1, 2. Mɛɛ naakpɛɛ nii Petro kɛ Yohane fee yɛ sɔlemɔ shĩa lɛ geeti lɛ naa?

 SHWANE hulu lɛ miishã asafo babaoo ko. Yudafoi ni kɛ amɛjamɔ lɛ shwɛɛɛ kɛ Kristo kaselɔi lɛ miibote sɔlemɔ shĩa lɛ kpo lɛ nɔ. Etsɛŋ ni “sɔlemɔ ŋmɛlɛtswaa lɛ” baashɛ. a (Bɔf. 2:46; 3:1) Petro kɛ Yohane fata asafo babaoo lɛ he kɛmiitsɔ sɔlemɔ shĩa lɛ geeti ni atsɛɔ lɛ Fɛfɛo lɛ mli. Sanegbai ni yaa nɔ kɛ mɛi anajiashi gbɛɛmɔi ehã jɛmɛ efee hoo, shi nuu ko ni ji obubuafo kɛjɛ emami musuŋ tɔ̃ɔ lɛ miibolɔ waa kɛmiiba nii.​—Bɔf. 3:2; 4:22.

² Be ni nuu obubuafo lɛ na akɛ Petro kɛ Yohane ebɛŋkɛ lɛ lɛ, ebolɔ kɛba amɛ shika. Bɔfoi lɛ wa amɛdamɔ shi, ni nuu lɛ bɔi amɛ kwɛmɔ, ejaakɛ esusu akɛ amɛbaahã lɛ shika. Petro kɛɛ lɛ akɛ: “Jwiɛtɛi kɛ shika tsuru lɛ, mibɛ eko, shi nɔ ni miyɔɔ lɛ, no mikɛhãa bo nɛɛ. Yɛ Yesu Kristo, Nazaretnyo lɛ gbɛ́i mli lɛ, nyiɛmɔ!” Feemɔ bɔ ni asafo babaoo lɛ ahe jɔ̃ amɛhe be ni Petro mɔ nuu ni enyiɛko pɛŋ lɛ nine mli ni nuu lɛ huru edamɔ shi lɛ he mfoniri okwɛ! (Bɔf. 3:6, 7) Feemɔ nuu lɛ hu he mfoniri ni eekwɛ enaji, ni eebɔ mɔdɛŋ ni efamɔ enaji klɛŋklɛŋ kwraa! Ebɛ naakpɛɛ mɔ akɛ ebɔi tuumɔ, ni ewó egbee nɔ kɛjie Nyɔŋmɔ yi!

3. Mɛɛ nikeenii ni nɔ bɛ nuu ni atsa lɛ lɛ kɛ asafo babaoo lɛ baanyɛ aná?

³ Asafo ni naa ekpɛ amɛhe lɛ sha foi kɛtee Petro kɛ Yohane ŋɔɔ yɛ Solomon ablanaa lɛ nɔ. Yesu etsɔɔ mɛi nii yɛ jɛmɛ pɛŋ, shi amrɔ nɛɛ, Petro damɔ jɛmɛ eetsɔɔ amɛ nɔ hewɔ ni enyɛ efee naakpɛɛ nii nɛɛ. (Yoh. 10:23) Eehã asafo babaoo lɛ kɛ nuu ni atsa lɛ lɛ nikeenii ko ni fe shika kɛ jwiɛtɛi. Nikeenii nɛɛ fe tsamɔ ni ekolɛ abaatsa amɛ lɛ kwraa. No ji hegbɛ ni amɛná akɛ amɛtsake amɛtsui, koni agbe amɛhe eshai lɛ, ni amɛbatsɔmɔ Yesu Kristo, mɔ ni Yehowa ehala akɛ “wala Hiɛnyiɛlɔ-Nukpa lɛ” sɛɛnyiɛlɔi.​—Bɔf. 3:15.

4. (a) Mɛni naakpɛɛ nii ni kaselɔi lɛ fee lɛ baahã afee amɛ? (b) Mɛɛ sanebimɔi enyɔ wɔbaahã hetoo?

⁴ Mɛɛ gbi ni sa kadimɔ po nɛ! Atsa nuu obubuafo ko, ni amrɔ nɛɛ eenyiɛ. Petro hã mɛi akpei abɔ hu hegbɛ ni amɛbale nɔ ni Nyɔŋmɔ suɔmɔnaa  nii ji, koni amɛnyɛ amɛnyiɛ bɔ ni sa Nyɔŋmɔ hiɛ. (Kol. 1:9, 10) Kɛfata he lɛ, nibii ni tee nɔ nakai gbi lɛ baahã maŋ onukpai ate shi awo Kristo sɛɛnyiɛlɔi anɔkwafoi lɛ, ni amɛbaabɔ mɔdɛŋ akɛ amɛtsĩ amɛnaa koni amɛkashiɛ Maŋtsɛyeli sane lɛ, taakɛ Yesu fã amɛ lɛ. (Bɔf. 1:8) Maŋ onukpai lɛ na Petro kɛ Yohane akɛ “mɛi ni leee woloŋ kɛ mɛi foji kɛkɛ.” Shi mɛni wɔbaanyɛ wɔkase yɛ gbɛ ni amɛtsɔ nɔ amɛye asafo babaoo lɛ odase lɛ mli? b (Bɔf. 4:13) Ni mɛɛ gbɛ nɔ wɔbaanyɛ wɔfee ekãa tamɔ bɔ ni Petro, Yohane, kɛ kaselɔi krokomɛi lɛ fee be ni ate shi awo amɛ lɛ?

5. Mɛni wɔkaseɔ yɛ bɔ ni Petro kɛ asafo babaoo lɛ wie lɛ mli?

⁵ Petro kɛ Yohane kɛ asafo babaoo lɛ wie, eyɛ mli akɛ amɛle akɛ ekolɛ amɛteŋ mɛi komɛi fata mɛi ni bi ni agbe Yesu lɛ ahe. (Mar. 15:8-15; Bɔf. 3:13-15) Ekã shi faŋŋ akɛ, Petro fee ekãa waa be ni ewie akɛ etsa nuu obubuafo lɛ yɛ Yesu gbɛ́i mli lɛ. Petro shiuuu anɔkwale lɛ nɔ. Efee lɛ faŋŋ ehã asafo babaoo lɛ akɛ amɛfata he ni agbe Kristo. Emli fuuu amɛ, ejaakɛ ele akɛ ‘lé ni amɛleee hewɔ ni amɛfee’ nakai lɛ. (Bɔf. 3:17) Ekɛ amɛ wie akɛ enyɛmimɛi, ni ewie nibii kpakpai ni Maŋtsɛyeli lɛ baafee lɛ ahe. Kɛ́ amɛtsake amɛtsui ni amɛhe Kristo nɔ amɛye lɛ, Yehowa baahã amɛ “hejɔlɛ daa.” (Bɔf. 3:19) Esa akɛ wɔ hu kɛ́ wɔmiijaje Nyɔŋmɔ kojomɔ ni baa lɛ, wɔfee ekãa ni wɔkashiu nɔ ko nɔ. Nakai beiaŋ nɔŋŋ lɛ, esaaa akɛ wɔwieɔ kpookpoo ni wɔdɔɔɔ wɔlilɛi mli loo wɔkojoɔ mɛi. Moŋ lɛ, esa akɛ wɔna mɛi ni wɔshiɛɔ wɔhãa lɛ akɛ amɛbaanyɛ amɛbatsɔmɔ wɔnyɛmimɛi, ni wɔwie nibii kpakpai ni Maŋtsɛyeli lɛ baafee lɛ ahe titri, taakɛ Petro fee lɛ.

6. Mɛɛ gbɛ nɔ Petro kɛ Yohane tsɔɔ akɛ amɛbaa amɛhe shi?

⁶ Bɔfoi lɛ baa amɛhe shi. Amɛkɛɛɛ akɛ amɛ diɛŋtsɛ amɛhewalɛ naa amɛfee naakpɛɛ nii lɛ. Petro kɛɛ amɛ akɛ: “Mɛni hewɔ nyɛkwɛɔ wɔ tamɔ nɔ ni wɔ diɛŋtsɛ wɔhewalɛ naa loo wɔ-Nyɔŋmɔjamɔ naa wɔkɛhã nuu nɛɛ nyiɛɔ nɛɛ?” (Bɔf. 3:12) Petro kɛ bɔfoi krokomɛi lɛ le akɛ, nɔ kpakpa fɛɛ nɔ kpakpa ni amɛfeɔ yɛ shiɛmɔ nitsumɔ lɛ mli lɛ, Nyɔŋmɔ hewalɛ lɛ ni hãa amɛfeɔ, jeee amɛ diɛŋtsɛ amɛhewalɛ. Enɛ hewɔ lɛ, amɛjɛ heshibaa mli amɛkɛ nibii ni amɛfee lɛ ahe yijiemɔ lɛ fɛɛ hã Yehowa kɛ Yesu.

7, 8. (a) Mɛɛ nikeenii wɔbaanyɛ wɔhã mɛi? (b) Mɛɛ gbɛ nɔ shi ni awo akɛ “abaasaa nibii fɛɛ” lɛ baa mli ŋmɛnɛ?

⁷ Esa akɛ wɔ hu wɔjie heshibaa ni tamɔ nakai nɔŋŋ kpo yɛ Maŋtsɛyeli shiɛmɔ nitsumɔ lɛ mli. Ŋmɛnɛ lɛ, eji anɔkwale akɛ Nyɔŋmɔ mumɔ lɛ hãaa Kristofoi hewalɛ ni amɛkɛtsa mɛi yɛ naakpɛɛ gbɛ nɔ. Shi wɔbaanyɛ wɔwa mɛi koni amɛná hemɔkɛyeli yɛ Nyɔŋmɔ kɛ Kristo mli, ni amɛná nikeenii ni Petro kɛhã lɛ nɔŋŋ eko, no ji amɛhe eshai ni akɛbaake amɛ, kɛ  hejɔlɛ ni Yehowa baahã amɛná daa lɛ. Daa afi lɛ, mɛi akpei ohai abɔ mɔɔ hegbɛ nɛɛ mli ni amɛbatsɔmɔɔ Kristo kaselɔi ni abaptisi amɛ.

⁸ Wɔle akɛ wɔyɛ be ni Petro tsɛ lɛ akɛ “bei ni abaasaa nibii fɛɛ” lɛ mli. Ato Nyɔŋmɔ Maŋtsɛyeli lɛ shishi yɛ ŋwɛi yɛ afi 1914 mli, ni no hã nɔ ni “Nyɔŋmɔ wie he yɛ egbalɔi krɔŋkrɔŋi ni hi shi yɛ blema lɛ anaa” lɛ ba mli. (Bɔf. 3:21; Lala 110:1-3; Dan. 4:16, 17) No sɛɛ etsɛɛɛ lɛ, Kristo wa ekaselɔi lɛ ni amɛto anɔkwa jamɔ shishi ekoŋŋ yɛ shikpɔŋ lɛ nɔ. Enɛ ehã mɛi akpekpei abɔ ebatsɔmɔ Nyɔŋmɔ Maŋtsɛyeli lɛ shishi bii, ni amrɔ nɛɛ, amɛfee ekome kɛmiijá Yehowa yɛ toiŋjɔlɛ mli. Amɛshɛ gbɔmɔ momo ni efite lɛ amɛfɔ̃, ni amɛwo “gbɔmɔ hee ni abɔ yɛ Nyɔŋmɔ suɔmɔ naa” lɛ. (Efe. 4:22-24) Nyɔŋmɔ mumɔ lɛ ni tsa nuu obubuafo ni baa nii lɛ, ni no nɔŋŋ waa mɛi ni amɛtsakeɔ ni amɛbajáa Nyɔŋmɔ lɛ, shi jeee adesai ahewalɛ naa. Esa akɛ wɔfee ekãa ni wɔkɛ Nyɔŋmɔ Wiemɔ lɛ atsu nii jogbaŋŋ kɛtsɔɔ mɛi nii tamɔ Petro fee lɛ. Nyɔŋmɔ hewalɛ naa wɔnyɛɔ wɔyeɔ wɔbuaa mɛi ni amɛbatsɔmɔɔ Kristo kaselɔi lɛ, shi jeee wɔ diɛŋtsɛ wɔhewalɛ naa.

9-11. (a) Te Yudafoi maŋ onukpai lɛ fee amɛnii amɛhã tɛŋŋ yɛ sane ni Petro kɛ Yohane shiɛ lɛ he? (b) Mɛni bɔfoi lɛ kpɛ amɛyiŋ akɛ amɛbaafee?

⁹ Wiemɔ ni Petro hã lɛ, kɛ nuu obubuafo ni atsa lɛ lɛ tuumɔ kɛ ebolɔmɔ lɛ hã jɛmɛ fee hoo. No hewɔ lɛ, sɔlemɔ shĩa lɛ nɔkwɛlɔ lɛ, ni ji mɔ ni ahala koni ekwɛ ni sɔlemɔ shĩa lɛ afee shweshweeshwe lɛ, kɛ osɔfoi hiɛnaanɔbii lɛ sha foi kɛtee jɛmɛ koni amɛyakwɛ nɔ ni yaa nɔ. Ekã shi faŋŋ akɛ, amɛji Sadukifoi, ni ji kuu ko ni emli bii lɛ yɔɔ nii kɛ gbɛnaa yɛ maŋ lɛ mli, ni amɛbɔ mɔdɛŋ waa ni amɛhã toiŋjɔlɛ ahi maŋ bii lɛ kɛ Romabii lɛ ateŋ, amɛkpoo blematsɛmɛi lɛ amlai ni Farisifoi lɛ sumɔɔ waa lɛ, ni amɛheee gbohiiashitee lɛ amɛyeee. c Be ni amɛyana Petro kɛ Yohane yɛ sɔlemɔ shĩa lɛ ni amɛkɛ ekãa miishiɛ akɛ atee Yesu shi lɛ, amɛmli fu waa!

¹⁰ Shiteekɛwolɔi ni mli efu waa nɛɛ yawo Petro kɛ Yohane tsuŋ, ni enɔ jetsɛremɔ lɛ amɛkɛ amɛ tee Yudafoi lɛ akɔɔtu wulu lɛ. Maŋ onukpai nɛɛ bu Petro kɛ Yohane akɛ “mɛi ni leee woloŋ kɛ mɛi foji kɛkɛ,” ni no hewɔ lɛ, amɛbɛ hegbɛ ni amɛtsɔɔ nii yɛ sɔlemɔ shĩa lɛ. Amɛyako jamɔ he skul ko ni abuɔ waa. Shi, be ni maŋ onukpai lɛ na ekãa kɛ nɔmimaa ni Petro kɛ Yohane kɛwieɔ lɛ, amɛhiɛ fee amɛ yaa. Mɛni hã amɛnyɛ amɛtsɔɔ nii jogbaŋŋ lɛ? Yiŋtoo kome ji akɛ, “amɛkɛ Yesu hi shi.” (Bɔf. 4:13) Amɛ-Nuŋtsɔ lɛ tsɔɔ nii akɛ mɔ ko ni yɔɔ hegbɛ lɛɛlɛŋ, shi jeee tamɔ woloŋmalɔi lɛ.​—Mat. 7:28, 29.

¹¹ Kojolɔi lɛ fã bɔfoi lɛ ni amɛkashiɛ dɔŋŋ. Yɛ Yudafoi lɛ ateŋ lɛ, nɔ ni kojolɔi nɛɛ baawie lɛ no akɛtsuɔ nii. Yɛ otsii fioo ni tsɔ hiɛ lɛ amli lɛ, nakai  kojolɔi lɛ nɔŋŋ bu Yesu fɔ akɛ “esa gbele.” (Mat. 26:59-66) Shi no hãaa Petro kɛ Yohane ashe gbeyei. Petro kɛ Yohane damɔ hii niiatsɛmɛi, ni le woloŋ, ni yɔɔ hegbɛ nɛɛ ahiɛ ni amɛfee ekãa ni amɛjɛ bulɛ mli amɛwie akɛ: “Kɛ́ eja yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛ diɛŋtsɛ nyɛkojoa. Shi wɔ lɛ, wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.”​—Bɔf. 4:19, 20.

12. Mɛni baanyɛ awa wɔ koni wɔyiŋ atsɔ kwraa ni wɔfee ekãa?

¹² Ani onyɛɔ ofeɔ ekãa tamɔ amɛ? Kɛ́ oná hegbɛ akɛ oye niiatsɛmɛi, mɛi ni le woloŋ, loo mɛi ni yɔɔ hegbɛ ni yɔɔ he ni oyɔɔ lɛ odase lɛ, te onuɔ he ohãa tɛŋŋ? Ni kɛ́ owekumɛi, oskulbii, loo mɛi ni okɛtsuɔ nii lɛ ye ohe fɛo yɛ ohemɔkɛyeli lɛ hewɔ hu? Ani osheɔ gbeyei? Kɛ́ nakai ni lɛ, obaanyɛ oye ogbeyeishemɔ lɛ nɔ. Be ni Yesu yɔɔ shikpɔŋ lɛ nɔ lɛ, etsɔɔ bɔfoi lɛ bɔ ni amɛaafee amɛkɛ ekãa kɛ bulɛ afã amɛhemɔkɛyeli lɛ he. (Mat. 10:11-18) Be ni atee lɛ shi lɛ, ewo ekaselɔi lɛ shi akɛ ebaaya nɔ ekɛ amɛ ahi shi “gbii lɛ fɛɛ kɛyashi je lɛ naagbee gbii lɛ amli.” (Mat. 28:20) Yesu tsɔɔ “nyɔŋ anɔkwafo kɛ hiɛshikalɔ lɛ” nɔ etsɔɔ wɔ bɔ ni wɔɔfee wɔfã wɔhemɔkɛyeli lɛ he. (Mat. 24:45-47; 1 Pet. 3:15) Atsɔɔ wɔ enɛ yɛ asafoŋ kpeei ashishi, tamɔ Wɔshiɛmɔ Kɛ Wɔshihilɛ Akɛ Kristofoi kpee lɛ nɛkɛ, kɛ agbɛnɛ hu, kɛtsɔ woji, vidioi kɛ nibii krokomɛi ni asafo lɛ feɔ lɛ anɔ, tamɔ “Sanebimɔi Ni Biblia Lɛ Ehã Hetoo” ni yɔɔ jw.org wɛbsaiti lɛ nɔ lɛ nɛkɛ. Ani oyaa asafoŋ kpeei nɛɛ ni okɛ nibii ni asafo lɛ feɔ lɛ tsuɔ nii? Kɛ́ ofeɔ nakai lɛ, oyiŋ baatsɔ kwraa yɛ Biblia mli anɔkwalei lɛ ahe ni obaafee ekãa waa. Ni taakɛ bɔfoi lɛ fee lɛ, bo hu obaawie Biblia mli anɔkwalei ni nɔ bɛ ni okase lɛ ahe otsɔɔ mɛi, ni ohãŋ nɔ ko kwraa atsĩ onaa.

13, 14. Kɛ́ wɔkɛ shiteekɛwoo kpe lɛ mɛni esa akɛ wɔfee? Ni mɛni hewɔ?

¹³ Be ni aŋmɛɛ Petro kɛ Yohane he lɛ, amrɔ nɔŋŋ ni amɛtee amɛkɛ asafo lɛ yakpe. Amɛkɛ asafo lɛ “hole amɛgbei anɔ amɛhã Nyɔŋmɔ” ni amɛsɔle amɛbi koni ehã amɛya nɔ amɛshiɛ kɛ ekãa. (Bɔf. 4:24) Petro le jogbaŋŋ akɛ, kɛ́ mɔ ko miibɔ mɔdɛŋ ni efee Nyɔŋmɔ suɔmɔnaa nii lɛ, esaaa akɛ ekɛ ehe fɔ̃ɔ lɛ diɛŋtsɛ ehewalɛ nɔ. Otsii fioo ni tsɔ hiɛ lɛ, eyahe ehe  eye fe nine ni ekɛɛ Yesu akɛ: “Kɛ́ nɔ ni baaba onɔ lɛ baahã mɛi krokomɛi lɛ fɛɛ nane atɔ̃tɔ po lɛ, mi lɛ, minane etɔ̃tɔŋ kɔkɔɔkɔ!” Ni kɛ̃lɛ, taakɛ Yesu gba lɛ, etsɛɛɛ ni Petro yashe gbɔmɔ gbeyei, ni no hã ekwa enaanyo kɛ tsɔɔlɔ lɛ. Shi Petro kase nii kɛjɛ nɔ ni ba lɛ mli.​—Mat. 26:33, 34, 69-75.

¹⁴ Jeee ofai shi ni obaatswa lɛ pɛ kɛkɛ baawa bo ni oya nɔ otsu nitsumɔ ni akɛwo odɛŋ akɛ oye Kristo he odase lɛ. Kɛ́ shiteekɛwolɔi bɔ mɔdɛŋ akɛ amɛbaahã okpa Yehowa jamɔ loo amɛbaahã okpa shiɛmɔ lɛ, kasemɔ Petro kɛ Yohane. Sɔlemɔ obi Yehowa ni ewaje bo. Bi nyɛmimɛi lɛ ni amɛye amɛbua bo. Hã asafoŋ onukpai lɛ kɛ mɛi krokomɛi ni bɔɔ mɔdɛŋ yɛ asafo lɛ mli lɛ ale naagbai ni okɛkpeɔ lɛ. Kɛ́ mɛi krokomɛi sɔle amɛhã bo lɛ, ebaanyɛ ewaje bo waa.​—Efe. 6:18; Yak. 5:16.

15. Kɛ́ be ko ni eho lɛ okpa shiɛmɔyaa lɛ, mɛɛ nɔkwɛmɔnɔ baanyɛ awo bo hewalɛ?

¹⁵ Kɛ́ be ko ni eho lɛ mɛi komɛi nyɛ onɔ aahu ni no hã okpa shiɛmɔyaa lɛ, onijiaŋ akaje wui. Kaimɔ akɛ, be ni Yesu gbo lɛ, bɔfoi lɛ fɛɛ kpa shiɛmɔyaa be kukuoo, shi etsɛɛɛ ni amɛkɛ ekãa bɔi shiɛmɔ ekoŋŋ. (Mat. 26:56; 28:10, 16-20) Kaahã tɔmɔi ni otɔ̃ be ko ni eho lɛ je onijiaŋ wui, moŋ lɛ, okɛ nɔ ni okase yɛ mli lɛ awo mɛi krokomɛi hewalɛ.

16, 17. Mɛni wɔkaseɔ yɛ sɔlemɔ ni Kristo sɛɛnyiɛlɔi lɛ sɔle lɛ mli?

¹⁶ Kɛ́ maŋ onukpai wa wɔ yi lɛ, mɛni esa akɛ wɔsɔle wɔbi? Ofainɛ kadimɔ akɛ, kaselɔi lɛ biii ni Yehowa abu amɛhe koni akawa amɛ yi. Amɛle Yesu wiemɔi nɛɛ jogbaŋŋ. Ekɛɛ: “Kɛ́ amɛwa mi yi lɛ, amɛbaawa nyɛ hu nyɛ yi.” (Yoh. 15:20) No hewɔ lɛ, kaselɔi anɔkwafoi nɛɛ bi Yehowa ni ‘ekwɛ’ amɛhe gbeyei ni shiteekɛwolɔi lɛ woɔ lɛ. (Bɔf. 4:29) Kaselɔi lɛ le akɛ Nyɔŋmɔ suɔmɔnaa nii ji nɔ ni he hiaa fe fɛɛ. Amɛle akɛ yi ni awaa amɛ lɛ miihã gbalɛ miiba mli. Amɛle hu akɛ ekɔɔɔ he eko nɔ ni adesai nɔyelɔi baawie lɛ, abaafee Nyɔŋmɔ suɔmɔnaa nii “yɛ shikpɔŋ lɛ nɔ” taakɛ Yesu tsɔɔ amɛ ni amɛsɔle lɛ.​—Mat. 6:9, 10.

¹⁷ Bɔ ni afee ni kaselɔi lɛ anyɛ afee Nyɔŋmɔ suɔmɔnaa nii lɛ, amɛsɔle amɛhã Yehowa akɛ: ‘Hã onyɔji lɛ aya nɔ awie owiemɔ lɛ kɛ ekãa babaoo.’ Mɛni Yehowa fee amrɔ nɔŋŋ? “He ni amɛbua amɛhe naa yɛ lɛ hoso, ni mumɔ krɔŋkrɔŋ lɛ yimɔ amɛ fɛɛ obɔbɔ ni  amɛwie Nyɔŋmɔ wiemɔ lɛ kɛ ekãa.” (Bɔf. 4:29-31) Nɔ ko nɔ ko nyɛŋ atsĩ Nyɔŋmɔ naa koni ekatsu eyiŋtoo he nii. (Yes. 55:11) Ekolɛ ebaafee tamɔ nɔ ni Nyɔŋmɔ yiŋtoo lɛ nyɛŋ aba mli, ni mɛi ni nyɛɔ wɔ lɛ ahe wa waa, shi kɛ́ wɔbi Nyɔŋmɔ ni ehã wɔná ekãa lɛ, ebaahã wɔ hewalɛ ni sa lɛ koni wɔnyɛ wɔya nɔ wɔshiɛ kɛ ekãa.

18. Mɛni asafo ni yɔɔ Yerusalem lɛ mli bii lɛ fee amɛhã amɛhe?

¹⁸ Etsɛɛɛ ni asafo ni ato shishi yɛ Yerusalem lɛ mli bii lɛ ayi bafa fe 5,000. d Eyɛ mli akɛ kaselɔi lɛ jɛ shihilɛi srɔtoi amli moŋ, shi amɛ fɛɛ amɛhiɛ “tsui kome kɛ susuma kome.” Amɛjwɛŋmɔ kɛ amɛsusumɔ fee ekome. (Bɔf. 4:32; 1 Kor. 1:10) Kaselɔi lɛ sɔle ni Yehowa ajɔɔ amɛmɔdɛŋbɔi lɛ anɔ, shi jeee no pɛ amɛfee. Amɛwowoo amɛhe hewalɛ, ni kɛ́ ehe bahia lɛ, amɛyeɔ amɛbuaa amɛhe kɛ heloonaa nibii. (1 Yoh. 3:16-18) Akɛ nɔkwɛmɔnɔ lɛ, kaselɔ Yosef ni bɔfoi lɛ wo lɛ Barnaba lɛ hɔ̃ɔ eshikpɔŋ, ni ekɛ shika lɛ fɛɛ hã bɔfoi lɛ. Amɛkɛye amɛbua mɛi ni jɛ hei ni jekɛ lɛ koni amɛya nɔ amɛhi Yerusalem be kplaŋŋ ni amɛkase amɛhemɔkɛyeli hee lɛ he nii babaoo.

19. Mɛni hewɔ Yehowa gbe Anania kɛ Safira lɛ?

¹⁹ Nuu ko ni atsɛɔ lɛ Anania kɛ eŋa Safira lɛ hu hɔ̃ɔ amɛshikpɔŋ, ni amɛkɛ shika lɛ bahã bɔfoi lɛ. Amɛkwa amɛfee tamɔ nɔ ni amɛkɛ shika lɛ fɛɛ ebahã; shi amɛkɛ “eko to sɛɛ.” (Bɔf. 5:2) Yehowa tswa amɛ nɔ ni amɛgboi, jeee akɛni shika ni amɛkɛbahã lɛ faaa hewɔ, shi moŋ, akɛni amɛhiɛ jwɛŋmɔ gbonyo ni amɛmale hu lɛ hewɔ. Biblia lɛ kɛɛ: ‘Jeee gbɔmɛi amɛmale amɛtsɔɔ lɛ, shi Nyɔŋmɔ moŋ ni.’ (Bɔf. 5:4) Anania kɛ Safira yatao gbɔmɛi ahiɛ nyam, moŋ fe ni amɛbaasa Nyɔŋmɔ hiɛ; amɛtamɔ mɛi ni Yesu wie eshi amɛ akɛ amɛji osatofoi lɛ.​—Mat. 6:1-3.

20. Mɛni wɔkase yɛ wɔbe kɛ wɔnii ni wɔkɛaasɔmɔ Yehowa lɛ he?

²⁰ Kaselɔi anɔkwafoi ni hi Yerusalem yɛ bɔfoi lɛ abeiaŋ lɛ fee ejurɔ waa. Ŋmɛnɛ lɛ, Yehowa Odasefoi akpekpei abɔ hu feɔ ejurɔ ni amɛjɛɔ amɛsuɔmɔ mli amɛtsuɔ onia kɛfiɔ jeŋ muu fɛɛ shiɛmɔ nitsumɔ lɛ sɛɛ. Anyɛɛɛ mɔ ko nɔ ni ekɛ ebe loo eshika afĩ nitsumɔ nɛɛ sɛɛ. Yɛ anɔkwale mli lɛ, Yehowa sumɔɔɔ ni wɔsɔmɔɔ lɛ kɛ mligbigbilimɔ loo yɛ nɔnyɛɛ naa. (2 Kor. 9:7) Esa akɛ wɔkai akɛ, jeee shika abɔ ni wɔkɛhãa lɛ ji nɔ ni he hiaa Yehowa, shi moŋ yiŋtoo hewɔ ni wɔkɛhãa lɛ. (Mar. 12:41-44) Wɔsumɔŋ ni wɔfee wɔnii tamɔ Anania kɛ Safira. Wɔsumɔŋ ni wɔsɔmɔ Nyɔŋmɔ koni mɛi ajie wɔyi loo ni wɔ wɔná he sɛɛ. Moŋ lɛ, wɔmiisumɔ ni wɔkase Petro, Yohane, kɛ Barnaba, ni wɔhã suɔmɔ krɔŋŋ ni wɔyɔɔ kɛhã Nyɔŋmɔ kɛ wɔnyɛmi gbɔmɔ lɛ atsirɛ wɔ ni wɔsɔmɔ Yehowa be fɛɛ be.​—Mat. 22:37-40.