ANI ole mɔ ni abifao bibioo nɛɛ ji? Hɛɛ, Yesu ni. Afɔ lɛ etsɛko yɛ kooloi atsũ ko mli. Kooloi atsũ ji he ni kooloi wɔɔ. Maria kɛ Yesu miifɔ̃ nɔ ni akɛ tejii kɛ kooloi krokomɛi lɛ aniyenii woɔ mli ni amɛyeɔ lɛ mli. Shi mɛni hewɔ Maria kɛ Yosef kɛ kooloi lɛ yɔɔ biɛ lɛ? Biɛ jeee he ni esa akɛ afɔ abifao yɛ, aloo nakai eji?

Dabi, ejeee nakai. Shi nɔ hewɔ ni amɛyɔɔ biɛ lɛ nɛ: Roma nɔyelɔ, Kaisare Augusto, fee mla akɛ mɔ fɛɛ mɔ aku esɛɛ kɛya maŋ mli he ni afɔ lɛ yɛ lɛ koni eyaŋma egbɛi yɛ wolo mli. Ojogbaŋŋ, biɛ yɛ Betlehem ji he ni afɔ Yosef yɛ. Shi beni ekɛ Maria bashɛ jɛmɛ lɛ, amɛnáaa tsũ yɛ he ko he ko. No hewɔ lɛ esa akɛ amɛkɛ kooloi lɛ ahi biɛ. Ni nɛkɛ gbi pɔtɛɛ nɛɛ nɔ Maria fɔ Yesu! Shi, taakɛ onaa lɛ, eyɛ jogbaŋŋ.

Ani oona tookwɛlɔi ni baa amɛbakwɛ Yesu lɛ? Amɛkɛ amɛtooi yɛ ŋa nɔ nyɔɔŋ mli amɛmiikwɛ amɛ, ni la ko ni tsoɔ waa kpɛ kɛbɔle amɛhe. Ŋwɛibɔfo ni! Tookwɛlɔi lɛ she gbeyei waa. Shi bɔfo lɛ kɛɛ amɛ akɛ: ‘Nyɛkashea gbeyei! Mihiɛ miishɛɛ sane ko kɛha nyɛ. Áfɔ Kristo, ni ji Nuŋtsɔ lɛ ŋmɛnɛ, yɛ Betlehem. Lɛ ebaahere gbɔmɛi lɛ ayiwala! Nyɛbaana ni akɛ mama ebala ehe ni ekã kooloi aniyenii anɔ̃ mli.’ Trukaa nɔŋŋ kɛkɛ ni bɔfoi pii ba ni amɛjie Nyɔŋmɔ yi. No hewɔ lɛ, amrɔ nɔŋŋ ni tookwɛlɔi nɛɛ kɛ oyaiyeli tee ni amɛyatao Yesu, ni amrɔ nɛɛ amɛna lɛ.

Ani ole nɔ hewɔ ni Yesu ji mɔ krɛdɛɛ lɛ? Ani ole mɔ diɛŋtsɛ ni eji? Kaimɔ akɛ, wɔgba Nyɔŋmɔ klɛŋklɛŋ Bi lɛ he sane yɛ wolo nɛɛ klɛŋklɛŋ sane lɛ mli. Nɛkɛ Binuu nɛɛ kɛ Yehowa tsu nii ni akɛfee ŋwɛi kɛ shikpɔŋ kɛ nibii krokomɛi fɛɛ. No hewɔ lɛ, mɔ ni Yesu ji nɛ!

Hɛɛ, Yehowa jie e-Bi lɛ wala yɛ ŋwɛi ni ekɛwo Maria musu mli. Amrɔ nɔŋŋ kɛkɛ ni abifao lɛ bɔi dalɛ yɛ emusu mli tamɔ bɔ ni gbekɛbii krokomɛi daraa yɛ amɛ nyɛmɛi amusuŋ lɛ. Shi nɛkɛ gbekɛ nɛɛ ji Nyɔŋmɔ Bi. Yɛ naagbee lɛ afɔ Yesu yɛ biɛ yɛ kooloi atsũ mli yɛ Betlehem. Ani ona nɔ hewɔ ni ŋwɛibɔfoi lɛ amii shɛ amɛhe waa ni amɛnyɛ amɛkɛɛ gbɔmɛi lɛ akɛ afɔ Yesu lɛ?