NIKASEMƆ 25
Mɛɛ Shihilɛ Nyɔŋmɔ Sumɔɔ Ni Wɔná?
Biblia lɛ tsɔɔ akɛ, adesa ni yɔɔ nɛɛ “be kukuoo kɛkɛ ehiɔ shi,” ni eshihilɛ mli “eyi tɔ kɛ haomɔi sɔŋŋ.” (Hiob 14:1) Ani nɛkɛ ji bɔ ni Nyɔŋmɔ sumɔɔ ni wɔshihilɛ afee? Kɛ́ jeee nakai lɛ, mɛɛ shihilɛ esumɔɔ ni wɔná? Ani ebaaba mli? Naa hetoi ni hãa mɔ tsui nyɔɔ emli ni Biblia lɛ kɛhãa.
1. Mɛɛ shihilɛ nɛkɛ Yehowa sumɔɔ ni wɔná?
Yehowa sumɔɔ ni wɔná shihilɛ ni hi jogbaŋŋ diɛŋtsɛ. Ekɛ klɛŋklɛŋ gbɔmɛi ni ebɔ, ni ji Adam kɛ Hawa lɛ, wo Eden abɔɔ lɛ, ni ji paradeiso fɛfɛo ko lɛ mli. Kɛkɛ ni “Nyɔŋmɔ jɔɔ amɛ, ni Nyɔŋmɔ kɛɛ amɛ akɛ: ‘Nyɛfɔa ní nyɛyi afaa, ni nyɛyia shikpɔŋ lɛ nɔ obɔ ni nyɛkwɛa nɔ.’” (1 Mose 1:28) No mli lɛ, Yehowa sumɔɔ ni amɛfɔ, amɛhã shikpɔŋ muu lɛ fɛɛ atsɔ paradeiso, ni agbɛnɛ hu, amɛkwɛ kooloi lɛ anɔ. Esumɔɔ ni adesai fɛɛ aná gbɔmɔtsoŋ hewalɛ kpakpa, ni amɛhi shi kɛya naanɔ hu.
Eyɛ mli akɛ ŋmɛnɛ lɛ wɔshihilɛ tamɔɔɔ nakai moŋ, a shi loloolo lɛ Nyɔŋmɔ sumɔɔ ni wɔná nakai shihilɛ. (Yesaia 46:10, 11) Eesumɔ ni adesai ni boɔ lɛ toi lɛ ahi shi kɛya naanɔ, yɛ shihilɛ ni hi jogbaŋŋ diɛŋtsɛ mli.—Kanemɔ Kpojiemɔ 21:3, 4.
2. Te wɔɔfee tɛŋŋ wɔná miishɛɛ bianɛ lɛ?
Bɔ ni Yehowa bɔ wɔ ehã lɛ hewɔ lɛ, wɔnuɔ he akɛ ‘ehe miihia wɔ,’ ni tsɔɔ akɛ, wɔsumɔɔ ni wɔle lɛ ni wɔjá lɛ. (Kanemɔ Mateo 5:3-6.) Esumɔɔ ni wɔkɛ lɛ abɔ naanyo kpaakpa, ‘wɔnyiɛ egbɛi lɛ fɛɛ anɔ, ni wɔsumɔ lɛ,’ ni wɔsɔmɔ lɛ ‘kɛ wɔtsui fɛɛ.’ (5 Mose 10:12; Lala 25:14) Kɛ́ wɔfee nakai lɛ, wɔbaaná miishɛɛ, eyɛ mli akɛ wɔyɛ naagbai po. Kɛ́ wɔjá Yehowa lɛ, wɔbaaná miishɛɛ, ejaakɛ wɔbaanu he akɛ wɔmiihi shi tamɔ bɔ ni esumɔɔ ni wɔhi shi lɛ.
KASEMƆ PII OFATA HE
Obaana bɔ ni Yehowa jɛ suɔmɔ kpele mli esaa shikpɔŋ lɛ nɔ ehã wɔ, kɛ nɔ ni e-Wiemɔ lɛ tsɔɔ wɔ yɛ shihilɛ ni esumɔɔ ni wɔná lɛ he.
3. Yehowa sumɔɔ ni adesai aná shihilɛ ni hi jogbaŋŋ diɛŋtsɛ
Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛni hewɔ Nyɔŋmɔ bɔ wɔshikpɔŋ fɛfɛo lɛ?
Nyɛkanea Jajelɔ 3:11 lɛ, ni nyɛsusua sanebimɔ nɛɛ he:
-
Mɛni ŋmalɛ nɛɛ tsɔɔ bo yɛ shihilɛ ni Yehowa sumɔɔ ni wɔná lɛ he?
4. Yehowa tsakeko ejwɛŋmɔ yɛ shihilɛ ni esumɔɔ ni wɔná lɛ he
Nyɛkanea Lala 37:11, 29 kɛ Yesaia 55:11 lɛ, ni nyɛsusua sanebimɔ nɛɛ he:
-
Mɛni yɔɔ ŋmalɛi nɛɛ amli ni hãa wɔleɔ akɛ Yehowa tsakeko ejwɛŋmɔ yɛ shihilɛ ni esumɔɔ ni wɔná lɛ he?
Kɛji akwɛɛɛ shĩa ko nɔ jogbaŋŋ ni efite lɛ, abaanyɛ asaa. Nakai nɔŋŋ adesai kwɛɛɛ shikpɔŋ lɛ nɔ jogbaŋŋ, hewɔ lɛ, Nyɔŋmɔ baasaa nɔ fɛfɛo ehã mɛi ni sumɔɔ lɛ lɛ
5. Kɛ́ wɔjá Yehowa lɛ, wɔbaaná miishɛɛ
Kɛ́ wɔná wɔle shihilɛ ni Nyɔŋmɔ sumɔɔ ni wɔná lɛ, no baanyɛ ahã wɔná miishɛɛ. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Be ni Terumi na bɔ ni esa akɛ ehi shi ehã lɛ, te ená he sɛɛ ehã tɛŋŋ?
Nyɛkanea Jajelɔ 12:13 lɛ, ni nyɛsusua sanebimɔ nɛɛ he:
-
Akɛni Yehowa efee nibii pii ehã wɔ hewɔ lɛ, mɛni kɛ mɛni esa akɛ wɔfee kɛda lɛ shi?
EKOLƐ MƆ KO BAABI BO AKƐ: “Mɛni baahã mɔ ko aná miishɛɛ, ni etsui anyɔ emli?”
-
Mɛni obaakɛɛ lɛ?
EMLI OTI
Yehowa sumɔɔ ni wɔhi shi kɛya naanɔ, yɛ shihilɛ ni hi jogbaŋŋ diɛŋtsɛ mli yɛ shikpɔŋ nɛɛ nɔ. Kɛ́ wɔjá lɛ kɛ wɔtsui fɛɛ lɛ, wɔbaaná miishɛɛ bianɛ po.
Mɛni Okase?
-
Mɛɛ shihilɛ kulɛ Yehowa sumɔɔ ni Adam kɛ Hawa aná?
-
Mɛni hãa wɔleɔ akɛ Nyɔŋmɔ tsakeko ejwɛŋmɔ yɛ shihilɛ ni esumɔɔ ni wɔná lɛ he?
-
Mɛni baahã oná miishɛɛ yɛ shihilɛ mli?
EHE SAJI KROKOMƐI
Obaana nɔ hewɔ ni wɔbaanyɛ wɔhe wɔye akɛ, no mli lɛ, ayɛ he ko ni atsɛɔ lɛ Eden abɔɔ.
“Ani No Mli Lɛ Abɔɔ Ko Yɛ Eden Lɛɛlɛŋ?” (Buu-Mɔɔ, January 1, 2011)
Obaana nɔ hewɔ ni wɔbaanyɛ wɔhe wɔye akɛ, shikpɔŋ lɛ baahi shi kɛya naanɔ lɛ.
Obaana nɔ ni Biblia lɛ kɛɔ yɛ shihilɛ kpakpa ni Nyɔŋmɔ sumɔɔ ni oná lɛ he.
Obaana bɔ ni nuu ko ni susu akɛ eyɛ nɔ fɛɛ nɔ lɛ na nɔ ni eshwɛ lɛ yɛ eshihilɛ mli lɛ.
a Yɛ nikasemɔ ni nyiɛ sɛɛ lɛ mli lɛ, obaana nɔ hewɔ ni ŋmɛnɛ lɛ wɔshihilɛ tamɔɔɔ nakai lɛ.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
