1, 2. (a) Namɔ gbɛtsɔɔmɔi esa akɛ wɔkɛtsu nii? (b) Mɛɛ sanebimɔi ahe wɔbaasusu yɛ yitso nɛɛ mli?

 BE NI oji gbekɛ lɛ, ekolɛ jeee be fɛɛ be kɛ́ ofɔlɔi kɛɛ ofee nɔ ko lɛ, osumɔɔ ni ofee. Eyɛ mli akɛ osumɔɔ amɛ, ni ole akɛ esa akɛ obo amɛ toi moŋ, shi loloolo lɛ, jeee be fɛɛ be osumɔɔ ni obo amɛ toi.

² Wɔle akɛ wɔ-Tsɛ Yehowa sumɔɔ wɔ. Ekwɛɔ wɔ jogbaŋŋ, ni ehãa wɔ nɔ fɛɛ nɔ ni baahã wɔná miishɛɛ yɛ shihilɛ mli. Ehãa wɔ gbɛtsɔɔmɔi ni baahã ahi ahã wɔ. Bei komɛi lɛ, etsɔɔ mɛi krokomɛi anɔ ekɛ gbɛtsɔɔmɔi hãa wɔ. Esa akɛ wɔbu hegbɛ ni Yehowa yɔɔ lɛ. (Abɛi 24:21) Shi mɛni hewɔ bei komɛi lɛ, ewaa kɛhãa wɔ akɛ wɔkɛ gbɛtsɔɔmɔi ni akɛhãa wɔ lɛ baatsu nii lɛ? Mɛni hewɔ Yehowa sumɔɔ ni wɔkɛ gbɛtsɔɔmɔi atsu nii lɛ? Ni mɛni wɔbaanyɛ wɔfee kɛtsɔɔ akɛ wɔbuɔ hegbɛ ni eyɔɔ lɛ?​—Kwɛmɔ Wiemɔi Komɛi Amligbalamɔ 9.

3, 4. Mɛni hewɔ adesai yeee emuu lɛ? Mɛni hewɔ bei komɛi lɛ, ewaa kɛhãa wɔ akɛ wɔkɛ gbɛtsɔɔmɔi ni akɛhãa wɔ lɛ baatsu nii lɛ?

³ Kɛjɛ be ni klɛŋklɛŋ nuu kɛ yoo, ni ji Adam kɛ Hawa fee esha nɛɛ, atuatsemɔ ebatsɔ adesai asu. Eyɛ  mli akɛ Nyɔŋmɔ bɔ Adam kɛ Hawa akɛ mɛi ni eye emuu moŋ, shi amɛtse Nyɔŋmɔ hiɛ atua. Enɛ hewɔ lɛ, adesa ko adesa ko yeee emuu. Emuu ni wɔyeee lɛ ji yiŋtoo kome hewɔ ni bei komɛi lɛ ewaa kɛhãa wɔ akɛ wɔkɛ gbɛtsɔɔmɔi ni Yehowa kɛ adesai kɛhãa wɔ lɛ baatsu nii lɛ. Yiŋtoo kroko hu ji akɛ, gbɔmɛi ni Yehowa tsɔɔ amɛnɔ ekɛ gbɛtsɔɔmɔi hãa wɔ lɛ hu yeee emuu.​—1 Mose 2:15-17; 3:1-7; Lala 51:5; Romabii 5:12.

⁴ Akɛni wɔyeee emuu hewɔ lɛ, bei komɛi lɛ wɔwóɔ wɔhe nɔ. Henɔwomɔ hãa ewaa kɛhãa wɔ akɛ wɔkɛ gbɛtsɔɔmɔi ni akɛhãa wɔ lɛ baatsu nii. Akɛ nɔkwɛmɔnɔ lɛ, Yehowa hala Mose koni enyiɛ Israel maŋ lɛ hiɛ. Nuu ko ni atsɛɔ lɛ Kora, ni kɛ afii pii esɔmɔ Yehowa lɛ, wó ehe nɔ ni ekɛ enifeemɔ tsɔɔ akɛ ebuuu Mose kwraa. Ni Mose hu? Eyɛ mli akɛ enyiɛ Nyɔŋmɔ webii lɛ ahiɛ moŋ, shi ewóoo ehe nɔ. Anɔkwa, Biblia lɛ hãa wɔleɔ akɛ, ebaa ehe shi fe gbɔmɛi fɛɛ ni yɔɔ shikpɔŋ lɛ nɔ yɛ nakai beiaŋ. Shi Kora sumɔɔɔ ni ekɛ gbɛtsɔɔmɔi ni Mose kɛhã lɛ atsu nii. Ekɔne mɛi pii ayiŋ po koni amɛbafata ehe kɛtse Mose hiɛ atua. Mɛni ba Kora kɛ mɛi ni fata ehe kɛtse atua lɛ anɔ? Akpãta amɛhiɛ. (4 Mose 12:3; 16:1-3, 31-35) Nɔkwɛmɔnii pii yɛ Biblia lɛ mli ni hãa wɔnaa akɛ henɔwomɔ ehiii kwraa.​—2 Kronika 26:16-21; kwɛmɔ Wiemɔi Komɛi Amligbalamɔ 10.

5. Mɛni adesai komɛi efee ni tsɔɔ akɛ amɛkɛ hegbɛ ni amɛná lɛ tsuuu nii jogbaŋŋ?

⁵ Bei pii lɛ, kɛ́ mɛi anine shɛ hegbɛ ko nɔ lɛ, amɛyeɔ amɛtsuinaa sane. Kɛjɛ blema tɔ̃ɔ lɛ, adesai pii kɛ hegbɛi ni amɛnine shɛɔ nɔ lɛ tsuuu nii jogbaŋŋ. (Kanemɔ Jajelɔ 8:9.) Akɛ nɔkwɛmɔnɔ lɛ, be ni Yehowa wó Saul Israel nɔ maŋtsɛ lɛ, no mli lɛ, efeɔ nibii kpakpai, ni  ebaa ehe shi. Shi eŋmɛ gbɛ ni fiofio lɛ, henɔwomɔ kɛ awuŋayeli bahe shi yɛ etsui mli, ni enɛ hã ewa David yi, tsɛbelɛ David efeko efɔŋ ko. (1 Samuel 9:20, 21; 10:20-22; 18:7-11) Sɛɛ mli lɛ, David baye maŋtsɛ, ni efata maŋtsɛmɛi kpakpai ni ye Israel nɔ jogbaŋŋ lɛ ahe. Shi lɛ po, ekɛ hegbɛ ni ená lɛ tsuuu nii jogbaŋŋ. Ekɛ Bat-sheba, ni ji nuu ko ni atsɛɔ lɛ Uria lɛ ŋa ná bɔlɛ, ni ebɔ mɔdɛŋ akɛ ebaatsimɔ esha ni efee lɛ nɔ. No hewɔ lɛ, etsɔ ŋaa koni agbe Uria yɛ ta mli.​—2 Samuel 11:1-17.

6, 7. (a) Kɛ́ wɔsumɔɔ Yehowa lɛ, mɛni no baatsirɛ wɔ ni wɔfee? (b) Kɛ́ ewa kɛhã wɔ akɛ wɔbaabo Yehowa toi lɛ, mɛɛ gbɛ nɔ Yesu nɔkwɛmɔnɔ lɛ baanyɛ aye abua wɔ?

⁶ Wɔsumɔɔ ni wɔkɛ gbɛtsɔɔmɔi ni Yehowa kɛhãa wɔ lɛ atsu nii, ejaakɛ wɔsumɔɔ lɛ. Wɔsumɔɔ lɛ fe mɔ fɛɛ mɔ loo nɔ fɛɛ nɔ, ni no hewɔ lɛ, wɔmiisumɔ ni ená miishɛɛ. (Kanemɔ Abɛi 27:11; Marko 12:29, 30.) Kɛjɛ be ni klɛŋklɛŋ nuu kɛ yoo lɛ yɔɔ Eden abɔɔ lɛ mli tɔ̃ɔ ni Satan Abonsam shwe akɛ adesai atse hegbɛ ni Yehowa yɔɔ lɛ hiɛ atua. Eesumɔ ni wɔhe wɔye akɛ, Yehowa bɛ hegbɛ ni etsɔɔ wɔ nɔ ni esa akɛ wɔfee kɛ nɔ ni esaaa akɛ wɔfeɔ. Shi wɔle akɛ enɛ jeee anɔkwale. Wɔheɔ wiemɔi ni nyiɛ sɛɛ nɛɛ wɔyeɔ, akɛ: “Yehowa wɔ-Nyɔŋmɔ, bo ji mɔ ni sa akɛ akɛ anunyam lɛ kɛ woo lɛ kɛ hewalɛ lɛ ahã, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.”​—Kpojiemɔ 4:11.

⁷ Be ni oji gbekɛ lɛ, ekolɛ atsɔɔ bo akɛ, esa akɛ obo ofɔlɔi toi be fɛɛ be, kɛ́ osumɔɔɔ ni ofeɔ nakai po. Nakai nɔŋŋ bei komɛi lɛ, ewaa kɛhãa wɔ hu akɛ wɔbaabo Yehowa toi. Shi akɛni wɔsumɔɔ lɛ ni wɔbuɔ lɛ hewɔ lɛ,  wɔmiaa wɔhiɛ ni wɔbo lɛ toi. Yesu fee enɛ he nɔkwɛmɔnɔ ehã wɔ. Be ni enáaa lɛ mlɛo akɛ ebaabo Yehowa toi po lɛ, ebo lɛ toi. Enɛ hã enyɛ ekɛɛ e-Tsɛ lɛ akɛ: “Hã osuɔmɔnaa nii aba mli, jeee minɔ.”​—Luka 22:42; kwɛmɔ Wiemɔi Komɛi Amligbalamɔ 11.

8. Mɛɛ gbɛi komɛi anɔ Yehowa tsɔɔ ekɛ gbɛtsɔɔmɔi hãa wɔ? (Kwɛmɔ akrabatsa ni ji, “ Bo Ŋaawoo Toi” lɛ.)

⁸ Ŋmɛnɛ lɛ, Yehowa tsɔɔ gbɛi srɔtoi anɔ ekɛ gbɛtsɔɔmɔi hãa wɔ. Akɛ nɔkwɛmɔnɔ lɛ, ehã wɔ Biblia lɛ. Agbɛnɛ hu, ehã wɔ asafoŋ onukpai. Kɛ́ wɔbuɔ mɛi ni Yehowa tsɔɔ amɛnɔ ekɛ gbɛtsɔɔmɔi hãa wɔ lɛ, no tsɔɔ akɛ wɔbuɔ hegbɛ ni Yehowa yɔɔ lɛ. Kɛ́ wɔkpoo yelikɛbuamɔ ni amɛkɛhãa wɔ lɛ, belɛ etsɔɔ akɛ wɔkpoo Yehowa. Be ni Israelbii lɛ te shi amɛwo Mose lɛ, Yehowa bu amɛnifeemɔ lɛ akɛ eji hiɛdɔɔ sane. Yɛ ehiɛ lɛ, lɛ ji mɔ ni amɛte shi amɛwo lɛ.​—4 Mose 14:26, 27; kwɛmɔ Wiemɔi Komɛi Amligbalamɔ 12.

9. Mɛɛ gbɛ nɔ suɔmɔ baatsirɛ wɔ ni wɔkɛ gbɛtsɔɔmɔi atsu nii?

⁹ Agbɛnɛ hu, kɛ́ wɔbu mɛi ni yɔɔ hegbɛ lɛ, etsɔɔ akɛ wɔsumɔɔ wɔnyɛmimɛi lɛ. Susumɔ nɔkwɛmɔnɔ nɛɛ he okwɛ. Kɛ́ adebɔɔ naa oshãra ba lɛ, bei pii lɛ, mɛi yayeɔ amɛbuaa kɛbaa mɛi awala yi. Kɛ́ mɛi nɛɛ baanyɛ atsu nitsumɔ lɛ jogbaŋŋ lɛ, esa akɛ mɔ ko ato amɛhe gbɛjianɔ, ní amɛteŋ mɔ fɛɛ mɔ hu kɛ gbɛtsɔɔmɔi ni akɛbaahã lɛ atsu nii. Shi kɛ́ amɛteŋ mɔ ko kɛ gbɛtsɔɔmɔ ni akɛhã lɛ tsuuu nii ni efee nɔ ni esumɔɔ lɛ, mɛni baaba? Eyɛ mli akɛ ekolɛ jeee jwɛŋmɔ gbonyo ehiɛ moŋ, shi enifeemɔ lɛ baanyɛ ahã mɛi ni fata ehe lɛ aná naagbai, ni ekolɛ, amɛbaapila waa po. Yɛ gbɛ ni tamɔ nakai nɔŋŋ nɔ lɛ, kɛ́ wɔbooo gbɛtsɔɔmɔi ni Yehowa kɛhãa wɔ kɛ gbɛtsɔɔmɔi ni mɛi ni ekɛ hegbɛ ewo amɛdɛŋ lɛ  kɛhãa wɔ lɛ toi lɛ, wɔbaahã mɛi krokomɛi ana amane. Shi kɛ́ wɔbo Yehowa toi lɛ, no baatsɔɔ akɛ wɔsumɔɔ wɔnyɛmimɛi lɛ, ni wɔbuɔ gbɛjianɔ ni Yehowa eto lɛ.​—1 Korintobii 12:14, 25, 26.

10, 11. Mɛni he wɔbaasusu amrɔ nɛɛ?

¹⁰ Nɔ fɛɛ nɔ ni Yehowa kɛɔ wɔ akɛ wɔfee lɛ he yɛ sɛɛnamɔ kɛhã wɔ. Kɛ́ wɔbu mɛi ni yɔɔ hegbɛ yɛ wɔweku lɛ mli kɛ asafo lɛ mli, kɛ mɛi ni nɔyeli lɛ kɛ hegbɛ ko ewo amɛdɛŋ yɛ maŋ lɛ mli lɛ, wɔ kɛ mɛi krokomɛi fɛɛ baaná he sɛɛ.​—5 Mose 5:16; Romabii 13:4; Efesobii 6:2, 3; Hebribii 13:17.

¹¹ Kɛ́ wɔna nɔ hewɔ ni Yehowa sumɔɔ ni wɔbu mɛi krokomɛi lɛ, no baaye abua wɔ ni wɔfee nakai. Hã wɔkwɛ bɔ ni wɔbaafee wɔjie bulɛ kpo yɛ shihilɛi srɔtoi etɛ amli.

12. Mɛni wu ko baanyɛ afee kɛtsɔɔ akɛ ebuɔ hegbɛ ni Yehowa yɔɔ lɛ?

¹² Yehowa ji mɔ ni to weku lɛ shishi, ni ehã weku lɛ mli bii lɛ ateŋ mɔ fɛɛ mɔ nitsumɔ ko. Kɛ́ amɛ fɛɛ amɛtsu nitsumɔ ni Yehowa kɛhã amɛ lɛ, weku muu lɛ fɛɛ baaná he sɛɛ, ni miishɛɛ baahi weku lɛ mli. (1 Korintobii 14:33) Yehowa kɛɛ wu lɛ ji weku lɛ yitso. Enɛ tsɔɔ akɛ, Yehowa miikpa gbɛ akɛ ebaakwɛ eŋa kɛ ebii lɛ, ni ejɛ suɔmɔ mli ekɛ gbɛtsɔɔmɔi ahã amɛ. No hewɔ lɛ, wu lɛ baabu bɔ ni ekwɛɔ eweku lɛ ehãa lɛ he akɔntaa ehã Yehowa. Wu ni ji Kristofonyo lɛ kɛ eweku lɛ yeɔ yɛ mlihilɛ kɛ suɔmɔ mli, tamɔ bɔ ni Yesu kɛ asafo lɛ yeɔ lɛ. Kɛ́ wu ko fee nakai lɛ, no tsɔɔ akɛ ebuɔ Yehowa.​—Efesobii 5:23; kwɛmɔ Wiemɔi Komɛi Amligbalamɔ 13.

13. Mɛni ŋa baanyɛ afee kɛtsɔɔ akɛ ebuɔ hegbɛ ni Yehowa kɛhã ewu lɛ?

 ¹³ Yehowa ehã ŋa lɛ hu nitsumɔ ko ni he hiaa ni sa akɛ etsu. Ŋa ni ji Kristofonyo lɛ yeɔ ebuaa ewu lɛ be ni ewu lɛ bɔɔ mɔdɛŋ waa ni etsu esɔ̃ akɛ weku yitso lɛ he nii lɛ. Esa akɛ ekɛ ewu lɛ afee ekome kɛtsɔse amɛbii lɛ. Gbɛ kome ni ebaanyɛ etsɔ nɔ etsɔse ebii lɛ koni amɛjie bulɛ kpo ji, ni lɛ diɛŋtsɛ hu ebaajie bulɛ kpo. (Abɛi 1:8) Ŋa ni ji Kristofonyo lɛ buɔ ewu, ni efiɔ eyiŋkpɛi asɛɛ. Kɛ́ enyaaa yiŋ ko ni ewu lɛ ekpɛ lɛ he po lɛ, ejɛɔ mlihilɛ kɛ bulɛ mli ehãa ewu lɛ leɔ bɔ ni enuɔ he ehãa. Kɛ́ nyɛmi yoo ko wu jeee Odasefonyo lɛ, bei pii lɛ, enáa naagbai krokomɛi efataa naagbai ni gbalashihilɛ mli bii fɛɛ kɛkpeɔ lɛ ahe. Shi kɛ́ etee nɔ esumɔ ewu lɛ ni ebu lɛ lɛ, ekolɛ wɔsɛɛ ko lɛ, ewu lɛ hu baakase Yehowa he nii ni ejá lɛ.​—Kanemɔ 1 Petro 3:1.

14. Mɛni gbekɛbii baanyɛ afee kɛtsɔɔ akɛ amɛbuɔ hegbɛ ni Yehowa kɛhã amɛfɔlɔi lɛ?

¹⁴ Gbekɛbii ajara wa hã Yehowa, ni ehe miihia waa ni abu amɛhe ni atsɔɔ amɛ gbɛ. Kɛ́ gbekɛbii bo amɛfɔlɔi toi lɛ, amɛhãa amɛfɔlɔi náa miishɛɛ. Nɔ ni fe fɛɛ lɛ, no tsɔɔ akɛ amɛbuɔ Yehowa, ni enɛ hãa Yehowa tsui nyɔɔ emli. (Abɛi 10:1) Wekui pii yɛ ni fɔlɔ kome pɛ ji mɔ ni tsɔseɔ bii lɛ. Kɛ́ eba lɛ nakai lɛ, fɔlɔ lɛ kɛ bii lɛ fɛɛ náaa lɛ mlɛo. Shi kɛ́ gbekɛbii lɛ bo amɛmami lɛ loo amɛpapa lɛ toi, ni amɛye amɛbua lɛ lɛ, miishɛɛ baahi amɛweku lɛ mli waa. Weku ko weku ko bɛ ni eye emuu. Shi bɔ fɛɛ bɔ ni weku ko shihilɛ ji lɛ, kɛ́ emli bii lɛ ateŋ mɔ fɛɛ mɔ kɛ Yehowa gbɛtsɔɔmɔi tsu nii lɛ, miishɛɛ baanyɛ aya nɔ ahi weku lɛ mli. Enɛ baawo Yehowa, mɔ ni to wekui fɛɛ ashishi lɛ, hiɛ nyam.​—Efesobii 3:14, 15.

15. Mɛni wɔbaanyɛ wɔfee kɛtsɔɔ akɛ wɔbuɔ mɛi ni Yehowa kɛ hegbɛ ewo amɛdɛŋ yɛ asafo lɛ mli lɛ?

¹⁵ Yehowa kɛ gbɛtsɔɔmɔi hãa wɔ kɛtsɔɔ Kristofoi asafo lɛ nɔ, ni etu Kristofoi asafo lɛ ewo Yesu dɛŋ. (Kolosebii 1:18) Yesu hu ehala “nyɔŋ anɔkwafo kɛ hiɛshikalɔ lɛ” ní ekwɛ Nyɔŋmɔ webii ni yɔɔ shikpɔŋ lɛ nɔ lɛ anɔ. (Mateo 24:45-47) Ŋmɛnɛ lɛ, Gbɛtsɔɔmɔ Kuu lɛ ji mɛi ni sɔmɔɔ akɛ “nyɔŋ anɔkwafo kɛ hiɛshikalɔ lɛ.” Gbɛtsɔɔmɔ Kuu lɛ kɛ nibii fɛɛ ni he hiaa wɔ lɛ hãa wɔ yɛ be ni sa mli koni wɔhemɔkɛyeli lɛ mli awa. Asafoŋ onukpai, asafoŋ sɔɔlɔi, kɛ kpokpaa nɔkwɛlɔi yeɔ amɛbuaa asafoi ni yɔɔ jeŋ fɛɛ lɛ, ni Gbɛtsɔɔmɔ Kuu lɛ kɛ gbɛtsɔɔmɔi hãa amɛ. Sɔ̃ kã nyɛmimɛi hii nɛɛ fɛɛ anɔ akɛ amɛkwɛ wɔ. Amɛbaabu bɔ ni amɛtsuɔ sɔ̃ nɛɛ he nii amɛhãa lɛ he akɔntaa amɛhã Yehowa. No hewɔ lɛ, kɛ́ wɔbu hii nɛɛ, no tsɔɔ akɛ wɔbuɔ Yehowa hu.​—Kanemɔ 1 Tesalonikabii 5:12; Hebribii 13:17; kwɛmɔ Wiemɔi Komɛi Amligbalamɔ 14.

16. Mɛni hewɔ wɔbaanyɛ wɔkɛɛ akɛ mumɔ krɔŋkrɔŋ lɛ nɔ atsɔɔ ahalaa asafoŋ onukpai kɛ asafoŋ sɔɔlɔi lɛ?

¹⁶ Asafoŋ onukpai kɛ asafoŋ sɔɔlɔi lɛ yeɔ amɛbuaa asafoŋ bii lɛ koni amɛya nɔ amɛye Nyɔŋmɔ anɔkwa, ní ekomefeemɔ ahi amɛteŋ. Amɛyeee emuu tamɔ wɔ nɔŋŋ. Shi mɛɛ gbɛ nɔ atsɔɔ ahalaa amɛ? Esa akɛ nyɛmimɛi hii nɛɛ ashɛ taomɔ nii ni yɔɔ Biblia lɛ mli kɛhã asafoŋ onukpai kɛ asafoŋ sɔɔlɔi lɛ ahe. (1 Timoteo 3:1-7, 12; Tito 1:5-9) Yehowa kɛ mumɔ krɔŋkrɔŋ lɛ tsirɛ mɛi ni amɛŋmala taomɔ nii nɛɛ amɛshwie shi yɛ Biblia lɛ mli. Kɛ́ asafoŋ onukpai lɛ miisusu mɔ ko he koni amɛhala lɛ akɛ asafoŋ onukpa loo asafoŋ sɔɔlɔ lɛ, amɛsɔleɔ  ni Yehowa ahã amɛ emumɔ krɔŋkrɔŋ lɛ. Eyɛ faŋŋ akɛ, Yehowa kɛ Yesu diɛŋtsɛ ji mɛi ni kwɛɔ asafo lɛ nɔ. (Bɔfoi 20:28) Hii ni ahala koni amɛkwɛ wɔnɔ ni amɛye amɛbua wɔ lɛ ji nikeenii ni jɛ Nyɔŋmɔ ŋɔɔ.​—Efesobii 4:8.

17. Mɛni bei komɛi lɛ, ehe baahia ni nyɛmi yoo ko afee kɛtsɔɔ akɛ ebuɔ yitsoyeli he gbɛjianɔ ni Yehowa eto lɛ?

¹⁷ Bei komɛi lɛ, ebaanyɛ eba lɛ akɛ asafoŋ onukpa loo asafoŋ sɔɔlɔ ko bɛ ni baatsu nibii komɛi ahe nii yɛ asafo lɛ mli. Kɛ́ eba lɛ nakai lɛ, nyɛmimɛi hii krokomɛi ni abaptisi amɛ baanyɛ aye abua. Shi kɛ́ nyɛmi nuu ni abaptisi lɛ bɛ jɛmɛ lɛ, ekolɛ ehe baahia ni nyɛmi yoo ko atsu nibii nɛɛ ahe nii. Kɛ́ nyɛmi yoo ko miitsu nɔ ko ni esa akɛ nyɛmi nuu ni abaptisi lɛ atsu he nii lɛ he nii lɛ, esa akɛ eha eyitso nɔ, ekolɛ kɛ duku, loo fai. (1 Korintobii 11:3-10) Kɛ́ efee nakai lɛ, no baatsɔɔ akɛ ebuɔ yitsoyeli he gbɛjianɔ ni Yehowa eto yɛ weku lɛ kɛ asafo lɛ mli lɛ.​—Kwɛmɔ Wiemɔi Komɛi Amligbalamɔ 15.

18, 19. (a) Mɛni wɔkaseɔ yɛ Romabii 13:1-7 lɛ mli? (b) Mɛni wɔbaanyɛ wɔfee kɛtsɔɔ akɛ wɔbuɔ amralofoi lɛ?

¹⁸ Ŋmɛnɛ lɛ, Yehowa ehã amralofoi lɛ hegbɛ ko, ni esa akɛ wɔbu amɛ. Amɛtoɔ maji kɛ kpokpai ahe gbɛjianɔ, ni amɛkwɛɔ koni nibii aya lɛ jogbaŋŋ. Agbɛnɛ hu, amɛhãa maŋbii lɛ anine shɛɔ nibii komɛi ni he hiaa amɛ lɛ anɔ. Kristofoi boɔ famɔ ni yɔɔ Romabii 13:1-7 lɛ toi. (Kanemɔ.) Wɔbuɔ “hegbɛi ni yeɔ nɔ” nɛɛ, ni wɔboɔ mlai ni yɔɔ maŋ ni wɔyɔɔ mli lɛ toi. Mlai nɛɛ baanyɛ asa wɔweku, wɔnitsumɔ, loo nibii ni wɔyɔɔ lɛ ahe. Akɛ nɔkwɛmɔnɔ lɛ, wɔwoɔ too, ni wɔkɛ saji ni amralofoi  lɛ taoɔ yɛ wɔhe lɛ hãa amɛ. Shi kɛ́ amralofoi lɛ bi ni wɔfee nɔ ko ni teɔ shi ewoɔ Nyɔŋmɔ mlai lɛ, mɛni esa akɛ wɔfee? Bɔfo Petro kɛɛ akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.”​—Bɔfoi 5:28, 29.

¹⁹ Be fɛɛ be ni ehe baahia ni wɔkɛ amralofoi tamɔ kojolɔi loo polisifoi ashãra lɛ, esa akɛ wɔjie bulɛ kpo. Kristofoi oblahii kɛ oblayei buɔ amɛtsɔɔlɔi kɛ mɛi krokomɛi ni tsuɔ nii yɛ amɛskul lɛ. Wɔbuɔ wɔnitsumɔtsɛmɛi kɛji mɛi krokomɛi ni wɔkɛtsuɔ nii lɛ po efeee nakai. Bɔfo Paulo fee nɔ ko ni tamɔ nakai. Ebu amralofoi lɛ be ni nakai feemɔ wa hã lɛ po. (Bɔfoi 26:2, 25) Kɛ́ mɛi kɛ wɔ yeee jogbaŋŋ po lɛ, esa akɛ wɔjie bulɛ kpo.​—Kanemɔ Romabii 12:17, 18; 1 Petro 3:15.

20, 21. Kɛ́ wɔjie bulɛ kpo wɔtsɔɔ mɛi krokomɛi lɛ, mɛɛ nibii kpakpai jɛɔ mli kɛbaa?

²⁰ Mɛi ni yɔɔ je lɛ mli lɛ ateŋ mɛi pii ejieee bulɛ kpo amɛtsɔɔɔ mɛi krokomɛi. Shi esoro Yehowa webii kwraa. Wɔtswa wɔfai shi akɛ, wɔbaabu mɔ fɛɛ mɔ. Wɔkɛ gbɛtsɔɔmɔ ni bɔfo Petro kɛhã nɛɛ tsuɔ nii, akɛ: “Nyɛkɛ woo ahãa gbɔmɛi srɔtoi fɛɛ.” (1 Petro 2:17) Kɛ́ wɔbuɔ mɛi krokomɛi lɛ, amɛnaa. Yesu wie akɛ: “Nyɛhãa nyɛla lɛ atsoa yɛ gbɔmɛi ahiɛ, koni amɛna nyɛnitsumɔi kpakpai lɛ, ni amɛwo nyɛ-Tsɛ . . . lɛ hiɛ nyam.”​—Mateo 5:16.

²¹ Kɛ́ wɔjie bulɛ kpo yɛ wɔshihilɛ mli fɛɛ, wɔweku lɛ mli jio, asafo lɛ mli jio lɛ, wɔnɔkwɛmɔnɔ kpakpa lɛ baaye abua mɛi krokomɛi ni amɛbakase Yehowa he nii. Ni kɛ́ wɔjie bulɛ kpo wɔtsɔɔ mɛi krokomɛi lɛ, no tsɔɔ akɛ wɔbuɔ Yehowa hu. Enɛ hãa Yehowa náa miishɛɛ, ni enaa akɛ wɔsumɔɔ lɛ.