NIKASEMƆ 28
Bileam Teji Lɛ Wie
Israelbii lɛ kɛ aaafee afii 40 efã gbɛ, ni amɛkpãtã maji wuji pii ahiɛ. Bianɛ lɛ, amɛbashɛ Moab ŋa lɛ nɔ yɛ Yordan Faa lɛ bokãgbɛ, ni eshwɛ fioo ni amɛbaashɛ Shiwoo Shikpɔŋ lɛ nɔ. Be ni Balak, ni ji Moab maŋtsɛ lɛ nu akɛ Israelbii lɛ ebɛŋkɛ lɛ lɛ, etsui fã. Eshe gbeyei akɛ amɛbaahe eshikpɔŋ lɛ yɛ edɛŋ. No hewɔ lɛ, eyatsɛ nuu ko ni atsɛɔ lɛ Bileam koni eba Moab ni ebalomɔ Israelbii lɛ, loo ebawie ni nɔ ko fɔŋ aba amɛnɔ.
Shi Yehowa kɛɛ Bileam akɛ: ‘Kaayalomɔ Israelbii lɛ.’ No hewɔ lɛ, Bileam eyaaa. Maŋtsɛ Balak saa etsɛ lɛ nɔ ni ji shii enyɔ nɔ, ni ewo lɛ shi akɛ ebaahã lɛ nɔ fɛɛ nɔ ni esumɔɔ. Shi loloolo lɛ, Bileam eyaaa. Sɛɛ mli lɛ, Nyɔŋmɔ kɛɛ lɛ akɛ: ‘Obaanyɛ oya, shi nɔ ni makɛɛ bo akɛ owie lɛ pɛ esa akɛ owie.’
Bileam ho eta eteji lɛ nɔ, ni ekɛ ehiɛ tsɔɔ wuoyigbɛ akɛ eeya Moab. Eto eyiŋ akɛ ebaalomɔ Israelbii lɛ, eyɛ mli akɛ Yehowa ekɛɛ lɛ akɛ ekafee nakai. Yehowa bɔfo badamɔ gbɛ lɛ nɔ shii etɛ sɔŋŋ. Bileam enaaa ŋwɛibɔfo lɛ, shi eteji lɛ na lɛ. Be klɛŋklɛŋ ni teji lɛ na lɛ lɛ, eje gbɛ lɛ nɔ kɛtee ŋa ko mli. Be ni teji lɛ na lɛ nɔ ni ji shii enyɔ nɔ lɛ, ekɛ ehe yakpɛtɛ gbogbo ko, ni emia Bileam nane kɛkpɛtɛ gbogbo lɛ. Be ni ena lɛ nɔ ni ji naagbee nɔ lɛ, eho ebu shi yɛ gbɛ lɛ teŋ. Shii etɛ lɛ fɛɛ lɛ, Bileam kɛ tso yi teji lɛ.
Be ni Bileam yi teji lɛ nɔ ni ji shii etɛ nɔ lɛ sɛɛ lɛ, Yehowa hã teji lɛ wie. Teji lɛ bi Bileam akɛ: ‘Mɛni hewɔ oyiɔ mi sɔŋŋ nakai?’ Bileam hã lɛ hetoo akɛ: ‘Ofee mi buulu. Eji mihiɛ klante kulɛ, magbe bo.’ Teji lɛ kɛɛ lɛ akɛ: ‘Ota minɔ afii abɔ. Ani mifee bo nɛkɛ pɛŋ?’
Kɛkɛ ni Yehowa hã Bileam na ŋwɛibɔfo lɛ. Ŋwɛibɔfo lɛ bi lɛ akɛ: ‘Ani Yehowa ekɛɛɛ bo akɛ okayalomɔ Israel?’ Bileam kɛɛ lɛ akɛ: ‘Mifee esha. Maku misɛɛ maya shĩa.’ Shi ŋwɛibɔfo lɛ kɛɛ lɛ akɛ: ‘Obaanyɛ oya Moab, shi nɔ ni Yehowa baakɛɛ bo akɛ owie lɛ pɛ esa akɛ owie.’
Ani Bileam kase nɔ ko yɛ sane nɛɛ mli? Dabi. Be ni Bileam tee Moab lɛ, eka akɛ ebaalomɔ Israel shii etɛ sɔŋŋ. Shi shii etɛ lɛ fɛɛ lɛ, Yehowa hã ejɔɔ amɛ moŋ. Sɛɛ mli lɛ, Israelbii lɛ yatutua Moab, ni amɛgbe Bileam. Eji Bileam bo Yehowa toi kɛjɛ shishijee kulɛ, ani nɛkɛ ebaayagbe naa?
“Nyɛgbɛa nyɛhiŋmɛiiaŋ, ni nyɛhiɛ ahia nyɛhe nɔ yɛ amimyeli srɔtoi fɛɛ he, ejaakɛ kɛji gbɔmɔ ená nii babaoo ni eteke nɔ po lɛ, jeee nibii ni eyɔɔ lɛ hãa lɛ wala.”—Luka 12:15
