NIKASEMƆ 11
Amɛŋmala Yesu he Sane
Oona hii ni yɔɔ mfoniri lɛ mli lɛ?— Amɛgbɛ́ii ji Mateo, Marko, Luka, Yohane, Petro, Yakobo, Yuda, kɛ Paulo. Hii nɛɛ kɛ Yesu hi shi yɛ be kome too lɛ nɔŋŋ mli, ni amɛŋmala Yesu he saji. Ha wɔkase amɛhe nii.
Mɛni ole yɛ hii nɛɛ ahe?
Amɛteŋ mɛi etɛ ji bɔfoi ni fata Yesu he kɛshiɛ. Ani ole amɛteŋ mɛi etɛ ni ji?— Amɛji Mateo, Yohane, kɛ Petro. Bɔfo Mateo kɛ bɔfo Yohane le Yesu jogbaŋŋ, ni amɛteŋ mɔ fɛɛ mɔ ŋma wolo ni gbaa wɔ Yesu shihilɛ mli saji. Bɔfo Yohane saa eŋma wolo ko ni atsɛɔ lɛ Kpojiemɔ Wolo lɛ kɛ woji etɛ krokomɛi, ni ji Yohane Klɛŋklɛŋ Wolo lɛ, Yohane Wolo ni Ji Enyɔ lɛ, kɛ Yohane Wolo ni Ji Etɛ lɛ. Bɔfo Petro ŋmala Biblia lɛ mli woji enyɔ. Woji nɛɛ ji Petro Klɛŋklɛŋ Wolo lɛ kɛ Petro Wolo ni Ji Enyɔ lɛ. Petro ŋma be ni Yehowa wie kɛjɛ ŋwɛi lɛ he sane yɛ ewolo ni ji enyɔ lɛ mli. Yehowa wie yɛ Yesu he nakai gbi lɛ akɛ: ‘Mɔ nɛ ji mibi. Misumɔɔ lɛ, ni miyɛ ehe tsui.’
Hii krokomɛi ni yɔɔ mfoniri lɛ mli lɛ hu tsɔɔ wɔ Yesu he nii yɛ woji ni amɛŋmala lɛ amli. Atsɛɔ amɛteŋ mɔ kome Marko. Eeenyɛ efee akɛ gbi ni amɔ Yesu lɛ, no mli lɛ eyɛ jɛmɛ ni ena nɔ ni tee nɔ lɛ fɛɛ. Atsɛɔ mɔ kroko hu Luka. Eji datrɛfonyo, ni eeenyɛ efee akɛ beni ebatsɔ Kristofonyo lɛ, no mli lɛ Yesu egbo momo.
Hii enyɔ krokomɛi ni ŋma Biblia lɛ eko ni onaa yɛ mfoniri lɛ mli ji Yesu nyɛmimɛi bibii. Ani ole amɛgbɛ́ii?— Atsɛɔ mɔ kome Yakobo kɛ mɔ kome hu Yuda. Be ko ni eho lɛ, amɛheee Yesu nɔ amɛyeee. Amɛsusu po akɛ, eeye sɛkɛ. Shi sɛɛ mli lɛ, amɛbahe Yesu nɔ amɛye ni amɛbatsɔmɔ Kristofoi.
Naagbee mɔ ni yɔɔ mfoniri lɛ mli ni ŋma Biblia lɛ eko lɛ gbɛ́i ji Paulo. Dani ebaatsɔ Kristofonyo lɛ, no mli lɛ, atsɛɔ lɛ Saulo. Esumɔɔɔ Kristofoi asane kwraa, ni eyitsoŋ wa waa yɛ amɛnɔ. Ani ole bɔ ni fee ni Paulo batsɔ Kristofonyo?— Gbi ko lɛ, Paulo nyiɛ gbɛ kɛmiiya he ko, nɔŋŋ ni enu ni mɔ ko kɛ lɛ miiwie kɛmiijɛ ŋwɛi. Yesu ni kɛ lɛ wie lɛ! Ebi Paulo akɛ: ‘Mɛni hewɔ oyitsoŋ wa waa yɛ mɛi ni heɔ minɔ amɛyeɔ lɛ anɔ nɛkɛ?’ No sɛɛ lɛ, Paulo tsake esubaŋ ni ebatsɔ Kristofonyo. Paulo ŋmala Biblia lɛ mli woji 14, kɛjɛ Romabii awolo lɛ kɛyashi Hebribii awolo lɛ.
Bɛ wɔkaneɔ Biblia lɛ daa, aloo jeee nakai?— Kɛ́ wɔkane Biblia lɛ, wɔbaale Yesu he nii babaoo. Ani obaasumɔ akɛ ole Yesu he nii babaoo?—
