HII SHI AKƐ KRISTOFONYO
Okɛ Miishɛɛ Ashiɛ Sane Kpakpa Lɛ
Ani ewa kɛhã bo be ko pɛŋ akɛ obaashiɛ? Wɔteŋ mɛi pii baahã hetoo akɛ, hɛɛ. Mɛni hewɔ? Ekolɛ bei pii lɛ mɛi ni yɔɔ wɔshikpɔŋkuku lɛ mli lɛ booo wɔ toi, loo ekolɛ amɛteɔ shi amɛwoɔ wɔ, aloo ekolɛ ewa kɛhã wɔ akɛ wɔkɛ mɛi ni wɔleee baagba sane. Ekã shi faŋŋ akɛ, nibii nɛɛ baanyɛ afite wɔmiishɛɛ. Shi miishɛɛ Nyɔŋmɔ lɛ ji mɔ ni wɔjáa lɛ, ni eesumɔ ni wɔkɛ miishɛɛ asɔmɔ lɛ. (La 100:2; 1Ti 1:11) Mɛni ji yiŋtoi etɛ komɛi ahewɔ ni esa akɛ wɔnya shiɛmɔ he lɛ?
Klɛŋklɛŋ lɛ, sane ni wɔshiɛɔ lɛ hãa mɛi náa hiɛnɔkamɔ. Eyɛ mli akɛ ŋmɛnɛ lɛ, hiɛnɔkamɔ ni mɛi yɔɔ lɛ miitã moŋ, shi wɔbaanyɛ wɔhã mɛi atsuii ayimɔ kɛ “nɔ ko kpakpa he sane kpakpa.” (Yes 52:7, NWT) Nyɔŋmɔ Maŋtsɛyeli lɛ he sane kpakpa lɛ hu baanyɛ ahã wɔná miishɛɛ. Dani obaashi kɛya shiɛmɔ lɛ, susumɔ jɔɔmɔi ni Nyɔŋmɔ Maŋtsɛyeli lɛ kɛbaaba shikpɔŋ lɛ nɔ lɛ he jogbaŋŋ.
Nɔ ni ji enyɔ lɛ, sane kpakpa lɛ ni wɔshiɛɔ lɛ yeɔ ebuaa mɛi yɛ heloŋ kɛ mumɔŋ fɛɛ. Ehãa amɛtsiɔ amɛhe kɛjeɔ nifeemɔi gbohii ahe, ni ehãa amɛnáa naanɔ wala he hiɛnɔkamɔ. (Yes 48:17, 18; Ro 1:16) Wɔshiɛmɔ nitsumɔ lɛ hãa wɔbafeɔ tamɔ mɛi ni miitao mɛi ni epila yɛ oshara ko mli ní amɛbaa amɛyi. Eyɛ mli akɛ mɛi komɛi sumɔɔɔ ni abaa amɛyi moŋ, shi wɔyaa nɔ wɔtaoɔ mɛi ni miisumɔ ni abaa amɛyi lɛ.
Nɔ ni ji etɛ lɛ, wɔshiɛmɔ nitsumɔ lɛ woɔ Yehowa hiɛ nyam, ni no ji nɔ ni he hiaa fe fɛɛ. Ehiɛ sɔɔ wɔshiɛmɔ nitsumɔ lɛ waa. (Yes 43:10; Heb 6:10) Kɛfata he lɛ, ehãa wɔ emumɔ krɔŋkrɔŋ lɛ tswaa, koni wɔnyɛ wɔtsu nitsumɔ nɛɛ. No hewɔ lɛ, kpa Yehowa fai ni ehã oná miishɛɛ, ni ji mumɔ krɔŋkrɔŋ lɛ yibii lɛ eko. (Gal 5:22) Yɛ Yehowa yelikɛbuamɔ naa lɛ, wɔbaanyɛ wɔye wɔgbeyeishemɔi anɔ, ni wɔkɛ ekãa baashiɛ. (Bɔf 4:31) Kɛkɛ lɛ, ekɔɔɔ he eko bɔ ni mɛi ni yɔɔ wɔshikpɔŋkuku lɛ mli lɛ baafee amɛnii amɛhã lɛ, wɔkɛ miishɛɛ baatsu shiɛmɔ nitsumɔ ni akɛwo wɔdɛŋ lɛ.
Te obaasumɔ ni ana bo yɛ shiɛmɔ nitsumɔ lɛ mli tɛŋŋ, akɛ oyɛ miishɛɛ aloo obɛ miishɛɛ? Te obaafee tɛŋŋ ojie miishɛɛ kpo?
KWƐMƆ VIDIO NI JI, NIKASEMƆ KƐ NIIANƆJWƐŊMƆ HÃA ANÁA MIISHƐƐ LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:
-
Mɛni hewɔ esa akɛ wɔhã Biblia lɛ kasemɔ afee oti yɛ wɔshihilɛ mli, kɛ́ wɔkɛ ŋmɛlɛtswai babaoo po shiɛɔ daa nyɔɔŋ lɛ?
-
Mɛɛ gbɛ nɔ wɔbaanyɛ wɔtsɔ wɔkase Maria?
-
Mɛɛ be oto ni okɛjwɛŋɔ Nyɔŋmɔ Wiemɔ lɛ nɔ?
-
Mɛni hãa onáa miishɛɛ kɛ́ ooshiɛ sane kpakpa lɛ?
