Nibii ni anáa kɛjɛɔ nibii titrii ejwɛ ni feɔ lá lɛ mli. Anáa nibii nɛɛ kɛjɛɔ nibii titrii ejwɛ ni feɔ lá, ni ji wala yibii tsuji, wala yibii yɛji, platelets, kɛ plasma lɛ amli. Ákɛ nɔkwɛmɔnɔ lɛ, hemoglobin yɛ wala yibii tsuji lɛ amli. Akɛ nibii ni anáa kɛjɛɔ hemoglobin ni yɔɔ lá mli lɛ tsaa mɛi ni bɛ lá loo amɛho lá babaoo lɛ.

Plasma oha mlijaa 90 ji nu, ni nibii ni haa gbɔmɔtso lɛ tsuɔ nii jogbaŋŋ, ŋoo kɛ niyenii mli hewalɛ hu yɛ mli. Agbɛnɛ hu, nibii ni haa lá wɔɔ, nibii ni yɔɔ wala yibii lɛ amli ni wuɔ shiɔ helai, kɛ nibii krokomɛi tamɔ albumin yɛ plasma mli. Kɛ́ mɔ ko yɛ he ko ni hela ko baanyɛ amɔ lɛ lɛ, ekolɛ datrɛfoi baatsɔɔ akɛ agbu lɛ gamma globulin ni aná kɛjɛ plasma ni yɔɔ mɛi ni amɛgbɔmɔtso wuɔ eshiɔ nakai hela lɛ mli lɛ. Abaanyɛ aná interferons kɛ interleukins yɛ wala yibii yɛji lɛ amli, ni akɛ enɛ tsaa helai komɛi ni tsɛŋeɔ mɔ ni muawai haa anáa lɛ kɛ kansai komɛi hu.

Ani esa akɛ Kristofoi akpɛlɛ helatsamɔ mli nifeemɔi ni akɛ nibii ni anáa kɛjɛɔ nibii titrii ejwɛ ni feɔ lá lɛ amli lɛ tsuɔ nii yɛ mli lɛ nɔ? Biblia lɛ kɛ enɛ he gbɛtsɔɔmɔ ni yɔɔ fitsofitso haaa, no hewɔ lɛ esa akɛ mɔ fɛɛ mɔ ajɛ ehenilee mli ekpɛ eyiŋ yɛ Nyɔŋmɔ hiɛ. Mɛi komɛi baakpoo nibii ni anáa kɛjɛɔ nibii titrii ejwɛ ni feɔ lá lɛ amli lɛ fɛɛ, ejaakɛ amɛsusuɔ akɛ Mla ni Nyɔŋmɔ wo Israelbii lɛ kɛɛ akɛ ‘atsi’ lá ni jɛɔ bɔɔ nɔ fɛɛ bɔɔ nɔ mli lɛ ‘ashwie shikpɔŋ.’ (5 Mose 12:22-24) Mɛi komɛi heŋ lá loo amɛkpɛlɛŋ ni akɛ nibii titrii ejwɛ ni feɔ lá lɛ eko atsa amɛ, shi ekolɛ  amɛbaakpɛlɛ ni akɛ nibii ni anáa kɛjɛɔ nibii titrii ejwɛ ni feɔ lá lɛ amli lɛ atsa amɛ. Ekolɛ amɛbaasusu akɛ nibii ni anáa kɛjɛɔ nibii titrii ejwɛ ni feɔ lá lɛ amli lɛ damɔɔɔ shi kɛhaaa bɔɔ nɔ ni aná lá lɛ kɛjɛ emli lɛ wala dɔŋŋ.

Kɛ́ ookpɛ oyiŋ yɛ nibii ni anáa kɛjɛɔ nibii titrii ejwɛ ni feɔ lá lɛ amli lɛ ahe lɛ, susumɔ saji ni nyiɛ sɛɛ nɛɛ ahe: Ani mile akɛ kɛ́ mikɛɛ misumɔɔɔ ni akɛ nibii ni anáa kɛjɛɔ nibii titrii ejwɛ ni feɔ lá lɛ amli lɛ eko tsuɔ nii yɛ mihelatsamɔ mli lɛ, belɛ miitsɔɔ akɛ miihi tsofai ni akɛ nibii nɛɛ fee, ní akɛwuɔ ashiɔ helai kɛ muawai ni kɛ helai baa loo nɔ ni haa lá wɔɔ koni lá akaho mɔ fe nine lɛ? Ani manyɛ magbála nɔ hewɔ ni misumɔɔɔ nibii ni anáa kɛjɛɔ nibii titrii ejwɛ ni feɔ lá lɛ amli lɛ ateŋ ekomɛi loo nɔ hewɔ ni misumɔɔ ekomɛi lɛ amli matsɔɔ datrɛfoi?

Opireshɛn mli nifeemɔi. Ekomɛi ji hemodilution kɛ cell salvage. Kɛ́ akɛ hemodilution miitsu nii lɛ, ajieɔ mɔ ni afeɔ lɛ opireshɛn lɛ lá awoɔ rɔba kotokui komɛi amli, ni ahaa lɛ tsofai kɛtoɔ nɔ ni ajie lɛ najiaŋ, ni kɛ́ agbe opireshɛn lɛ naa lɛ akuɔ sɛɛ akɛ elá lɛ haa lɛ. Kɛ́ akɛ cell salvage miitsu nii lɛ, agbalaa mɔ ni afeɔ lɛ opireshɛn lɛ lá ni hoɔ lɛ awoɔ nɔ ko mli, ni adoɔ nɔ ni akɛhaa lɛ ekoŋŋ. Akɛni esoro gbɛ ni datrɛfonyo fɛɛ datrɛfonyo tsɔɔ nɔ etsuɔ helatsamɔ mli nifeemɔi nɛɛ ahe nii hewɔ lɛ, esa akɛ Kristofoi aha datrɛfoi ni baakwɛ amɛ lɛ agbála gbɛ nɔ ni amɛbaatsɔ amɛfee enɛ lɛ mli amɛha amɛ.

Kɛ́ ookpɛ oyiŋ yɛ helatsamɔ mli nifeemɔi nɛɛ ahe lɛ, bi ohe saji ni nyiɛ sɛɛ nɛɛ: ‘Kɛji yɛ mihelatsamɔ lɛ mli lɛ, abaaha milá  lɛ fã ko ayatsɔ tsɔne ko mli, ní ekolɛ abaatsĩ lá lɛ naa be fioo dani ebaaba migbɔmɔtso lɛ mli ekoŋŋ lɛ, ani mihenilee ebuŋ mi fɔ akɛ lá lɛ eje mimli, ni no hewɔ lɛ esa akɛ ‘atsi ashwie shikpɔŋ’? (5 Mose 12:23, 24) Kɛ́ yɛ mihelatsamɔ mli ni ajie milá lɛ eko ni ayabɛje lɛ ní aku sɛɛ akɛwo mimli lɛ, ani mihenilee ni mikɛ Biblia lɛ etsɔse lɛ lɛ gbaŋ minaa? Ani mile akɛ kɛ́ mikɛɛ misumɔɔɔ helatsamɔ mli nifeemɔi ni akɛ mi diɛŋtsɛ milá baatsu nii  yɛ mli lɛ ateŋ eko eko lɛ, belɛ miitsɔɔ akɛ mikpɛlɛŋ akɛ ajie milá ni akwɛ mli, ni miihi tsɔne ni akɛjieɔ muji yɛ lá lɛ mli loo tsɔne ni akɛyeɔ tsui lɛ najiaŋ kɛ aafee tsui lɛ opireshɛn lɛ?’

Esa akɛ Kristofonyo fɛɛ Kristofonyo akpɛ eyiŋ yɛ bɔ ni ebaasumɔ ni akɛ elá atsu nii aha kɛ́ aafee lɛ opireshɛn lɛ he. Esa akɛ ekpɛ eyiŋ hu yɛ lá ni agbalaa ni akwɛɔ mli kɛ helatsamɔ mli nifeemɔi ni eba nɔ nyɛsɛɛ nɛɛ, ni ajieɔ mɔ lɛ lá fioo ko, ni ekolɛ yɛ gbɛ ko nɔ lɛ abɛjeɔ lɛ ni asaa akɛhaa lɛ ekoŋŋ lɛ he.