Nibii ni Haa Miishɛɛ Hiɔ Weku Mli

Oblahii kɛ Oblayei ni Akɛaagba Sane

“Be ko ni eho lɛ, ewaaa akɛ mikɛ mibi nuu lɛ aaagba sane, shi amrɔ nɛɛ ni eye afii 16 lɛ, ewa akɛ mi loo miwu aaale nɔ ni esusuɔ. Esumɔɔ ni ekome too ehi etsu lɛŋ, ni efɔɔɔ wɔ kɛ sanegbaa!”—MIRIAM, MEXICO.

“Tsutsu ko lɛ, mibii lɛ sumɔɔ waa ni mikɛ amɛ agba sane fɛɛ sane. Amɛboɔ nɔ ni miyɔɔ amɛ kɛɛmɔ lɛ toi jogbaŋŋ! Ŋmɛnɛ lɛ, akɛni amɛshɛ amɛblahiiaŋ kɛ amɛblayeiaŋ hewɔ lɛ, amɛsusuɔ akɛ mibe eho.”—SCOTT, AUSTRALIA.

KƐ́ AMRƆ nɛɛ ootsɔse gbekɛ ko ni eshɛ eblahiiaŋ loo eblayeiaŋ lɛ, ekolɛ ewaaa akɛ oookpɛlɛ saji ni fɔlɔi komɛi wie ni atsĩ tã kɛtsɔ hiɛ lɛ anɔ. Be ko ni eho lɛ, ekolɛ bɔ ni okɛ obi lɛ gbaa sane haa lɛ yaa nɔ jogbaŋŋ tamɔ bɔ ni tsɔji enyɔ woɔ foi kɛnyiɛɔ gbɛjegbɛ wulu ko ni tsɔji enyɔ baanyɛ atsɔ nɔ lɛ nɔ lɛ. Amrɔ nɛɛ etamɔ nɔ ni atsi gbɛ lɛ. Yoofɔyoo ko ni yɔɔ Italy ni atsɛɔ lɛ Angela lɛ kɛɛ akɛ: “Beni mibinuu lɛ ji gbekɛ fioo lɛ, be fɛɛ be lɛ ebiɔ mi saji. Amrɔ nɛɛ, miji mɔ ni bɔɔ mɔdɛŋ koni maje mikɛ lɛ sanegbaa shishi. Kɛ́ mifeee nakai lɛ, gbii pii baanyɛ aho ni wɔgbaŋ sane ni mɔɔ shi.”

Taakɛ eji yɛ Angela gbɛfaŋ lɛ, ekolɛ bo hu ona akɛ obi ni kulɛ ewieɔ fe akoo lɛ ebatsɔ oblanyo loo oblayoo ni tsiɔ ehe kɛjɛɔ mɛi ahe ni henumɔ tsakeɔ trukaa. Kɛ́ obɔ mɔdɛŋ fɛɛ ni ooonyɛ akɛ okɛ lɛ baagba sane lɛ, ekolɛ ekɛ wiemɔi kukuji ni etsɔɔɔ hedɔɔ baaha bo hetoo. Kɛ́ obi obinuu lɛ akɛ, “Te ogbi lɛ tee lɛ eha tɛŋŋ?” Ekɛ oyaiyeli haa bo hetoo yɛ ahuntoo naa akɛ, “Jogbaŋŋ.” Kɛ́ obi obiyoo lɛ akɛ, “Ŋmɛnɛ lɛ, mɛni ba yɛ skul?” Eholeɔ ekɔ̃ji anɔ kɛhaa bo hetoo akɛ, “Nɔ ko baaa.” Kɛji obɔ mɔdɛŋ akɛ obaaje sanegbaa ni eyaaa nɔ jogbaŋŋ shishi ekoŋŋ kɛ wiemɔ nɛɛ akɛ, “mɛni hewɔ okɛ mi egbaaa sane babaoo lɛ?” afooo odaaŋ kpɛ.

Eji anɔkwale akɛ, oblahii kɛ oblayei komɛi sumɔɔ ni amɛjie amɛsusumɔi akpo. Shi jeee nɔ ni amɛfɔlɔi lɛ sumɔɔ akɛ amɛnu lɛ he amɛwieɔ. Nyɛ ko ni yɔɔ Nigeria ni atsɛɔ lɛ Edna lɛ kɛɛ akɛ: “Bei pii lɛ, kɛ́ mikɛɛ mibiyoo lɛ akɛ efee nɔ ko lɛ, hetoo ni ehaa mi ji, ‘kaagba minaa.’” Ramón, ni ji nuu ko ni yɔɔ Mexico lɛ kɛ shihilɛ ni tamɔ nakai nɔŋŋ kpeɔ yɛ ekɛ ebinuu ni eye afii 16 lɛ sharamɔ mli. Nuu nɛɛ kɛɛ akɛ: “Wɔtaa saji anaa daa gbi. Be fɛɛ be ni makɛɛ lɛ akɛ efee nɔ ko lɛ, etaoɔ nɔ ko ekɛjieɔ enaa koni ekafee.”

Kɛ́ fɔlɔ ko bɔ mɔdɛŋ akɛ ekɛ ebi oblanyo loo oblayoo ko baawie, shi ebi lɛ efooo edaaŋ lɛ, ebaanyɛ eha fɔlɔ lɛ ahao. Biblia lɛ maa nɔ mi akɛ, “kɛ́ ajinatoo bɛ lɛ, yiŋtoi feɔ yaka.” (Abɛi 15:22) Anna ni ji fɔlɔ mɔ kome mɔ ni yɔɔ Russia lɛ kɛɛ akɛ: “Kɛ́ mileee nɔ ni yɔɔ mibinuu lɛ yiŋ lɛ, mihaoɔ aahu akɛ, efeɔ mi akɛ mibolɔ waa.” Mɛni hewɔ kɛ eshɛ be ni sanegbaa he hiaa waa moŋ lɛ, etamɔ nɔ ni oblahii kɛ oblayei kɛ amɛfɔlɔi lɛ nyɛɛɛ agba sane jogbaŋŋ lɛ?

Gbɛtsiinii lɛ Ayɔsemɔ

Sanegbaa jeee wiemɔ ni awieɔ kɛkɛ. Yesu kɛɛ akɛ, ‘nɔ ni eyi tsui eteke nɔ lɛ, no naabu wieɔ.’ (Luka 6:45) Wɔtsɔɔ sanegbaa kpakpa nɔ wɔkaseɔ nii kɛjɛɔ mɛi adɛŋ, ni wɔ hu wɔhaa amɛleɔ nɔ̃ gbɔmɛi ni wɔji. Ebaanyɛ ewa kɛha oblahii kɛ oblayei akɛ amɛaajie nɔ ni yɔɔ amɛtsuiiaŋ kɛ amɛjwɛŋmɔŋ lɛ akpo, ejaakɛ kɛ́ gbekɛ ko shɛ eblahiiaŋ loo eblayeiaŋ lɛ, bei pii lɛ kɛ́ eji mɔ ko ni sumɔɔ sanegbaa po lɛ, ebaanyɛ etsake trukaa ni etsɔ mɔ ko ni hiɛ  gboɔ nii waa. Nilelɔi kɛɔ akɛ, bei pii lɛ oblahii kɛ oblayei nuɔ he tamɔ nɔ ni amɛdamɔ kpoku ko nɔ amɛmiishwɛ shwɛmɔ ko yɛ mɛi pii ahiɛ ní mɛi nɛɛ miikwɛ nɔ fɛɛ nɔ ni amɛfeɔ lɛ ni amɛjieee amɛhiŋmɛii yɛ amɛnɔ. Yɛ nɔ najiaŋ ni oblahii kɛ oblayei nɛɛ aaaya nɔ ashwɛ shwɛmɔ lɛ, amɛteaŋ mɛi ni hiɛ gboɔ nii waa lɛ gbalaa kpoku lɛ nɔ mama lɛ kɛtsiɔ kpoku lɛ hiɛ, kɛ wɔɔwie he yɛ mfonirifeemɔŋ gbɛ nɔ, ni tsɔɔ akɛ amɛfeɔ amɛnii yɛ gbɛ ni haa ewaa kɛhaa amɛfɔlɔi akɛ amɛkɛ amɛ aaagba sane nɔ.

Gbɛtsiinii kroko ni baanyɛ atsi sanegbaa naa ji heyeli ni oblahii kɛ oblayei taoɔ ni amɛná lɛ. Anyɛŋ ajo enɛ naa foi—obi lɛ miida, ni nɔ ni fata dalɛ nɛɛ he ji ehe ni eeetsi kɛjɛ weku lɛ he wɔsɛɛ ko. Dabi, enɛ etsɔɔɔ akɛ obi ni eshɛ eblahiiaŋ loo eblayeiaŋ lɛ eshɛ he ni esa akɛ eshi shĩa. Ohe miihia obi lɛ yɛ gbɛ̀i babaoo anɔ. Shi nibii ni haa mɔ ko nyɛɔ ekpɛɔ eyiŋ jogbaŋŋ akɛ mɔ aŋkro lɛ jeɔ shishi afii abɔ dani mɔ lɛ batsɔɔ onukpa. Oblahii kɛ oblayei babaoo sumɔɔ ni amɛ diɛŋtsɛ amɛsusu sane ko he dani amɛjie lɛ kpo amɛtsɔɔ mɛi krokomɛi, ni enɛ fata nibii ni amɛtsɔmɔɔ mli kɛ́ amɛmiidara lɛ ahe.

Eji anɔkwale akɛ, ekolɛ oblahii kɛ oblayei kɛ amɛsusumɔ eteŋ mɛi ni ji amɛsasoi—enɛ ji nɔ ni yoofɔyoo ko ni yɔɔ Mexico ni atsɛɔ lɛ Jessica lɛ hu yɔse. Ekɛɛ akɛ: “Beni mibiyoo lɛ ji gbekɛ lɛ, efɔɔ mi bɛŋkɛmɔ kɛ enaagbai. Amrɔ nɛɛ enanemɛi lɛ aŋɔɔ moŋ eyaa.” Kɛ́ nakai obi ni eshɛ eblahiiaŋ loo eblayeiaŋ lɛ yɔɔ lɛ, kaamu sane naa akɛ “ekpoo” bo akɛ efɔlɔ. Ákɛ nɔ ni tamɔɔɔ nakai lɛ, niiamlipɛimɔi srɔtoi etsɔɔ akɛ, kɛ́ oblahii kɛ oblayei ejieee lɛ kpo akɛ amɛkpɛlɛɔ nɔ ni akɛɔ amɛ lɛ nɔ po lɛ, amɛbuɔ ŋaawoo ni amɛfɔlɔi kɛhaa amɛ lɛ akɛ sɛɛnamɔ yɛ he kwraa fe amɛtipɛŋfoi lɛ anɔ lɛ. Shi te ooofee tɛŋŋ okwɛ koni oha obi aná nɔmimaa akɛ ebaanyɛ ekɛ bo agba sane be fɛɛ be lɛ?

Nibii ni Haa Ayeɔ Omanye—Gbɛtsiinii lɛ Ajiemɔ

Ŋɔɔ lɛ akɛ, ookudɔ tsɔne yɛ gbɛjegbɛ wulu kakadaŋŋ ko ni kã shi trɔmɔɔ lɛ nɔ. Beni ofã gbɛ kilomitai babaoo yɛ gbɛjegbɛ lɛ nɔ lɛ, tsakemɔi fioo komɛi pɛ ehe bahia ni ofee yɛ bɔ ni okudɔɔ tsɔne lɛ ohaa lɛ mli. Kɛkɛ ni trukaa lɛ, oyashɛ he ko ni gbɛ lɛ edɔ kɔŋtɔ waa. Kɛ́ otsɔne lɛ baaya nɔ ahi gbɛ lɛ nɔ lɛ, ehe baahia ni otsake bɔ ni okudɔɔ tsɔne lɛ ohaa lɛ. Nakai nɔŋŋ eji kɛji obi lɛ shɛ eblahiiaŋ loo eblayeiaŋ. Ekolɛ ehe bahia ni ofee tsakemɔi fioo yɛ bɔ ni otsɔseɔ obi lɛ ohaa lɛ mli yɛ afii abɔ ni eho nɛ lɛ amli. Shi amrɔ nɛɛ, obi lɛ shihilɛ edɔ kɔŋtɔ, ni esa akɛ otsake gbɛ̀i ni otsɔɔ nɔ otsɔseɔ obi lɛ amli koni onyɛ ‘otsɔ gbɛ kɔŋtɔ lɛ nɔ.’ Bi ohe saji ni nyiɛ sɛɛ nɛɛ.

▪ ‘Ani mifee klalo akɛ mikɛ mibinuu loo mibiyoo baagba sane, kɛ́ eetao ekɛ mi awie?’ Biblia lɛ kɛɔ akɛ: “Wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.” (Abɛi 25:11) Taakɛ ŋmalɛ nɛɛ feɔ lɛ faŋŋ lɛ, bei pii lɛ, be ni sa ji nɔ ni he hiaa. Ákɛ nɔkwɛmɔnɔ lɛ: Okwaafonyo nyɛŋ akpa eŋmɔshi nii kɛ́ nikpamɔ be lɛ shɛko, ni asaŋ enyɛŋ etsi nikpamɔ be lɛ hu eto kɛ́ eshɛ. Kɛ́ ŋmɔshi nibii lɛ shɛ kpamɔ lɛ, esa akɛ efee bɔ fɛɛ bɔ ni eeenyɛ kɛkpa. Ekolɛ obi ni eshɛ eblahiiaŋ loo eblayeiaŋ lɛ yɛ be pɔtɛɛ ko ni esumɔɔ ni ekɛ mɔ ko agba sane. Kaaha hegbɛ nɛɛ miiŋmɛɛ bo. Nyɛ ko ni ji fɔlɔ mɔ kome mɔ ni yɔɔ Australia ni atsɛɔ lɛ Frances lɛ kɛɛ akɛ: “Bei pii lɛ, mibiyoo lɛ baa miŋɔɔ yɛ pia lɛ mli gbɛkɛ, ni ebayeɔ ŋmɛlɛtswaa kome bei komɛi. Miji mɔ ko ni wɔɔ mra, no hewɔ lɛ mináaa lɛ mlɛo, shi yɛ nakai beaŋ ni jenamɔ yi ewa ni ebaa miŋɔɔ lɛ, wɔgbaa nɔ fɛɛ nɔ he sane.”

KAA ENƐ OKWƐ: Kɛ́ obi ni eshɛ eblahiiaŋ loo eblayeiaŋ lɛ feɔ enii tamɔ nɔ ni esumɔɔɔ ni ekɛ bo agba sane lɛ, okɛ lɛ afee ekome kɛfee nɔ ko—nyɛyasharaa shi, okɛ lɛ ata otsɔne lɛ mli kɛyashara shi, nyɛshwɛa shwɛmɔ ko, loo okɛ lɛ afee ekome kɛtsu shĩa nitsumɔ ko. Bei pii lɛ, shihilɛi ni tamɔ enɛɛmɛi lɛ haa mɛi ni eshɛ amɛblahiiaŋ loo amɛblayeiaŋ lɛ nyɛɔ amɛjieɔ amɛsusumɔi akpo.

▪ ‘Ani mikɔɔ wiemɔi ni ekɛtsuɔ nii lɛ asɛɛ?’ Hiob 12:11 lɛ kɛɔ akɛ: “Nto toi kaa wiemɔi ekwɛɔ, tamɔ bɔ ni daa hu saa niyenii anaa lɛ?” Amrɔ nɛɛ ji be ni ehe hiaa waa akɛ ‘oka’ obinuu loo obiyoo lɛ wiemɔi ‘okwɛ.’ Bei pii lɛ, oblahii kɛ oblayei wieɔ oookɛɛ nɔ ni amɛwieɔ lɛ ji anɔkwale be fɛɛ be. Ákɛ nɔkwɛmɔnɔ lɛ, ekolɛ obinuu loo obiyoo lɛ baakɛɛ akɛ, “Be fɛɛ be lɛ, okɛ mi yeɔ tamɔ gbekɛ!” loo “Kɛ́ miiwie lɛ obooo mi toi!” Yɛ nɔ najiaŋ ni ooogbala ojwɛŋmɔ kɛya ewiemɔi lɛ mli saji ni ejaaa, tamɔ “be fɛɛ be lɛ” kɛ “obooo mi toi” lɛ anɔ lɛ, kpɛlɛmɔ nɔ akɛ ekolɛ jeee nɔ ni obi lɛ taoɔ etsɔɔ lɛ diɛŋtsɛ ewieɔ lɛ. Ákɛ nɔkwɛmɔnɔ lɛ, kɛ́ obi lɛ kɛɛ akɛ “Be fɛɛ be lɛ, okɛ mi yeɔ tamɔ gbekɛ” lɛ, ekolɛ nɔ ni  etaoɔ etsɔɔ ji akɛ “Minuɔ he akɛ obɛ hekɛnɔfɔɔ yɛ mimli,” ni kɛ́ ekɛɛ akɛ “Kɛ́ miiwie lɛ obooo mi toi” lɛ, ekolɛ nɔ ni etaoɔ etsɔɔ ji akɛ “Miisumɔ ni makɛɛ bo bɔ ni minuɔ he mihaa diɛŋtsɛ.” Bɔɔ mɔdɛŋ ni okɔ wiemɔi ni ekɛtsuɔ nii lɛ asɛɛ.

KAA ENƐ OKWƐ: Kɛ́ obi ni eshɛ eblahiiaŋ loo eblayeiaŋ lɛ kɛ wiemɔi ni wa tsu nii lɛ, obaanyɛ oha hetoo kɛ wiemɔ ni tamɔ nɛkɛ: “Mina akɛ onáaa nɔ ko he miishɛɛ, ni masumɔ ni okɛɛ mi nɔ ni ji. Kɛɛmɔ mi nɔ hewɔ ni onuɔ he akɛ mikɛ bo yeɔ tamɔ gbekɛ lɛ.” No sɛɛ lɛ, bo nɔ ni eyɔɔ kɛɛmɔ lɛ toi, ni kaafolɔ ewiemɔ lɛ mli kɛ́ eewie.

▪ ‘Ani mifeɔ minii yɛ gbɛ ni mileee akɛ etsiɔ mibi lɛ naa ni ekɛ mi akagba sane nɔ, kɛtsɔ enɔ ni minyɛɔ doo akɛ ewie lɛ nɔ?’

Biblia lɛ kɛɔ akɛ: “Jalɛ yibii lɛ, hejɔlɛ [loo toiŋjɔlɛ] mli aduɔ yɛ ahaa mɛi ni feɔ hejɔlɛ nii lɛ.” (Yakobo 3:18) Tsɔ owiemɔ kɛ onifeemɔ nɔ oha ‘toiŋjɔlɛ’ ahi shi koni eha efee mlɛo kɛha obi ni eshɛ eblahiiaŋ loo eblayeiaŋ lɛ ni ejie esusumɔi akpo. Kaimɔ akɛ, bo ji obi lɛ hefãlɔ. No hewɔ lɛ, kɛ́ nyɛmiisusu sane ko he lɛ, kaafee ohe tamɔ lɔyafonyo ko ni miitao ena tɔmɔ ko yɛ odasefonyo ko ni aabi lɛ saji yɛ saneyelihe lɛ wiemɔ mli. Tsɛ ko ni yɔɔ Korea ni atsɛɔ lɛ Ahn lɛ kɛɛ akɛ: “Fɔlɔ ni le nii lɛ kɛ wiemɔi ni tamɔ enɛɛmɛi tsuŋ nii, ‘Bo kwraa, mɛɛ be obaada?’ aloo ‘Shii enyiɛ otaoɔ ni makɛɛ bo?’” Ekɛfata he akɛ: “Beni mikɛ wiemɔi ni tamɔ enɛɛmɛi tsu nii kɛyashi be ko lɛ, miyɔse akɛ, jeee akɛ mibihii lɛ amli woɔ la yɛ gbɛ nɔ ni mitsɔɔ mikɛ amɛ wieɔ lɛ he kɛkɛ, shi moŋ amɛmli woɔ la hu yɛ nɔ ni mikɛɔ amɛ lɛ he.”

KAA ENƐ OKWƐ: Kɛ́ obi ni eshɛ eblahiiaŋ loo eblayeiaŋ lɛ haaa osanebimɔi ahetoo lɛ, kaa gbɛ kroko okwɛ. Ákɛ nɔkwɛmɔnɔ lɛ, yɛ nɔ najiaŋ ni ooobi obiyoo bɔ ni egbi lɛ tee lɛ eha lɛ, kɛɛmɔ lɛ bɔ ni bo diɛŋtsɛ ogbi lɛ tee lɛ eha ni okwɛ bɔ ni ebaafee enii eha yɛ he. Kɛ́ ootao ona obiyoo lɛ susumɔ yɛ sane ko he lɛ, bi saji ni kɔɔɔ lɛ diɛŋtsɛ ehe. Bi lɛ susumɔ ni enaanyo ko hiɛ yɛ sane lɛ he. No sɛɛ lɛ, bi lɛ ŋaa ni ebaawo enaanyo lɛ yɛ sane lɛ he.

Sanegbaa kpakpa baanyɛ aya nɔ yɛ okɛ obii ni amɛshɛ amɛblahiiaŋ lɛ ateŋ. Tsakemɔ bɔ ni okɛ amɛ gbaa sane ohaa lɛ mli yɛ bɔ ni shihilɛ lɛ yɔɔ ha lɛ naa. Okɛ fɔlɔi ni eye omanye yɛ enɛ feemɔ mli lɛ agba sane. (Abɛi 11:14) Kɛ́ okɛ obinuu loo obiyoo miigba sane lɛ, ‘ha ohe afee oya kɛ ninumɔ, ni ohumi shi kɛ wiemɔ, ni ohumi shi kɛ mlifu.’ (Yakobo 1:19) Naagbee kwraa lɛ, onijiaŋ akaje wui yɛ mɔdɛŋ ni obɔɔ ni otsɔse obii ni amɛshɛ amɛblahiiaŋ loo amɛblayeiaŋ lɛ “yɛ Nuŋtsɔ [Yehowa] tsɔsemɔ kɛ ŋaawoo lɛ mli.”—Efesobii 6:4.

BI OHE AKƐ . . .

▪ Mɛɛ tsakemɔi mina yɛ mibi lɛ he kɛjɛ beni eshɛ eblahiiaŋ loo eblayeiaŋ nɛɛ?

▪ Mɛɛ gbɛ̀i anɔ manyɛ matsɔ maha misanegbai amɔ shi fe tsutsu lɛ?

[Akrabatsa ni yɔɔ baafa 12]

Fɔlɔi Komɛi Aŋaawoo

“Kɛ́ mɛi fata wɔhe kɛmiigba sane lɛ, mibinuu lɛ shiuuu saji anɔ. No hewɔ lɛ, sɛɛ mli kɛ́ eshwɛ mikɛ lɛ pɛ lɛ, mikɛ lɛ tsaa sanegbaa ni no mli lɛ wɔkɛ mɛi lɛ gbaa lɛ nɔ.” —ANGELA, ITALY.

“Wɔyɔse akɛ, bei pii lɛ wɔbii lɛ jieɔ amɛsusumɔi akpo kɛji wɔjie amɛ yi ni wɔha amɛle akɛ wɔsumɔɔ amɛ naakpa lɛ.” —DONIZETE, BRAZIL.

“Mikɛ mɛi ni edara ni akɛ Biblia mli shishitoo mlai tsɔse amɛ lɛ gba sane ni mibi amɛ bɔ ni amɛnu he amɛha beni amɛji oblahii kɛ oblayei lɛ, kɛ bɔ ni amɛfɔlɔi ye bua amɛ. Mikase nibii babaoo kɛjɛ sanegbai nɛɛ amli.”—DAWN, BRITAIN.