“Be ni mi ji gbekɛ lɛ, daa gbi lɛ, minyɛmi nuu lɛ yiɔ mi ni ejɛɔ mi. Be ni mibote gbalashihilɛ mli hu lɛ, mishaayoo lɛ hu feɔ mi niseniianii. Ekɛ mishaanuu fɛɛ kɛ miye oookɛɛ nyɔŋ ji mi. Mikpɛ miyiŋ shii abɔ akɛ magbe mihe.”—Madhu, a India.

 World Health Organization lɛ ema nɔ mi akɛ “niseniianii ni afeɔ yei lɛ miiya nɔ yɛ he fɛɛ he.” Akɔntaabuu ko ni ekɛhã lɛ tsɔɔ mli akɛ, kɛ́ ahala yei etɛ lɛ, amɛteŋ mɔ kome fɛɛ mɔ kome lɛ, ayi lɛ loo afee lɛ bɔlɛnamɔ niseniianii pɛŋ yɛ eshihilɛ mli.

 Kɛ́ enɛ eba onɔ pɛŋ lɛ, he fɛɛ he ni obaaya lɛ, ekolɛ obaanu he akɛ abaajɛ bo, abaayi bo loo abaafee bo bɔlɛnamɔ niseniianii. Nibii ni afeɔ yei hewɔ lɛ ekolɛ, obaanu he akɛ mɛi babaoo susuɔ akɛ ‘Yei ahe bɛ sɛɛnamɔ ko.’ Shi ani yei asane kã Nyɔŋmɔ tsui nɔ lɛɛlɛŋ?

 Ŋmalɛ: “Nuu kɛ yoo [Nyɔŋmɔ bɔ] amɛ.”—1 Mose 1:27.

 Nɔ ni etsɔɔ: Nyɔŋmɔ bɔ hii kɛ yei. Enaa akɛ esa akɛ akɛ bulɛ ahã amɛteŋ mɔ fɛɛ mɔ. Kɛfata he lɛ, Nyɔŋmɔ kpaa gbɛ akɛ wu “asumɔ eŋa tamɔ lɛ diɛŋtsɛ ehe,” jeee ni ebaaye eŋa nɔ, ekɛ lɛ baawie bɔ ni esaaa, loo ebaawa lɛ yi. (Efesobii 5:33; Kolosebii 3:19) Ekã shi faŋŋ akɛ, yei ashweshweeshwefeemɔ kã Nyɔŋmɔ tsui nɔ waa diɛŋtsɛ.

 “Be ni miji gbekɛ lɛ, miwekumɛi fee mi bɔlɛnamɔ niseniianii. Be ni miye afii 17 lɛ, minitsumɔtsɛ lɛ kɛɛ mi akɛ kɛ́ mikpɛlɛɛɛ ni ekɛ mi aná bɔlɛ lɛ, ebaashwie mi yɛ nitsumɔ lɛ mli. Be ni mida nɛɛ hu lɛ, miwu, mifɔlɔi, kɛ mikutsoŋbii ebuuu mi amɛhãaa nɔ ko. Shi naagbee mli aahu lɛ, mibakase Yehowa, b ni ji Bɔlɔ lɛ, he nii. Ekɛ yei yeɔ yɛ bulɛ mli. Enɛ hã miná nɔmimaa akɛ esumɔɔ mi ni mihe yɛ sɛɛnamɔ kɛhã lɛ.” —Maria, Argentina.

 Ŋmalɛ: “Naanyo ko yɛ ni kpɛtɛɔ mɔ gbagbalii fe nyɛmi.”—Abɛi 18:24.

 Nɔ ni etsɔɔ: Naanyo kpakpa baaye abua bo. Kɛ́ ebaahi lɛ okɛ mɔ ko ni oheɔ lɛ oyeɔ agba bɔ ni onuɔ he ohãa lɛ he sane.

 “Afii 20 sɔŋŋ ni minyɛɛɛ makɛɛ mɔ ko mɔ ko akɛ aafee mi bɔlɛnamɔ niseniianii. No hewɔ lɛ, be ni mida lɛ, mináaa miishɛɛ yɛ shihilɛ mli, mibahao waa, ni minu he akɛ minyɛɛɛ nɔ ko mafee. Shi be ni mikɛ mɔ ko ni miheɔ lɛ miyeɔ, ni miisumɔ ni ebo mi toi lɛ gba sane lɛ, mitsui nyɔ mimli ni mihe jɔ mi.”—Elif, Türkiye.

 Ŋmalɛ: ‘Nyɛshɛrɛa nibii ni hãa nyɛyeɔ nyɛtsui lɛ fɛɛ nyɛshwieɔ Nyɔmɔ nɔ, ejaakɛ ejwɛŋɔ nyɛhe.’—1 Petro 5:7.

 Nɔ ni etsɔɔ: Kɛ́ osɔle lɛ, Nyɔŋmɔ boɔ toi lɛɛlɛŋ. (Lala 55:22; 65:2) Akɛni esusuɔ ohe hewɔ lɛ, ebaanyɛ eye ebua bo koni ona akɛ ohe yɛ sɛɛnamɔ waa.

 “Yehowa he nii ni mikase lɛ ye ebua mi ni piŋmɔ kɛ dɔlɛ ni yɔɔ mimli lɛ naa ba shi. Amrɔ nɛɛ manyɛ masɔle makɛɛ Yehowa nɔ fɛɛ nɔ ni yeɔ mitsui. Etamɔ naanyo ko ni nuɔ bɔ ni minuɔ he mihãa lɛ shishi diɛŋtsɛ.” —Ana, Belize.

 Ŋmalɛ: ‘Yehowa baaye mɛi ni bɛ tsɛmɛi kɛ mɛi ni akumɔ amɛ lɛ asane ehã amɛ, koni gbɔmɔ adesa ni yɔɔ shikpɔŋ lɛ nɔ lɛ akawo amɛhe gbeyei dɔŋŋ.’—Lala 10:​17, 18.

 Nɔ ni etsɔɔ: Etsɛŋ kwraa, Nyɔŋmɔ baajie nibii fɛɛ ni tsɔɔ jalɛ sane ni ayeee, ni yiwalɛ kɛ niseniianii ni afeɔ yei fata he lɛ, kɛje shihilɛ mli.

 “Le ni mibale akɛ etsɛŋ, Yehowa baafo niseniianii fɛɛ ni afeɔ yei lɛ asɛɛ lɛ, ehã mitsui enyɔ mimli waa diɛŋtsɛ. Ehã mitoiiaŋ ejɔ mi agbɛnɛ.”—Roberta, Mexico.

 Kɛ́ ootao ole bɔ ni Biblia lɛ hãa anáa hiɛnɔkamɔ, nɔ hewɔ ni obaanyɛ ohe emli shiwoi lɛ oye, kɛ bɔ ni Yehowa Odasefoi jɛɔ Biblia lɛ mli amɛyeɔ amɛbuaa mɛi ŋmɛnɛ lɛ, bi ni mɔ ni hã bo wolo nɛɛ abasara bo loo ehã mɔ ko abasara bo; aheŋ bo nɔ ko.

 Daunlodimɔ sane nɛɛ nɔ ni aprintiɔ lɛ.