“Suɔmɔ Be yɛ ni Nyɛ̃ɛ Be Yɛ”

“NYƆŊMƆ lɛ, suɔmɔ ji lɛ.” Yɛ maji komɛi anɔ lɛ, mɛi ŋmalaa wiemɔi nɛɛ kɛkpɛtɛɔ amɛtsũi amli. Eji anɔkwale akɛ wiemɔi nɛɛ tsɔɔ nɔ̃ gbɔmɔ ni Nyɔŋmɔ ji diɛŋtsɛ—eji suɔmɔ.

Shi mɛi babaoo leee akɛ wiemɔi nɛɛ yɛ Biblia lɛ mli. Bɔfo Yohane ji mɔ ni ŋma wiemɔi nɛɛ akɛ: ‘Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ.’ (1 Yohane 4:8) Yohane ŋma kɛkɔ suɔmɔ ni Nyɔŋmɔ yɔɔ kɛha je lɛ, ni ji adesai lɛ hu he akɛ: “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”—Yohane 3:16.

Enɛ hewɔ lɛ, ekolɛ mɛi komɛi susuɔ akɛ be fɛɛ be lɛ Nyɔŋmɔ baaku ehiɛ eshwie nɔ fɛɛ nɔ ni wɔfeɔ lɛ nɔ. Bɔ ni mɛi babaoo baa amɛjeŋ amɛhaa ŋmɛnɛ lɛ tsɔɔ akɛ amɛsusuɔ akɛ ekɔɔɔ he eko nɔ ni amɛfeɔ lɛ, Nyɔŋmɔ gbalaŋ amɛ toi. Shi ani nakai eji? Ani Nyɔŋmɔ sumɔɔ mɛi kpakpai kɛ mɛi fɔji fɛɛ? Ani be shɛɔ ní Nyɔŋmɔ nyɛ̃ɔ mɔ ko?

Nibii ni Nyɔŋmɔ Sumɔɔ kɛ Nibii ni Enyɛ̃ɔ

Nilelɔ Maŋtsɛ Salomo jaje akɛ: “Nɔ fɛɛ nɔ yɛ ebe ní ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe . . . suɔmɔ be yɛ, ni nyɛ̃ɛ be yɛ.” (Jajelɔ 3:1, 8) Ŋmalɛ nɛɛ tsɔɔ akɛ, eyɛ mli akɛ Nyɔŋmɔ yɛ suɔmɔ babaoo, ni emli hi moŋ, shi bei komɛi lɛ, enyɛ̃ɔ nɔ ko.

Klɛŋklɛŋ kwraa lɛ, te wiemɔ “nyɛ̃ɛ” ní akɛtsu nii yɛ Biblia lɛ mli lɛ shishi lɛ? Wolo ko tsɔɔ akɛ: “Wiemɔ ‘nyɛ̃ɛ’ lɛ hiɛ shishinumɔi srɔtoi babaoo yɛ Ŋmalɛ lɛ mli. Ebaanyɛ etsɔɔ hetsɛ̃ ni naa wa, mɔ ni abɛɔ awoɔ mli be kplaŋŋ ní bei pii lɛ ehaa agbeɔ mɔ lɛ he guɔ. Nyɛ̃ɛ ni tamɔ nɛkɛ lɛ baanyɛ ahe mɔ ko jwɛŋmɔ aahu akɛ ebaatao gbɛ ko nɔ etsɔ eye mɔ ni enyɛ̃ɔ lɛ lɛ awui.” Enɛ ji shishinumɔ ní wɔteŋ mɛi babaoo yɔɔ yɛ nyɛ̃ɛ he, ni wɔnaa nibii ni jɛɔ nyɛ̃ɛ ni tamɔ nɛkɛ lɛ mli kɛbaa lɛ yɛ jeŋ fɛɛ. Shi nakai wolo lɛ nɔŋŋ tee nɔ etsɔɔ mli akɛ: “Agbɛnɛ hu, ‘nyɛ̃ɛ’ baanyɛ atsɔɔ nɔ ko ni ahiɔ kwraa, shi jeee kɛ jwɛŋmɔ lɛ akɛ abaaye nakai nɔ̃ lɛ awui.”

Shishinumɔ ni ji enyɔ nɛɛ ji nɔ ni wɔsusuɔ he lɛ, shi jeee klɛŋklɛŋ nɔ̃ lɛ. Eji hetsɛ̃ ni naa wa ní anáa ahaa nɔ ko, loo nɔ ko ní ahiɔ kwraa—shi jeee kɛ jwɛŋmɔ akɛ agbe mɔ he guɔ loo aye awui. Ani Nyɔŋmɔ baanyɛ aná nyɛ̃ɛ ni tamɔ nɛkɛ? Kadimɔ nɔ ni Abɛi 6:16-19 lɛ kɛɔ lɛ: “Nibii ekpaa Yehowa nyɛɔ, ni nɔ ni ji kpawo lɛ ji enihiinii: Hewoo hiŋmɛii, apasa lilɛi, kɛ niji ni shwieɔ lá ni eye bem shi, tsui ni shwieɔ eyiŋ jwɛŋmɔi fɔ̃ji, naji ni he yɔɔ oyá kɛ foijee kɛ efɔŋ mli yaa, amale odaseyelɔ ni foɔ sane tãa, kɛ mɔ ni woɔ nyɛmimɛi ateŋ béi.”

Taakɛ wɔna lɛ, nifeemɔi komɛi yɛ ní Nyɔŋmɔ nyɛ̃ɔ. Ni kɛlɛ, enyɛ̃ɛɛ mɛi ni feɔ nakai  nibii lɛ doo. Esusuɔ shihilɛi komɛi, tamɔ mɔ lɛ gbɔjɔmɔi, shihilɛ mli ni eyɔɔ, bɔ ni atsɔse lɛ aha, kɛ le ni eleee ni efee lɛ ahe. (1 Mose 8:21; Romabii 5:12) Mɔ ni ŋma Abɛi awolo lɛ tsɔɔ mli yɛ gbɛ ni sa nɔ akɛ: “Mɔ ni Yehowa sumɔɔ lɛ, lɛ ekãa, tamɔ bɔ ni tsɛ feɔ ebi ni eyɔɔ ehe tsui lɛ!” (Abɛi 3:12) Ekolɛ fɔlɔ ko baanyɛ̃ nibii fɔji ni ebi ko feɔ lɛ, shi akɛni esumɔɔ ebi lɛ lolo hewɔ lɛ, ebaafee bɔ fɛɛ bɔ ni eeenyɛ kɛye ebua lɛ ní ekwa esu gbonyo lɛ kɛtsɔ etoi ní eeegbala lɛ nɔ. Akɛni Yehowa hu yɛ suɔmɔ hewɔ lɛ, ekɔɔ gbɛ ni tamɔ nakai nɔŋŋ kɛ́ ena akɛ abaanyɛ ahere mɔ fɔŋ lɛ yiwala.

Be mli ni Eja Gbɛ akɛ Aaaná Nyɛ̃ɛ

Ni kɛ́ mɔ ko bale nɔ ni ji Nyɔŋmɔ suɔmɔnaanii shi ehiii shi yɛ naa hu? Suɔmɔ ní Nyɔŋmɔ yɔɔ kɛha nakai mɔ lɛ tãa. Kɛ́ eje gbɛ etee nɔ efee nibii ni Yehowa nyɛ̃ɔ lɛ, no lɛ, Yehowa baanyɛ̃ lɛ. Ákɛ nɔkwɛmɔnɔ lɛ, Biblia lɛ kɛɔ akɛ: “Yehowa lɛ, jalɔ moŋ ekãa; shi mɔ fɔŋ kɛ mɔ ni sumɔɔ yiwalɛ lɛ, esusuma nyɛ̃ɔ amɛ.” (Lala 11:5) Bɔfo Paulo fee lɛ faŋŋ yɛ wolo ni eŋma eha Hebribii lɛ mli akɛ, eshaifaa ko bɛ kɛha mɛi ni tamɔ nɛkɛ ni tsakeee amɛtsui lɛ. Ekɛɛ akɛ: “Kɛ́ kwa wɔkwaa wɔfeɔ esha, beni wɔná anɔkwale he nilee lɛ sɛɛ lɛ, belɛ eshai ahe afɔle ko bɛ dɔŋŋ; shi kojomɔ gbɛkwɛmɔ ní yɔɔ gbeyei kɛkɛ, kɛ [awuŋayeli ni naa wa tamɔ la] ní baashã henyɛlɔi lɛ.” (Hebribii 10:26, 27) Mɛni hewɔ Nyɔŋmɔ ni yɔɔ suɔmɔ lɛ baafee nɔ ko ni tamɔ nɛkɛ?

Kɛ́ mɔ ko je gbɛ etee nɔ efee esha ko ni yɔɔ hiɛdɔɔ lɛ, fiofio lɛ, eshɛɔ he ko ni enyɛɛɛ etsake dɔŋŋ. Mɔ lɛ jeŋba baanyɛ afite kwraa bɔ ni anyɛŋ ajaje lɛ, loo asaa lɛ. Biblia lɛ kɛ gbɔmɔ ni tamɔ nɛkɛ lɛ toɔ kootsɛ ni nyɛŋ ehe turuntrai lɛ etsake lɛ he. (Yeremia 13:23) Akɛni mɔ lɛ nyɛŋ aná tsuitsakemɔ hewɔ lɛ, Biblia lɛ tsɔɔ akɛ “eye fɔ kɛmiiya naanɔ,” ni eshaifaa ko bɛ kɛha lɛ dɔŋŋ.—Marko 3:29.

Nakai eji yɛ Adam kɛ Hawa kɛ Yuda Iskariot gbɛfaŋ. Akɛni abɔ Adam kɛ Hawa akɛ mɛi ni eye emuu, ní amɛnu Nyɔŋmɔ famɔ ni yɔɔ faŋŋ ní ekɛha amɛ lɛ shishi hewɔ lɛ, ekã shi faŋŋ akɛ esha ni amɛfee lɛ ji nɔ ni amɛje gbɛ amɛfee, ni no hewɔ lɛ amɛbɛ naajiemɔ ko. Nɔ ni Nyɔŋmɔ kɛɛ amɛ beni amɛfee esha lɛ sɛɛ lɛ tsɔɔ akɛ ebiii ni amɛtsake amɛtsui. (1 Mose 3:16-24) Eyɛ mli akɛ Yuda yeee emuu moŋ, shi ekɛ Nyɔŋmɔ diɛŋtsɛ Bi lɛ bɔ gbagbalii, ni kɛlɛ etsɔɔ esɛɛ gbɛ. Yesu diɛŋtsɛ tsɛ Yuda akɛ “laajemɔ bi.” (Yohane 17:12) Biblia lɛ hu tsɔɔ akɛ Abonsam ji eshafeelɔ ni ekpilim etsui kɛjɛ teteete, ni hiɛkpatamɔ pɛ sa lɛ. (1 Yohane 3:8; Kpojiemɔ 12:12) Nyɔŋmɔ nyɛ̃ɔ mɛi nɛɛ.

 Shi eji anɔkwale akɛ jeee mɔ fɛɛ mɔ ni efee esha lɛ naŋ yiwalaheremɔ, ni enɛ haa wɔmii shɛɔ wɔhe waa. Yehowa toɔ etsui shi waa, ni enyaaa he akɛ eeegbala eshafeelɔi ni leee ni amɛfee lɛ atoi. (Ezekiel 33:11) Ewoɔ amɛ hewalɛ ni amɛtsake amɛtsui, koni akɛ amɛhe eshai lɛ afa amɛ. Wɔkaneɔ akɛ: “Ha ní mɔ fɔŋ akwa egbɛ̀i lɛ, ni nɔshafeelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu!”—Yesaia 55:7.

Jwɛŋmɔ ni Ja ni Aaaná yɛ Suɔmɔ kɛ Nyɛ̃ɛ He

Ekã shi faŋŋ akɛ, ákɛ anɔkwa Kristofoi ni miikase Nyɔŋmɔ lɛ, esa akɛ wɔle “be” ni esa akɛ ‘wɔjie suɔmɔ kpo,’ kɛ “be” ni esa akɛ ‘wɔjie nyɛ̃ɛ kpo.’ Kɛ́ mɔ ko nuɔ nii ahe fe nine lɛ, no lɛ ebaanyɛ eha ejie suɔmɔ kɛ mɔbɔnalɛ kpo yɛ gbɛ ni ejaaa nɔ. Shi nɔ ni kaselɔ Yuda wie lɛ baanyɛ aye abua wɔ koni wɔná jwɛŋmɔ ni ja yɛ mɔbɔnalɛ kpojiemɔ, kɛ nyɛ̃ɛ ni wɔɔnyɛ̃ esha lɛ he. Ekɛɛ akɛ: “Mɛi komɛi hu nyɛkɛ hegbeyeishemɔ anaa amɛ mɔbɔ, ni nyɛhĩa amɛtade ni amɛkɛ heloo jeŋba ewo he muji lɛ tete.” (Yuda 22, 23, Ga Biblia hee) No hewɔ lɛ, esa akɛ wɔnyɛ̃ nɔ fɔŋ, shi jeee mɔ ni fee nɔ fɔŋ lɛ doo.

Kɛfata he lɛ, afã Kristofoi akɛ amɛsumɔ amɛhenyɛlɔi kɛtsɔ ekpakpa ni wɔɔfee amɛ lɛ nɔ. Yesu kɛɛ akɛ: “Nyɛsumɔa nyɛhenyɛlɔi, . . . nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ.” (Mateo 5:44) Enɛ hewɔ Yehowa Odasefoi shiɛɔ Nyɔŋmɔ Maŋtsɛyeli lɛ he sanekpakpa lɛ amɛhaa mɛi daa ni amɛfɔ̃ɔɔ lɛ, eyɛ mli moŋ akɛ mɛi komɛi booo amɛshɛɛ sane lɛ toi. (Mateo 24:14) Akɛni Odasefoi lɛ kɛ nɔ ni Biblia lɛ kɛɔ lɛ kpãa gbee hewɔ lɛ, amɛnaa mɔ fɛɛ mɔ akɛ mɔ ni Yehowa baanyɛ ajie suɔmɔ kpo atsɔɔ lɛ, ní ena lɛ mɔbɔ. Kɛ́ mɛi hiɛ esɔɔɔ mɔdɛŋ ni Odasefoi lɛ bɔɔ akɛ amɛye amɛbua amɛ, loo amɛkpoo amɛ, loo amɛwa amɛyi po lɛ, Odasefoi lɛ kɛ bɔfo Paulo ŋaawoo nɛɛ tsuɔ nii: “Nyɛjɔɔa mɛi ni waa nyɛ yi lɛ, nyɛjɔɔa ni nyɛkalomɔa . . . Nyɛkaŋɔa efɔŋ nyɛtoa mɔ ko mɔ ko efɔŋ najiaŋ.” (Romabii 12:14, 17) Amɛhaa ehiɔ amɛjwɛŋmɔ mli akɛ Yehowa ji mɔ ni baatsɔɔ mɛi ni sa akɛ esumɔ, kɛ mɛi ni sa akɛ enyɛ̃ amɛ. Lɛ ji mɛi fɛɛ a-Kojolɔ—lɛ ebaatsɔɔ mɛi ni sa wala, kɛ mɛi ni sa gbele.—Hebribii 10:30.

Hɛɛ, “Nyɔŋmɔ lɛ, suɔmɔ ji lɛ.” No hewɔ lɛ, esa akɛ wɔhiɛ asɔ suɔmɔ ni esumɔɔ wɔ lɛ, ni wɔbɔ mɔdɛŋ wɔkase nɔ ni ji esuɔmɔnaa nii, ni wɔhi shi yɛ naa. Yehowa Odasefoi ni yɔɔ he ni oyɔɔ lɛ yɛ he miishɛɛ akɛ amɛbaaye amɛbua bo ni okase nɔ ni ji Nyɔŋmɔ suɔmɔnaa nii kɛjɛ bo diɛŋtsɛ o-Biblia lɛ mli, kɛ bɔ ni ooofee okɛtsu nii yɛ oshihilɛ mli. Kɛ́ ofee nakai lɛ, Nyɔŋmɔ enyɛŋ bo, shi moŋ ebaasumɔ bo.—w11-E 12/1.

[Wiemɔ ni akɔ ni akɛmiitsu nii ni yɔɔ baafa 13]

“Nibii ekpaa Yehowa nyɛɔ, ni nɔ ni ji kpawo lɛ ji enihiinii: Hewoo hiŋmɛii, apasa lilɛi, kɛ niji ni shwieɔ lá ni eye bem shi, tsui ni shwieɔ eyiŋ jwɛŋmɔi fɔ̃ji, naji ni he yɔɔ oyá kɛ foijee kɛ efɔŋ mli yaa, amale odaseyelɔ ni foɔ sane tãa, kɛ mɔ ni woɔ nyɛmimɛi ateŋ béi.”—ABƐI 6:16-19

[Wiemɔ ni akɔ ni akɛmiitsu nii ni yɔɔ baafa 14]

“Kɛ́ kwa wɔkwaa wɔfeɔ esha, beni wɔná anɔkwale he nilee lɛ sɛɛ lɛ, belɛ eshai ahe afɔle ko bɛ dɔŋŋ; shi kojomɔ gbɛkwɛmɔ ní yɔɔ gbeyei kɛkɛ.”—HEBRIBII 10:26, 27

[Wiemɔ ni akɔ ni akɛmiitsu nii ni yɔɔ baafa 15]

“Ha ní mɔ fɔŋ akwa egbɛ̀i lɛ, ni nɔshafeelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ . . . Ekɛaafa lɛ aahu!”—YESAIA 55:7

[Mfoniri ni yɔɔ baafa 14]

Fɔlɔ ni yɔɔ suɔmɔ lɛ gbalaa ebi toi koni ekɛye ebua lɛ

[Mfoniri ni yɔɔ baafa 15]

Nyɔŋmɔ ejie esuɔmɔ kɛ emɔbɔnalɛ lɛ kpo etsɔɔ gboklɛfoi babaoo