BE NI Nyɔŋmɔ webii lɛ shi Babilon yɛ afi 537 D.Ŋ.B. lɛ, Yehowa hã ajaje gbɛ ni amɛbaatsɔ nɔ kɛya Yerusalem lɛ. Ekɛɛ akɛ: “Nyɛjea maŋ lɛ gbɛ lɛ! Nyɛsaa, nyɛsaa gbɛjegbɛ lɛ, nyɛkɔlɔa enɔ tɛi lɛ!” (Yes. 62:10) Eeenyɛ efee akɛ, ahã Yudafoi komɛi tsɔ hiɛ ni amɛyafee enɛ. Ekolɛ amɛyaje gbɛ lɛ, amɛtsimɔtsimɔi bui ni yɔɔ gbɛ lɛ nɔ lɛ, ni amɛsaasai hei ni efee dokoidokoi lɛ. Enɛ baaye abua amɛnyɛmimɛi ni baaba yɛ amɛsɛɛ lɛ koni amɛyashɛ amɛjakumaŋ shweshweeshwe ni nɔ ko nɔ ko wooo amɛnajiaŋ.

Wɔbaanyɛ wɔkɛ enɛ ato nɔ ni mɔ ko baanyɛ afee koni eshɛ otii ni ekɛmamɔ ehiɛ yɛ mumɔŋ lɛ ahe lɛ he. Yehowa miisumɔ ni ewebii lɛ fɛɛ ashɛ mumɔŋ otii ni amɛkɛmamɔ amɛhiɛ lɛ ahe ni nɔ ko nɔ ko wooo amɛnajiaŋ. E-Wiemɔ lɛ woɔ wɔ hewalɛ akɛ: “Jajemɔ onaji amaamɔhe lɛ pɛpɛɛpɛ, ni oha ogbɛi fiaa aja.” (Abɛi 4:26) Kɛ́ oda jio, odako jio lɛ, nilee yɛ mli akɛ okɛ ŋaawoo ni jɛ Nyɔŋmɔ ŋɔɔ nɛɛ aaatsu nii.

Ekolɛ onu ni mɛi miiwie oblanyo loo oblayoo ko he akɛ: ‘Nɔ fɛɛ nɔ miiya nɔ jogbaŋŋ kɛmiihã lɛ’ loo ‘Eeya ehiɛ waa.’ Bei pii lɛ, oblahii kɛ oblayei yɛ gbɔmɔtsoŋ hewalɛ, amɛle nii, ni amɛsumɔɔ ni amɛye omanye yɛ nɔ fɛɛ nɔ mli. Eja gbɛ akɛ Biblia lɛ wie akɛ: “Oblahii anunyam ji amɛhewalɛ.” (Abɛi 20:29) Oblanyo loo oblayoo ni kɛ hesai ni eyɔɔ kɛ enyɛmɔ fɛɛ sɔmɔɔ Yehowa lɛ baanyɛ ashɛ mumɔŋ otii ni ekɛmamɔ ehiɛ lɛ ahe, ni ebaaná anɔkwa miishɛɛ.

Shi ekolɛ oyɔse akɛ, mɛi sumɔɔ ni oblahii kɛ oblayei ni ji Yehowa Odasefoi lɛ kɛ amɛhewalɛ lɛ atsu nii yɛ je lɛ mli. Kɛ́ Odasefonyo oblanyo loo oblayoo ko bɔɔ mɔdɛŋ yɛ skul lɛ, ekolɛ etsɔɔlɔi lɛ ateŋ mɔ ko loo enanemɛi skulbii lɛ ateŋ mɔ ko baanyɛ enɔ ni eya yunivɛsiti koni no ahã eye  omanye yɛ nibii agbɛjianɔtoo nɛɛ mli. Aloo ekolɛ kɛ́ nyɛmi nuu loo nyɛmi yoo ko bɔɔ mɔdɛŋ yɛ kpɔiaŋgbɔlemɔ mli lɛ, mɛi ni taoɔ mɛi ni tamɔ nakai lɛ baawo lɛ hewalɛ koni ekɛ enyɛmɔ fɛɛ awo mli. Ani okɛ shihilɛ ni tamɔ nakai ekpe, loo ole mɔ ko ni kɛ shihilɛ ni tamɔ nakai miikpe? Mɛni baaye abua Kristofonyo ko ni ekɛ hiɛshikamɔ akpɛ eyiŋ?

Biblia mli tsɔɔmɔi lɛ baanyɛ asaa mɔ ko ni enyɛ enyiɛ gbɛ ni hi fe fɛɛ ni kɛ mɔ yaa wala mli lɛ nɔ. Jajelɔ 12:1 lɛ kɛɔ akɛ: “Kaimɔ obɔlɔ lɛ yɛ oblahiiaŋ gbii lɛ amli.” Mɛni ji gbɛ ni hi fe fɛɛ ni bo loo oblanyo loo oblayoo ko baanyɛ atsɔ nɔ ‘akai e-Bɔlɔ lɛ’?

Susumɔ nɔ ni oblanyo ko ni atsɛɔ lɛ Eric * ni yɔɔ Afrika anaigbɛ lɛ kɛkpe lɛ he okwɛ. No mli lɛ, esumɔɔ bɔɔlutswaa waa. Be ni Eric ná afii 15 lɛ, no mli lɛ, etswaa bɔɔlu ehãa emaŋ lɛ. Enɛ tsɔɔ akɛ, etsɛŋ ni ebaaná hegbɛ ni eya Yuropa ni ayatsɔɔ lɛ bɔɔlutswaa jogbaŋŋ, ni ekolɛ enɛ baahã bɔɔlutswaa kuu ko ni yɔɔ jɛmɛ lɛ ahe lɛ. Shi te eeefee tɛŋŋ ‘ekai e-Bɔlɔ’ lɛ? Ni mɛni bo loo onaanyo oblanyo loo oblayoo ko baanyɛ akase yɛ sane nɛɛ mli?

Yehowa Odasefoi kɛ Eric bɔi Biblia lɛ kasemɔ be ni eyaa skul lɛ. Ebakase akɛ, e-Bɔlɔ lɛ baatsu adesai anaagbai lɛ ahe nii kwraa. Ebana nɔ hewɔ ni ehe yɔɔ sɛɛnamɔ akɛ ekɛ ebe kɛ enyɛmɔ fɛɛ aaafee Nyɔŋmɔ suɔmɔnaa nii lɛ. Enɛ ni Eric yɔse lɛ hã ekpɛ eyiŋ akɛ ekɛ enyɛmɔ fɛɛ woŋ bɔɔlutswaa lɛ mli dɔŋŋ. Moŋ lɛ, abaptisi lɛ ni etiu mumɔŋ otii asɛɛ. Sɛɛ mli lɛ, ebatsɔ asafoŋ sɔɔlɔ, ni no sɛɛ lɛ, afɔ̃ lɛ nine kɛhã Biblia Skul Kɛha Nyɛmimɛi Hii Oshijafoi lɛ.

Eji Eric tiu bɔɔlutswaa lɛ sɛɛ kulɛ, ekolɛ ebaahe gbɛ́i ni ebaaná shika. Shi eyɔse akɛ Biblia mli shishitoo mla nɛɛ ji anɔkwale akɛ: “Niiatsɛ nii lɛ ji emɔɔ ní wa, ni lɛ diɛŋtsɛ ejwɛŋmɔ naa lɛ etamɔ gbogbo grɔŋŋ.” (Abɛi 18:11) Anɔkwa, kɛ́ mɔ ko susu akɛ eyɛ shweshweeshwe yɛ nii ni ená lɛ hewɔ lɛ, belɛ elaka ehe. Kɛfata he lɛ, bei pii lɛ, mɛi ni kɛ amɛnyɛmɔ fɛɛ tiuɔ ninamɔ sɛɛ lɛ ‘kɛ piŋmɔi babaoo gbulɔɔ amɛhe.’—1 Tim. 6:9, 10.

Miishɛɛ sane ji akɛ, oblahii kɛ oblayei babaoo yɛ miishɛɛ ni amɛyɛ shweshweeshwe akɛni amɛkɛ amɛhe ewo be fɛɛ sɔɔmɔ lɛ mli lɛ hewɔ. Eric wie akɛ: “Mibafata be fɛɛ sɔɔlɔi akuu ni sɔmɔɔ Yehowa lɛ he. No ji kuu ni hi fe fɛɛ ni manyɛ mikɛ mihe adɔmɔ, ni miida Yehowa shi akɛ etsɔɔ mi gbɛ pɛ ni atsɔɔ nɔ anáa anɔkwa miishɛɛ, ní hãa ayeɔ omanye yɛ shihilɛ mli hu lɛ.”

Ni bo hu? Yɛ nɔ najiaŋ ni oootiu je lɛŋ otii asɛɛ lɛ, hã “ogbɛi” aja yɛ Yehowa hiɛ kɛtsɔ gbɛgbamɔ nitsumɔ lɛ ni okɛ ohe aaawo mli lɛ nɔ.—Kwɛmɔ akrabatsa ni yitso ji, “ Sɛɛnamɔi ni Minyɛŋ Maná yɛ Yunivɛsiti” lɛ.

Be ni gbalashihilɛ mli bii komɛi yasara United States nitsumɔhe nine lɛ, amɛna akɛ Betelbii ni sɔmɔɔ Yehowa yɛ jɛmɛ lɛ yɛ miishɛɛ waa. Sɛɛ mli lɛ, nyɛmi yoo lɛ ŋma akɛ: “Asomoaŋ, jeee nɔ ko kwraa wɔfeɔ lɛ.” Gbalashihilɛ mli bii nɛɛ kpɛ amɛyiŋ akɛ amɛkɛ amɛnyɛmɔ kɛ amɛbe baatiu sɔɔmɔ hegbɛi moŋ asɛɛ.

Eshɛ he ko ni efee tamɔ nɔ ni tsakemɔi ni gbalashihilɛ mli bii lɛ to akɛ amɛbaafee lɛ dara tsɔ, ni amɛnyɛŋ amɛfee. Shi gbi ko be ni amɛsusuɔ ŋmalɛ kɛhã gbi lɛ ni je kpo yɛ Yohane 8:31 lɛ he lɛ, amɛyɔse nɔ ko. Yesu wie yɛ jɛmɛ akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ.” Ŋmalɛ nɛɛ ye ebua amɛ ni amɛyɔse akɛ, ehi waa akɛ amɛkɛ nibii aaashã afɔle koni amɛshihilɛ afee mlɛo. Amɛhɔ̃ɔ shĩa agbo ni amɛyɔɔ lɛ, amɛjie jatsui krokomɛi kɛje amɛnɔ, ni amɛtee asafo ko ni yelikɛbuamɔ he miihia yɛ jɛmɛ lɛ mli. Amrɔ nɛɛ, amɛji gbɛgbalɔi, ni amɛyeɔ amɛbuaa kɛmamɔɔ Maŋtsɛyeli Asai hu, ni amɛkɛ amɛhe hãa kɛtsuɔ nii yɛ kpokpaa wulu nɔ kpeei ashishi. Te amɛnuɔ he amɛhãa tɛŋŋ? Amɛwie akɛ: “Akɛni wɔhã wɔshihilɛ efee mlɛo, ni wɔmiifee nɔ ni Yehowa gbɛjianɔtoo lɛ biɔ yɛ wɔdɛŋ lɛ hewɔ lɛ, wɔyɛ miishɛɛ waa.”

Salomo ŋma akɛ: “Too ohiɛ tɛ̃ɛ, ni ohã ohiŋmɛiiasɛɛ akwɛ ohiɛ tuuntu.” (Abɛi 4:25) Taakɛ tsɔne kudɔlɔ kwɛɔ ehiɛ tɛ̃ɛ lɛ, esa akɛ wɔ hu wɔkpoo nibii fɛɛ ni haŋ wɔshɛ mumɔŋ otii ni wɔkɛmamɔɔ wɔhiɛ lɛ ahe lɛ.

Mɛni ji mumɔŋ otii komɛi ni obaanyɛ okɛmamɔ ohiɛ ni oshɛ he? Ehi waa akɛ okɛaafee oti ni ma ohiɛ akɛ obaatsɔ be fɛɛ sɔɔlɔ. Oti kroko ji, ni oyaye  obua asafo ko ni bɛŋkɛ ni miitao shiɛlɔi ni bɔɔ mɔdɛŋ koni amɛbawa amɛ kɛtsu amɛshikpɔŋkuku ni da lɛ mli nii. Aloo ekolɛ asafo ko yɛ shiɛlɔi babaoo ni bɔɔ mɔdɛŋ, shi amɛbɛ asafoŋ onukpai kɛ asafoŋ sɔɔlɔi ni fa bɔ ni sa. Ani obaanyɛ oye obua yɛ gbɛi nɛɛ eko nɔ? Okɛ kpokpaa nɔkwɛlɔ lɛ awie he okwɛ akɛ obaanyɛ oye obua lo. Kɛ́ ootao oyasɔmɔ yɛ he ko ni jɛkɛ lɛ, obaanyɛ obi ni atsɔɔ bo asafoi ni yɔɔ shɔŋŋ ni miitao yelikɛbuamɔ. *

Hã wɔsusu shihilɛ ni awie he yɛ Yesaia 62:10 lɛ he ekoŋŋ wɔkwɛ. Ekolɛ, Yudafoi lɛ ekomɛi tsu nii waa kɛsaa gbɛ ni yaa amɛjakumaŋ lɛ nɔ jogbaŋŋ, bɔ ni afee ni Nyɔŋmɔ webii lɛ anyɛ ayashɛ shweshweeshwe. Kɛ́ oomia ohiɛ koni oshɛ otii komɛi ahe yɛ anɔkwa jamɔ mli lɛ, onijiaŋ akaje wui. Yɛ Yehowa yelikɛbuamɔ naa lɛ, bo hu obaanyɛ oshɛ nakai otii lɛ ahe. Yaa nɔ obi Yehowa ni ehã bo nilee ni okɛjie gbɛtsĩi nii ni okɛkpeɔ lɛ. Yɛ be ni sa mli lɛ, obaana akɛ ebaaye ebua bo ni ojaje “onaji amaamɔhe.”—Abɛi 4:26.