Bei komɛi lɛ, naagbai kɛ shihilɛi ni mli wawai ni wɔkɛkpeɔ lɛ baanyɛ ahao wɔ aahu akɛ wɔnyɛɛɛ nɔ ko wɔfee. Shi yɛ bei ni tamɔ nɛkɛ lɛ amli lɛ, kɛ́ wɔjwɛŋ jamɔ krɔŋŋ ni abaato shishi ekoŋŋ lɛ he ninaa ni Ezekiel tsɔɔ mli fitsofitso lɛ nɔ lɛ, ebaanyɛ ewaje wɔ. Mɛni hewɔ wɔkɛɔ nakai? Wɔkaseɔ yɛ gbalɛ nɛɛ mli akɛ, bɔ fɛɛ bɔ ni fee lɛ, Nyɔŋmɔ ni yɔɔ hewalɛ ni emuɔ wala mumɔ ewoɔ wui ni egboi amli, ni amɛbaa wala mli ekoŋŋ lɛ baanyɛ ehã wɔ hewalɛ ni he hiaa wɔ lɛ ni wɔkɛtsu naagbai ni wɔkɛkpeɔ lɛ ahe nii​—naagbai po ni yɛ adesai ahiɛ lɛ, amɛtamɔ nɔ ni anyɛŋ atsu amɛhe nii lɛ.​—Kanemɔ Lala 18:29; Fip. 4:13.

Wɔkaiɔ hu akɛ afii ohai abɔ dani abaafɔ Ezekiel lɛ, gbalɔ Mose wie akɛ, Yehowa yɛ hewalɛ ni eesumɔ hu ni ekɛ ehewalɛ lɛ aye abua ewebii lɛ. Mose ŋma akɛ: “Nyɔŋmɔ ji abobaahe kɛjɛ blema tɔ̃ɔ, enaanɔ niji lɛ yɛ oshishi.” (5 Mo. 33:27) Hɛɛ, wɔbaanyɛ wɔná nɔmimaa akɛ, kɛ́ wɔkɛ wɔhiɛ fɔ̃ Yehowa nɔ yɛ haomɔ beiaŋ lɛ, ekɛ esuɔmɔ niji lɛ baawo wɔshishi kɛwó wɔnɔ blɛoo, ni ebaaye ebua wɔ ni wɔdamɔ wɔnaji anɔ ekoŋŋ.​—Eze. 37:10.