1, 2. Mɛni hewɔ bei pii lɛ ehi akɛ wɔɔbi saji lɛ?

ANI okadi gbɛ ni gbekɛbii tsɔɔ nɔ amɛbiɔ saji lɛ pɛŋ? Amɛteŋ mɛi babaoo yɛ ni kɛ́ amɛle wiemɔ nɔŋŋ pɛ lɛ, amɛbiɔ saji. Amɛkwɛɔ ohiɛ gãa ni amɛbiɔ saji tamɔ: Mɛni hewɔ atatu lɛ yɔɔ bluu lɛ? Mɛni akɛfee ŋulamii lɛ? Namɔ tsɔɔ loofɔji lɛ bɔ ni aláa ahaa? Ekolɛ obaabɔ mɔdɛŋ akɛ oooha hetoo, shi jeee bɛ fɛɛ be enɛ feemɔ yɔɔ mlɛo. Ekolɛ hetoo ni hi fe fɛɛ ni obaaha lɛ po baaha amɛbi sane kroko, ni ji: Mɛni hewɔ?

² Jeee gbekɛbii pɛ biɔ saji. Wɔyaa nɔ wɔbiɔ saji be mli ni wɔdaraa lɛ. Wɔfeɔ nakai be mli ni wɔmiiya he ko ni wɔleee jɛmɛ, wɔbiɔ saji koni wɔkɛle osharai ni ebaabi ni wɔtsi wɔhe kɛjɛ he, loo koni wɔkɛle sane ko. Shi, etamɔ nɔ ni mɛi babaoo ekpa saji abimɔ, titri lɛ saji ni he hiaa waa lɛ. Kɛ́ hooo lɛ, amɛkpaa hetooi lɛ ataomɔ.

3. Mɛni hewɔ mɛi babaoo ebɔɔɔ mɔdɛŋ dɔŋŋ akɛ amɛaatao sanebimɔi ni he hiaa waa lɛ ahetooi lɛ?

³ Susumɔ sanebimɔ ni yɔɔ wolo nɛɛ sɛɛ, saji ni abibii yɛ  ehiɛkpamɔ wiemɔ lɛ mli, loo  sanebimɔi ni akɛje yitso nɛɛ shishi lɛ ahe okwɛ. Enɛɛmɛi ji sanebimɔi ni he hiaa waa ni obaanyɛ obi lɛ ateŋ ekomɛi. Kɛlɛ, mɛi babaoo anijiaŋ eje wui yɛ mɔdɛŋ ni amɛbɔɔ kɛtaoɔ sanebimɔi nɛɛ ahetooi lɛ mli. Mɛni hewɔ? Ani Biblia lɛ yɛ sanebimɔi nɛɛ ahetooi? Mɛi komɛi nuɔ he akɛ emli saji ahetooi lɛ ashishinumɔ wa. Mɛi krokomɛi nuɔ he akɛ saji ni amɛaabi lɛ baanyɛ awo amɛ hiɛgbele loo eha amɛhiɛ ashwie shi. Ni mɛi komɛi hu susuɔ akɛ esa akɛ ashi sanebimɔi ni tamɔ enɛɛmɛi lɛ aha jamɔŋ hiɛnyiɛlɔi kɛ tsɔɔlɔi. Bo hu te osusuɔ tɛŋŋ?

4, 5. Mɛni ji shihilɛ mli sanebimɔi komɛi ni he hiaa waa ni wɔbaanyɛ wɔbi, ni mɛni hewɔ esa akɛ wɔtao amɛhetooi?

⁴ Eka shi faŋŋ akɛ oosumɔ ni oná hetooi oha shihilɛ mli sanebimɔi ni he hiaa waa lɛ. Ŋwanejee ko bɛ he akɛ bei komɛi lɛ obiɔ akɛ: ‘Mɛni ji yiŋtoo ni yɔɔ shihilɛ sɛɛ? Ani shihilɛ lɛ fɛɛ nɛ? Te Nyɔŋmɔ su diɛŋtsɛ ji ha tɛŋŋ?’ Nilee yɛ mli akɛ ooobi saji ni tamɔ enɛɛmɛi, ni ehe miihia ni oya nɔ otao sanebimɔi nɛɛ ahetooi aahu kɛyashi obaaná hetooi ni haa mɔ tsui nyɔɔ emli, ni anyɛɔ akɛ he fɔ̃ɔ nɔ. Yesu Kristo ni ji tsɔɔlɔ ni ehé gbɛi waa lɛ kɛɛ akɛ: ‘Nyɛyaa nɔ nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele aha nyɛ.’—Mateo 7:7.

⁵ Kɛji akɛ ‘otee nɔ otao’ sanebimɔi ni he hiaa lɛ ahetooi lɛ, obaana akɛ sɛɛnamɔ babaoo jɛɔ enɛ feemɔ mli kɛbaa. (Abɛi 2:1-5) Yɛ nɔ ni ekolɛ mɛi krokomɛi ekɛɛ bo lɛ fɛɛ sɛɛ lɛ, sanebimɔi lɛ ahetooi yɛ, ni obaanyɛ ona—yɛ Biblia lɛ mli. Hetooi lɛ ashishinumɔ waaa. Nɔ ni fe fɛɛ lɛ, amɛhaa mɔ náa hiɛnɔkamɔ kɛ miishɛɛ. Ni hetooi nɛɛ baanyɛ aye abua bo koni oná shihilɛ ni haa mɔ tsui nyɔɔ emli amrɔ nɛɛ. Klɛŋklɛŋ lɛ, ha wɔsusu sanebimɔ ko ni gbáa mɛi pii anaa lɛ he wɔkwɛ.

6. Mɛni hewɔ mɛi babaoo kɛɔ akɛ Nyɔŋmɔ susuuu wɔhe kɛji akɛ aawie adesai apiŋmɔ he lɛ?

⁶ Mɛi babaoo baaha sanebimɔ nɛɛ hetoo akɛ hɛɛ. Amɛkɛɔ  akɛ, ‘Eji Nyɔŋmɔ susuɔ wɔhe kulɛ, ani nɛkɛ jeŋ baafee?’ Wɔnaa tawuu, nyɛ̃ɛ, kɛ nɔnaa miiya nɔ yɛ je lɛŋ he fɛɛ he. Ni akɛ aŋkroaŋkroi lɛ, wɔhe yeɔ, wɔkɛ amanehulu kpeɔ, ni wɔsuɔlɔi gboiɔ. Enɛ hewɔ lɛ, mɛi babaoo kɛɔ akɛ, ‘Eji Nyɔŋmɔ susuɔ wɔ kɛ wɔnaagbai ahe kulɛ, ani etsiŋ nibii nɛɛ anaa koni amɛkaba wɔnɔ?’

7. (a) Mɛɛ gbɛ nɔ jamɔŋ hiɛnyiɛlɔi eha mɛi babaoo ená susumɔ akɛ Nyɔŋmɔ bɛ musuŋtsɔlɛ? (b) Mɛni diɛŋtsɛ Biblia lɛ tsɔɔ yɛ kaai ni baanyɛ aba wɔnɔ lɛ ahe?

⁷ Nɔ ni fiteɔ sane lɛ kwraa ji akɛ, bei komɛi lɛ jamɔŋ tsɔɔlɔi haa mɛi susuɔ akɛ Nyɔŋmɔ bɛ musuŋtsɔlɛ. Yɛ mɛɛ gbɛ nɔ? Kɛji akɛ oshara ba mɛi anɔ lɛ, amɛkɛɔ akɛ eji Nyɔŋmɔ suɔmɔnaa nii. Yɛ enɛ feemɔ mli lɛ, tsɔɔlɔi ni tamɔ nɛkɛ lɛ shwaa Nyɔŋmɔ yɛ nibii fɔji ni baa lɛ ahe. Ani nibii ni awieɔ yɛ Nyɔŋmɔ he nɛɛ ji anɔkwale? Mɛni Biblia lɛ tsɔɔ diɛŋtsɛ? Yakobo 1:13 lɛ haa hetoo akɛ: “Kɛji aaka mɔ ko lɛ, ekakɛɛ akɛ: Nyɔŋmɔ ŋɔɔ ajɛ aka mi. Ejaakɛ Nyɔŋmɔ lɛ akaaa lɛ yɛ nifɔji agbɛfaŋ, ni lɛ diɛŋtsɛ hu ekaaa mɔ ko.” No hewɔ lɛ, jeee Nyɔŋmɔ haa efɔŋfeemɔ ni onaa yɛ shihilɛ ni ebɔle bo kɛkpe lɛ mli lɛ baa. (Hiob 34:10-12) Eji anɔkwale akɛ eŋmɛɔ gbɛ ni nibii fɔji yaa nɔ. Shi srɔtofeemɔ agbo yɛ gbɛ ni aŋmɛɔ koni nɔ ko aba kɛ mɔ ni hɔ nɔ ni ba lɛ sɛɛ lɛ teŋ.

8, 9. (a) Te obaafee srɔtofeemɔ ni yɔɔ efɔŋfeemɔ gbɛ ni aŋmɛɔ kɛ mɔ ni hɔ sɛɛ lɛ teŋ lɛ he nɔkwɛmɔnɔ oha tɛŋŋ? (b) Mɛni hewɔ ebafeŋ nɔ ni ja akɛ wɔɔwie wɔshi yiŋtoo hewɔ ni Nyɔŋmɔ eŋmɛ adesai agbɛ koni amɛkɔ gbɛ ni ejaaa lɛ?

⁸ Ákɛ nɔkwɛmɔnɔ lɛ, susumɔ tsɛ nilelɔ ko ni yɔɔ suɔmɔ kɛ ebinuu ni eda shi ekã he ekɛ efɔlɔi yɔɔ shĩa lɛ he okwɛ. Beni bi lɛ tse atua ni ekpɛ eyiŋ akɛ eeshi shĩa lɛ, etsɛ etsĩii enaa. Bi lɛ yadi shihilɛ gbɛ ni esaaa sɛɛ ni ekɛ ehe yawo haomɔ mli. Ani tsɛ lɛ ji mɔ ni hɔ ebi lɛ naagba lɛ sɛɛ? Dabi. (Luka 15:11-13) Nakai nɔŋŋ Nyɔŋmɔ etsĩii adesai anaa beni amɛhala gbɛ ni ejaaa lɛ, shi jeee lɛ ji mɔ ni hɔ naagbai ni jɛ mli kɛba lɛ sɛɛ. Belɛ, eka shi faŋŋ akɛ, ebafeŋ nɔ ni ja akɛ abaashwa Nyɔŋmɔ yɛ naagbai ni adesai kɛkpeɔ lɛ ahe.

 ⁹ Nyɔŋmɔ yɛ yiŋtoi kpakpai ahewɔ ni eŋmɛ adesai agbɛ koni amɛkɔ gbɛ ni ejaaa lɛ. Ákɛ wɔ-Bɔlɔ ni yɔɔ nilee kɛ hewalɛ lɛ, ehe ehiaaa ni etsɔɔ eyiŋtoi lɛ amli etsɔɔ wɔ. Shi kɛlɛ, Nyɔŋmɔ jɛɔ suɔmɔ mli efeɔ nakai. Obaakase yiŋtoi nɛɛ ahe nii babaoo yɛ Yitso 11 lɛ mli. Shi, ná nɔmimaa akɛ jeee Nyɔŋmɔ kɛ naagbai ni wɔkɛkpeɔ lɛ baa wɔnɔ. Nɔ ni tamɔɔɔ nakai lɛ, ekɛ amɛnaa tsabaa kome pɛ ni yɔɔ lɛ he hiɛnɔkamɔ haa wɔ!—Yesaia 33:2.

10. Mɛni hewɔ wɔbaanyɛ wɔná hekɛnɔfɔɔ yɛ Nyɔŋmɔ mli akɛ ebaajie nibii ni jɛɔ efɔŋfeemɔ mli kɛbaa lɛ fɛɛ kɛya lɛ?

¹⁰ Kɛfata he lɛ, Nyɔŋmɔ yɛ krɔŋkrɔŋ. (Yesaia 6:3) Enɛ tsɔɔ akɛ eyɛ krɔŋŋ ni ehe tse. Anaaa nɔ fɔŋ ko yɛ emli. No hewɔ lɛ, wɔbaanyɛ wɔkɛ wɔhe afɔ̃ enɔ kwraa kɛmɔ shi. Wɔnyɛŋ wɔná hekɛnɔfɔɔ ni tamɔ nakai nɔŋŋ yɛ adesai, ní bei komɛi lɛ amɛyeee anɔkwa lɛ amli. Bei pii lɛ, adesa ni hiɛ gbɛnaa ní eyeɔ anɔkwa fe fɛɛ lɛ po bɛ hewalɛ ni ekɛaatsake nibii gbohii ni jɛɔ mɛi fɔji anifeemɔi amli kɛbaa lɛ. Shi Nyɔŋmɔ ji mɔ ni yɔɔ hewalɛ ni fe fɛɛ. Ebaanyɛ ejie nibii gbohii fɛɛ ni efɔŋfeemɔ kɛba adesai anɔ lɛ kɛya, ni ebaafee nakai hu. Kɛ́ Nyɔŋmɔ tsu he nii lɛ, ekɛ efɔŋfeemɔ baaba naagbee kwraa kɛya naanɔ!—Lala 37:9-11.

11. (a) Te Nyɔŋmɔ nuɔ jalɛ sane ni ayeee lɛ he ehaa tɛŋŋ? (b) Te Nyɔŋmɔ nuɔ amanehulu ni okɛkpeɔ lɛ he ehaa tɛŋŋ?

¹¹ Shi amrɔ nɛɛ, te Nyɔŋmɔ nuɔ nibii ni yaa nɔ yɛ je lɛŋ kɛ oshihilɛ mli lɛ he ehaa tɛŋŋ? Ojogbaŋŋ, Biblia lɛ tsɔɔ akɛ Nyɔŋmɔ “sumɔɔ jalɛsaneyeli.” (Lala 37:28) No hewɔ lɛ esusuɔ ekpakpa kɛ efɔŋ ni adesai feɔ mɛi lɛ ahe waa. Enyɛ̃ɔ jalɛ sane ni ayeee lɛ fɛɛ. Biblia lɛ kɛɔ akɛ beni je lɛŋ yi obɔ kɛ efɔŋfeemɔ yɛ bei ni eho lɛ amli lɛ, ‘edɔ Nyɔŋmɔ yɛ etsui mli.’ (1 Mose 6:5, 6) Nyɔŋmɔ tsakeko. (Maleaki 3:6) Ekã he enáaa amanehului ni yaa nɔ yɛ jeŋ fɛɛ lɛ he miishɛɛ. Ni Nyɔŋmɔ sumɔɔɔ ni gbɔmɛi apiŋ. Biblia lɛ kɛɔ akɛ ‘esusuɔ ohe.’—1 Petro 5:7.

12, 13. (a) Mɛni hewɔ wɔyɔɔ sui kpakpai tamɔ suɔmɔ lɛ, ni suɔmɔ náa susumɔ ni wɔhiɛ yɛ bɔ ni je lɛŋ shihilɛ yɔɔ ha lɛ nɔ hewalɛ yɛ mɛɛ gbɛ nɔ? (b) Mɛni hewɔ obaanyɛ oná nɔmimaa akɛ Nyɔŋmɔ baatsu je lɛŋ naagbai lɛ ahe nii diɛŋtsɛ lɛ?

 ¹² Te wɔɔfee tɛŋŋ wɔná nɔmimaa akɛ Nyɔŋmɔ sumɔɔɔ akɛ wɔnaa amanehulu lɛ? Naa odaseyelii krokomɛi ni tsɔɔ nakai. Biblia lɛ tsɔɔ akɛ abɔ gbɔmɔ yɛ Nyɔŋmɔ subaŋ nɔ. (1 Mose 1:26) No hewɔ lɛ, sui kpakpai ni wɔyɔɔ lɛ ji odaseyeli ni tsɔɔ akɛ Nyɔŋmɔ yɛ sui kpakpai. Ákɛ nɔkwɛmɔnɔ lɛ, ani mɛi ni efeko nɔ ko ni naa amanehulu lɛ asane haoɔ bo? Kɛji akɛ osusuɔ jalɛ sane ni ayeee ni tamɔ nɛkɛ he lɛ, no lɛ ná nɔmimaa akɛ Nyɔŋmɔ nuɔ he waa ehaa amɛ yɛ gbɛ ni da nɔ.

¹³ Sui ni hi fe fɛɛ yɛ adesai ahe lɛ ateŋ ekome ji nyɛmɔ ni wɔyɔɔ ni wɔkɛjieɔ suɔmɔ kpo wɔtsɔɔ lɛ. Enɛ hu jieɔ bɔ ni Nyɔŋmɔ ji lɛ kpo. Biblia lɛ tsɔɔ akɛ, “Nyɔŋmɔ lɛ, suɔmɔ ji lɛ.” (1 Yohane 4:8) Wɔjieɔ suɔmɔ kpo akɛni Nyɔŋmɔ jieɔ suɔmɔ kpo etsɔɔ lɛ hewɔ. Ani suɔmɔ baatsirɛ bo koni ofo piŋmɔ kɛ jalɛ sane ni ayeee ni onaa yɛ je lɛŋ lɛ sɛɛ? Ani obaafo sɛɛ kɛji akɛ oyɛ hewalɛ ni okɛaafee nakai? Eka shi faŋŋ akɛ obaafee nakai! Nakai nɔŋŋ obaanyɛ oná nɔmimaa akɛ Nyɔŋmɔ kɛ amanehulu kɛ jalɛ sane ni ayeee baaba naagbee. Shiwoi ni atsĩ tã yɛ wolo nɛɛ hiɛkpamɔ wiemɔ lɛ mli lɛ jeee lamɔ loo hiɛnɔkamɔ folo ko. Nyɔŋmɔ shiwoi lɛ baaba mli anɔkwale! Kɛlɛ, bɔni afee ni oná shiwoi nɛɛ amli hemɔkɛyeli lɛ, ehe miihia ni ole Nyɔŋmɔ ni kɛ nakai shiwoi lɛ ha lɛ he nii babaoo.

14. Mɛni ji Nyɔŋmɔ gbɛi, ni mɛni hewɔ esa akɛ wɔkɛtsu nii?

¹⁴ Mɛni obaafee kɛji oosumɔ ni mɔ ko ale bo jogbaŋŋ? Ani otsɔɔŋ lɛ ogbɛi? Ani Nyɔŋmɔ yɛ gbɛi? Jamɔi pii kɛɔ akɛ egbɛi ji “Nyɔŋmɔ” loo “Nuŋtsɔ,” shi enɛɛmɛi jeee egbɛi diɛŋtsɛ. Amɛji sablai, tamɔ bɔ ni “maŋtsɛ” kɛ “nɔyelɔ” ji sablai lɛ nɔŋŋ. Biblia lɛ tsɔɔ akɛ Nyɔŋmɔ yɛ sablai pii. Sablai nɛɛ ateŋ ekomɛi ji “Nyɔŋmɔ” kɛ “Nuŋtsɔ.” Shi kɛlɛ, Biblia lɛ tsɔɔ hu akɛ Nyɔŋmɔ yɛ lɛ diɛŋtsɛ egbɛi ni ji Yehowa. Lala 83:19 lɛ kɛɔ akɛ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” Kɛji akɛ nakai gbɛi lɛ bɛ Biblia  shishitsɔɔmɔ ni oyɔɔ lɛ mli lɛ, ekolɛ obaasumɔ ni okwɛ Saji Krokomɛi ni Fata He ni yɔɔ wolo nɛɛ baafa 195-197 lɛ amli koni okɛle nɔ hewɔ ni eba lɛ nakai. Anɔkwa sane ji akɛ Nyɔŋmɔ gbɛi lɛ jeɔ kpo shii akpei abɔ yɛ blema Bibliai ni akɛ niji ŋmala lɛ amli. No hewɔ lɛ, Yehowa miisumɔ ni ole egbɛi koni okɛtsu nii. Wɔbaanyɛ wɔkɛɛ akɛ, etsɔɔ Biblia lɛ nɔ ejieɔ ehe shi etsɔɔ bo.

15. Mɛni gbɛi ni ji Yehowa lɛ shishi tsɔɔ?

¹⁵ Nyɔŋmɔ ha lɛ diɛŋtsɛ ehe gbɛi ko ni hiɛ shishinumɔ diɛŋtsɛ. Nyɔŋmɔ gbɛi ni ji Yehowa lɛ shishi tsɔɔ akɛ ebaanyɛ eha shiwoi fɛɛ ni ekɛha lɛ aba mli, ni ebaanyɛ etsu nibii fɛɛ ni ekpɛɔ eyiŋ yɛ he lɛ ahe nii. * Nyɔŋmɔ gbɛi lɛ yɛ srɔto, esoro  no kwraa. Lɛ pɛ atsɛɔ lɛ nakai. Yehowa yɛ srɔto kwraa yɛ gbɛ̀i srɔtoi anɔ. Yɛ mɛɛ gbɛ nɔ?

16, 17. Mɛni wɔbaanyɛ wɔkase kɛjɛ Yehowa he yɛ esablai ni nyiɛ sɛɛ nɛɛ amli: (a) “Ofe”? (b) “naanɔi amaŋtsɛ”? (d) “Bɔlɔ”?

¹⁶ Wɔna akɛ Lala 83:19 lɛ wieɔ Yehowa he akɛ: “Bo [pɛ] ji mɔ ni kwɔ fe fɛɛ.” Nakai nɔŋŋ Yehowa pɛ ji mɔ ni awieɔ ehe akɛ “Ofe.” Kpojiemɔ 15:3 lɛ kɛɔ akɛ: “Onitsumɔi lɛ dara ni amɛyɛ naakpɛɛ, Nuŋtsɔ Nyɔŋmɔ Ofe; ogbɛ̀i lɛ ja ni anɔkwa ji amɛ, bo jeŋmaji lɛ a-Maŋtsɛ.” Sabla ni ji “Ofe lɛ” tsɔɔ wɔ akɛ Yehowa ji hewalɔ ni fe fɛɛ ni yɔɔ. Mɔ ko kɛ lɛ yeee egbɔ yɛ hewalɛ mli; ehewalɛ lɛ nɔ kwɔ fe hewalɛi fɛɛ. Atsɛ Yehowa yɛ 1 Timoteo 1:17 lɛ akɛ “naanɔi amaŋtsɛ.” Ni Sabla ni ji “naanɔi amaŋtsɛ” lɛ kaiɔ wɔ akɛ Yehowa yɛ srɔto kwraa yɛ shishinumɔ kroko naa. Lɛ pɛ ji mɔ ni ehi shi bei fɛɛ. Lala 90:2 lɛ kɛɔ akɛ: “Bo ji Mawu kɛjɛ naanɔ kɛyaa naanɔ.” Susumɔ nɛɛ haa mɔ naa kpɛɔ ehe, aloo jeee nakai?

¹⁷ Yehowa yɛ srɔto hu kɛ shishinumɔ akɛ lɛ pɛ ji Bɔlɔ. Kpojiemɔ 4:11 lɛ kaneɔ akɛ: “Nuŋtsɔ, bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” Nɔ fɛɛ nɔ ni obaanyɛ osusu he—kɛjɛ mumɔŋ bɔɔ nii ni anaaa amɛ ni yɔɔ ŋwɛi lɛ kɛ ŋulamii ni yiɔ ŋwɛi obɔ gbɛkɛ lɛ anɔ, kɛyashi aduawai ni woɔ yɛ tsei anɔ, kɛ looi ni yɔɔ ŋshɔi kɛ faai amli lɛ anɔ lɛ—fɛɛ ba shihilɛ mli ejaakɛ Yehowa ji Mɔ ni bɔ!

18. Mɛni hewɔ mɛi komɛi nuɔ he akɛ amɛnyɛŋ amɛbɛŋkɛ Nyɔŋmɔ kɔkɔɔkɔ lɛ, shi mɛni ji nɔ ni Biblia lɛ tsɔɔ?

¹⁸ Yehowa sui ni yɔɔ naakpɛɛ lɛ ahe saji ni mɛi komɛi kaneɔ lɛ haa gbeyei mɔmɔɔ amɛ. Amɛsheɔ gbeyei akɛ Nyɔŋmɔ nɔ kwɔ tsɔ kɛha amɛ, ni ákɛ amɛnyɛŋ amɛbɛŋkɛ lɛ kɔkɔɔkɔ loo amɛjeee mɛi komɛi yɛ Nyɔŋmɔ ni nɔ kwɔ tamɔ nɛkɛ lɛ hiɛ. Shi ani susumɔ nɛɛ ja? Biblia lɛ tsɔɔ nɔ kroko kwraa ni tamɔɔɔ nakai. Ewieɔ Yehowa he akɛ: “Ekɛ wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:27) Biblia lɛ woɔ wɔ hewalɛ po  akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.

19. (a) Te wɔɔfee tɛŋŋ wɔje shishi akɛ wɔɔbɛŋkɛ Nyɔŋmɔ, ni mɛɛ sɛɛnamɔi baajɛ mli aba? (b) Te Nyɔŋmɔ sui lɛ ateŋ nɔ ni osumɔɔ fe fɛɛ?

¹⁹ Te ooofee tɛŋŋ obɛŋkɛ Nyɔŋmɔ? Klɛŋklɛŋ kwraa lɛ, yaa nɔ yɛ nɔ ni ofeɔ amrɔ nɛɛ lɛ mli—ni ji akɛ, kã he okase Nyɔŋmɔ he nii. Yesu kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ” lɛ. (Yohane 17:3) Hɛɛ, Biblia lɛ tsɔɔ akɛ Yehowa kɛ Yesu he nii ni akaseɔ lɛ baaha aná “naanɔ wala”! Taakɛ atsĩ tã kɛtsɔ hiɛ lɛ, “Nyɔŋmɔ lɛ, suɔmɔ ji lɛ.” (1 Yohane 4:16) Yehowa yɛ sui kpakpai krokomɛi babaoo hu ni asumɔɔ. Ákɛ nɔkwɛmɔnɔ lɛ, Biblia lɛ kɛɔ akɛ Yehowa ji “Nyɔŋmɔ musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fá pii.” (2 Mose 34:6) ‘Ehi ni eŋɔfaa mra.’ (Lala 86:5) Nyɔŋmɔ toɔ etsui shi. (2 Petro 3:9) Eji anɔkwafo. (1 Korintobii 1:9) Obaana bɔ ni Yehowa etsɔɔ akɛ eyɛ sui ni atsĩ amɛtã nɛɛ kɛ sui kpakpai krokomɛi babaoo be mli ni oyaa nɔ okaneɔ saji babaoo yɛ Biblia lɛ mli lɛ.

20-22. (a) Ani na ni wɔnaaa Nyɔŋmɔ lɛ tsĩɔ wɔ gbɛ koni wɔkanyɛ wɔbɛŋkɛ lɛ? Tsɔɔmɔ mli. (b) Mɛɛ hewalɛ mɛi komɛi ni ehiɛɛɛ jwɛŋmɔ gbonyo lɛ baanyɛ awo bo, shi mɛni esa akɛ ofee?

²⁰ Eji anɔkwale akɛ onyɛŋ ona Nyɔŋmɔ ejaakɛ eji mumɔ. (Yohane 1:18; 4:24; 1 Timoteo 1:17) Shi kɛlɛ, kɛtsɔ ehe nii ni oookase yɛ Biblia lɛ mli lɛ nɔ lɛ, obaanyɛ obale lɛ akɛ mɔ ko ni yɔɔ diɛŋtsɛ. Taakɛ lalatsɛ lɛ kɛɛ lɛ, obaanyɛ ‘ona Yehowa mlihilɛ lɛ.’ (Lala 27:4; Romabii 1:20) Babaoo ni okaseɔ Yehowa he nii lɛ, babaoo ni obaleɔ mɔ ni eji diɛŋtsɛ, ni enɛ baaha oná yiŋtoo babaoo ni ooodamɔ nɔ osumɔ lɛ, ni onu he akɛ obɛŋkɛ lɛ kpaakpa.

²¹ Fiofio lɛ, obaanu nɔ hewɔ ni Biblia lɛ kɛɔ wɔ akɛ wɔsusu Yehowa he akɛ wɔ-Tsɛ lɛ shishi. (Mateo 6:9) Jeee akɛ lɛ ehaa wɔ wala kɛkɛ, shi moŋ akɛ eesumɔ ni wɔná shihilɛ ni hi fe fɛɛ—taakɛ bɔ pɛ ni tsɛ fɛɛ tsɛ ni yɔɔ suɔmɔ lɛ baasumɔ akɛ  ebii aná lɛ nɔŋŋ. (Lala 36:10) Biblia lɛ tsɔɔ hu akɛ adesai baanyɛ amɛbatsɔmɔ Yehowa nanemɛi. (Yakobo 2:23) Susumɔ he okwɛ—obaanyɛ otsɔ jeŋ muu fɛɛ Bɔlɔ lɛ naanyo!

²² Be mli ni oyaa nɔ okaseɔ nibii babaoo kɛjɛɔ Biblia lɛ mli lɛ, obaana akɛ mɛi komɛi ni ehiɛɛɛ jwɛŋmɔ gbonyo ko lɛ baawo bo hewalɛ koni okpa nikasemɔ lɛ. Ekolɛ, ebaadɔ amɛ akɛ oootsake nibii ni oheɔ oyeɔ lɛ. Shi kaaha mɔ ko miitsĩ onaa kɛmiijɛ naanyobɔɔ ni fe fɛɛ ni obaanyɛ oná lɛ he.

23, 24. (a) Mɛni hewɔ esa akɛ oya nɔ obibii saji yɛ nɔ ni okaseɔ lɛ he lɛ? (b) Mɛni he abaasusu yɛ yitso ni nyiɛ sɛɛ lɛ mli?

²³ Yɛ anɔkwale mli lɛ, nibii komɛi yɛ ni onuŋ amɛshishi yɛ shishijee mli. Ebaabi ni okɛ heshibaa abi yelikɛbuamɔ, shi kaaha hiɛgbele miiha ooshashao shi. Yesu kɛɛ akɛ ehi akɛ abaa he shi tamɔ gbekɛ bibioo. (Mateo 18:2-4) Ni taakɛ wɔle ni gbekɛbii feɔ lɛ, amɛbiɔ saji babaoo. Nyɔŋmɔ miisumɔ ni onine ashɛ hetooi lɛ anɔ. Biblia lɛ jie mɛi komɛi ni bɔ mɔdɛŋ koni amɛkase Nyɔŋmɔ he nii lɛ ayi. Amɛkpa Ŋmalɛi lɛ amli jogbaŋŋ koni amɛkɛná nɔmimaa akɛ nibii ni amɛkaseɔ lɛ ji anɔkwale.—Bɔfoi lɛ Asaji 17:11.

²⁴ Gbɛ ni hi fe fɛɛ ni wɔɔtsɔ nɔ wɔkase Yehowa he nii ji Biblia lɛ mli ni wɔɔpɛi. Esoro lɛ yɛ woji krokomɛi fɛɛ ahe. Yɛ mɛɛ gbɛ nɔ? Abaasusu sane nɛɛ he yɛ yitso ni nyiɛ sɛɛ lɛ mli.