Nɔyelii ni yɔɔ je lɛŋ hei srɔtoi ebi ni mɛi ahã gbɛ akã amɛ kɛ mɛi krokomɛi ateŋ, ni amɛŋmɛɛɛ gbɛ ni mɛi abua amɛhe naa kutuu hu. Yehowa Odasefoi etswa amɛfãi shi akɛ amɛbaabo nɔyelii lɛ agbɛtsɔɔmɔi lɛ toi, shi yɛ nakai beiaŋ nɔŋŋ lɛ, amɛbaaya nɔ amɛkpe kɛhã amɛjamɔŋ nifeemɔi lɛ. Enɛ hewɔ lɛ, asafoi lɛ kɛ videoconferencing apps tamɔ Zoom feɔ amɛkpeei lɛ bɔ ni afee ni amɛfee shweshweeshwe.

 Bɔ ni afee ni wɔnyɛ wɔfee wɔsafoŋ kpeei be fɛɛ be, ni efee shweshweeshwe hu lɛ, Gbɛtsɔɔmɔ Kuu lɛ kpɛlɛ ni akɛ oniai ni wɔtsuɔ lɛ eko ahe Zoom akaunt ahã asafoi lɛ. Enɛ eye ebua asafoi komɛi ni kulɛ amɛnyɛŋ amɛwo videoconference akaunt lɛ he nyɔmɔ lɛ waa. Akaunt nɛɛ ekomɛi biɔ ni awo dɔlai 15-20 loo nɔ ni fe nakai po. Kulɛ asafoi nɛɛ kɛ apps ni awooo he nyɔmɔ, ni bɛ shweshweeshwe, ni mɛi abɔ ni baanyɛ akɔnɛti lɛ faaa lɛ feɔ kpeei lɛ. Asafoi fɛɛ ni kɛ Zoom akaunt ni asafo lɛ woɔ he nyɔmɔ lɛ feɔ asafoŋ kpeei lɛ náa he sɛɛ waa, ejaakɛ ekɛ nitsumɔ waaa, eyɛ shweshweeshwe, ni eŋmɛɔ gbɛ koni mɛi babaoo anyɛ akɔnɛti. Kɛbashi amrɔ nɛɛ, asafoi 65,000 ni yɔɔ maji ni fa fe 170 nɔ lɛ kɛ Zoom akaunt nɛɛ feɔ amɛkpeei.

 Kulɛ Kairagi Asafo ni yɔɔ Manado, yɛ North Sulawesi, ni yɔɔ Indonesia lɛ kɛ videoconferencing app ko ni awooo he nyɔmɔ lɛ feɔ asafoŋ kpeei, shi amɛkɛ asafo lɛ Zoom akaunt lɛ bɔi asafoŋ kpeei feemɔ. Nyɛmimɛi po ni leee bɔ ni akɛ kɔmpiuta, tablɛt kɛ amɛhenɔi lɛ tsuɔ nii jogbaŋŋ lɛ, náa kpeei lɛ ahe sɛɛ jogbaŋŋ, ejaakɛ ehe ehiaaa ni kɛ́ kpee lɛ miiya nɔ lɛ, etse ni amɛsaa amɛkɔnɛti ekoŋŋ.”

 Lester Jijón, Jr., ni eji asafoŋ onukpa yɛ Guayacanes Oeste Asafo ni yɔɔ Guayaquil yɛ Ecuador lɛ wie akɛ: “Akɛni nyɛmimɛi lɛ ateŋ mɛi babaoo bɛ shika tsɔ hewɔ lɛ, kulɛ ebaawa ehã asafoi lɛ akɛ amɛbaawo Zoom akaunt ni baanyɛ ehã nyɛmimɛi lɛ fɛɛ aba asafoŋ kpee lɛ he nyɔmɔ. Amrɔ nɛɛ, akɛni Zoom akaunt ni asafo lɛ ehe ni wɔkɛfeɔ asafoŋ kpeei lɛ ŋmɛɔ gbɛ ni mɛi babaoo kɔnɛtiɔ hewɔ lɛ, wɔnyɛɔ wɔfɔ̃ɔ mɛi babaoo nine kɛbaa wɔsafoŋ kpeei lɛ, ni wɔsheee gbeyei akɛ ebaatɛke mɛi abɔ ni baanyɛ akɔnɛti lɛ.”

 Johnson Mwanza, ni eji asafoŋ onukpa yɛ Ngwerere North Asafo ni yɔɔ Lusaka yɛ Zambia lɛ mli lɛ, ŋma akɛ: “Wɔnyɛmimɛi babaoo ewie shii abɔ akɛ, ‘Zoom akaunt ni asafo lɛ eto he gbɛjianɔ lɛ ehã wɔbɛŋkɛ wɔhe kpaakpa, ni wɔnuɔ he hu akɛ Yehowa sumɔɔ wɔ, ni esusuɔ wɔhe waa.’”

 Ajɛ fotro ni akɛyeɔ abuaa mɛi be ni oshãra eba lɛ mli ahe Zoom akaunt lɛ. Oniai ni mɛi jɛɔ amɛsuɔmɔ mli amɛtsuɔ kɛfiɔ jeŋ muu fɛɛ nitsumɔ lɛ sɛɛ lɛ mli ajɛɔ atoɔ fotro nɛɛ. Mɛi babaoo tsɔɔ donate.jw.org lɛ nɔ amɛtsuɔ oniai nɛɛ. Oyiwaladɔŋŋ waa yɛ oniai ni ojɛɔ osuɔmɔ mli otsuɔ lɛ hewɔ. Oniai nɛɛ yeɔ ebuaa wɔ kɛtsuɔ yelikɛbuamɔ nibii krokomɛi ahe nii yɛ je lɛŋ fɛɛ.​—2 Korintobii 8:14.