Biblia lɛ Tsakeɔ Mɛi

Mɛni tsirɛ Mexico oblahii akuu ko ni gbɛi ji Satan Bibii lɛ mlinyo ko, ni etsake kɛbatsɔ maŋnyo kpakpa ni yeɔ anɔkwa? Mɛni hewɔ yoo ko ni jɛ Japan ni ji guɔyelɔ kpanaa lɛ fɔ̃ɔ ninámɔ sɛɛtiumɔ akɛ oti titri ni ma ehiɛ yɛ eshihilɛ mli, ni te enuɔ tsakemɔi ni efee lɛ ahe ehaa tɛŋŋ? Mɛni tsirɛ Russianyo ko ni ji tawuu nii ahɔ̃ɔlɔ lɛ ni ekpa enitsumɔ ni haa enáa shika babaoo shi eteɔ shi ewoɔ mla lɛ tsumɔ? Ha wɔkwɛ nɔ ni mɛi nɛɛ yɔɔ kɛɛmɔ.

EHE SAJI

GBƐI: ADRIAN PEREZ

EFII: 30

MAŊ: MEXICO

MƆ NI EJI TSUTSU: OJOTSWALƆI AKUU KO MLINYO

MITSUTSU SHIHILƐ: Beni miye afii 13 lɛ, wɔweku lɛ fã kɛyahi Ecatepec de Morelos, yɛ Mexico State. Yɛ nakai beaŋ lɛ, oblahii kɛ oblayei ni yɔɔ jɛmɛ niiaŋ lɛ ateŋ mɛi babaoo kɛ amɛhe woɔ mlatɔmɔ nifeemɔi amli, amɛjeɔ gbɛ amɛfiteɔ nibii ni yɔɔ maŋ lɛŋ, ni tsofai fɔji kɛ nitsumɔ eka amɛhe. Eyeee be ko ni mibɔi dãanumɔ bɔ ni esaaa, mibɔi mɛi anibii fitemɔ, ni mikɛ mihe wo jeŋba shara mli.

Sɛɛ mli lɛ, wɔku wɔsɛɛ kɛtee San Vicente ni ji he ni afɔ́ mi yɛ lɛ ekoŋŋ. Shi no mli lɛ, tsofai fɔji kɛ nitsumɔ ehe shi yɛ jɛmɛ hu. Efɔɔ kaa akɛ obaana ni oblahii kɛ oblayei komɛi egboi kɛkamɔ gbɛjegbɛi lɛ ahe. Miyadɔmɔ kuu ko ni gbɛi ji Satan Bibii lɛ. Wɔjuɔ, ni wɔkɛ tsofai fɔji tsuɔ nii, titri lɛ wɔshoɔ takunta loo gluu wɔwoɔ wɔgugɔŋ. Bei pii lɛ, mileee bɔ ni feɔ ni mishɛɔ shĩa, ni bei komɛi hu lɛ, mikãa gbɛjegbɛ lɛ he ni mileee nɔ ni yaa nɔ. Awo minanemɛi lɛ ateŋ mɛi komɛi tsuŋ yɛ juu kɛ gbɔmɔgbee hewɔ.

Yɛ nɛkɛ nibii fɔji nɛɛ ni mifeɔ lɛ fɛɛ sɛɛ lɛ, miheɔ Nyɔŋmɔ nɔ miyeɔ. Bɔni afee ni mihenilee akayi mi pii lɛ, mikɛ mihe woɔ jamɔŋ kusum nifeemɔi komɛi amli, tamɔ Otsi Krɔŋkrɔŋ ni ji otsi ni tsɔɔ Easter hiɛ lɛ mli nifeemɔi lɛ nɛkɛ. Shi no sɛɛ lɛ, wɔ fɛɛ, ni nuu ni fee enii akɛ  Kristo lɛ hu fata he lɛ, yatɔɔ dãa kɛjwereɔ wɔhe yɛ wɔhe ni wɔkɛwo nifeemɔ lɛ mli lɛ hewɔ.

BƆ NI BIBLIA LƐ TSAKE MISHIHILƐ: Yehowa Odasefoi kɛ mi bɔi Biblia lɛ kasemɔ beni eshwɛ fioo ni maye afii 20 lɛ. Mile akɛ sɛɛnamɔ kpakpa ko bɛ bɔ ni mibaa mijeŋ mihaa lɛ he, ni kɛ́ mitee nɔ nakai lɛ, nibii anaa eyakpaŋ jogbaŋŋ kɛhaŋ mi. Nɔ ni ná minɔ hewalɛ waa ji sane ni aŋma yɛ Galatabii 6:8 lɛ akɛ: “Mɔ ni dũɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni dũɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.” Ŋmalɛ nɛɛ ha mina akɛ, kɛ́ miitao ni nibii anaa ayakpa jogbaŋŋ kɛha mi lɛ, no lɛ esa akɛ madũ nii kɛha wɔsɛɛ.

Beni miyaa hiɛ yɛ Biblia kasemɔ mli lɛ mibanu shishi akɛ, Yehowa ji Nyɔŋmɔ ni hiɛ kã ni yɔɔ diɛŋtsɛ ni jwɛŋɔ mihe akɛ mɔ aŋkro ni eyɛ he miishɛɛ akɛ ekɛ eshai ni mifee tsutsu lɛ baafa mi. Mi diɛŋtsɛ miná niiashikpamɔ ni tsɔɔ akɛ eboɔ sɔlemɔi atoi, ni ehaa amɛ hetoo hu.

Minaaa lɛ mlɛo akɛ mafee tsakemɔi yɛ mishihilɛ mli. Ekpakpa ko dani minyɛ mishi ojotswalɔi akuu ni mikɛ mihe yabɔ amɛ lɛ. Eyɛ mli akɛ mijeee kuu lɛ mlinyo dɔŋŋ moŋ, shi amɛgu mi akɛ mikatsɔ hei komɛi ni kuu lɛ susuɔ akɛ eyɛ amɛkwɛmɔ shishi lɛ, no hewɔ lɛ minyɛɛɛ matsɔ hei nɛɛ. Yɛ bei komɛi amli lɛ, ehe bahiaa akɛ mikɛ mihe atee mitsutsu nanemɛi lɛ ejaakɛ amɛtaoɔ mi, ni amɛbɔɔ mɔdɛŋ koni amɛkɔne miyiŋ ni mikɛ mihe awo misa jeŋba lɛ mli ekoŋŋ.

Yɛ gbɛ ni tamɔɔɔ nakai nɔ lɛ, be ni mibɔi Odasefoi lɛ kɛbɔɔ yɛ kpeei ni amɛfeɔ yɛ Maŋtsɛyeli Asa lɛ nɔ lɛ ashishi lɛ, mibana akɛ asafo lɛ mlibii lɛ dɔɔ mɔ he waa ni amɛyɛ suɔmɔ. Miná he miishɛɛ waa akɛ mɛi nɛɛ ahemɔkɛyeli lɛ mli wa ni amɛhiɔ shi yɛ amɛtsɔɔmɔi lɛ anaa. Bɔ ni amɛhiɔ shi amɛhaa lɛ yɛ srɔto kwraa yɛ bɔ ni sá lɛ mibaa mijeŋ mihaa lɛ he.

BƆ NI MINÁ HE SƐƐ: Abaptisi mi akɛ Yehowa Odasefoi lɛ ateŋ mɔ kome afii nyɔŋma nɛ. Mibɔ mɔdɛŋ waa ni mikɛ Biblia mli tsɔɔmɔi lɛ atsu nii yɛ mishihilɛ mli. Enɛ hewɔ lɛ, miiná bulɛ yɛ miwekumɛi lɛ ahiɛ. Amrɔ nɛɛ lɛ, amɛle mi akɛ mɔ ko ni hiɛ wa kɛ nitsumɔ, ni bei komɛi po lɛ minyɛɔ miyeɔ mibuaa amɛ kɛ shika. Enɛ ha minyɛ Awo bɔi Biblia lɛ kasemɔ ni bianɛ lɛ eji Yehowa Odasefoi lɛ ateŋ mɔ kome. Tsɛ Ataa hu miifee tsakemɔi yɛ eshihilɛ mli. Miwekumɛi lɛ ateŋ mɛi babaoo jeee Yehowa Odasefoi, shi beni amɛna tsakemɔi ni mifee lɛ, amɛkpɛlɛ nɔ akɛ Biblia lɛ baanyɛ aye abua mɛi koni amɛba amɛjeŋ jogbaŋŋ.

EHE SAJI

GBƐI: YAYOI NAGATANI

EFII: 50

MAŊ: JAPAN

MƆ NI EJI TSUTSU: YOO GUƆYELƆ KPANAA

MITSUTSU SHIHILƐ: Atsɔse mi yɛ kosɛɛ maŋ bibioo ko ni emli bii lɛ yɛ mɛi ahe miishɛɛ babaoo mli. Mipapa yɛ shwapo agbo ko yɛ maŋ nɛɛ mli, ni ehe mɛi nyɔŋma ni tsuɔ nii yɛ mli amɛhaa lɛ. Wɔshĩa lɛ yɛ shwapo lɛ masɛi tuuntu, ni no hewɔ lɛ eyɛ mli akɛ Ataa kɛ Awo bɛ dekã moŋ, shi minuuu shoofeemɔ he.

 Miji kromɔbi yɛ yei etɛ ateŋ, ni no hewɔ lɛ, migbekɛbiiashi tɔŋŋ ni atsɔse mi koni wɔsɛɛ ko lɛ makwɛ wɔweku lɛ nitsumɔ lɛ nɔ. Mibote gbalashihilɛ mli beni midako tsɔ. Miwu kpa nitsumɔ ni etsuɔ yɛ shikatoohe lɛ ni ebaye ebua mi yɛ wɔweku lɛ nitsumɔ lɛ mli. Wɔfɔ bii etɛ kɛtsara nɔ yɛ be kukuoo mli. Mimami kwɛɔ mibii lɛ kɛfataa shĩa nitsumɔi ni etsuɔ lɛ ahe, ni mi hu mitsuɔ nii yɛ shwapo lɛ mli kɛjɛ leebi kɛyashi gbɛkɛ. Yɛ enɛ fɛɛ sɛɛ lɛ, wɔnáa be kɛjieɔ wɔhiɛtserɛ akɛ weku.

Kɛkɛ ni shika he naagba ba, ni esa shwapoi ni ahɔ̃ɔ nii yɛ amɛmli lɛ ahe, ni no ha wɔnitsumɔ lɛ bɔi shigbeemɔ. Bɔni afee ni wɔkpee shihilɛ lɛ naa lɛ, wɔkpɛ wɔyiŋ akɛ wɔbaagbele shwapo ni ahɔ̃ɔ tsumaa he nibii yɛ mli yɛ gbɛjegbɛ ko ni lɔle fɔɔ nɔ tsɔmɔ lɛ he. Yɛ gbi ni tsɔ gbi ni wɔkɛbaafee kusum kɛje tsumaa lɛ shishi lɛ hiɛ lɛ nɔ lɛ, aŋsɔ mli hela ko ni mɔ mipapa, ni ji wɔnitsumɔ lɛ nɔ nukpa trukaa lɛ ha nɔ̃ nyɔ enɔ. Enɛ ha egbee ŋa kwraa, no hewɔ lɛ shwapo hee lɛ nɔkwɛmɔ he sɔ̃i bakã minɔ. Miwu tee nɔ ekwɛ wɔshwapo momo lɛ nɔ. Enɛ ha wɔfee mɛi ni bɛ dekã kwraa yɛ shihilɛ mli.

Aheɔ nii waa yɛ wɔshwapo hee lɛ mli. Miná miishɛɛ waa yɛ nɔ ni minyɛ mitsu lɛ hewɔ ni mikɛ miwɔ shã afɔle yɛ nitsumɔ lɛ hewɔ. Eyɛ mli akɛ misumɔɔ mibii lɛ moŋ, shi nitsumɔ ji nɔ titri ni he mijwɛŋmɔ. Ekpakpa ko dani mináa be ni mikɛ miwu gbaa sane, ni kɛ wɔná be kɛgba sane po lɛ, sane naa sɔŋŋ wɔtaa. Bɔni afee ni maye yeyeeyefeemɔ nɔ lɛ, mifɔɔ kpojee gbɛkɛ gbɛkɛ ni mikɛ minanemɛi kɛ nitsumɔtsɛmɛi krokomɛi yashwɛɔ wɔhiɛ kɛ dãa. Mishihilɛ fɛɛ ji ni matsu nii, manu dãa, ni mawɔ. Miná shika babaoo shi miishɛɛ ni ji miishɛɛ lɛ mináaa eko, ni mileee nɔ hewɔ.

BƆ NI BIBLIA LƐ TSAKE MISHIHILƐ: Beni Yehowa Odasefoi kɛ mi bɔi Biblia lɛ kasemɔ lɛ, Biblia mli ŋmalɛi etɛ komɛi ná minɔ hewalɛ waa. Mifó beni minu Mateo 5:3 lɛ shishi lɛ. Jɛmɛ kaneɔ akɛ: “Ajɔɔ mumɔ lɛŋ ohiafoi [loo mɛi ni le akɛ Nyɔŋmɔ he miihia amɛ] lɛ; shi amɛnɔ ji ŋwɛi maŋtsɛyeli lɛ.” Ŋmalɛ nɛɛ ha mina nɔ hewɔ ni yɛ shika babaoo ni miyɔɔ kɛ bulɛ ni minanemɛi kɛhaa mi lɛ fɛɛ sɛɛ lɛ, mibɛ miishɛɛ lɛ. Mibayɔse akɛ ja mikpɛlɛ nɔ akɛ Nyɔŋmɔ he miihia mi ni mitsu he nii dani maná anɔkwa miishɛɛ diɛŋtsɛ.

Yɛ nakai beaŋ lɛ Japan ná shika helɛtemɔ he naagba wulu, ni enɛ ha miná bɔ ni 1 Timoteo 6:9 lɛ ji anɔkwale ha yɛ minanemɛi lɛ ateŋ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli.” Minu he akɛ Yesu wiemɔi ni yɔɔ Mateo 6:24 lɛ, ni kɛɔ akɛ, “nyɛnyɛŋ Nyɔŋmɔ kɛ mamona [niifálɛ] nyɛsɔmɔ” lɛ kɔɔ mihe tɛ̃ɛ, no hewɔ lɛ mikpɛ miyiŋ akɛ mafee tsakemɔi komɛi yɛ mishihilɛ mli.

Mibayɔse akɛ mikpoo mifɔlɔi, miwu, kɛ mibii lɛ. Miyoo hu akɛ miná sui gbohii komɛi. Mibuuu saa. Mináaa tsui mihaaa mɛi. Ni mitsui shaa mi waa. Shishijee lɛ, misusu akɛ minyɛŋ matsake ni matsɔ Kristofonyo. Shi misumɔɔ mibii lɛ waa, ni mibayɔse akɛ kɛ́ mikɛ Biblia mli ŋaawoo tsu nii yɛ bɔ ni mikɛ miweku lɛ yeɔ haa lɛ mli lɛ, enáa mibii lɛ anɔ hewalɛ kpakpa. Miná be babaoo miha amɛ ni mikɛ amɛ yaa Kristofoi akpeei.

BƆ NI MINÁ HE SƐƐ: Akɛni mina yiŋtoo hewɔ ni wɔyɔɔ wala mli, miinyɛ miisɔmɔ Nyɔŋmɔ, ni miiba mijeŋ yɛ gbɛ ni saa ehiɛ nɔ hewɔ lɛ, miná anɔkwa miishɛɛ ni mitsui enyɔ mimli jogbaŋŋ. Akɛni mihaaa nitsumɔ he ahia mi fe miweku lɛ hewɔ lɛ, misaa miná hekɛnɔfɔɔ yɛ mi diɛŋtsɛ mimli ekoŋŋ.

Akɛni minyɛ Awo na akɛ mijeŋba etsake kwraa yɛ Biblia mli shishitoo mlai ni mikɛtsuɔ nii lɛ hewɔ lɛ, enɛ kanya lɛ ni ekase Biblia lɛ ni ebatsɔ Kristofonyo. Eŋɔɔ minaa akɛ mitsɛ kɛ miwu fɛɛ eteee shi amɛwooo wɔyiŋkpɛi lɛ. Wekukpãa ni yɔɔ gbagbalii ebakã mikɛ mibii lɛ ateŋ, ni amrɔ nɛɛ miná anɔkwa miishɛɛ diɛŋtsɛ yɛ miweku lɛ mli.

EHE SAJI

GBƐI: MIKHAIL ZUYEV

EFII: 51

MAŊ: RUSSIA

MƆ NI EJI TSUTSU: EJUƆ SHI EHƆ̃Ɔ TAWUU NII

 MITSUTSU SHIHILƐ: Koo fɛfɛo ko ebɔle Krasnogorsk ni ji he ni afɔ́ mi yɛ lɛ he. Moscow Faa lɛ hoɔ kɛtsɔɔ maŋ lɛ wuoyigbɛ. Koo lɛ miihe asu maŋ lɛŋ akutsei ni yɔɔ maŋ lɛ anaigbɛ kɛ kooyigbɛ husui lɛ anaa lɛ.

Beni miji oblanyo fioo lɛ, misumɔɔ atswerɛ nɔmɔ kɛ tawuu nii kɛ shwɛmɔ. Mikɛ bei pii gbɔleɔ mikpɔiaŋ. Agbɛnɛ hu, mijuɔ shi mifeɔ tui, tuŋtɛi, kɛ kaklai. Yɛ sɛɛ mli lɛ, mikɛ enɛ fee minitsumɔ. Mito minitsumɔ lɛ he gbɛjianɔ jogbaŋŋ, ni no hewɔ lɛ minyɛɔ mihɔ̃ɔ mitawuu nii lɛ mihaa ojotswalɔi ni amɔɔɔ mi.

BƆ NI BIBLIA LƐ TSAKE MISHIHILƐ: Yɛ afi 1990 afii lɛ shishijee gbɛ lɛ, mikɛ Yehowa Odasefoi kpe, shi yɛ shishijee mli lɛ mináaa amɛmli hekɛnɔfɔɔ. Minyaaa bɔ ni amɛbiɔ mɔ saji babaoo lɛ he.

Gbi ko lɛ, amɛteŋ mɔ kome kɛ mi kane Romabii 14:12 lɛ, ni jɛmɛ kaneɔ akɛ: “Wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.” Mibi mihe akɛ mɛɛ akɔntaa mabu maha Nyɔŋmɔ. Ŋmalɛ nɛɛ tsirɛ mi koni makase nɔ ni Nyɔŋmɔ biɔ yɛ midɛŋ.

Mimia mihiɛ waa koni mikɛ Biblia mli ŋaawoo ni yɔɔ Kolosebii 3:5-10 lɛ atsu nii. Jɛmɛ kaneɔ akɛ: “No hewɔ lɛ nyɛgbea nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ lɛ, nii ahewɔ ni Nyɔŋmɔ mlifũ baa toigbele bii lɛ anɔ lɛ. . . . Nyɛshɛrɛa nɛkɛ nii nɛɛ fɛɛ nyɛshwiea, nii ni ji mlifu, mlila, nishaianii, musubɔɔ wiemɔ, hiɛgbeji awiemɔ lɛ, kɛjɛa nyɛdaaŋ. Nyɛkamalemalea nyɛhe, ejaakɛ nyɛjie gbɔmɔ momo lɛ kɛ enitsumɔi lɛ nyɛshwie, ni nyɛwo gbɔmɔ hee.”

Mináaa lɛ mlɛo kwraa akɛ mafee tsakemɔi ni tamɔ nɛkɛ. Ojotswalɔi ni tsutsu lɛ mihɔ̃ɔ tawuu nii mihaa amɛ lɛ fɔɔ mi shika hamɔ koni maha amɛ tawuu nii, ni agbɛnɛ hu, ewa kɛha mi akɛ maye mihe nɔ kɛji mɛi jɛ mi. Shi fɛɛ sɛɛ lɛ, mikpata tawuu nii babaoo ni jara wa ni miyɔɔ lɛ ahiɛ. Beni mibale suɔmɔ ni Nyɔŋmɔ kɛ Kristo yɔɔ kɛha mi lɛ, etsirɛ mi koni mi hu masumɔ amɛ. Mitee nɔ mikase Biblia lɛ, mikɛ asafo ni yɔɔ mikutso lɛ mli lɛ yaa kpeei daa, ni mitee nɔ misɔle koni Nyɔŋmɔ aye abua mi.

BƆ NI MINÁ HE SƐƐ: Fiofio lɛ, yɛ mihiɛ miamɔ kɛ minyɛmimɛi Kristofoi lɛ ayelikɛbuamɔ naa lɛ, miná sui kpakpai. Akɛni mile akɛ Yehowa Nyɔŋmɔ susuɔ wɔteŋ mɔ fɛɛ mɔ he ni ehiɛ kpaaa mɛi ni egboi lɛ po anɔ hewɔ lɛ, mináa miishɛɛ babaoo. (Bɔfoi lɛ Asaji 24:15) Minyaa bɔ ni Yehowa Odasefoi lɛ jɛɔ amɛtsuiŋ amɛfeɔ nii kɛ bɔ ni amɛyeɔ anɔkwa lɛ he waa. Mihiɛ sɔɔ bɔ ni amɛjɛ anɔkwale mli amɛná mihe miishɛɛ lɛ, ni minyaa anɔkwa ni amɛyeɔ Nyɔŋmɔ lɛ he.

Yɛ shishijee mli lɛ, miwekumɛi lɛ kɛ minanemɛi lɛ ateŋ mɛi komɛi te shi amɛwo hemɔkɛyeli hee ni miyɔɔ mli lɛ. Shi amɛwowoo amɛtsuii kɛ susumɔ akɛ, ehi moŋ akɛ mikɛ mihe baadɔmɔ jamɔ ko fe nɔ ni mikɛ awuiyelɔi aaabɔ. Eŋɔɔ minaa waa akɛ amrɔ nɛɛ mihɔ̃ɔɔ tawuu nii dɔŋŋ, shi moŋ nɔ ni kã mitsui nɔ ji ni maye mabua mɛi koni amɛkase toiŋjɔlɛ Nyɔŋmɔ lɛ he nii.

[Mfoniri ni yɔɔ baafa 27]

Bɔni afee ni mihenilee akayi mi pii lɛ, mikɛ mihe wo Katolik jamɔŋ kusum nifeemɔi amli

[Mfoniri ni yɔɔ baafa 28]

Miná shika babaoo shi miishɛɛ ni ji miishɛɛ lɛ, mináaa eko