Biblia lɛ wieɔ faŋŋ akɛ Yesu tee gbohii ashi kɛba wala mli. Nakai amaniɛbɔi lɛ jeee adesãi, amɛba yɛ hei ni yɔɔ diɛŋtsɛ, kɛ bei pɔtɛi amli. Akɛ nɔkwɛmɔnɔ lɛ, yɛ hulutsoo be mli yɛ afi 31 Ŋ.B. lɛ, asafo babaoo ko kɛ Yesu fã gbɛ kɛjɛ Kapernaum kɛtee Nain. Be ni amɛyashɛ lɛ, amɛkɛ asafo kroko kpe. Obaanyɛ ohe gbohiiashitee he amaniɛbɔɔ ni ba sɛɛ mli yɛ jɛmɛ lɛ oye ejaakɛ aŋma yɛ Nyɔŋmɔ Wiemɔ ni ji Biblia lɛ mli, ni agbɛnɛ hu eba yɛ mɛi ni yɔɔ jɛmɛ lɛ fɛɛ ahiɛ.—Kanemɔ Luka 7:11-15.

Yesu tee enaanyo Lazaro ni gbo gbii ejwɛ lɛ hu shi. Obaanyɛ ohe nɔ ni Yesu fee nakai gbi lɛ he amaniɛbɔɔ lɛ oye, ejaakɛ mɛi babaoo ye no hu he odase.—Kanemɔ Yohane 11:39-45.

Yesu tee mɛi ashi ejaakɛ emusuŋ tsɔ lɛ yɛ mɛi lɛ ahe. Efee nakai hu koni ekɛhã mɛi ale akɛ e-Tsɛ lɛ, ni ji mɔ ni Bɔ wala lɛ, ehã lɛ hewalɛ yɛ gbele nɔ.—Kanemɔ Yohane 5:21, 28, 29.

Gbohii ashi ni Yesu tee lɛ hãa wɔnáa hiɛkɛnɔfɔɔ yɛ shi ni ewo yɛ wɔsɛɛ be he lɛ nɔ. Ebaatee mɛi babaoo ashi, ni ebaatee mɛi ni ejaaa ní lé anɔkwa Nyɔŋmɔ lɛ he nɔ ko kwraa lɛ hu ashi. Abaahã amɛ hegbɛ ni amɛkɛle Yehowa Nyɔŋmɔ ni amɛsumɔ lɛ hu.—Kanemɔ Bɔfoi lɛ Asaji 24:15.