Yehowa Nyɔŋmɔ miitao ni gbɔmɛi fɛɛ akase lɛ kɛ e-ŋwɛi Maŋtsɛyeli lɛ he nii, ekɔɔɔ he eko shihilɛ mli ni amɛyɔɔ. (1 Timoteo 2:3, 4) Enɛ hewɔ lɛ, Yehowa Odasefoi feɔ Bibliai kɛ Biblia kasemɔ woji kɛ nibii kɛhãa mɛi babaoo, ni mumuii hu fata he. Anɔkwa, Yehowa asafo lɛ efee woji kɛ nibii akpei abɔ ahe vidioi a yɛ mumuii awiemɔi ni fa fe oha mli! Te wɔfeɔ tɛŋŋ wɔfeɔ woji kɛ nibii nɛɛ yɛ mumuii awiemɔi mli, ni wɔjaraa wɔhãa mɛi lɛ? Ni kɛjɛ be ni wɔje shishi nɛɛ, mɛɛ gbɛ nɔ wɔtee wɔhiɛ yɛ nibii nɛɛ afeemɔ mli?

 Wiemɔ shishitsɔɔmɔ kui ni yɔɔ je lɛŋ hei srɔtoi lɛ ji mɛi ni feɔ woji kɛ nibii lɛ ahe vidioi lɛ yɛ mumuii awiemɔi amli. Wiemɔ shishitsɔɔlɔi akuu lɛ mli bii lɛ ateŋ mɔ fɛɛ mɔ pɛiɔ nɔ ni amɛbaatsɔɔ shishi lɛ mli jogbaŋŋ. No sɛɛ lɛ, amɛfeɔ ekome kɛkwɛɔ bɔ ni amɛbaatsɔɔ shishi kɛba mumuii awiemɔ lɛ mli. Kɛ́ amɛgbe no naa lɛ, amɛrikɔdiɔ lɛ vidio. Amrɔ nɛɛ, ayɛ mumuii awiemɔ shishitsɔɔlɔi akui 60 ni tsuɔ nii be fɛɛ be kɛtsɔɔ Biblia kasemɔ woji ashishi, ni ayɛ mumuii awiemɔ shishitsɔɔlɔi 40 krokomɛi hu ni tsuɔ nii yɛ be kɛ beiaŋ.

 Be ko ni eho lɛ, ebiɔ shika babaoo dani anyɛɔ afeɔ vidio yɛ mumuii awiemɔ mli. No mli lɛ, kamirai ni akɛshaa vidioi kɛ nibii krokomɛi ni akɛtsuɔ he nii lɛ ajara wala fe bɔ ni amɛji ŋmɛnɛ lɛ. Agbɛnɛ hu, esa akɛ afee rikɔdiŋ lɛ yɛ studio, no hewɔ lɛ, wɔ diɛŋtsɛ wɔmaa tsũ lɛ, loo bei komɛi lɛ, wɔsaa tsũ ko ni ama momo. Kɛ́ abu fɛɛ naa lɛ, ebaabi ni aná shika ni fa fe Amerika dɔlai 30,000 dani abaanyɛ afee studio kɛ emli nɔ fɛɛ nɔ kɛhã mumui awiemɔ shishitsɔɔmɔ kuu kome.

 Bɔ ni afee ni akɛ oniai ni atsuɔ lɛ atsu nii yɛ hiɛshikamɔ mli lɛ, wɔsafo lɛ ebɔ mɔdɛŋ ehã gbɛ ni atsɔɔ nɔ atsɔɔ wiemɔ shishi lɛ efee mlɛo, ni ebɛ haŋtsii hu. Wɔkɛ ŋmɛnɛ beiaŋ nibii ni akɛfeɔ rikɔdiŋ ni hi jogbaŋŋ, shi amɛjara walaaa ni tsuɔ nii. Yɛ nɔ najiaŋ ni abaafee studio lɛ, wiemɔ shishitsɔɔmɔ kuu lɛ kɛ pɛnte kɔla grin pɛnteɔ amɛɔfis lɛ he ko, ni amɛdamɔɔ jɛmɛ kɛrikɔdiɔ vidio lɛ. Kɛ́ ehe bahia ni mɛi babaoo arikɔdi vidio kome lɛ, nyɛmimɛi lɛ rikɔdiɔ amɛgbɛfaŋ nɔ lɛ yɛ amɛshĩai loo ɔfis, ní ehe ehiaaa ni amɛya studio dɔŋŋ.

 Wɔfee sɔftwɛɛ hu ni yeɔ ebuaa mɛi ni ahãa amɛrikɔdiɔ mumuii avidioi lɛ. Enɛ ehã be ni kulɛ ebaahe wiemɔ shishitsɔɔlɔi lɛ kɛfee wolo loo nɔ ko yɛ mumui awiemɔ mli lɛ nɔ egbɔ kwraa. Wɔnyɛmimɛi lɛ ahiɛ sɔɔ nibii ni afee ni ehã tsakemɔi eba nɛɛ waa. Nyɛmi nuu ko ni atsɛɔ lɛ Alexander lɛ kɛɛ akɛ: “Bianɛ lɛ, ajieɔ woji kɛ nibii yɛ mumuii awiemɔ mli mra fe be ko ni eho. Ehãa mimii shɛɔ mihe waa. Mikwɛɔ vidioi lɛ gbi fɛɛ gbi.”

 Bei nɛɛ amli lɛ, akɛ shika ni shɛɛɛ Amerika dɔlai 5,000 toɔ nibii fɛɛ ni ebaabi ni wiemɔ shishitsɔɔmɔ kuu ko aná kɛtsu nii lɛ ahe gbɛjianɔ. Enɛ hewɔ lɛ, wɔnyɛɔ wɔfeɔ mumuii avidioi yɛ wiemɔi babaoo amli.

 Kɛ́ wiemɔ shishitsɔɔlɔi lɛ rikɔdi woji kɛ nibii lɛ eko yɛ mumuii awiemɔ ko mli amɛgbe naa nɔŋŋ lɛ, esa akɛ mɛi ni ehe hiaa amɛ lɛ anine ashɛ nɔ. Be ko ni eho lɛ, wɔfeɔ vidioi lɛ yɛ videocassettes kɛ DVD nɔ, shi no mli lɛ nibii nɛɛ ajara wala, eheɔ be, ni ehe nitsumɔ hu fa. Kɛ́ arikɔdi agbe naa lɛ, akɛyahãa nitsumɔhe ko koni efee babaoo ehã wɔ. Naagbee lɛ, akɛ videocassettes lɛ kɛ DVD lɛ majeɔ asafoi lɛ. Yɛ afi 2013 pɛ lɛ, wɔfite Amerika dɔlai 2,000,000 kɛfee mumuii avidioi yɛ DVD nɔ.

 Eŋɔɔ mumuii lɛ anaa waa akɛ amɛnine shɛɔ nibii nɛɛ anɔ. Shi jeee be fɛɛ be vidioi lɛ kɛ nitsumɔ yɔɔ mlɛo, titri lɛ, be ni cassettes lɛ kɛ DVD lɛ bɔi famɔ lɛ. Bei komɛi po lɛ, ebiɔ ni arikɔɔdi Biblia mli wolo kome pɛ awo DVD pii anɔ. Nyɛmi nuu ko ni yɔɔ Brazil ni atsɛɔ lɛ Gilnei lɛ wie akɛ: “Mikaiɔ akɛ kɛ́ ehe bahia ni wɔkane ŋmalɛ ko lɛ, wɔtaoɔ videocassette nɔ ni nakai Biblia mli wolo lɛ yɔɔ, kɛkɛ lɛ wɔtao ŋmalɛ lɛ yɛ nɔ. No mli lɛ, Wɔnáaa lɛ mlɛo kwraa.” Nyɛmi yoo ko ni atsɛɔ lɛ Rafayane ni kɛ woji kɛ nibii ni afee yɛ mumui awiemɔ mli yɛ DVD nɔ lɛ kaseɔ nii lɛ wie akɛ: “No mli lɛ, kɛ́ miifee aŋkro nikasemɔ lɛ etɔɔ mi waa. Eheɔ wɔ be babaoo kɛtaoɔ ŋmalɛi loo saji krokomɛi.” Ni kɛ́ nyɛmimɛi lɛ tee shiɛmɔ lɛ, amɛyatswaa DVD kɛ videocassettes lɛ yɛ mɛi ni ayaashiɛ ahã amɛ lɛ a-TV lɛ nɔ. Nyɛmimɛi komɛi po kɛ amɛ diɛŋtsɛ amɛtsɔji ni akɛjieɔ DVD lɛ yaa. Etsɛɛɛ nɔŋŋ ni aná DVD tsɔji bibii ni skrin yɔɔ he, ni nyɛmimɛi lɛ pii kɛ no bɔi vidio jiemɔ yɛ shiɛmɔ nitsumɔ lɛ mli. Nyɛmi nuu ko ni atsɛɔ lɛ Bobby ni yɔɔ United States lɛ wie akɛ: “Kɛ́ okane ŋmalɛ ko ohã mɔ ko ni ehe bahia ni okane ekroko lɛ, bei pii lɛ, ja otswa yɛ DVD kroko nɔ. Enɛ feemɔ heɔ be, ni ewaa kɛhãa wɔ akɛ wɔkɛ Biblia lɛ baatsu nii be ni wɔkɛ mɛi miigba sane.”

 Yɛ afi 2013 lɛ, Yehowa asafo lɛ jie JW Library Sign Language app lɛ kpo, ni no hãa nyɛmimɛi lɛ nyɛɔ amɛdaunlodiɔ woji kɛ nibii ahe vidio srɔtoi lɛ yɛ mumuii awiemɔ mli yɛ amɛfoŋ kɛ amɛtablɛtii anɔ. Ajie app lɛ kpo yɛ Amerika Mumuii Awiemɔ mli klɛŋklɛŋ. Kɛkɛ ni yɛ afi 2017 lɛ, afee app lɛ bɔ ni anyɛ akɛ mumuii awiemɔi krokomɛi wo nɔ. Nyɛmimɛi ni yɔɔ jeŋ fɛɛ lɛ amii shɛ amɛhe waa. Nyɛmi nuu ko ni yɔɔ Brazil ni atsɛɔ lɛ Juscelino lɛ wie akɛ: “Mikpaaa enɛ gbɛ kwraa! Mitee nɔ misusu bɔ ni Gbɛtsɔɔmɔ Kuu lɛ feɔ nibii srɔtoi kɛtsɔɔ akɛ amɛsumɔɔ wɔ, ni ji mumuii lɛ waa lɛ he, ni amɛmiisumɔ ni wɔya wɔhiɛ yɛ anɔkwale lɛ mli tamɔ mɛi ni jeee mumuii lɛ yaa amɛhiɛ lɛ nɔŋŋ. Mimii shɛ mihe waa, ni app lɛ ye ebua mi koni maya nɔ makase Biblia lɛ jogbaŋŋ fe tsutsu lɛ.”

 Ŋmɛnɛ lɛ, wɔfeɔ mumuii awiemɔ vidioi lɛ fɛɛ bɔ ni anyɛɔ akɛwoɔ wɔ-wɛbsaiti lɛ kɛ JW Library Sign Language app lɛ nɔ. Enɛ hewɔ lɛ, anyɛɔ atsɔɔ woji kɛ nibii ashishi kɛyaa mumuii awiemɔ mli, arikɔdiɔ, ni nyɛmimɛi lɛ anine shɛɔ nɔ yɛ gbii fioo pɛ mli, moŋ fe ni amɛbaamɛ nyɔji loo afii pii dani amɛnine ashɛ nɔ lɛ. Anɔkwa, bianɛ lɛ, ajieɔ woji kɛ nibii akpo yɛ mumuii awiemɔi pii kɛ wiemɔi krokomɛi amli yɛ be kome too mli.

 Naa nɔ ni wɔnyɛmimɛi mumuii komɛi ewie. Nyɛmi yoo ko ni atsɛɔ lɛ Klízia lɛ wie akɛ: “Mɛɛ asafo yɔɔ ni susuɔ mumuii ahe aahu akɛ amɛhãa wɔnine shɛɔ nibii ni baahã wɔhemɔkɛyeli lɛ mli awa lɛ nɔ yɛ gbɛ ni waaa nɔ? Nɔ ko bɛ je nɛɛ mli ni wɔbaanyɛ wɔkɛto nɔ ni Yehowa asafo lɛ feɔ ehãa wɔ lɛ he.” Nyɛminuu Vladimir wie akɛ: “Mumuii awoji kɛ nibii ni afee lɛ vidio lɛ hãa minaa akɛ, Yehowa susuɔ mumuii kɛ mɛi ni jeee mumuii fɛɛ ahe.”

 Awieɔ yɛ wɔmumuii awiemɔ vidioi lɛ amli akɛ: “Vidio nɛɛ fata jeŋ muu fɛɛ Biblia mli tsɔsemɔ nitsumɔ ko ni ajɛɔ suɔmɔ mli atsuɔ onia kɛfiɔ sɛɛ lɛ he.” Wɔhiɛ sɔɔ oniai ni nyɛtsuɔ lɛ waa diɛŋtsɛ, ni nyɛtsuɔ oniai nɛɛ babaoo kɛtsɔɔ donate.jw.org. lɛ nɔ. Oniai nɛɛ yeɔ ebuaa ni wɔnyɛɔ wɔfeɔ Biblia lɛ kɛ woji ni akɛkaseɔ Biblia lɛ wɔhãa gbɔmɛi fɛɛ, ni mumuii hu fata he lɛ.