Daa afi lɛ, afɔ̃ɔ nine atsɛɔ mɛi ni yɔɔ bei fɛɛ sɔɔmɔ krɛdɛɛ lɛ mli lɛ ekomɛi kɛyaa Buu Mɔɔ Biblia Gilead Skul, ni afeɔ yɛ Watchtower Educational Center ni yɔɔ Patterson, yɛ New York lɛ. a Kɛ́ amɛtee skul nɛɛ, atsɔɔ amɛ bɔ ni amɛbaafee amɛtsu nitsumɔi srɔtoi ni akɛwoɔ amɛdɛŋ yɛ Yehowa gbɛjianɔtoo lɛ mli lɛ jogbaŋŋ. Tsɔsemɔ nɛɛ yeɔ ebuaa amɛ ni amɛwajeɔ nyɛmimɛi ni yɔɔ asafoi srɔtoi kɛ nitsumɔhe niji srɔtoi lɛ amli, ni amɛtswaa amɛ amɛmaa shi.

 Eji anɔkwale akɛ mɛi ni yɔɔ je lɛŋ hei srɔtoi fɛɛ baa skul nɛɛ eko. Akɛ nɔkwɛmɔnɔ lɛ, Gilead klas 147 nɔ ni afee lɛ afee yɛ 2019, skulbii 56 jɛ maji srɔtoi 29 anɔ amɛba skul nɛɛ. Mɛi ni yɔɔ bei fɛɛ sɔɔmɔ krɛdɛɛ lɛ fai srɔtoi amli tamɔ Betelbii, kpokpaa nɔkwɛlɔi, maŋsɛɛ sɔɔlɔi, loo gbɛgbalɔi krɛdɛi lɛ ji mɛi ni afɔ̃ɔ amɛnine kɛyaa Gilead skul nɛɛ.

 Atsɔɔ hiɛ kwraa atoɔ gbɛjianɔ srɔtoi babaoo dani skulbii nɛɛ aklɛŋklɛŋ nikasemɔ yɛ klas lɛ jeɔ shishi. Akɛ nɔkwɛmɔnɔ lɛ, World Headquarters Travel Department (WHQ Travel) lɛ heɔ plen tikiti kɛhã mɛi ni afɔ̃ amɛnine akɛ amɛba skul lɛ. Yɛ Gilead klas ni ji 147 lɛ nɔ lɛ gbɛfaŋ lɛ, nyɔmɔ ni abɔ yɛ skulbii ni jɛ maŋsɛɛ kɛmiiya skul lɛ ahe, kɛjɛ amɛshĩai kɛtee skul lɛ kɛ amɛsɛɛkuu ekoŋŋ lɛ, ji Amerika dɔlai 1,075. Skulbii ni jɛ Solomon Islands kɛtee skul lɛ, wó plen srɔtoi ejwɛ dani amɛyashɛ Patterson, ni be ni agbe naa ni amɛkuɔ amɛsɛɛ lɛ, amɛwó plen srɔtoi etɛ dani amɛyashɛ amɛmaŋ​—amɛgbɛfãa lɛ fɛɛ fee kilomitai 35,400 kɛ sɛɛ! Enɛ he amɛteŋ mɔ fɛɛ mɔ Amerika dɔlai 2,300 akɛ plen nyɔmɔwoo. Bɔ ni afee ni abaa shika yi lɛ, WHQ Travel lɛ kɛ kɔmpiuta program ko tsuɔ nii kɛtaoɔ plen tikiti ni jara waaa tsɔ amɛheɔ. Kɛ́ aná tikiti lɛ eko po lɛ, kɔmpiuta program nɛɛ yaa nɔ ekwɛɔ akɛ tikiti ni aná lɛ jara eba shi lo. Eyaa nɔ ekwɛɔ aahu otsii, loo nyɔji po kɛyashi ebaana akɛ ebashi kɛkɛ lɛ, ahe nɔ ni eba shi lɛ. WHQ Travel lɛ kɛ airline credits loo airline mileage ni akɛke asafo lɛ tsuɔ nii kɛheɔ tikiti kɛhã skulbii ni baaba skul nɛɛ ateŋ mɛi komɛi.

 Skulbii lɛ ateŋ mɛi babaoo yɛ ni ja amɛná visa dani amɛbaanyɛ amɛya United States. No hewɔ lɛ, World Headquarters Legal Department lɛ yeɔ ebuaa amɛ koni amɛná visa ni akɛhãa skulbii. Asafo lɛ woɔ Amerika dɔlai 510 kɛhã skulbii lɛ ateŋ mɔ fɛɛ mɔ visa kɛ rɛjistreshiŋ.

 Mɛɛ gbɛ nɔ wɔnaa tsɔsemɔi ni skulbii nɛɛ ya naa lɛ he sɛɛ? Hendra Gunawan sɔmɔɔ akɛ asafoŋ onukpa yɛ Southeast Asia. Ekɛ nyɛmi nuu ko kɛ eŋã ni amɛgbe Gilead skul naa lɛ yɔɔ asafo kome mli. Ewie akɛ: “Be ko ni eho lɛ, wɔbɛ daa gbɛgbalɔi yɛ wɔsafo lɛ mli. Shi be ni nyɛminuu lɛ kɛ eŋa lɛ jɛ Gilead skul lɛ amɛba lɛ, ekãa ni amɛjie lɛ kpo kɛ bɔ ni amɛsumɔɔ ni amɛkɛ amɛhe ahã kɛye amɛbua mɛi krokomɛi lɛ, ná nyɛmimɛi krokomɛi anɔ hewalɛ ni nyɛmimɛi nɛɛ hu bɔi gbɛgbamɔ nitsumɔ lɛ. Sɛɛ mli lɛ, nyɛmiyoo ko ni yɔɔ wɔsafo lɛ mli lɛ po tee Skul Kɛhã Maŋtsɛyeli Sanekpakpa Jajelɔi lɛ eko!”

 Sergio Panjaitan kɛ nyɛmimɛi ni egbe Gilead naa lɛ tsuɔ nii yɛ Betel shĩa ko ni yɔɔ Southeast Asia lɛ. Ewie akɛ: “Tsɔsemɔ ni nyɛmimɛi nɛɛ na lɛ, jeee amɛ pɛ ebafee jɔɔmɔ kɛhã amɛ; shi ebafee jɔɔmɔ kɛhã wɔ hu, no ji wɔ hu wɔmiiná he sɛɛ. Amɛkase nibii babaoo! Shi nɔ najiaŋ ni amɛbaanu he akɛ amɛhe hiaa fe mɛi krokomɛi lɛ, amɛbaa amɛhe shi, ni wɔkaseɔ nibii babaoo yɛ amɛŋɔɔ. Su kpakpa ni amɛjieɔ lɛ kpo nɛɛ woɔ wɔ hewalɛ, ni wɔ hu wɔnyɛɔ wɔkɛwoɔ mɛi krokomɛi hewalɛ.”

 Te Yehowa asafo lɛ feɔ tɛŋŋ enáa shika kɛwoɔ nyɔji babaoo ni abɔɔ yɛ skul lɛ he lɛ? Fɛɛ jɛɔ oniai ni atsuɔ kɛfĩɔ jeŋ muu fɛɛ nitsumɔ lɛ sɛɛ lɛ mli. Atsɔɔ gbɛi nɛɛ ekomɛi amli yɛ donate.jw.org. Nyɛyiwaladɔŋŋ waa yɛ oniai srɔtoi ni nyɛtsuɔ ni akɛ eko yeɔ ebuaa skul ni mɛi ni jɛ je lɛŋ hei srɔtoi fɛɛ náa he sɛɛ nɛɛ.