No mli lɛ, Ninive ji Ashur Maŋtsɛyeli lɛ maŋtiase. Eji maŋ ko ni he wa waa, eyɛ maŋtsɛmɛi awei kɛ jamɔhei fɛfɛji, ni eyɛ gbɛjegbɛi ni lɛɛlɛɛi kɛ gbogboi wuji hu. Hebri gbalɔ Nahum tsɛ maŋ nɛɛ akɛ “láshishwiemɔ maŋ.”—Nahum 3:1.

Gbɛ́i nɛɛ sa maŋ nɛɛ waa, ejaakɛ nibii ni aŋɔ kɛjɛ Sanherib maŋtsɛwe lɛ maa Ashur yiwalɛ nifeemɔi lɛ anɔ mi diɛŋtsɛ. Nibii nɛɛ eko nɔ lɛ, atɛŋ yiwalɔ ko ni miifã gboklɛfonyo ko ni aka lɛ akpɛtɛ shikpɔŋ lɛ lilɛi yɛ edaaŋ. Nitɛŋmɔi lɛ ekrokomɛi anɔ hu lɛ, onaa mɛi ni aŋɔ amɛ nom ni akɛ kpãa eŋmɔ kpoŋ, ni akɛ kpoŋ nɛɛ egbulɔ nomii lɛ agugɔji loo amɛnaabui kɛmiigbala amɛ, ni maŋ lɛ kɛ nifeemɔ nɛɛ shwãa. Ahaa mɛi ni aŋɔ amɛ nom lɛ ahiɛnyiɛlɔi lɛ tsotsoroɔ amɛmaŋtsɛmɛi lɛ ayitsei ni afolɔ lɛ yɛ amɛkuɛ tamɔ kuɛnii lɛ, ni eyɛ taŋ waa.

Ashur maŋ lɛ he yinɔsaneŋmalɔ Archibald Henry Sayce tsɔɔ yiwalɛ nifeemɔi ni yaa nɔ beni aŋɔ maŋ ko nom yɛ ta mli lɛ mli akɛ: “Afolɔɔ gbɔmɛi ayitsei, ni abuaa naa tamɔ gɔŋ ashwieɔ gbɛ ni kunimyelɔ lɛ baatsɔ nɔ lɛ nɔ; ashãa gbekɛbii hii kɛ yei hiɛkalɔi, loo akɛ amɛ toɔ kɛha yiwalɛ nifeemɔ ko ni wa po fe enɛ; no ji asɛŋɔ hii yɛ tsei anɔ, akpɔlɔɔ amɛhewoji beni amɛhiɛ kamɔ, ashwilaa amɛhiŋmɛi, loo afolɔɔ amɛniji kɛ amɛnaji, ni afolɔɔ amɛtoi kɛ amɛgugɔji hu.”

Nyɔŋmɔ fã Yudafoi lɛ akɛ: “Kɛji omã tsũ hee lɛ, foo afabaŋ okɛbɔle otsũ lɛ yiteŋ, koni mɔ ko akajɛ jɛi ebagbee shi ní lá ko yi sɔ̃ miiba oshĩa lɛ nɔ.” (5 Mose 22:8) Ehe bahia ni afo afabaŋ nɛɛ kɛbu mɛi ahe akɛni yɛ Biblia beaŋ lɛ, Yudafoi lɛ feɔ nibii srɔtoi yɛ amɛtsũi lɛ ayiteaŋ hewɔ.

Israelbii babaoo woɔ amɛtsũi lɛ ayiteŋ bɔ ni abaanyɛ ata jɛmɛ. Tsũ lɛ yiteŋ bafeɔ he ko ni sa ni mɛi tara shi amɛwereɔ hulu, amɛhereɔ kɔɔyɔɔ, loo amɛyatsuɔ shĩa nibii krokomɛi yɛ. Yɛ hulutsoo beaŋ lɛ, tsũ lɛ yiteŋ bafeɔ he ni sa jogbaŋŋ kɛha wɔɔ. (1 Samuel 9:26) Okwaafoi kaa akokoi kɛ amɛhenɔi loo agbamii kɛ weinyibii ni egbiɔ yɛ jɛmɛ dani amɛyagbɛlɛɔ.—Yoshua 2:6.

Kɛfata he lɛ, mɛi komɛi kɛ tsũ yiteŋ hu fee jamɔhe kɛha anɔkwa jamɔ loo wɔŋjamɔ. (Nehemia 8:16-18; Yeremia 19:13) Bɔfo Petro tee eyasɔle yɛ tsũ yiteŋ aaafee shwane ŋmɛlɛ nyɔŋma kɛ enyɔ mli. (Bɔfoi lɛ Asaji 10:9-16) Kɛ́ adu agbamii koni eha hɔŋ loo afolɔ tɛŋ blɛoi ashwie nɔ lɛ, jɛmɛ shitamɔ baanyɛ afee miishɛɛ waa.

Wolo ko (The Land and the Book) wie akɛ yɛ Biblia beaŋ lɛ, kɛ́ Israelbii ma tsũ lɛ, amɛfeɔ atrakpoi loo atswere ko “kɛkpɛtɛɔ tsu lɛ he, shi yɛ kpo lɛ teŋ nɔŋŋ,” ni akwɔɔ kɛyaa tsũ lɛ yiteŋ. No hewɔ lɛ, shĩatsɛ ko baanyɛ aje tsu lɛ yiteŋ eyi shi ni eboteee shĩa lɛ mli. Ekolɛ, enɛ hewɔ Yesu bɔ kɔkɔ kɛtsɔɔ bɔ ni ehe hiaa ákɛ akɛ oyaiyeli aaajo foi kɛshi maŋ ko ni awo he ka lɛ mli lɛ akɛ: “Mɔ ni yɔɔ tsũ yiteŋ lɛ, ekakpeleke shi eyakɔ nɔ ko kɛjɛ eshia.”—Mateo 24:17.