Nɔ ni Yesu Tsɔɔ yɛ Nyɔŋmɔ He

“Mɔ pɛ ni le Tsɛ lɛ jogbaŋŋ ji Bi lɛ. Shi Bi lɛ miisumɔ ni egba Tsɛ lɛ he saji etsɔɔ mɛi krokomɛi bɔni afee ni amɛ hu amɛle Tsɛ lɛ.”—LUKA 10:22, CONTEMPORARY ENGLISH VERSION.

DANI Nyɔŋmɔ Bi lɛ aaaba shikpɔŋ lɛ nɔ akɛ gbɔmɔ lɛ, ekɛ e-Tsɛ lɛ ná naanyobɔɔ ni bɛŋkɛ kpaakpa mli ŋɔɔmɔ afii babaoo. (Kolosebii 1:15) No ha Bi lɛ le e-Tsɛ lɛ susumɔi, ehenumɔi kɛ egbɛi. Sɛɛ mli beni Bi nɛɛ ba shikpɔŋ nɛɛ nɔ akɛ gbɔmɔ ni abale lɛ akɛ Yesu lɛ, eshwe ni etsɔɔ mɛi anɔkwalei ni kɔɔ e-Tsɛ lɛ he. Kɛ́ wɔbo nɔ ni Bi lɛ yɔɔ kɛɛmɔ lɛ toi lɛ, wɔbaanyɛ wɔkase Nyɔŋmɔ he nii babaoo.

Nyɔŋmɔ gbɛ́i Nyɔŋmɔ gbɛ́i ni ji Yehowa lɛ bafee nɔ titri ni he hiaa Yesu. Nɛkɛ suɔmɔ Bi nɛɛ ná shwelɛ akɛ mɛi krokomɛi ale e-Tsɛ lɛ gbɛ́i ni amɛkɛtsu nii. Yesu diɛŋtsɛ gbɛ́i lɛ shishi ji “Yehowa ji Yiwalaherelɔ.” Gbi gbɛkɛ dani Yesu gbo lɛ, Yesu sɔle ekɛɛ Yehowa akɛ: “Mijie ogbɛi lɛ kpo mitsɔ.” (Yohane 17:26) Belɛ ebɛ naakpɛɛ akɛ Yesu kɛ Nyɔŋmɔ gbɛ́i lɛ tsu nii ni eha mɛi krokomɛi le gbɛ́i lɛ. Kulɛ te Yesu toibolɔi lɛ aaafee tɛŋŋ amɛle anɔkwale ni kɔɔ Yehowa he kɛ́ amɛleee Yehowa gbɛ́i lɛ kɛ nɔ ni gbɛ́i lɛ damɔ shi kɛha lɛ? *

Nyɔŋmɔ suɔmɔ kple lɛ Be ko lɛ, Yesu kɛɛ Nyɔŋmɔ yɛ sɔlemɔ mli akɛ: “Ataa, . . . oosumɔ mi dani ato je lɛ shishi.” (Yohane 17:24) Beni Yesu yɔɔ ŋwɛi lɛ, Nyɔŋmɔ jie suɔmɔ kpo etsɔɔ lɛ. No hewɔ lɛ, beni Yesu ba shikpɔŋ lɛ nɔ lɛ ejie nakai suɔmɔ lɛ kɛ esui fɛfɛji babaoo kpo yɛ gbɛi srɔtoi anɔ.

Yesu tsɔɔ akɛ Yehowa suɔmɔ lɛ mli lɛɛ naakpa. Yesu wie akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yohane 3:16) Hela wiemɔ ni atsɔɔ shishi yɛ biɛ akɛ “je lɛ” etsɔɔɔ “shikpɔŋ lɛ.” Je lɛ ni akɛtsu nii yɛ biɛ lɛ damɔ shi kɛha adesai fɛɛ. Suɔmɔ ni Nyɔŋmɔ yɔɔ kɛha adesa weku lɛ da aahu ákɛ ekɛ esuɔmɔ Bi ni kã etsui nɔ lɛ ha koni adesai anɔkwafoi aye amɛhe kɛjɛ esha kɛ gbele he, ni wɔsɛɛ lɛ amɛná naanɔ wala. Wɔnyɛŋ wɔnu suɔmɔ kple ni tamɔ enɛ lɛ shishi jogbaŋŋ kɛmɔ shi.—Romabii 8:38, 39.

Yesu ma anɔkwasane ko nɔ mi, ni no ji akɛ: Yehowa sumɔɔ aŋkroaŋkroi ni jaa lɛ lɛ waa diɛŋtsɛ. Yesu tsɔɔ akɛ Yehowa tamɔ tookwɛlɔ ko ní etooi lɛ ateŋ eko fɛɛ eko jara wa kɛha, ni esusuɔ amɛhe akɛ aŋkroaŋkro. (Mateo 18:12-14) Yesu kɛɛ akɛ afilimata kome folo enyɔŋ shikpɔŋ ni Yehowa leee. Yesu kɛfata he akɛ: “Nyɛyiteŋtsɔi po lɛ akane fɛɛ.” (Mateo 10:29-31) Kɛ́ Yehowa nyɛɔ eyɔseɔ akɛ afilimata kome elaaje kɛjɛ buu pɔtɛɛ ko mli lɛ, enyiɛ nɔŋŋ ni ejwɛŋŋ aŋkroaŋkroi ni jaa lɛ lɛ ateŋ mɔ fɛɛ mɔ he? Kɛ́ Yehowa baanyɛ akane wɔyiteŋtsɔi fɛɛ lɛ, belɛ ani wɔshihilɛ mli nɔ ko yɛ, ni ji—wɔhiamɔ nii, wɔdeŋmegbomɔ, kɛ wɔnaagbai—ni enyɛŋ ele?

Ŋwɛi Tsɛ Taakɛ wɔkadi yɛ sane ni tsɔ hiɛ lɛ mli lɛ, Yesu ji Nyɔŋmɔ Bi koome lɛ. Ebɛ naakpɛɛ akɛ suɔmɔ Bi nɛɛ tsɛ́ Yehowa shii abɔ akɛ “e-Tsɛ,” ni eha mɛi le enɛ. Anɔkwasane ji akɛ beni Yesu eye afii 12 ni etee sɔlemɔwe lɛ, yɛ eklɛŋklɛŋ wiemɔ ni ewie ni  aŋma afɔ shi lɛ mli lɛ, etsɛ́ Yehowa akɛ “mitsɛ.” (Luka 2:49) Wiemɔ ni ji “Tsɛ” lɛ je kpo nɔ ni miihe ashɛ shii 190 sɔŋŋ yɛ Sanekpakpai lɛ amli. Yesu wie Yehowa he yɛ shihilɛi srɔtoi amli akɛ “nyɛtsɛ,” “wɔtsɛ,” kɛ “mitsɛ.” (Mateo 5:16; 6:9; 7:21) Wiemɔ nɛɛ ni Yesu kɛtsu nii shii abɔ lɛ tsɔɔ akɛ adesai ni yeee emuu baanyɛ aná amɛkɛ Yehowa teŋ wekukpãa kpakpa ni suɔmɔ yɔɔ mli, ní amɛkɛ amɛhe hu afɔ̃ enɔ.

Mɔbɔnalɔ ni efee klalo akɛ ekɛ tɔmɔi baake Yesu le akɛ Yehowa mɔbɔnalɛ ni fa lɛ he miihia adesai ni yeee emuu lɛ. Beni Yesu wieɔ abɛbua ni kɔɔ bi nyeŋnyeŋtswi lɛ he lɛ, ekɛ Yehowa to tsɛ ko ni musuŋtsɔɔ lɛ ní efee klalo akɛ ekɛ ebi ni etsake etsui lɛ tɔmɔi baake lɛ lɛ he. (Luka 15:11-32) Yesu wiemɔi lɛ maa nɔ mi ehaa wɔ akɛ Yehowa taoɔ tsuitsakemɔ ko yɛ eshafeelɔ ko gbɛfaŋ koni edamɔ no nɔ Ena lɛ mɔbɔ. Yehowa efee klalo akɛ ekɛ efɔŋfeelɔ ni etsake etsui lɛ he baake lɛ. Yesu tsɔɔ mli akɛ: “Miikɛɛ nyɛ akɛ, nakai nɔŋŋ miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai-nɛɛhu kɛ nɛɛhu ni tsuitsakemɔ ehiaaa amɛ lɛ.” (Luka 15:7) Namɔ yɔɔ ni esumɔŋ akɛ ebɛŋkɛ Nyɔŋmɔ ni naa mɔbɔ nɛɛ?

Sɔlemɔi atoibolɔ Dani Yesu baaba shikpɔŋ lɛ nɔ beebe lɛ, eyɔse akɛ Yehowa ji ‘sɔlemɔi atoibolɔ,’ ni enyaa mɛi ni jáa lɛ yɛ anɔkwale mli lɛ asɔlemɔi ahe. (Lala 65:3) No hewɔ lɛ, beni Yesu tsuɔ esɔɔmɔ nitsumɔ lɛ, etsɔɔ etoibolɔi lɛ bɔ ni asɔleɔ kɛ nɔ ni esa akɛ amɛsɔle yɛ he. Ewo ŋaa akɛ, “nyɛkawiea trilii.” Ewo etoibolɔi lɛ hewalɛ ni amɛsɔle koni ‘afee nɔ ni Nyɔŋmɔ sumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.’ Wɔbaanyɛ wɔsɔle hu kɛha wɔdaa ŋmaa, akɛ wɔtɔmɔi ake wɔ, koni wɔnyɛ wɔkpee kaai anaa. (Mateo 6:5-13) Yesu tsɔɔ akɛ Yehowa boɔ Etsuji asɔlemɔi atoi, ni etsuɔ nibii ni amɛjɛɔ hemɔkɛyeli mli amɛbiɔ lɛ ahe nii ehaa amɛ taakɛ tsɛ feɔ haa ebii lɛ.—Mateo 7:7-11.

Ekã shi faŋŋ akɛ Yesu tsɔɔ anɔkwalei ni kɔɔ Yehowa he, ni etsɔɔ nɔ̃ Nyɔŋmɔ hu ni eji. Shi nɔ kroko hu yɛ ni kɔɔ Yehowa he ni Yesu sumɔɔ ni mɛi ale, ni no nɔ Yehowa baatsɔ ekɛ tsakemɔi aba jeŋ muu lɛ fɛɛ kɛtsu Eyiŋtoo kɛha shikpɔŋ nɛɛ kɛ adesai lɛ ahe nii. Yɛ anɔkwale mli lɛ, shɛɛ sane ni Yesu kɛhaa lɛ fã nɛɛ ji eshiɛmɔ nitsumɔ lɛ saneyitso.

[Shishigbɛ niŋmaa]