Amrɔ nɛɛ, mɛi ni jɛ shɔŋŋshɔŋŋ enu Yesu he. Mɛi babaoo jɛ hei ni etse amɛhe banee po ba koni amɛbabo lɛ toi, ní amɛbakwɛ enaakpɛɛ nitsumɔi lɛ. Shi gbii komɛi asɛɛ lɛ, eku esɛɛ etee Kapernaum, he ni etsu enitsumɔ lɛ titri yɛ lɛ. Esɛɛkuu lɛ he sane gbɛ shwã oyayaayai yɛ maŋ nɛɛ ni bɛŋkɛ Galilea Ŋshɔ lɛ mli. Enɛ hewɔ lɛ, mɛi babaoo ba shĩa lɛ, he ni eyɔɔ lɛ. Amɛteŋ mɛi komɛi ji Farisifoi kɛ Mla lɛ tsɔɔlɔi ni jɛ Galilea kɛ Yudea niiaŋ fɛɛ, ní Yerusalem fata he.

‘Mɛi babaoo bua amɛhe naa, ni jɛmɛ tsĩ ni anaaa gbɛ yɛ shinaa lɛ naa po, ni eje shishi ewie wiemɔ lɛ etsɔɔ amɛ.’ (Marko 2:2) Agbɛnɛ, hegbɛ egbele ni akɛbaafee nɔ ko ni sa kadimɔ waa. Eji nifeemɔ ko ni baaye ebua wɔ ni wɔna akɛ, Yesu yɛ hewalɛ ní ekɛbaajie nibii ni kɛ adesai anaagbai baa lɛ kɛya, ní agbɛnɛ hu etsa mɛi fɛɛ ni esumɔɔ.

Be ni Yesu tsɔɔ nii yɛ tsũ ni mɛi eyi mli tɔ lɛ mli lɛ, hii ejwɛ komɛi hiɛ nuu ko ni ekumɔ ni kã saa nɔ kɛba. Amɛmiitao ni Yesu atsa amɛnaanyo lɛ. Kɛ̃lɛ, akɛni mɛi lɛ ayi fa hewɔ lɛ, amɛnyɛɛɛ “amɛkɛ lɛ aba Yesu ŋɔɔ tɛ̃ɛ.” (Marko 2:4) Kwɛ bɔ ni amɛnijiaŋ baaje wui ahã. Amɛkwɔ kɛtee tsũ lɛ yiteŋ, ni amɛjie ntayai ni akɛwo tsũ lɛ eko, ni gbɛ bakã tsũ lɛ yiteŋ. Kɛkɛ ni amɛshiu saa ni nuu ni ekumɔ lɛ kã nɔ lɛ kɛtsɔ jɛmɛ kɛyi shi.

Ani Yesu mli fu akɛ amɛfo ewiemɔ lɛ mli? Dabida! Ehiɛ sɔ hemɔkɛyeli ni amɛjie lɛ kpo lɛ waa, ni ekɛɛ nuu ni ekumɔ lɛ akɛ: “Aŋɔ ohe eshai lɛ afa bo.” (Mateo 9:2) Shi ani Yesu baanyɛ ekɛ eshai afa lɛɛlɛŋ? Woloŋmalɔi lɛ kɛ Farisifoi lɛ eyanáaa enɛ he miishɛɛ, ni amɛsusu yɛ amɛyiŋ akɛ: “Mɛni hewɔ mɔ nɛɛ wieɔ yɛ nɛkɛ gbɛ nɔ? Eebɔ musu. Namɔ baanyɛ ekɛ eshai afa akɛ ja Nyɔŋmɔ kome pɛ?”​—Marko 2:7.

Akɛni Yesu le nɔ ni yɔɔ amɛtsuiiaŋ hewɔ lɛ, ekɛɛ amɛ akɛ: “Mɛni hewɔ nyɛsusuɔ nibii nɛɛ yɛ nyɛtsuii amli lɛ? Te enɛɛmɛi amli nɔ ni waaa, ni aaakɛɛ mɔ ni ekumɔ lɛ akɛ, ‘Aŋɔ ohe eshai lɛ afa bo,’ aloo ni aaakɛɛ akɛ, ‘Tee shi ni owó osaa lɛ ni onyiɛ’?” (Marko 2:8, 9) Hɛɛ, afɔle ni Yesu baashã yɛ sɛɛ mli lɛ hewɔ lɛ, ebaanyɛ ekɛ nuu lɛ he eshai afa lɛ.

Kɛkɛ ni Yesu hã asafoku lɛ, ní mɛi ni wieɔ shiɔ lɛ lɛ hu fata he lɛ na akɛ, eyɛ hegbɛ akɛ eŋɔɔ eshai efaa yɛ shikpɔŋ lɛ nɔ. Etsɔ ehe ehã nuu ni ekumɔ lɛ, ni efã lɛ akɛ: “Miikɛɛ bo akɛ, Tee shi, wó osaa lɛ, ni oya oshĩa.” Amrɔ nɔŋŋ lɛ, nuu lɛ te shi, ewo esaa lɛ, ni enyiɛ kɛje kpo yɛ mɛi ni yɔɔ jɛmɛ lɛ fɛɛ ahiɛ. Mɛi lɛ anaa kpɛ amɛhe waa! Amɛwo Nyɔŋmɔ hiɛ nyam amɛkɛɛ: “Wɔnako nɔ ko ni tamɔ nɛkɛ pɛŋ”!​—Marko 2:11, 12.

Esa kadimɔ waa akɛ Yesu tsĩ esha tã be ni ewieɔ hela he lɛ, ni etsɔɔ akɛ tsakpaa yɛ eshaifaa kɛ gbɔmɔtsoŋ hewalɛnamɔ teŋ. Biblia lɛ tsɔɔ akɛ, wɔ-klɛŋklɛŋ fɔlɔ, Adam, fee esha, ni akɛ wɔ fɛɛ wɔná nɔ ni jɛ esha lɛ mli kɛba ni ji hela kɛ gbele lɛ akɛ gboshinii. Shi kɛ́ Nyɔŋmɔ Maŋtsɛyeli lɛ miiye nɔ lɛ, Yesu kɛ mɛi fɛɛ ni sumɔɔ Nyɔŋmɔ, ní jáa Nyɔŋmɔ lɛ ahe eshai baafa amɛ. Kɛkɛ lɛ, abaajie helai kwraa kɛya naanɔ.​—Romabii 5:12, 18, 19.