1, 2. Mɛni afee koni akɛbu yoo lɛ seshi lɛ he? Mɛni hewɔ?

 KLƐŊKLƐŊ gbalɛ ni agba yɛ Biblia lɛ mli lɛ yeɔ ebuaa wɔ ni wɔnuɔ bɔ ni Nyɔŋmɔ yiŋtoo lɛ baaba mli ahã lɛ shishi. Be ni Nyɔŋmɔ kɛ Eden shiwoo lɛ hã lɛ, ewie akɛ: ‘Mikɛ nyɛɛ aaaŋmɛ Satan kɛ yoo lɛ teŋ, kɛ Satan seshi kɛ yoo lɛ seshi teŋ.’ Te nyɛɛ nɛɛ naa baawa ahã tɛŋŋ? Yehowa wie akɛ: ‘Yoo lɛ seshi lɛ aaatswa Satan yitso nɔ, ni Satan hu aaatswa enanetsitsi nɔ.’ (1 Mose 3:15) Nyɛɛ ni kã Satan kɛ yoo lɛ teŋ lɛ naa baawa aahu akɛ, Abonsam baafee nɔ fɛɛ nɔ ni eeenyɛ koni ekpata seshi nɛɛ hiɛ.

² Enɛ hewɔ ni lalatsɛ lɛ sɔle kɛkɔ Nyɔŋmɔ webii ahe akɛ: “Ohenyɛlɔi lɛ miifee hoo, ni mɛi ni he tsɛ̃ɔo lɛ ehole amɛyitsei anɔ. Amɛyaa omaŋ lɛ yi nɔ ajina yɛ ŋaa mli, ni amɛkpaŋɔ omɛi ni oŋɔtee lɛ ayi nɔ; amɛkɛɔ akɛ: ‘Nyɛbaa, ni wɔbutua amɛ ní amɛkafee maŋ dɔŋŋ!’” (Lala 83:3-5) No mli lɛ, oti ni ma Satan hiɛ ji ni efite wekutɔkpaa ni seshi lɛ baajɛ mli kɛba lɛ loo ekpata hiɛ. Bɔ ni afee ni abu seshi lɛ he ni ama nɔ  aduatsɔ akɛ Mesia Maŋtsɛyeli lɛ baaba lɛ, Yehowa kpaŋ kpaŋmɔi krokomɛi hu.

3, 4. (a) Mɛɛ be Mla kpaŋmɔ lɛ bɔi nitsumɔ? Mɛni Israel maŋ lɛ kpɛlɛ akɛ amɛbaafee? (b) Ato Mla kpaŋmɔ lɛ koni ebu mɛni he?

³ Be ni Abraham, Isak, kɛ Yakob shwiei lɛ ayi bafa babaoo lɛ, Yehowa kɛ amɛ to blema Israel maŋ lɛ. Nyɔŋmɔ kɛ maŋ nɛɛ kpaŋ kpaŋmɔ krɛdɛɛ ko kɛtsɔ Mose, ni ji kpaŋmɔ lɛ teŋdamɔlɔ lɛ nɔ. Yehowa hã amɛ Mla lɛ, ni Israelbii lɛ kpɛlɛ nɔ akɛ amɛbaaye nɔ. Biblia lɛ kɛɔ akɛ, Mose kɔ “kpaŋmɔ lɛ wolo lɛ, ni ekane ewo maŋ lɛ toiiaŋ; ni amɛkɛɛ: Nii fiaa ni Yehowa ewie lɛ, wɔɔfee ni wɔɔbo toi. Ni Mose wó lá lɛ ni eŋɔshwã maŋ lɛ nɔ, ni ekɛɛ: Naa, kpaŋmɔ ni Yehowa kɛ nyɛ ekpaŋ yɛ nɛkɛ wiemɔi nɛɛ fɛɛ nɔ lɛ nɔ lá nɛ.”​—2 Mose 24:3-8.

⁴ Mla kpaŋmɔ lɛ bɔi nitsumɔ yɛ afi 1513 dani Kristo ba. Yehowa tsɔ nakai kpaŋmɔ lɛ nɔ ehala Israel maŋ lɛ kɛhã yiŋtoo krɛdɛɛ ko. Nyɔŋmɔ baafee amɛ-Kojolɔ, amɛ-Mlawolɔ, kɛ amɛ-Maŋtsɛ. (Yesaia 33:22) Israelbii lɛ ayinɔsane hãa wɔnaa nɔ ni baa kɛ́ abo Yehowa shishitoo mlai ni ja lɛ atoi kɛ nɔ ni baa kɛ́ abooo toi. Nyɔŋmɔ Mla lɛ eŋmɛɛɛ gbɛ ni Israelbii lɛ kɛ wɔŋjalɔi abote gbalashihilɛ mli, ni eŋmɛɛɛ gbɛ hu ni amɛjá nyɔŋmɔi krokomɛi. Akɛ Mla lɛ hã koni ebu Abraham seshi lɛ he ni ekafite.​—2 Mose 20:4-6; 34:12-16.

5. (a) Mɛɛ hegbɛ Mla kpaŋmɔ lɛ hã Israel maŋ lɛ ná? (b) Mɛni hewɔ Nyɔŋmɔ kpoo Israel lɛ?

⁵ Ahala osɔfoi yɛ Mla kpaŋmɔ lɛ shishi, koni amɛsɔmɔ yɛ Israel. Osɔfoi nɛɛ fee osɔfoi akuu kroko ni baasɔmɔ adesai yɛ gbɛ ko ni hi fe no nɔ wɔsɛɛ lɛ he mfoniri. (Hebribii 7:11; 10:1) Mla kpaŋmɔ nɛɛ hã Israel maŋ lɛ ná hegbɛ koni amɛtsɔ “osɔfoi amaŋtsɛyeli.” Ja Israelbii lɛ eye Yehowa mlai lɛ anɔ dani amɛbaanyɛ amɛtsɔ “osɔfoi amaŋtsɛyeli.” (Nyɛkanea 2 Mose 19:5, 6.) Shi amɛyabooo Yehowa toi. Amɛkpɛlɛɛɛ Mesia, ni ji mɔ titri yɛ Abraham seshi lɛ mli lɛ nɔ. Moŋ lɛ, amɛkpoo Yesu, ni Nyɔŋmɔ hu kpoo amɛ.

6. Mɛni Mla lɛ tsu?

⁶ Akɛni Israel maŋ lɛ yeee Nyɔŋmɔ anɔkwa hewɔ lɛ, amɛtsɔɔɔ osɔfoi amaŋtsɛyeli. Shi enɛ etsɔɔɔ akɛ Mla lɛ tsuuu yiŋtoo hewɔ ni akɛhã lɛ he nii. Mla lɛ bu seshi lɛ he, ni eye ebua ni mɛi yɔse Mesia lɛ. Mla lɛ tsu yiŋtoo hewɔ ni akɛhã lɛ he nii be ni Kristo ba shikpɔŋ lɛ nɔ ni mɛi yɔse lɛ lɛ. Biblia lɛ kɛɔ akɛ: “Kristo ji mla lɛ naagbee.” (Romabii 10:4) No hewɔ lɛ, mɛɛ kuu baaná hegbɛ lɛ kɛsɔmɔ akɛ osɔfoi amaŋtsɛyeli?  Yehowa kpaŋ kpaŋmɔ kroko kɛto maŋ hee ko.

7. Mɛni Yehowa tsɔ Yeremia nɔ egba?

⁷ Jeeŋmɔ dani Mla kpaŋmɔ lɛ baaba naagbee lɛ, Yehowa tsɔ gbalɔ Yeremia nɔ egba akɛ E-kɛ Israel maŋ lɛ baakpaŋ “kpaŋmɔ hee” ko. (Nyɛkanea Yeremia 31:31-33.) Nakai kpaŋmɔ lɛ baafee srɔto yɛ Mla kpaŋmɔ lɛ he ejaakɛ ehe ehiaŋ ni akɛ kooloi ashã afɔle kɛhã eshaifaa. Te aaafee tɛŋŋ ní enɛ aba mli lɛ?

8, 9. (a) Mɛni Yesu lá lɛ tsuɔ? (b) Mɛɛ hegbɛ mɛi ni yɔɔ kpaŋmɔ hee lɛ mli lɛ baná? (Kwɛmɔ mfoniri ni yɔɔ nikasemɔ lɛ shishijee lɛ.)

⁸ Yɛ afii ohai abɔ sɛɛ, yɛ afi 33 Nisan 14 lɛ nɔ lɛ, Yesu to gbijurɔyeli kroko ni ji Nuŋtsɔ lɛ Gbɛkɛ Niyeli lɛ shishi. Yesu wie wein ni yɔɔ kpulu lɛ mli he etsɔɔ ebɔfoi anɔkwafoi 11 lɛ akɛ: “Nɛkɛ kpulu nɛɛ ji kpaŋmɔ hee lɛ yɛ milá ni aŋɔshwie shi ahã nyɛ lɛ mli.” (Luka 22:20) Mateo bɔ nɔ ni Yesu wie lɛ he amaniɛ akɛ: “Enɛ ji milá ni ji kpaŋmɔ hee lɛ nɔ lɛ, ní afɔse ashwie shi yɛ mɛi pii ahewɔ hã eshaifaa lɛ.”​—Mateo 26:27, 28.

⁹ Yesu lá ni afɔse ashwie shi lɛ ji nɔ ni hã kpaŋmɔ hee lɛ bɔi nitsumɔ. Afɔse lá nɛɛ ashwie shi shi kome, shi ehãa anyɛɔ akɛ mɛi ahe eshai faa amɛ be fɛɛ be. Yesu fataaa mɛi ni akɛfee kpaŋmɔ hee lɛ he. Mɛni hewɔ? Ejaakɛ efeee esha, no hewɔ lɛ ehe ehiaaa ni akɛ ehe eshai afa lɛ. Shi Nyɔŋmɔ baanyɛ etsɔ hewalɛ ni Yesu afɔle lɛ yɔɔ lɛ nɔ ejɔɔ adesai. Ebaanyɛ ekɛ emumɔ krɔŋkrɔŋ lɛ afɔ adesai anɔkwafoi mu, ni eŋɔ amɛ akɛ “bii.” (Nyɛkanea Romabii 8:14-17.) Yehowa naa amɛ akɛ esha bɛ amɛhe, tamɔ bɔ ni enaa e-Bi Yesu Kristo lɛ nɔŋŋ. Mɛi ni afɔ amɛ mu nɛɛ baatsɔmɔ “Kristo nanemɛi niyelɔi.” Agbɛnɛ hu, amɛbaaná hegbɛ ni ŋmɛɛ Israel maŋ lɛ, ni amɛbaatsɔ “osɔfoi amaŋtsɛyeli.” Bɔfo Petro wie amɛhe akɛ: “Nyɛ lɛ, weku ní ahala ji nyɛ, maŋtsɛmɛi ní yeɔ osɔfoi, jeŋmaŋ krɔŋkrɔŋ, maŋ ní eŋɔfee enɔ, koni nyɛjaje mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.” (1 Petro 2:9) Enɛ tsɔɔ faŋŋ akɛ, kpaŋmɔ hee lɛ he miihia waa! Ehãa Yesu kaselɔi lɛ náa hegbɛ akɛ amɛbaafee Abraham seshi lɛ fã kroko lɛ.

10. Mɛɛ be kpaŋmɔ hee lɛ bɔi nitsumɔ? Mɛni hewɔ nakai beaŋ dani ebɔi nitsumɔ lɛ?

¹⁰ Jeee Nuŋtsɔ lɛ Gbɛkɛ Niyeli lɛ shishi ni kpaŋmɔ hee lɛ bɔi nitsumɔ. Mɛni hewɔ? Ejaakɛ ja Yesu etee ŋwɛi ni ekɛ afɔle ni eshã lɛ he jara lɛ eyahã Nyɔŋmɔ dani kpaŋmɔ lɛ baabɔi nitsumɔ. Agbɛnɛ hu, esa akɛ akɛ mumɔ krɔŋkrɔŋ lɛ afɔ mɛi ni baatsɔmɔ “Kristo nanemɛi niyelɔi” lɛ mu dã. No hewɔ lɛ, kpaŋmɔ hee lɛ bɔi nitsumɔ yɛ afi 33 Pentekoste gbi lɛ nɔ, be ni Nyɔŋmɔ mumɔ lɛ ba Yesu kaselɔi lɛ anɔ lɛ.

11. Mɛɛ gbɛ nɔ kpaŋmɔ hee lɛ hãa Yudafoi kɛ Jeŋmajiaŋbii fɛɛ náa hegbɛ lɛ akɛ amɛtsɔmɔ mumɔŋ Israelbii? Mɛi enyiɛ baafee kpaŋmɔ hee lɛ mli bii?

¹¹ Be ni Yehowa tsɔ Yeremia nɔ egba akɛ ekɛ Israelbii lɛ baakpaŋ kpaŋmɔ hee ko lɛ, ana akɛ be ko baashɛ ni akɛ Mla kpaŋmɔ lɛ tsuŋ nii dɔŋŋ. Mla lɛ ba naagbee be ni kpaŋmɔ hee lɛ bɔi nitsumɔ lɛ. (Hebribii 8:13) Kpaŋmɔ hee lɛ hewɔ lɛ, Yudafoi kɛ Jeŋmajiaŋbii foolɔi lɛ fɛɛ baaná hegbɛ kome too lɛ nɔŋŋ akɛ amɛtsɔmɔ Nyɔŋmɔ Maŋtsɛyeli lɛ niyelɔi, ejaakɛ amɛketiafoo lɛ ji “tsuiŋ ketiafoo ni yɔɔ mumɔ mli, ni jeee ŋmalɛ okadi mli.” (Romabii 2:29) Nyɔŋmɔ kɛ emlai lɛ baawo amɛjwɛŋmɔŋ kɛ amɛtsuiiaŋ. (Hebribii 8:10) Mɛi 144,000 ní afɔ amɛ mu baafee kpaŋmɔ hee lɛ mli bii. Amɛbaafee maŋ hee ni atsɛɔ lɛ “Nyɔŋmɔ Israel,” loo mumɔŋ Israel lɛ.​—Galatabii 6:16; Kpojiemɔ 14:1, 4.

12. Mɛɛ srɔto yɔɔ Mla kpaŋmɔ lɛ kɛ kpaŋmɔ hee lɛ teŋ?

¹² Mɛɛ srɔto yɔɔ Mla kpaŋmɔ lɛ kɛ kpaŋmɔ hee lɛ teŋ? Yehowa kɛ Israel maŋ lɛ ni fee Mla kpaŋmɔ lɛ,  ni Yehowa kɛ mumɔŋ Israelbii lɛ ni fee kpaŋmɔ hee lɛ. Mose ji teŋdamɔlɔ kɛhã Mla kpaŋmɔ lɛ, ni Yesu ji teŋdamɔlɔ kɛhã kpaŋmɔ hee lɛ. Kooloi alá ji nɔ ni hã Mla kpaŋmɔ lɛ bɔi nitsumɔ, ni Yesu lá ni ekɛshã afɔle lɛ ji nɔ ni hã kpaŋmɔ hee lɛ bɔi nitsumɔ. Yɛ Mla kpaŋmɔ lɛ shishi lɛ, Mose ji Israel maŋ lɛ hiɛnyiɛlɔ. Ni Yesu, ni ji asafo lɛ Yitso lɛ ji mɛi ni yɔɔ kpaŋmɔ hee lɛ mli lɛ a-Hiɛnyiɛlɔ.​—Efesobii 1:22.

13, 14. (a) Mɛɛ gbɛ nɔ kpaŋmɔ hee lɛ kɔɔ Maŋtsɛyeli lɛ he? (b) Te aaafee tɛŋŋ ni mɛi ni afɔ amɛ mu lɛ aaayafata Yesu he yɛ ŋwɛi kɛye nɔ akɛ maŋtsɛmɛi kɛ osɔfoi lɛ?

¹³ Mɛɛ gbɛ nɔ kpaŋmɔ hee lɛ kɔɔ Maŋtsɛyeli lɛ he? Kpaŋmɔ nɛɛ hãa anáa maŋ krɔŋkrɔŋ ni baaná hegbɛ lɛ kɛsɔmɔ akɛ maŋtsɛmɛi kɛ osɔfoi yɛ ŋwɛi Maŋtsɛyeli lɛ mli. Nakai maŋ lɛ ji Abraham seshi lɛ fã kroko lɛ. (Galatabii 3:29) No hewɔ lɛ, kpaŋmɔ hee lɛ maa nɔ aduatsɔ akɛ, Nyɔŋmɔ kɛ Abraham kpaŋmɔ lɛ baaba mli.

¹⁴ Kpaŋmɔ hee lɛ nɔ adamɔ ato mumɔŋ Israel maŋ lɛ, ni no ji nɔ ni hãa mɛi ni afɔ amɛ mu lɛ batsɔmɔɔ “Kristo nanemɛi niyelɔi.” Shi te aaafee tɛŋŋ ni mɛi ni afɔ amɛ mu lɛ aaayafata Yesu he yɛ ŋwɛi kɛye nɔ akɛ maŋtsɛmɛi kɛ osɔfoi lɛ? Ja akpaŋ kpaŋmɔ kroko dani amɛbaaná nakai hegbɛ lɛ.

15. Mɛɛ kpaŋmɔ Yesu diɛŋtsɛ kɛ ekaselɔi anɔkwafoi lɛ kpaŋ?

¹⁵ Be ni Yesu to Nuŋtsɔ lɛ Gbɛkɛ Niyeli lɛ shishi sɛɛ lɛ, ekɛ ekaselɔi anɔkwafoi lɛ kpaŋ kpaŋmɔ ko ni atsɛɔ lɛ Maŋtsɛyeli kpaŋmɔ lɛ. (Nyɛkanea Luka 22:28-30.) Yehowa fataaa kpaŋmɔ nɛɛ he, tamɔ bɔ ni efata kpaŋmɔ krokomɛi lɛ fɛɛ he lɛ. Yesu diɛŋtsɛ kɛ mɛi ni afɔ amɛ mu lɛ ni kpaŋ kpaŋmɔ nɛɛ. Be ni Yesu wie akɛ, “taakɛ bɔ ni mitsɛ eto ehã mi lɛ,” no mli lɛ, eeenyɛ efee akɛ eewie kpaŋmɔ ni Yehowa kɛ lɛ kpaŋ akɛ ebaasɔmɔ akɛ “osɔfo . . . kɛmiiya naanɔ yɛ Melkizedek gbɛjianɔ lɛ naa” lɛ he.​—Hebribii 5:5, 6.

16. Mɛɛ hegbɛ Maŋtsɛyeli kpaŋmɔ lɛ hãa Kristofoi ni afɔ amɛ mu lɛ náa?

¹⁶ Bɔfoi anɔkwafoi 11 lɛ kɛ Yesu hi shi yɛ ekai lɛ amli. Maŋtsɛyeli kpaŋmɔ lɛ maa nɔ aduatsɔ akɛ bɔfoi lɛ baata maŋtsɛsɛii anɔ, ni amɛkɛ Yesu baaye nɔ yɛ ŋwɛi akɛ maŋtsɛmɛi kɛ osɔfoi. Shi jeee mɛi 11 lɛ pɛ baaná nakai hegbɛ lɛ. Yesu jie ehe kpo etsɔɔ bɔfo Yohane yɛ ninaa mli ni ekɛɛ lɛ akɛ: “Kunimyelɔ lɛ, mahã lɛ gbɛ ni ekɛ mi ata mimaŋtsɛsɛi lɛ nɔ, taakɛ bɔ nɔŋŋ ni mi hu miye kunim, ni mikɛ mitsɛ ta emaŋtsɛsɛi lɛ nɔ lɛ.” (Kpojiemɔ 3:21) No hewɔ lɛ, akɛ Kristofoi 144,000 ní afɔ amɛ mu lɛ ni kpaŋ Maŋtsɛyeli kpaŋmɔ lɛ. (Kpojiemɔ 5:9, 10; 7:4) Nɛkɛ kpaŋmɔ nɛɛ hãa mɛi ni afɔ amɛ mu lɛ náa hegbɛ lɛ akɛ amɛyafata Yesu he yɛ ŋwɛi kɛye nɔ. Abaanyɛ akɛto ayemforo ni kɛ maŋtsɛ ko yaabote gbalashihilɛ mli lɛ he. Kɛ́ mɛi enyɔ lɛ bote gbalashihilɛ mli pɛ, ayemforo lɛ baanyɛ ekɛ maŋtsɛ lɛ aye nɔ.  Anɔkwa, Biblia lɛ tsɛɔ mɛi ni afɔ amɛ mu lɛ akɛ Kristo “ayemforo lɛ,” kɛ “oblayoo fro” ni atsɛ ehe baa ahã Kristo.​—Kpojiemɔ 19:7, 8; 21:9; 2 Korintobii 11:2.

17, 18. (a) Tsɔɔmɔ kpaŋmɔi ekpaa ni wɔsusu he ni kɔɔ Maŋtsɛyeli lɛ he lɛ mli. (b) Mɛni hewɔ wɔbaanyɛ wɔkɛ wɔhiɛ afɔ̃ Maŋtsɛyeli lɛ nɔ kwraa lɛ?

¹⁷ Kpaŋmɔi ni wɔsusu he yɛ nikasemɔi enyɔ nɛɛ amli lɛ fɛɛ kɔɔ Maŋtsɛyeli lɛ he. (Kwɛmɔ akrabatsa ni yitso ji, “Bɔ ni Nyɔŋmɔ Baahã Eyiŋtoo lɛ Aba Mli” lɛ.) Nibii ni wɔsusu he lɛ hãa wɔnaa faŋŋ akɛ, kpaŋmɔi nɛɛ maa nɔ aduatsɔ kɛhãa wɔ akɛ Maŋtsɛyeli lɛ baaba. Wɔbaanyɛ wɔná nɔmimaa akɛ, Nyɔŋmɔ baatsɔ Mesia Maŋtsɛyeli lɛ nɔ etsu eyiŋtoo kɛhã adesai kɛ shikpɔŋ lɛ he nii.​—Kpojiemɔ 11:15.

¹⁸ Ŋwanejee ko bɛ he akɛ Maŋtsɛyeli lɛ pɛ ji nɔ ni baatsu adesai anaagbai lɛ ahe nii. Wɔyɛ nɔmimaa akɛ ekɛ jɔɔmɔi baahã adesai fɛɛ. No hewɔ lɛ, nyɛhãa wɔkɛ ekãa agbaa mɛi krokomɛi anɔkwale nɛɛ he sane!​—Mateo 24:14.