NIKASEMƆ 09
Tsɔ Sɔlemɔ Nɔ Otsi Obɛŋkɛ Nyɔŋmɔ
Ani onuɔ he akɛ esa akɛ mɔ ko atsɔɔ bo gbɛ yɛ shihilɛ mli? Ani oyɛ sanebimɔi komɛi ni osusuɔ he waa ni ootao hetoo? Ani miishɛjemɔ loo hewalɛwoo he miihia bo? Ani oosumɔ ni otsi obɛŋkɛ Yehowa waa? Sɔlemɔ baanyɛ ahã oná nibii nɛɛ fɛɛ. Shi mɛɛ gbɛ nɔ esa akɛ otsɔ osɔle? Ani Nyɔŋmɔ boɔ mɔ fɛɛ mɔ sɔlemɔ toi? Mɛni esa akɛ ofee koni ebo osɔlemɔi toi? Hã wɔkwɛ.
1. Namɔ esa akɛ wɔsɔle wɔhã, ni mɛni wɔbaanyɛ wɔsɔle yɛ he?
Yesu kɛɛ wɔsɔle wɔhã wɔ-Tsɛ ni yɔɔ ŋwɛi lɛ pɛ. Yesu diɛŋtsɛ hu sɔle ehã Yehowa. Ekɛɛ: “No hewɔ lɛ, nyɛsɔlea yɛ nɛkɛ gbɛ nɔ: ‘Wɔ-Tsɛ ni yɔɔ ŋwɛi . . . ’” (Mateo 6:9) Kɛ́ wɔsɔle wɔhã Yehowa lɛ, naanyobɔɔ ni yɔɔ wɔ kɛ lɛ teŋ lɛ mli waa.
Wɔbaanyɛ wɔsɔle yɛ nɔ fɛɛ nɔ he. Shi, ja wɔsɔlemɔ lɛ kɛ nɔ ni Nyɔŋmɔ sumɔɔ kpãa gbee, dani ebaahã hetoo. Biblia lɛ kɛɛ: “Nɔ fɛɛ nɔ ni wɔbiɔ ni kɛ [Nyɔŋmɔ suɔmɔnaa nii] kpãa gbee lɛ, eboɔ wɔ toi.” (1 Yohane 5:14) Yesu tsɔɔ nibii komɛi ni wɔbaanyɛ wɔsɔle yɛ he. (Kanemɔ Mateo 6:9-13.) Wɔbaanyɛ wɔbi nibii ni he hiaa wɔ, shi esa akɛ wɔda Nyɔŋmɔ shi yɛ nibii ni efeɔ ehãa wɔ lɛ hewɔ, ni wɔbi lɛ ni ewa mɛi krokomɛi hu.
2. Te esa akɛ wɔsɔle wɔhã tɛŋŋ?
Biblia lɛ kɛɛ ‘wɔfɔse wɔtsuiiaŋ wɔshwie Nyɔŋmɔ hiɛ.’ (Lala 62:8) Hewɔ lɛ, esa akɛ wɔsɔlemɔi lɛ ajɛ wɔtsuiŋ tɔ̃ɔ. Wɔbaanyɛ wɔsɔle ni anu loo wɔsɔle yɛ wɔyitsoŋ be ni wɔta shi, wɔkã shi, wɔdamɔ shi, loo wɔkulã shi—nɔ ni he hiaa ji, ni wɔfee nakai yɛ bulɛ mli. Wɔbaanyɛ wɔsɔle be fɛɛ be yɛ he fɛɛ he.
3. Mɛɛ gbɛ nɔ Nyɔŋmɔ hãa wɔsɔlemɔi hetoo?
Efeɔ nakai yɛ gbɛi srɔtoi anɔ. Yehowa kɛ e-Wiemɔ lɛ, ni ji Biblia lɛ, ehã wɔ, ni saji ni wɔbiɔ lɛ pii ahetoo yɛ mli. “Mɔ ni jwɛŋmɔ esako lɛ hiɛ kãa shi” kɛ́ ekane Nyɔŋmɔ Wiemɔ lɛ. (Lala 19:7; kanemɔ Yakobo 1:5.) Kɛ́ wɔkɛ naagbai kpe lɛ, Nyɔŋmɔ baanyɛ ehã wɔná toiŋjɔlɛ. Ni ebaanyɛ ehã mɛi ni jáa lɛ lɛ abawa wɔ yɛ be ni sa mli.
KASEMƆ PII OFATA HE
Obaana bɔ ni obaafee ojɛ otsuiŋ osɔle ni esa Nyɔŋmɔ hiɛ, kɛ sɛɛnamɔi ni yɔɔ sɔlemɔ he hu.
4. Nɔ ni hãa Nyɔŋmɔ boɔ sɔlemɔ ko toi
Mɛni baahã wɔsɔlemɔi asa Nyɔŋmɔ hiɛ? Jiemɔ VIDIO lɛ.
Yehowa miisumɔ ni wɔsɔle wɔhã lɛ. Nyɛkanea Lala 65:2 lɛ, ni nyɛsusua sanebimɔi nɛɛ ahe:
-
Kɛ́ okwɛ lɛ, ani “Sɔlemɔ Toibolɔ” lɛ miisumɔ ni osɔle ohã lɛ? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
Kɛ́ wɔmiisumɔ ni Nyɔŋmɔ abo wɔsɔlemɔi toi lɛ, esa akɛ wɔbɔ mɔdɛŋ wɔfee nibii ni esumɔɔ. Nyɛkanea Mika 3:4 kɛ 1 Petro 3:12 lɛ, ni nyɛsusua sanebimɔ nɛɛ he:
-
Mɛni esa akɛ wɔfee koni Yehowa abo wɔsɔlemɔi toi?
Kɛ́ ayaawu ta lɛ, afãi enyɔ lɛ fɛɛ sɔleɔ koni amɛye kunim. Kɛ́ okwɛ lɛ, ani Nyɔŋmɔ baahã sɔlemɔi nɛɛ hetoo?
5. Esa akɛ wɔjɛ wɔtsuiŋ wɔsɔle
Atsɔɔ mɛi komɛi akɛ amɛtĩ sɔlemɔ kome too ko mli shii abɔ. Shi ani nakai Nyɔŋmɔ sumɔɔ ni wɔsɔle wɔhã lɛ? Nyɛkanea Mateo 6:7 lɛ, ni nyɛsusua sanebimɔ nɛɛ he:
-
Kɛ́ oosɔle lɛ, mɛni baawa bo ni okawie “wiemɔ kome too lɛ nɔŋŋ shii abɔ”?
Daa gbi lɛ, susumɔ nɔ ko pɔtɛɛ ni Yehowa efee ehã bo lɛ he, ni oda lɛ shi yɛ he. Feemɔ nakai gbii kpawo, ni obaana akɛ, osɔle yɛ saji srɔtoi kpawo ahe ni otĩii sane kome too lɛ nɔŋŋ mli shii abɔ.
Tsɛmɛi sumɔɔ ni amɛbii agba amɛ amɛtsuiŋ sane. Yehowa hu miisumɔ ni wɔjɛ wɔtsuiŋ wɔsɔle wɔhã lɛ
6. Sɔlemɔ ji Nyɔŋmɔ dɛŋ nikeenii
Mɛɛ gbɛ nɔ sɔlemɔ baanyɛ awa wɔ, titri lɛ, be ni wɔkɛ naagbai miikpe? Jiemɔ VIDIO lɛ.
Biblia lɛ kɛɛ sɔlemɔ baanyɛ ahã wɔná toiŋjɔlɛ. Nyɛkanea Filipibii 4:6, 7 lɛ, ni nyɛsusua sanebimɔi nɛɛ ahe:
-
Eyɛ mli akɛ jeee be fɛɛ be sɔlemɔ jieɔ wɔnaagbai lɛ kɛyaa moŋ, shi mɛɛ gbɛ nɔ ewaa wɔ?
-
Mɛɛ nibii komɛi obaasumɔ ni osɔle yɛ he?
Ani ole akɛ . . .
wiemɔ ni ji “amen” lɛ shishi ji, “aba mli nakai” loo “lɛɛlɛŋ”? Kɛjɛ blema tɔ̃ɔ lɛ, mɛi kɛɔ “amen” kɛmuɔ sɔlemɔ naa.—1 Kronika 16:36.
7. Too be kɛhã sɔlemɔ
Bei komɛi lɛ, dekã ni wɔbɛ lɛ sɔŋŋ hewɔ lɛ, wɔhiɛ kpaa nɔ akɛ wɔbaasɔle. Te Yesu na sɔlemɔ ehã tɛŋŋ? Nyɛkanea Mateo 14:23 kɛ Marko 1:35 lɛ, ni nyɛsusua sanebimɔi nɛɛ ahe:
-
Mɛni Yesu fee koni ená be kɛsɔle?
-
Mɛɛ be baahi jogbaŋŋ kɛhã bo?
MƐI KOMƐI KƐƆ AKƐ: “Sɔlemɔ he ehiaaa, ejaakɛ mɔ ko booo toi.”
-
Bo hu te osusuɔ tɛŋŋ?
EMLI OTI
Kɛ́ wɔjɛ wɔtsuiŋ wɔsɔle lɛ, ehãa wɔbɛŋkɛɔ Nyɔŋmɔ waa, wɔnáa toiŋjɔlɛ, ni wɔnyɛɔ wɔfeɔ nibii ni sa Yehowa hiɛ.
Mɛni Okase?
-
Namɔ esa akɛ wɔsɔle wɔhã?
-
Te esa akɛ wɔsɔle wɔhã tɛŋŋ?
-
Mɛɛ gbɛi komɛi anɔ wɔnáa sɔlemɔ he sɛɛ?
EHE SAJI KROKOMƐI
Obaana saji ni mɛi fɔɔ bimɔ yɛ sɔlemɔ he lɛ ahetoo.
“Nibii Kpawo ni Esa akɛ Ole yɛ Sɔlemɔ He” (Buu-Mɔɔ, January 1, 2011)
Obaana yiŋtoi kpakpai ahewɔ ni esa akɛ osɔle, kɛ bɔ ni obaafee osɔle jogbaŋŋ.
Obaana nɔ ni Biblia lɛ kɛɔ yɛ mɔ ni esa akɛ wɔsɔle wɔhã lɛ lɛ he.
“Ani Esa Akɛ Masɔle Mahã Saints Loo Hetselɔi?” (jw.org lɛ nɔ sane)
Lala vidio nɛɛ baahã ona akɛ, obaanyɛ osɔle be fɛɛ be yɛ he fɛɛ he.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
