1-3. (a) Te mɛi pii feɔ amɛnii yɛ amɛnitsumɔi ahe amɛhaa tɛŋŋ? (b) Mɛɛ susumɔ Biblia lɛ sumɔɔ ni wɔná yɛ nitsumɔ he, ni mɛɛ sanebimɔi wɔbaasusu he yɛ yitso nɛɛ mli?

MƐI pii yɛ ŋmɛnɛ ni amɛbuuu nitsumɔ akɛ nɔ ko ni haa mɔ náa miishɛɛ. Akɛni amɛkɛ ŋmɛlɛtswaa babaoo gboɔ deŋme kɛtsuɔ nitsumɔ ni amɛnaaa he miishɛɛ hewɔ lɛ, amɛkɛ mligbigbilimɔ yaa nitsumɔ daa gbi. Mɛɛ gbɛ nɔ mɛi ni hiɛ su ni tamɔ nɛkɛ lɛ aaatsɔ nɔ amɛná amɛnitsumɔi ahe miishɛɛ ni amɛtsui anyɔ amɛmli yɛ etsumɔ mli po?

² Biblia lɛ haa anaa akɛ deŋmegbomɔ ji nɔ ko kpakpa. Ekɛɔ akɛ nitsumɔ kɛ emli sɛɛnamɔi lɛ ji jɔɔmɔ. Salomo ŋma akɛ: “Kɛ́ gbɔmɔ fɛɛ gbɔmɔ aaaye ni enu, ni eye nii kpakpai amli ŋɔɔmɔ yɛ edeŋmegbomɔ fɛɛ mli lɛ, Nyɔŋmɔ nikeenii ni.” (Jajelɔ 3:13) Yehowa ni ji Nyɔŋmɔ ni sumɔɔ wɔ, ni be fɛɛ be lɛ esumɔɔ akɛ ekɛ nibii ni hi aduro wɔ lɛ miisumɔ ni wɔná nitsumɔ he miishɛɛ ni wɔye wɔdeŋmegbomɔi lɛ amli nii kpakpai lɛ amli ŋɔɔmɔ. Kɛ́ wɔɔya nɔ wɔhi Nyɔŋmɔ suɔmɔ lɛ mli lɛ, ehe miihia ni wɔba wɔjeŋ yɛ gbɛ ni kɛ esusumɔ yɛ nitsumɔ he kɛ eshishitoo mlai ni kɔɔ he lɛ baakpã gbee nɔ.—Kanemɔ Jajelɔ 2:24; 5:17.

³ Wɔbaasusu sanebimɔi ejwɛ he yɛ yitso nɛɛ mli: Te wɔɔfee tɛŋŋ wɔgbo deŋme ni wɔye emli nii kpakpai lɛ amli ŋɔɔmɔ lɛ? Mɛɛ nitsumɔi esaaa akɛ anɔkwa Kristofoi tsuɔ? Te wɔɔfee tɛŋŋ wɔto wɔheloonaa nitsumɔi lɛ ahe gbɛjianɔ koni ekagba wɔjamɔ lɛ naa lɛ? Ni mɛni ji nitsumɔ ni he  hiaa fe fɛɛ ni wɔbaanyɛ wɔtsu? Shi, klɛŋklɛŋ lɛ nyɛhaa wɔpɛia nɔkwɛmɔnɔ ni Yehowa Nyɔŋmɔ kɛ Yesu Kristo ni ji nitsulɔi enyɔ ni nɔ bɛ lɛ fee lɛ mli wɔkwɛa.

4, 5. Mɛɛ gbɛ nɔ Biblia lɛ haa wɔnaa akɛ Yehowa ji nitsulɔ ni he yɔɔ sɛɛnamɔ?

⁴ Yehowa ji Nitsulɔ ni Fe Fɛɛ lɛ. Mose Klɛŋklɛŋ Wolo 1:1 lɛ kɛɔ akɛ: “Shishijee mli lɛ Nyɔŋmɔ bɔ ŋwɛi kɛ shikpɔŋ.” Beni Nyɔŋmɔ bɔ nibii ni yɔɔ shikpɔŋ lɛ nɔ egbe naa lɛ, ekɛɛ akɛ “ehi naakpa.” (1 Mose 1:31) Nɔ ni ewiemɔ nɛɛ tsɔɔ ji akɛ, ená nii fɛɛ ni etsu yɛ shikpɔŋ lɛ nɔ lɛ he miishɛɛ naakpa. Ŋwanejee ko bɛ he akɛ, Yehowa ni ji ‘miishɛɛ Nyɔŋmɔ’ lɛ náa he miishɛɛ akɛ eji nitsulɔ ni he yɔɔ sɛɛnamɔ.—1 Timoteo 1:11.

⁵ Wɔ-Nyɔŋmɔ ni nijiaŋ eŋɔɔɔ lɛ lɛ tsuɔ nii daa. Beni agbe shikpɔŋ lɛ kɛ emli nibii lɛ abɔɔ naa afii babaoo sɛɛ lɛ, Yesu kɛɛ akɛ: “Mitsɛ miitsu nii kɛbashi be nɛɛ.” (Yohane 5:17) Mɛni Tsɛ lɛ tsuɔ? Ejɛɔ ŋwɛi etsɔɔ adesai agbɛ ni ekwɛɔ amɛ. Eeto “bɔɔ nɔ hee” ni ji Kristofoi ni akɛ mumɔ efɔ amɛ mu ni kɛ Yesu baaye maŋtsɛ yɛ ŋwɛi lɛ ahe gbɛjianɔ. (2 Korintobii 5:17) Eetsu nii ni baaha eyiŋtoo akɛ adesai ni sumɔɔ lɛ lɛ aná naanɔ wala yɛ jeŋ hee lɛ mli lɛ aba mli. (Romabii 6:23) Nibii ni jɛɔ nitsumɔ nɛɛ mli kɛbaa lɛ haa Yehowa náa miishɛɛ waa. Mɛi akpekpei abɔ boɔ Maŋtsɛyeli lɛ he shɛɛ sane lɛ toi, Nyɔŋmɔ gbalaa amɛ kɛbaa emasɛi, ni amɛyaa nɔ amɛfeɔ tsakemɔi ni baaha amɛya nɔ amɛhi esuɔmɔ lɛ mli.—Yohane 6:44.

6, 7. Mɛɛ mɔdɛŋ ale kɛjɛ blema akɛ Yesu bɔɔ?

⁶ Ale Yesu kɛjɛ blema akɛ mɔ ni tsuɔ nii waa. Dani ebaaba shikpɔŋ lɛ nɔ lɛ, etsu nii akɛ Nyɔŋmɔ ‘nitsulɔ ŋaalɔ’ yɛ nii fɛɛ “ni yɔɔ ŋwɛi kɛ nii ni yɔɔ shikpɔŋ lɛ nɔ” ni abɔ lɛ mli. (Abɛi 8:22-31; Kolosebii 1:15-17) Beni eyɔɔ shikpɔŋ lɛ nɔ hu lɛ etsu nii waa. Ekase tsumaa he nitsumɔi lɛ eko yɛ egbekɛbiiashi,  ni abale lɛ akɛ ‘tsoŋaalɔ.’ * (Marko 6:3) Mɔdɛŋbɔɔ kɛ hesai srɔtoi akɛtsuɔ nitsumɔ nɛɛ—titri lɛ akɛni nakai beaŋ lɛ abɛ tsɔji ni akɛgbálaa tsei, shwapoi ni ahɔ̃ɔ tsumaa he nibii yɛ mli, kɛ dɛŋdadei ní kɛ sarawa hewalɛ tsuɔ nii lɛ. Feemɔ Yesu ni miiya eyatao tso—ekolɛ eefolɔ tsei ni eegbála mli, ni eeshɔɔ lɛ shi kɛmiiya enitsumɔhe lɛ he mfoniri yɛ ojwɛŋmɔ mli okwɛ. Feemɔ Yesu ni miimamɔ tsũi—eefee mplaŋi ni ekɛmiiwo tsũi ayiteŋ, eekpɛ shinai, ni eekpɛ tsu mli nibii po lɛ he mfoniri yɛ ojwɛŋmɔ mli okwɛ. Ŋwanejee ko bɛ he akɛ Yesu diɛŋtsɛ ná miishɛɛ ni jɛɔ mɔdɛŋbɔɔ kɛ nitsumɔ ní atsuɔ lɛ jogbaŋŋ lɛ mli kɛbaa lɛ eko.

⁷ Yesu kɛ ekãa diɛŋtsɛ tsu esɔɔmɔ nitsumɔ lɛ. Ekɛ ehe wo nitsumɔ ni he hiaa waa nɛɛ mli vii afii etɛ kɛ fã. Akɛni eetao ni enine ashɛ mɛi babaoo nɔ hewɔ lɛ, efiteee be, ni eteɔ shi mra kɛtsuɔ nii kɛyashiɔ jenamɔ yi waa. (Luka 21:37, 38; Yohane 3:2) Ekpa “maji kɛ akrowai amli eshiɛ Nyɔŋmɔ maŋtsɛyeli lɛ he sanekpakpa lɛ etsɔɔ mɛi.” (Luka 8:1) Etswa nantu shitoi ohai abɔ yɛ gbɛjegbɛi ni nɔ ewo mulu nɔ, kɛyashiɛ sanekpakpa lɛ etsɔɔ mɛi.

8, 9. Mɛɛ gbɛ nɔ Yesu ná deŋme ni egbo lɛ he sɛɛ?

⁸ Ani Yesu ná deŋme ni egbo yɛ sɔɔmɔ nitsumɔ lɛ mli lɛ he sɛɛ? Hɛɛ! Edu Maŋtsɛyeli lɛ he anɔkwale lɛ dumɔwui lɛ, ni beni ebaashi kɛya ŋwɛi lɛ, ŋmɔji lɛ egba futaa ni sa kpamɔ. Nyɔŋmɔ nitsumɔ lɛ ni Yesu tsu lɛ ha ená ekãa ni etsui nyɔ emli aahu akɛ ebu nitsumɔ nɛɛ naa ni eeegbe lɛ akɛ eniyenii. (Yohane 4:31-38) Akɛni etsu nitsumɔ ni akɛwo edɛŋ lɛ jogbaŋŋ hewɔ lɛ ená miishɛɛ babaoo ni no ha enyɛ ekɛɛ e-Tsɛ yɛ esɔɔmɔ nitsumɔ lɛ naagbee akɛ: “Mi lɛ miwo ohiɛ nyam yɛ shikpɔŋ lɛ nɔ, akɛni nitsumɔ lɛ ní oŋɔha mi tsumɔ lɛ, migbe naa lɛ.”—Yohane 17:4.

 ⁹ Yɛ anɔkwale mli lɛ, Yehowa kɛ Yesu ta mɛi fɛɛ ni gboɔ deŋme ni amɛnáa he sɛɛ lɛ anɔ. Suɔmɔ ni wɔyɔɔ kɛha Yehowa lɛ tsirɛɔ wɔ koni wɔfee “Nyɔŋmɔ kaselɔi.” (Efesobii 5:1) Suɔmɔ ni wɔyɔɔ kɛha Yesu lɛ kanyaa wɔ koni ‘wɔnyiɛ enanemaahei lɛ asɛɛ kpaakpa.’ (1 Petro 2:21) No hewɔ lɛ, nyɛhaa wɔsusua bɔ ni wɔɔfee wɔgbo deŋme ní wɔye emli nii kpakpai lɛ amli ŋɔɔmɔ lɛ he wɔkwɛa.

10, 11. Mɛni baanyɛ aha wɔná jwɛŋmɔ ni ja yɛ wɔnitsumɔi ahe?

¹⁰ Anɔkwa Kristofoi yɛ hegbɛ akɛ amɛtsuɔ nii. Wɔmiisumɔ ni wɔná nitsumɔi ni wɔtsuɔ lɛ ahe miishɛɛ ni wɔtsui anyɔ wɔmli yɛ he, shi enɛ feemɔ baanyɛ awa kɛji akɛ wɔyaje nitsumɔi ni wɔnáaa he miishɛɛ amli lɛ. Kɛ́ wɔyaje shihilɛ ni tamɔ nɛkɛ mli lɛ, mɛɛ gbɛ nɔ wɔɔtsɔ wɔná wɔnitsumɔi lɛ ahe miishɛɛ?

¹¹ Kɛtsɔ jwɛŋmɔ ni ja ni wɔɔná lɛ nɔ. Jeee be fɛɛ be wɔbaanyɛ wɔtsake shihilɛi amli ni wɔyajeɔ lɛ, shi wɔbaanyɛ wɔtsake wɔjwɛŋmɔ be fɛɛ be. Kɛ́ wɔjwɛŋ Nyɔŋmɔ susumɔ yɛ nitsumɔ he lɛ nɔ lɛ, ebaanyɛ eha wɔná jwɛŋmɔ ni ja yɛ nitsumɔ he. Ákɛ nɔkwɛmɔnɔ lɛ, kɛ́ oji weku yitso lɛ, ha anɔkwa sane ni ji akɛ bɔ ni abuuu onitsumɔ lɛ fɛɛ sɛɛ lɛ, no ji nɔ ni haa oweku lɛ náa amɛdaaŋ ŋmaa lɛ ahi ojwɛŋmɔ mli. Nɔ hewɔ ji akɛ Nyɔŋmɔ naa oshĩabii lɛ ni oookwɛ lɛ akɛ nɔ ko ni he hiaa waa. E-Wiemɔ lɛ kɛɔ akɛ kɛ́ mɔ ko kwɛɛɛ eweku lɛ, “efaŋ mɔ ni heee yeee [loo mɔ ni ekwa Yehowa].” (1 Timoteo 5:8) Kɛ́ okpɛlɛ nɔ akɛ onitsumɔ lɛ haa otsuɔ oti ko ni he hiaa he nii—ni tsɔɔ akɛ ehaa otsuɔ sɔ̃ ni Nyɔŋmɔ kɛwo odɛŋ lɛ he nii lɛ—ebaanyɛ eye ebua bo ni oná onitsumɔ lɛ he miishɛɛ ni otsui anyɔ omli yɛ he, be mli ni ekolɛ onanemɛi nitsulɔi lɛ nuuu he nakai.

12. Mɛɛ jɔɔmɔi mɔdɛŋbɔɔ kɛ anɔkwayeli ni akɛtsuɔ nii lɛ haa anáa?

¹² Kɛtsɔ mɔdɛŋbɔɔ kɛ anɔkwayeli nɔ. Mɔdɛŋbɔɔ ni wɔkɛtsuɔ  nii kɛ nii ni wɔtsuɔ jogbaŋŋ lɛ baanyɛ aha wɔnine ashɛ jɔɔmɔi anɔ. Bei pii lɛ nitsumɔtsɛmɛi nyaa nitsulɔi ni bɔɔ mɔdɛŋ ni amɛtsuɔ nii jogbaŋŋ lɛ ahe waa. (Abɛi 12:24; 22:29) Ákɛ anɔkwa Kristofoi lɛ, esa akɛ wɔye anɔkwa hu yɛ wɔnitsumɔ mli—wɔkaju shika, nitsumɔ lɛ mli nibii, ni wɔkɛ nitsumɔ be lɛ akafee nɔ kroko. (Efesobii 4:28) Taakɛ wɔna yɛ yitso ni tsɔ hiɛ lɛ mli lɛ, anɔkwayeli haa anáa jɔɔmɔi. Ewaaa akɛ aaamu afɔ̃ nitsulɔ ni ale lɛ akɛ eyeɔ anɔkwa lɛ nɔ. Ni kɛ́ wɔnitsumɔtsɛ lɛ yɔse mɔdɛŋ ni wɔbɔɔ kɛtsuɔ nii lɛ jio, eyɔseee jio, “henilee kpakpa” ni wɔyɔɔ lɛ kɛ le ni wɔle akɛ wɔmiifee nɔ ni sa Nyɔŋmɔ ni wɔsumɔɔ lɛ lɛ hiɛ  lɛ baanyɛ aha wɔná miishɛɛ.—Hebribii 13:18; Kolosebii 3:22-24.

13. Mɛni baanyɛ ajɛ wɔjeŋ ni wɔbaa jogbaŋŋ yɛ nitsumɔhe lɛ mli aba?

¹³ Kɛtsɔ yɔsemɔ ni wɔɔyɔse akɛ wɔjeŋba baanyɛ awo Nyɔŋmɔ hiɛ nyam lɛ nɔ. Kɛ́ wɔba wɔjeŋ jogbaŋŋ ákɛ Kristofoi yɛ wɔnitsumɔhei lɛ, mɛi krokomɛi yɔseɔ. Mɛni jɛɔ mli kɛbaa? Wɔjeŋba lɛ baanyɛ ‘ewula Nyɔŋmɔ ni ji wɔyiwalaherelɔ lɛ tsɔɔmɔ lɛ.’ (Tito 2:9, 10) Hɛɛ, wɔjeŋba kpakpa lɛ baanyɛ aha mɛi krokomɛi ana akɛ wɔjamɔ lɛ hi, ni ebaaha amɛná he miishɛɛ babaoo. Bo lɛ kwɛ miishɛɛ ni obaaná kɛ́ ojeŋba kpakpa yɛ nitsumɔhe lɛ ha onaanyo nitsulɔ ko bɔi anɔkwale lɛ he miishɛɛ namɔ! Nɔ ni he hiaa fe fɛɛ lɛ, ani nɔ ko yɛ ni baaha oná miishɛɛ fe le ni ole akɛ ojeŋba kpakpa lɛ woɔ Yehowa hiɛ nyam ni ehaa etsui nyɔɔ emli lɛ?—Kanemɔ Abɛi 27:11; 1 Petro 2:12.

14-16. Kɛ́ wɔmiikpɛ wɔyiŋ yɛ nitsumɔ ni wɔbaatsu he lɛ, mɛɛ sanebimɔi ni he hiaa esa akɛ wɔsusu he?

¹⁴ Biblia lɛ kɛ gbɛtsɔɔmɔ ni yɔɔ fitsofitso ni kɔɔ heloonaa nitsumɔ ni hi kɛ nɔ ni ehiii he lɛ hako. Enɛ etsɔɔɔ akɛ wɔbaanyɛ wɔtsu nitsumɔ fɛɛ nitsumɔ ni bajeɔ wɔgbɛ nɔ lɛ. Ŋmalɛi lɛ baanyɛ aye abua wɔ koni wɔhala nitsumɔi ni hi ni saa Nyɔŋmɔ hiɛ, koni wɔkwa nitsumɔi ni esaaa ehiɛ lɛ. (Abɛi 2:6) Kɛ́ wɔmiikpɛ wɔyiŋ yɛ nitsumɔ ni wɔbaatsu he lɛ, esa akɛ wɔsusu sanebimɔi enyɔ ni he hiaa nɛɛ ahe.

¹⁵ Ani nitsumɔ nɛɛ baaha mikɛ mihe awo nifeemɔ ko ni Biblia lɛ wieɔ eshiɔ lɛ mli? Nyɔŋmɔ Wiemɔ lɛ wieɔ eshiɔ juu, amale, kɛ amagai afeemɔ kɛha wɔŋjamɔ. (2 Mose 20:4; Bɔfoi lɛ Asaji 15:29; Efesobii 4:28; Kpojiemɔ 21:8) Wɔbaakpoo nitsumɔ fɛɛ nitsumɔ ni baaha wɔkɛ wɔhe awo nifeemɔi nɛɛ amli lɛ. Suɔmɔ ni wɔyɔɔ kɛha Yehowa lɛ haŋ wɔkɛ wɔhe awo nitsumɔ ko ni baaha wɔkɛ wɔhe awo nifeemɔi ni teɔ shi woɔ Nyɔŋmɔ mlai lɛ amli lɛ mli.—1 Yohane 5:3.

 ¹⁶ Ani nitsumɔ nɛɛ tsumɔ baatsɔɔ faŋŋ akɛ wɔfiɔ nifeemɔ ko ni ehiii sɛɛ loo wɔwoɔ mɛi hewalɛ ni amɛkɛ amɛhe awo mli? Susumɔ nɔkwɛmɔnɔ nɛɛ he okwɛ. Naagba ko bɛ he akɛ mɔ aaatsu nii akɛ mɔ ni hereɔ gbɔi atuu yɛ nitsumɔhe ko. Shi kɛ́ akɛɛ Kristofonyo ko abatsu nitsumɔ nɛɛ yɛ helatsamɔhe ko ni nitsumɔ titri ni atsuɔ yɛ jɛmɛ lɛ ji hɔjiemɔ hu? Eji anɔkwale akɛ enitsumɔ lɛ haŋ ekɛ ehe awo hɔjiemɔ nifeemɔ lɛ mli tɛ̃ɛ. Shi ani nii ni etsuɔ yɛ jɛmɛ daa lɛ  fiŋ helatsamɔhe ni amɛnitsumɔ titri ji hɔjiemɔ, ni ji nifeemɔ ni Nyɔŋmɔ Wiemɔ lɛ ekpɛlɛɛɛ nɔ lɛ gbɛjianɔtoo lɛ sɛɛ? (2 Mose 21:22-24) Ákɛ mɛi ni sumɔɔ Yehowa lɛ, wɔsumɔɔɔ ni wɔfeɔ nɔ ko ni kɛ nifeemɔi ni Ŋmalɛ lɛ ekpɛlɛɛɛ nɔ lɛ yɔɔ tsakpãa waa.

17. (a) Mɛɛ otii wɔbaanyɛ wɔsusu he kɛ́ wɔmiikpɛ wɔyiŋ yɛ nitsumɔ he? (Kwɛmɔ akrabatsa ni yitso ji “ Ani Esa akɛ Matsu Nitsumɔ Nɛɛ?” lɛ.) (b) Mɛɛ gbɛ nɔ wɔhenilee baanyɛ aye abua wɔ koni wɔkpɛ yiŋ ni saa Nyɔŋmɔ hiɛ?

¹⁷ Wɔbaanyɛ wɔná nitsumɔ he saji babaoo ni wɔbiɔ lɛ ahetoo kɛtsɔ saji enyɔ ni he hiaa ni abi yɛ kuku 15 kɛ 16 lɛ he ni wɔɔsusu jogbaŋŋ lɛ nɔ. Kɛfata he lɛ, nibii krokomɛi yɛ ni esa akɛ wɔsusu he jogbaŋŋ kɛ́ wɔmiikpɛ wɔyiŋ yɛ nitsumɔ ko tsumɔ he. * Esaaa akɛ wɔkpaa gbɛ akɛ tsulɔ kuu lɛ kɛ  gbɛtsɔɔmɔ baaha yɛ shihilɛ fɛɛ shihilɛ ni ekolɛ wɔkɛbaakpe lɛ he. Enɛ hewɔ ni ehe hiaa ni wɔkɛ hiɛshikamɔ atsu nii lɛ. Taakɛ wɔkase yɛ Yitso 2 lɛ, ehe miihia ni wɔjwɛŋ bɔ ni wɔɔfee wɔkɛ Nyɔŋmɔ Wiemɔ lɛ aaatsu nii yɛ wɔdaa gbi shihilɛ mli lɛ nɔ koni wɔkɛtsɔse wɔhenilee. Kɛ́ ‘fɔ ni wɔfɔɔ feemɔ’ lɛ tsɔse ‘wɔhenumɔ nii’ lɛ, no baaha wɔhenilee lɛ anyɛ aye abua wɔ koni wɔkpɛ yiŋ ni saa Nyɔŋmɔ hiɛ, ní wɔya nɔ wɔhi esuɔmɔ lɛ mli.—Hebribii 5:14.

18. Mɛni hewɔ ebɛ mlɛo akɛ wɔɔya nɔ wɔkpɛ yiŋ ni baasa Yehowa hiɛ lɛ?

¹⁸ Ebɛ mlɛo akɛ wɔɔya nɔ wɔkpɛ yiŋ ni baasa Yehowa hiɛ yɛ “naagbee gbii” ni ji “jaramɔ bei” nɛɛ amli. (2 Timoteo 3:1) Nitsumɔ námɔ kãaa shi akɔɔɔ, ni ewaaa akɛ nitsumɔ aaaje mɔ dɛŋ. Ákɛ anɔkwa Kristofoi lɛ wɔle akɛ ehe miihia ni wɔtsu nii waa koni wɔwekui lɛ anine atɛke amɛtsɛŋ. Shi kɛ́ wɔkwɛɛɛ jogbaŋŋ lɛ, nɔnyɛi ni wɔkɛkpeɔ yɛ nitsumɔhei loo susumɔ ni je lɛ hiɛ yɛ ninámɔ he ni náa mɔ nɔ hewalɛ lɛ haŋ wɔkɛ Nyɔŋmɔjamɔŋ nibii aye klɛŋklɛŋ gbɛhe. (1 Timoteo 6:9, 10) Nyɛhaa wɔsusua bɔ ni wɔɔfee wɔŋmɛ pɛpɛɛpɛ koni wɔyoo “nii ni hi titri lɛ” he wɔkwɛa.—Filipibii 1:10.

19. Mɛni hewɔ Yehowa ji mɔ ni sa akɛ wɔkɛ wɔhe afɔ̃ enɔ kwraa lɛ, ni mɛni hekɛnɔfɔɔ nɛɛ baaye abua wɔ ni wɔkwa?

¹⁹ Okɛ ohiɛ afɔ̃ Yehowa nɔ kwraa. (Kanemɔ Abɛi 3:5, 6) Ani ejeee mɔ ni sa akɛ wɔkɛ wɔhe afɔ̃ enɔ? Yɛ anɔkwale mli lɛ, ejwɛŋɔ wɔnɔ. (1 Petro 5:7) Ele nibii ni he hiaa wɔ fe bɔ ni wɔle, ni enine efoko kuku. (Lala 37:25) No hewɔ lɛ esa akɛ wɔbo nɔ ni e-Wiemɔ lɛ kɛɔ wɔ lɛ toi akɛ: “Shika suɔmɔ akaba nyɛjeŋba mli, ni nyɛmii ashɛa nii ni nyɛyɔɔ lɛ he; ejaakɛ lɛ diɛŋtsɛ ekɛɛ: ‘Mishiŋo ni misaa mikwaŋo gbi ko gbi ko.’” (Hebribii 13:5) Be-fɛɛ sɔɔlɔi babaoo baanyɛ aye odase akɛ Nyɔŋmɔ baanyɛ eha wɔnine ashɛ shihilɛ mli hiamɔ nii lɛ anɔ. Kɛ́ wɔkɛ wɔhe fɔ̃ɔ Yehowa nɔ kwraa akɛ ebaakwɛ wɔ  lɛ, wɔyeŋ wɔtsui fe nine yɛ daaŋ ŋmaa ni wɔɔha wɔweku lɛ he. (Mateo 6:25-32) Wɔŋmɛŋ gbɛ ni heloonaa nitsumɔ aha wɔku wɔhiɛ wɔshwie mumɔŋ nifeemɔi tamɔ sanekpakpa lɛ shiɛmɔ kɛ kpeeiyaa nɔ.—Mateo 24:14; Hebribii 10:24, 25.

20. Mɛni hiŋmɛi nɔ ni aaaha etse lɛ tsɔɔ, ni mɛɛ gbɛ nɔ oootsɔ oha ohiŋmɛi nɔ atse daa?

 ²⁰ Ha ohiŋmɛi nɔ atse. (Kanemɔ Mateo 6:22, 23) Wɔhiŋmɛi nɔ ni wɔɔha etse lɛ tsɔɔ akɛ wɔkɛ wɔjwɛŋmɔ emaaa nibii babaoo nɔ. Kristofonyo ni hiŋmɛi nɔ tse lɛ kɛ ejwɛŋmɔ maa oti kome pɛ nɔ—Nyɔŋmɔ suɔmɔnaa nifeemɔ. Kɛ́ wɔkɛ wɔhiŋmɛi ema oti ni sa nɔ lɛ, wɔhaŋ nitsumɔ ni nyɔmɔwoo fa kɛ ogbɔjɔ shihilɛ sɛɛtiumɔ ahe wɔjwɛŋmɔ. Asaŋ wɔnaŋ shwelɛ wɔhaŋ nibii hei kpakpai ni eko nyiɛ eko sɛɛ, ní nihɔɔlɔi tswaa he adafi koni amɛkɛkɔne wɔyiŋ akɛ ja wɔná eko dani wɔmii baashɛ wɔhe lɛ. Te ooofee tɛŋŋ oha ohiŋmɛi nɔ atse daa lɛ? Kaafili nii bɔ ni esaaa. Kaaha nibii ni heɔ mɔ be kɛ jwɛŋmɔ fe nine miiyi oshihilɛ mli obɔ. Okɛ Biblia mli ŋaawoo akɛ kɛ́ wɔyɛ “ŋmãa kɛ hehaanii” lɛ wɔmii ashɛ he lɛ atsu nii. (1 Timoteo 6:8) Bɔɔ mɔdɛŋ ni oha oshihilɛ afee mlɛo bɔ ni ooonyɛ.

21. Mɛni hewɔ esa akɛ wɔyɔse nibii ni he hiaa yɛ wɔshihilɛ mli lɛ, ni te nɔ ni esa akɛ wɔkɛye klɛŋklɛŋ gbɛhe lɛ?

²¹ Okɛ mumɔŋ nibii aye klɛŋklɛŋ gbɛhe, ni ohi shi yɛ naa daa. Akɛni nibii ni wɔyɔɔ tsumɔ yɛ gbi fɛɛ gbi mli lɛ fa hewɔ lɛ, esa akɛ wɔyɔse nibii ni he hiaa yɛ wɔshihilɛ mli. Kɛjeee nakai lɛ, nibii ni he ehiaaa tsɔ lɛ baahe wɔbe fɛɛ, ni wɔbaaku wɔhiɛ wɔshwie nibii ni he hiaa waa lɛ anɔ. Mɛni esa akɛ efee nɔ ni he hiaa fe fɛɛ yɛ wɔshihilɛ mli? Mɛi babaoo buɔ univɛsiti kɛ ehenɔi ní amɛaaya koni amɛná nitsumɔ ni nyɔmɔwoo babaoo yɔɔ mli lɛ akɛ no he hiaa fe fɛɛ. Kɛlɛ, Yesu wo esɛɛnyiɛlɔi lɛ hewalɛ koni ‘amɛtao Nyɔŋmɔ maŋtsɛyeli lɛ tsutsu.’ (Mateo 6:33) Hɛɛ, ákɛ anɔkwa Kristofoi lɛ wɔkɛ Nyɔŋmɔ Maŋtsɛyeli lɛ yeɔ klɛŋklɛŋ gbɛhe yɛ wɔshihilɛ mli. Esa akɛ wɔshihilɛ gbɛ—yiŋ ni wɔkpɛɔ, otii ni wɔkɛmamɔɔ wɔhiɛ, kɛ nibii ni wɔtiuɔ sɛɛ lɛ—atsɔɔ akɛ Maŋtsɛyeli lɛ he nibii kɛ Nyɔŋmɔ suɔmɔnaa nii he hiaa wɔ kwraa fe heloonaa nibii kɛ je lɛŋ nibii asɛɛtiumɔ.

22, 23. (a) Mɛni ji anɔkwa Kristofoi anitsumɔ titri, ni mɛɛ gbɛ nɔ wɔɔtsɔ wɔtsɔɔ yɛ akɛ nitsumɔ nɛɛ he hiaa wɔ? (Kwɛmɔ akrabatsa ni yitso ji “ Miyiŋkpɛɛ lɛ Eha Miná Miishɛɛ ni Mitsui Enyɔ Mimli” lɛ.) (b) Te otswa ofai shi yɛ oheloonaa nitsumɔ lɛ he oha tɛŋŋ?

²² Akɛni wɔle akɛ wɔbote naagbee gbii lɛ amli vii hewɔ lɛ, wɔkɛ wɔjwɛŋmɔ maa anɔkwa Kristofoi anitsumɔ titri ni ji shiɛmɔ kɛ kaselɔfeemɔ nitsumɔ lɛ nɔ. (Mateo 24:14; 28:19, 20) Taakɛ Yesu ni ji wɔ-Nɔkwɛmɔnɔ lɛ fee lɛ, wɔmiisumɔ ni wɔkɛ wɔhe awo nitsumɔ ni hereɔ mɔ yiwala nɛɛ mli vii. Mɛɛ gbɛ nɔ wɔɔtsɔ wɔtsɔɔ yɛ akɛ nitsumɔ nɛɛ he hiaa wɔ? Nyɔŋmɔ webii lɛ ateŋ mɛi babaoo jɛɔ amɛtsui muu fɛɛ mli amɛtsuɔ shiɛmɔ nitsumɔ lɛ akɛ asafo mli shiɛlɔi. Amɛteŋ mɛi komɛi hu eto amɛshihilɛ he gbɛjianɔ ni amɛmiisɔmɔ akɛ gbɛgbalɔi loo maŋsɛɛ sanekpakpa shiɛlɔi. Akɛni fɔlɔi babaoo eyɔse akɛ mumɔŋ otii ni mɔ kɛ aaama ehiɛ lɛ ahe yɛ sɛɛnamɔ hewɔ lɛ, amɛwoɔ amɛbii lɛ hewalɛ koni amɛkɛ be-fɛɛ sɔɔmɔ nitsumɔ lɛ afee amɛnitsumɔ. Ani Maŋtsɛyeli jajelɔi ni yɔɔ ekãa lɛ náa amɛdeŋmegbomɔ yɛ shiɛmɔ nitsumɔ lɛ mli lɛ he sɛɛ? Hɛɛ, amɛnáa he sɛɛ! Susuma muu fɛɛ mli ni ajɛɔ asɔmɔɔ Yehowa lɛ haa mɔ tsui nyɔɔ emli ni enáa miishɛɛ kɛ jɔɔmɔi babaoo.—Kanemɔ Abɛi 10:22.

²³ Wɔteaŋ mɛi pii kɛ be babaoo tsuɔ nii koni wɔweku lɛ mli bii lɛ anine atɛke amɛtsɛŋ. Kaimɔ akɛ Yehowa miisumɔ ni wɔgbo deŋme ni wɔye emli nii kpakpai lɛ amli ŋɔɔmɔ. Kɛ́ wɔba wɔjeŋ yɛ gbɛ ni kɛ esusumɔ yɛ nitsumɔ he kɛ eshishitoo mlai ni kɔɔ he lɛ kpãa gbee nɔ lɛ, wɔbaaná miishɛɛ yɛ wɔnitsumɔi amli. Shi nyɛhaa wɔtswaa wɔfai shi akɛ wɔhaŋ wɔheloonaa nitsumɔ agbala wɔjwɛŋmɔ kɛjɛ wɔnitsumɔ titri, ni ji Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ nɔ. Kɛ́ wɔkɛ nitsumɔ nɛɛ ye klɛŋklɛŋ gbɛhe yɛ wɔshihilɛ mli lɛ, wɔkɛtsɔɔ akɛ wɔsumɔɔ Yehowa, ni no baaha wɔya nɔ wɔhi esuɔmɔ lɛ mli.