Tsi Obɛŋkɛ Nyɔŋmɔ

Obaanyɛ Oná “Nyɔŋmɔ he Nilee”

YEHOWA NYƆŊMƆ efee nibii ni baaha wɔnine ashɛ jwetri ko ni nɔ bɛ nɔ, ni eesumɔ waa akɛ wɔná jwetri nɛɛ. Jwetri nɛɛ haaa mɔ aná heloonaa nibii, shi moŋ ehaa mɔ náa nɔ ko ní je lɛŋ shika fɛɛ nyɛɛɛ ahe—hejɔlɛ, tsui ni nyɔɔ mɔ mli, kɛ miishɛɛ yɛ shihilɛ mli. Mɛni ji jwetri nɛɛ? Nilelɔ Maŋtsɛ Salomo wiemɔi ni yɔɔ Abɛi 2:1-6 lɛ tsɔɔ nɔ ni eji.

Salomo wie jwetri nɛɛ he akɛ eji “Nyɔŋmɔ he nilee”—ni ji anɔkwalei ni kɔɔ Nyɔŋmɔ kɛ eyiŋtoi ahe ni yɔɔ Biblia lɛ mli lɛ. (Kuku 5) Jwetri nɛɛ hiɛ fãi srɔtoi.

Anɔkwale tsɔɔmɔi. Biblia lɛ haa sanebimɔi tamɔ enɛɛmɛi ahetoo: Te atsɛɔ Nyɔŋmɔ tɛŋŋ? (Lala 83:19) Mɛni baa mɔ nɔ yɛ gbele mli? (Lala 146:3, 4) Mɛni hewɔ wɔyɔɔ shihilɛ mli? (1 Mose 1:26-28; Lala 115:16) Kɛ́ okwɛ lɛ, aso jwetri ko kɛ sanebimɔi ni he hiaa waa tamɔ nɛkɛ lɛ ahetoo lɛ yeɔ egbɔ?

Ŋaawoo kpakpa. Biblia lɛ haa wɔleɔ shihilɛ gbɛ ni hi fe fɛɛ. Te ooofee tɛŋŋ oha ogbalashihilɛ aye omanye? (Efesobii 5:28, 29, 33) Te ooofee tɛŋŋ otsɔse obii koni amɛdara kɛbatsɔmɔ onukpai kpakpai? (5 Mose 6:5-7; Efesobii 6:4) Te ooofee tɛŋŋ oná miishɛɛ yɛ shihilɛ mli? (Mateo 5:3; Luka 11:28) Shikome ekoŋŋ lɛ, aso jwetri ko kɛ ŋaawoo kpakpa ní aaaná yɛ saji nɛɛ ahe lɛ yeɔ egbɔ?

Bɔ ni Nyɔŋmɔ ji kɛ esui lɛ ashishinumɔ. Biblia lɛ ji nɔ titri ni haa wɔleɔ Nyɔŋmɔ he anɔkwa saji. Te Nyɔŋmɔ ji ha tɛŋŋ? (Yohane 1:18; 4:24) Ani esusuɔ wɔhe? (1 Petro 5:6, 7) Mɛni ji esui titrii lɛ ekomɛi? (2 Mose 34:6, 7; 1 Yohane 4:8) Kɛ́ okwɛ lɛ, jara enyiɛ abaanyɛ awo yɛ anɔkwa saji ni kɔɔ wɔ-Bɔlɔ lɛ he lɛ he?

“Nyɔŋmɔ he nilee” lɛ ji mfonirifeemɔŋ jwetri ni nɔ bɛ lɛɛlɛŋ. Te ooofee tɛŋŋ oná? Salomo kɛ nilee nɛɛ to “jwetrii ni aŋɔtee” he yɛ Abɛi 2:4 lɛ, ni ŋmalɛ nɛɛ baanyɛ aye abua wɔ ni wɔná sanebimɔ nɛɛ hetoo. Susumɔ enɛ he okwɛ: Jwetri ko ni aŋɔtee lɛ diɛŋtsɛ nyɛŋ ajɛ he ni akɛto lɛ ni ebagbee wɔdɛŋ trukaa. Ja wɔgbo deŋme dani wɔbaanyɛ wɔná. Nakai nɔŋŋ eji yɛ Nyɔŋmɔ he nilee lɛ gbɛfaŋ. Aŋɔ jwetri nɛɛ ato yɛ Biblia lɛ mli. Ja wɔbɔ he mɔdɛŋ waa dani wɔbaaná.

Salomo tsɔɔ nɔ ni esa akɛ wɔfee koni wɔná “Nyɔŋmɔ he nilee” lɛ. Wiemɔi ni ji “omɔ miwiemɔi lɛ amli,” kɛ “okɛ otsui ha” lɛ tsɔɔ akɛ esa akɛ wɔjɛ wɔtsuiŋ wɔkpɛlɛ nɔ. (Kuku 1, 2) Wiemɔi ni ji “obolɔ otsɛ́,” “otao esɛɛ gbɛ,” kɛ “otao” lɛ tsɔɔ akɛ esa akɛ wɔbɔ he mɔdɛŋ waa, ni wɔ diɛŋtsɛ wɔjɛ wɔtsuiŋ wɔfee nakai. (Kuku 3, 4) Belɛ, kɛ́ wɔɔná nakai jwetri lɛ, esa akɛ wɔkɛ tsui kpakpa akase Biblia lɛ jogbaŋŋ.—Luka 8:15.

Kɛ́ wɔ tsutsu wɔfee nakai lɛ, Yehowa baaye abua wɔ koni wɔná ehe nilee lɛ. Kuku 6 lɛ tsɔɔ akɛ “Yehowa haa aleɔ nii.” Ja Nyɔŋmɔ eye ebua wɔ dani wɔbaanyɛ wɔnu Biblia mli anɔkwalei lɛ ashishi jogbaŋŋ. (Yohane 6:44; Bɔfoi lɛ Asaji 16:14) Obaanyɛ oná nɔmimaa akɛ kɛ́ ojɛ anɔkwayeli mli otao Nyɔŋmɔ Wiemɔ lɛ mli lɛ, obaaná “Nyɔŋmɔ he nilee” lɛ—eji jwetri ni baaha otsui anyɔ omli yɛ shihilɛ mli kɛteke nɔ.—Abɛi 2:10-21. *—w11-E 10/1.

[Shishigbɛ niŋmaa]