Kasemɔ Nii Kɛjɛ Nyɔŋmɔ Wiemɔ Lɛŋ

Mɛni Baaba yɛ Kojomɔ Gbi lɛ Nɔ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ bo o-Biblia lɛŋ hei ni obaanyɛ okane hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi lɛ ahe.

1. Mɛni ji Kojomɔ Gbi Lɛ?

Taakɛ mfoniri ni yɔɔ ninejurɔgbɛ lɛ tsɔɔ lɛ, mɛi babaoo susuɔ akɛ yɛ Kojomɔ Gbi lɛ nɔ lɛ, akɛ susumai akpekpe toi akpei abɔ baaba Nyɔŋmɔ maŋtsɛsɛi lɛ hiɛ koni adamɔ amɛtsutsu nifeemɔi lɛ anɔ akojo amɛ—mɛi komɛi anyɔmɔwoo baafee wala yɛ ŋwɛi, ni mɛi komɛi anyɔmɔwoo lɛ baafee piŋmɔ yɛ hɛl loo Abonsam la mli. Kɛlɛ, Biblia lɛ tsɔɔ akɛ yiŋtoo ni yɔɔ Kojomɔ Gbi lɛ sɛɛ ji koni akpɔ mɛi kɛjɛ jalɛsane ni ayeee mli. (Lala 96:13) Nyɔŋmɔ ehala Yesu akɛ Kojolɔ ni baasaa ekɛ jalɛsaneyeli abaha adesai ekoŋŋ.—Kanemɔ Yesaia 11:1-5; Bɔfoi lɛ Asaji 17:31.

2. Mɛɛ gbɛ nɔ Kojomɔ Gbi lɛ kɛ jalɛsaneyeli baaba ekoŋŋ?

Beni Adam, ni ji klɛŋklɛŋ adesa lɛ je gbɛ egbo Nyɔŋmɔ nɔ toi lɛ, ekɛ eshwiei fɛɛ yawo esha, piŋmɔ kɛ gbele mli. (Romabii 5:12) Bɔni afee ni ajaje shihilɛ ni ejaaa nɛɛ, Yesu kɛ mɛi akpekpe toi akpei abɔ ni egboi lɛ baaba wala mli ekoŋŋ loo ebaatee amɛ shi. Kpojiemɔ wolo lɛ haa wɔnaa akɛ enɛ baaba yɛ Kristo Yesu afii akpe nɔyeli lɛ mli.—Kanemɔ Kpojiemɔ 20:4, 11, 12.

Adamɔŋ nibii ni mɛi ni atee amɛ shi lɛ fee dani amɛgboi lɛ anɔ kɛkojo amɛ, shi moŋ nibii ni yɔɔ “woji” ni atsĩ tã yɛ Kpojiemɔ yitso 20 lɛ mli lɛ anɔ abaadamɔ akojo amɛ. (Romabii 6:7) Taakɛ bɔfo Paulo tsɔɔ lɛ, “jalɔi kɛ mɛi ni ejaaa” fata mɛi ni abaatee amɛshi kɛba wala mli koni amɛná hegbɛ amɛkase Nyɔŋmɔ he nii lɛ ahe.—Kanemɔ Bɔfoi lɛ Asaji 24:15.

 3. Mɛni Kojomɔ Gbi lɛ baatsu?

Mɛi ni náaa ale Yehowa Nyɔŋmɔ koni amɛsɔmɔ lɛ dani amɛgboi lɛ baaná hegbɛ ni baaha amɛtsake ni amɛfee ekpakpa. Kɛ́ amɛfee ekpakpa lɛ, amɛshitee lɛ baafee ‘shitee kɛmiiya wala mli.’ Kɛlɛ, mɛi ni abaatee amɛshi lɛ ekomɛi ebasumɔŋ ni amɛfee Yehowa suɔmɔnaanii. Mɛi nɛɛ ashitee lɛ baafee ‘shitee kɛmiiya kojomɔ mli.’—Kanemɔ Yohane 5:28, 29; Yesaia 26:10; 65:20.

Beni afii akpe Kojomɔ Gbi lɛ baaba naagbee lɛ, no mli lɛ Yehowa eku sɛɛ ekɛ adesai ni feɔ toiboo lɛ eba wala ni yeɔ emuu mli ekoŋŋ. (1 Korintobii 15:24-28) Mɛɛ gbɛkpamɔ ni yɔɔ miishɛɛ po enɛ ji kɛha mɛi fɛɛ ni feɔ toiboo lɛ! Yɛ naagbee kaa lɛ mli lɛ, Nyɔŋmɔ baajie Satan Abonsam, ní no mli lɛ ehi bu kwɔŋkwɔŋ lɛ mli afii akpe lɛ, kɛje kpo. Satan baabɔ mɔdɛŋ ekoŋŋ akɛ ekpale gbɔmɛi kɛjɛ Yehowa he, shi mɛi ni baakpoo Satan lɛ baahi shikpɔŋ lɛ nɔ kɛya naanɔ.—Kanemɔ Yesaia 25:8; Kpojiemɔ 20:7-9.

4. Mɛɛ kojomɔ gbi kroko adesai baaná he sɛɛ?

Agbɛnɛ hu Biblia lɛ kɛ wiemɔ ni ji “kojomɔ gbi” lɛ tsuɔ nii kɛhaa nifeemɔ ni kɛ amrɔ nɛɛ nibii agbɛjianɔtoo lɛ naagbee baaba lɛ. Nɛkɛ kojomɔ gbi nɛɛ baaba trukaa taakɛ Noa beaŋ Nu Afua, ni kpata nakai yinɔ fɔŋ lɛ hiɛ lɛ ba lɛ. Miishɛɛ sane ji akɛ, ‘gbɔmɛi ni ekwa’ Nyɔŋmɔ lɛ ahiɛkpatamɔ ni ebɛŋkɛ kpaakpa lɛ baagbele gbɛ kɛha shikpɔŋ nɔ gbɛjianɔtoo hee “ni jalɛ hiɔ mli lɛ.”—Kanemɔ 2 Petro 3:6, 7, 13.—w12-E 9/1.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? baafa 213-215 lɛ mli

[Mfoniri ni yɔɔ baafa 16]

“The Last Judgement,” ni Gustave Doré ŋma lɛ, 1832-1883

[He ni Sane lɛ Jɛ]

Mɔ ni kpɛ mfonirii nɛɛ ji Doré