Kɛjɛ January 2018 Wɔshiɛmɔ Kɛ Wɔshihilɛ Akɛ Kristofoi Kpee Nifeemɔ Wolo lɛ nɔ kɛbaa lɛ, akɛ shiɛmɔ wiemɔi woɔ nifeemɔ wolo lɛ hiɛ. Awoɔ wɔ hewalɛ ni wɔkɛ mɛi agba sane titri, moŋ fe ni wɔbaahã amɛ woji kɛkɛ. Bɔ ni afee ni shiɛlɔi ana bɔ ni amɛbaafee enɛ amɛhã lɛ, shiɛmɔ wiemɔ vidioi lɛ hãa anaa bɔ ni abaafee akɛ Biblia lɛ pɛ atsu nii kɛje sanegbaa shishi. Shi ani enɛ tsɔɔ akɛ, kɛ́ wɔmiishiɛ yɛ shĩa fɛɛ shĩa lɛ, esaaa akɛ wɔkɛ woji tsuɔ nii? Dabi kwraa! Akɛ nɔkwɛmɔnɔ lɛ, tratii ni wɔkɛbaatsu nii lɛ ji gbɛ ko ni sa ni wɔbaanyɛ wɔtsɔ nɔ wɔje sanegbaa shishi. Wɔbaanyɛ wɔtsɔ gbɛi ni nyiɛ sɛɛ nɛɛ anɔ wɔkɛ tratii lɛ ateŋ eko fɛɛ eko atsu nii:

1. Bi sane ni abaanyɛ ahã hetoo yɛ gbɛi srɔtoi etɛ anɔ ni yɔɔ trati lɛ hiɛ lɛ.

2. Okɛ hetoo ni yɔɔ ŋmalɛ loo ŋmalɛi ni yɔɔ baafa 2 lɛ ŋwɛigbɛ lɛ amli lɛ atsɔɔ mɔ lɛ. Kɛ́ mɔ lɛ yɛ be lɛ, okɛ lɛ akane saji ni yɔɔ trati lɛ mligbɛ lɛ eko, ni nyɛsusu he.

3. Okɛ trati lɛ ahã lɛ, ni owo lɛ hewalɛ ni ekane nɔ ni eshwɛ lɛ yɛ be ni hi kɛhã lɛ mli.

4. Dani obaashi lɛ, okɛ sanebimɔ ni yɔɔ “Kɛhã Hesusumɔ” lɛ shishi lɛ atsɔɔ lɛ, ni oto gbɛjianɔ okɛ lɛ ayasusu hetoo ni Biblia lɛ kɛhãa lɛ he be kroko.

Kɛ́ oku osɛɛ otee lɛ, nyɛsusua hetoo lɛ he, ni oshi sanebimɔ kroko kɛhã be kroko. Obaanyɛ oshi sanebimɔ ko ni yɔɔ wɔwɛbsaiti lɛ nɔ loo sanebimɔ ko ni yɔɔ wolo ni atsĩ tã yɛ trati lɛ sɛɛ lɛ mli. Yɛ be ni sa mli lɛ, hã lɛ Sane Kpakpa Ni Jɛ Nyɔŋmɔ Ŋɔɔ! broshuɔ lɛ eko, loo Nitsɔɔmɔ Dɛŋdadei Titrii lɛ ateŋ nɔ ni akɛfeɔ Biblia mli nikasemɔ lɛ eko.