BE NI Anita batsɔ Yehowa Odasefonyo lɛ, ewu lɛ mli fu waa. * (Kwɛmɔ shishigbɛ niŋmaa lɛ.) Ebɔ mɔdɛŋ akɛ ebaatsĩ enaa koni ekaya asafoŋ kpeei, ni ebɔ lɛ kɔkɔ akɛ ekatsɛ Nyɔŋmɔ gbɛ́i lɛ dɔŋŋ. Kɛ́ enu ni Anita miitsɛ gbɛ́i Yehowa lɛ po kɛkɛ lɛ, etsui baa waa.

Agbɛnɛ hu, Anita wu lɛ sumɔɔɔ ni etsɔɔ ebii lɛ Yehowa he nii, loo ekɛ amɛ yaa asafoŋ kpeei. Enɛ bafee naagba wulu kɛhã Anita, ejaakɛ ehe bahia ni ekɛ gbekɛbii lɛ akase nii yɛ teemɔŋ.

Taakɛ eba lɛ yɛ Anita sane lɛ mli lɛ, ekolɛ oweku lɛ mli nyo ko sumɔɔɔ ni ojáa Yehowa, ni eebɔ mɔdɛŋ ni etsĩ onaa. Aloo ekolɛ okɛ shihilɛ kroko ni jaraa miikpe. Ekolɛ hela ko emɔ bo be kplaŋŋ. Ekolɛ obi, owu, loo oŋa egbo. Aloo ekolɛ owekunyo ko ni osumɔɔ esane waa lɛ ekpa Yehowa jamɔ. Yɛ shihilɛi ni tamɔ nɛkɛ amli lɛ, mɛni baaye abua bo ni oya nɔ oye Yehowa anɔkwa?

Bɔfo Paulo wie akɛ: “Shifimɔ he ehia nyɛ.” (Hebribii 10:36) No hewɔ lɛ, mɛni baaye abua bo ni onyɛ ofi shi?

Kɛ́ okɛ shihilɛ ko ni jaraa miikpe lɛ, kaimɔ akɛ, esa akɛ okɛ ohiɛ afɔ̃ Yehowa nɔ koni eye ebua bo ni onyɛ ofi shi. Sɔlemɔ obi lɛ edɛŋ yelikɛbuamɔ. Be ni nyɛmi yoo ko ni atsɛɔ lɛ Ana lɛ wu gbo lɛ, nakai pɛpɛɛpɛ efee. No mli lɛ, amɛhi shi akɛ wu kɛ ŋa afii 30 sɔŋŋ. Ana wie akɛ: “Gbi lɛ etee nitsumɔ, shi ekuuu esɛɛ. No mli lɛ eye afii 52 pɛ.”

Nitsumɔ ni Ana tsuɔ lɛ ye ebua lɛ moŋ nɛ, shi no nyɛɛɛ ashɛje emii. No hewɔ lɛ mɛni efee? Ewie akɛ: “Mikɛɛ Yehowa nɔ fɛɛ nɔ ni yɔɔ mitsui mli, ni mikpa lɛ fai ni eye ebua mi.” Ana le akɛ Yehowa ye ebua lɛ, ejaakɛ be fɛɛ be kɛ́ esɔle egbe naa lɛ, enuɔ he akɛ ehe ejɔ lɛ ni etsui eŋmɛ dɛmm. Ekɛfata he akɛ: “Miyɛ nɔmimaa akɛ Yehowa baatee miwu lɛ shi.”—Filipibii 4:6, 7.

Yehowa ewo etsuji ashi akɛ, ebaabo amɛsɔlemɔi atoi. (Lala 65:3) Ni ebaahã amɛ nɔ fɛɛ nɔ ni baaye abua amɛ ni amɛya nɔ amɛsɔmɔ lɛ. Yehowa baaye abua bo ni oye lɛ anɔkwa yɛ shihilɛi ni jaraa po amli.

Gbɛ kroko ni Yehowa tsɔɔ nɔ eyeɔ ebuaa wɔ ji, kɛtsɔ wɔnyɛmimɛi Kristofoi lɛ anɔ. Wɔbaanyɛ wɔkase nɔ ko kɛjɛ bɔ ni nyɛmimɛi ni yɔɔ Tesalonika lɛ ye amɛbua amɛhe be ni awaa amɛyi lɛ mli. Ehe bahia ni amɛwowoo amɛhe hewalɛ yɛ nakai bei ni jaraa lɛ mli. (1 Tesalonikabii 2:14; 5:11) Naanyobɔɔ ni yɔɔ amɛteŋ lɛ, kɛ kpe ni amɛkpe daa lɛ ye ebua amɛ ni amɛtee nɔ amɛsɔmɔ Yehowa. Mɛni baaye abua wɔ ni wɔya nɔ wɔye Yehowa anɔkwa taakɛ nyɛmimɛi ni yɔɔ Tesalonika lɛ fee lɛ?

Esa akɛ wɔ hu wɔná nanemɛi kpakpai yɛ asafo lɛ mli, ni wɔwowoo wɔhe hewalɛ, titri lɛ yɛ jaramɔ bei amli. (Romabii 14:19) Awa bɔfo Paulo yi, ni ekɛ naagbai krokomɛi hu kpe, shi Yehowa waje lɛ ni enyɛ efi shi. Be ko lɛ, Yehowa tsɔ Paulo nyɛmimɛi Kristofoi lɛ anɔ ewo lɛ hewalɛ. Paulo wie yɛ enanemɛi lɛ ahe akɛ: “Amɛbatsɔmɔ mɛi ni shɛjeɔ mimii babaoo.” (Kolosebii 4:10, 11) Nyɛmimɛi nɛɛ sumɔɔ Paulo sane. No hewɔ lɛ, be ni yelikɛbuamɔ he bahia lɛ lɛ, amɛshɛje emii ni amɛwo lɛ hewalɛ. Ani okaiɔ be ko ni nyɛmimɛi ni yɔɔ osafo lɛ mli lɛ wie loo amɛfee nɔ ko ni wo bo hewalɛ?

Agbɛnɛ hu, Yehowa eduro wɔ asafoŋ onukpai lɛ. Nyɛmimɛi hii nɛɛ baanyɛ awo wɔ hewalɛ, ni amɛjɛ Biblia lɛ mli amɛwo wɔ ŋaa. Amɛtamɔ “abobaahe yɛ kɔɔyɔɔ naa kɛ teemɔhe yɛ nugbɔnɛmɔ naa, tamɔ faai yɛ ŋã kpataa nɔ loo tɛsaa kpele ko ni hãa hɔ̃ɔŋ yɛ shikpɔŋ gbiŋ nɔ.” (Yesaia 32:2) Le ni wɔle akɛ nyɛmimɛi nɛɛ efee klalo akɛ amɛbaaye amɛbua wɔ lɛ shɛjeɔ wɔmii. No hewɔ lɛ, kɛ́ oyaje shihilɛ ko ni mli wa mli lɛ, yaa asafoŋ onukpai lɛ aŋɔɔ. Amɛbaanyɛ amɛye amɛbua bo ni oya nɔ osɔmɔ Yehowa.

Asafoŋ onukpai lɛ nyɛŋ atsu onaagbai fɛɛ ahe nii amɛhã bo. Amɛyeee emuu tamɔ bo nɔŋŋ. (Bɔfoi 14:15) Shi kɛ́ okɛ onaagba ko yafɔ̃ asafoŋ onukpa ko hiɛ, ni ekɛ bo fee ekome kɛsɔle yɛ he lɛ, no baanyɛ ashɛje omii. (Yakobo 5:14, 15) Akɛ nɔkwɛmɔnɔ lɛ, asafoŋ onukpai wo nyɛmi nuu ko ni yɔɔ Italy, ni hela ko ni naa wa emɔ lɛ afii pii lɛ hewalɛ. Anɔkwa, ewie akɛ: “Suɔmɔ kɛ hedɔɔ ni nyɛmimɛi lɛ ejie lɛ kpo amɛtsɔɔ mi, kɛ saramɔ ni amɛfɔɔ mi saramɔ lɛ eye ebua mi ni minyɛ mifi shi.” Kɛ́ okɛ naagba ko ni naa wa miikpe lɛ, Yehowa miisumɔ ni obi asafoŋ onukpai lɛ adɛŋ yelikɛbuamɔ.

Kɛ́ wɔhã wɔhiɛ hi Yehowa sɔɔmɔ nɔ lɛ, Yehowa baaye abua wɔ. Nakai pɛpɛɛpɛ nyɛmi nuu ko ni atsɛɔ lɛ John lɛ fee. Be ni eye afii 39 lɛ, ená ele akɛ ená kansa henɔ ko ni mɛi efɔɔɔ namɔ. Enu he akɛ kulɛ esaaa akɛ hela ni tamɔ nakai mɔɔ lɛ, ejaakɛ edako. Ni eŋa kɛ amɛbinuu fioo, ni no mli lɛ eye afii etɛ pɛ lɛ, sane gba enaa waa. Ewie akɛ: “Yɛ wɔbi fioo lɛ kwɛmɔ sɛɛ lɛ, ehe bahia ni miŋa akwɛ mi hu, ní eye ebua mi be fɛɛ be ni esa akɛ maya helatsamɔhe lɛ.” Be fɛɛ be ni John baajɛ helatsamɔhe lɛ eba lɛ, enuɔ tɔlɛ he waa, ni efeɔ lɛ tamɔ nɔ ni ebaashwe. Shi jeee no pɛ. John ná ele akɛ etsɛ kã hela saa nɔ ní etsɛŋ ebaagbo, no hewɔ lɛ esa akɛ aná mɔ ko akwɛ lɛ.

Mɛni ye ebua John kɛ eweku lɛ yɛ nakai be ni jaraa lɛ mli? Eyɛ mli akɛ bei pii lɛ John nuɔ tɔlɛ he moŋ, shi emia ehiɛ ni eye ebua eweku lɛ koni amɛhiɛ ahi Yehowa sɔɔmɔ nɔ. Ewie akɛ: “Wɔtee asafoŋ kpeei lɛ fɛɛ, wɔtee shiɛmɔ daa otsi, ni wɔfee weku jamɔ daa, be ni nakai feemɔ bɛ mlɛo po.” John bana akɛ, ehe miihia waa ni ehã wekukpaa ni yɔɔ ekɛ Yehowa teŋ lɛ mli awa be fɛɛ be. Eyɛ mli akɛ be ni hela lɛ je shishi lɛ ehiɛ fee lɛ yaa ni ehao moŋ, shi etsɛɛɛ ni yeyeeyefeemɔ lɛ naa ba shi. Ena akɛ Yehowa sumɔɔ lɛ, ni ewaje lɛ. Bo hu kɛ́ ohao loo nɔ ko wo ohe gbeyei lɛ, Yehowa baanyɛ atsɔ gbɛ ni tamɔ nakai nɔŋŋ nɔ eye ebua bo. John wie akɛ: “Yehowa baanyɛ awaje bo, tamɔ bɔ ni ewaje mi lɛ.”

No hewɔ lɛ, kɛ́ okɛ naagba ko ni naa wa miikpe lɛ, kaimɔ nɔ ni Paulo wie lɛ, akɛ: “Shifimɔ he ehia.” Okɛ ohe afɔ̃ Yehowa nɔ kɛtsɔ sɔlemɔ nɔ. Okɛ onyɛmimɛi Kristofoi lɛ abɔ daa, yaa asafoŋ onukpai lɛ aŋɔɔ kɛhã yelikɛbuamɔ, ni ohã ohiɛ ahi Yehowa sɔɔmɔ nɔ. Ekɔɔɔ he eko nɔ naagba ni okɛkpeɔ amrɔ nɛɛ loo nɔ ni okɛbaakpe wɔsɛɛ lɛ, Yehowa baaye abua bo koni onyɛ ofi shi.