Fɔmɔ nii ni akɛshwɛɔ kɛyashiɔ he baa lɛ esaaa Nyɔŋmɔ hiɛ, ejaakɛ ehaa mɔ susuɔ lɛ pɛ emiishɛɛnamɔ he, ni esusuɔ nibii ni he tseee he. Agbɛnɛ hu mɔ ni kɛ efɔmɔ nii shwɛɔ kɛyashiɔ ehe baa lɛ baanyɛ abu mɛi krokomɛi hu akɛ mɛi ni haa enáa bɔlɛnamɔŋ miishɛɛ kɛkɛ. Ehaaa mɔ lɛ abu bɔlɛnamɔ akɛ suɔmɔ kpojiemɔ ni yaa nɔ yɛ mɛi enyɔ ateŋ, shi moŋ ebuɔ lɛ akɛ nɔ ni ekɛgbeɔ ebɔlɛnamɔŋ akɔnɔi, koni ená miishɛɛ. Miishɛɛnamɔ nɛɛ sɛɛ etsɛɛɛ. Yɛ anɔkwale mli lɛ, fɔmɔ nii ni akɛshwɛɔ kɛyashiɔ he baa lɛ egbeee gbɔmɔtsoŋ henumɔi kɛha “ajwamaŋbɔɔ, nyaŋemɔ nitsumɔ, . . . akɔnɔ fɔŋ,” shi moŋ ehaa emli woɔ wu.—Kolosebii 3:5.

Bɔfo Paulo ŋma akɛ: “Nyɛ mɛi ni asumɔɔ nyɛ, . . . nyɛhaa wɔtsuua wɔhe kɛjɛa heloo kɛ mumɔ fɛɛ he muji mli, ni wɔgbe hetsemɔ naa yɛ Nyɔŋmɔ gbeyeishemɔ mli.” (2 Korintobii 7:1) Kɛ́ ewa waa kɛha bo akɛ okɛ wiemɔi nɛɛ aaatsu nii lɛ, onijiaŋ akaje wui. Yehowa ‘ŋɔfaa mra,’ ni eyeɔ ebuaa mɔ be fɛɛ be. (Lala 86:5; Luka 11:9-13) Yɛ anɔkwale mli lɛ, otsui ni buɔ bo fɔ, kɛ mɔdɛŋ ni obɔɔ koni oye su nɛɛ nɔ—eyɛ mli akɛ bei komɛi lɛ okɛ ohe woɔ mli moŋ lɛ—tsɔɔ akɛ oyɛ su kpakpa. Ha ehi ojwɛŋmɔ mli hu akɛ “Nyɔŋmɔ da fe wɔtsui, ni ele nii fiaa.” (1 Yohane 3:20) Jeee wɔhe eshai lɛ pɛ Nyɔŋmɔ naa; enaa wɔsui fɛɛ. Enɛ haa emusuŋ tsɔɔ lɛ ni eboɔ sɔlemɔi ni wɔjɛɔ wɔtsuiiaŋ  wɔsɔleɔ koni ena wɔ mɔbɔ lɛ toi. No hewɔ lɛ jɛɛ otsuiŋ okɛ heshibaa atsi abɛŋkɛ Nyɔŋmɔ yɛ sɔlemɔ mli daa tamɔ gbekɛ yaa etsɛ ŋɔɔ kɛ́ eyaje naagba mli lɛ, ni onijiaŋ akaje wui. Yehowa baaha oná henilee kpakpa. (Lala 51:3-14, 19; Yesaia 1:18) Shi ehe miihia ni otsu osɔlemɔi lɛ ahe nii. Ákɛ nɔkwɛmɔnɔ lɛ, ehe baahia ni okpoo bɔlɛnamɔ he mfonirii fɛɛ kɛ agbɛnɛ hu nanemɛi fɔji. *

Kɛ́ yɛ omɔdɛŋbɔɔ lɛ fɛɛ sɛɛ lɛ onyɛɛɛ okpa ofɔmɔ nii ni okɛshwɛɔ kɛyashiɔ ohe baa lɛ, ofainɛ okɛ ofɔlɔ ni ji Kristofonyo loo nyɛmi ko ni eda yɛ mumɔŋ ni ji onaanyo, ni susuɔ ohe lɛ agba he sane. *—Abɛi 1:8, 9; 1 Tesalonikabii 5:14; Tito 2:3-5.