Teokrase Skul Srɔtoi​—Amɛtsɔɔ akɛ Yehowa Sumɔɔ Wɔ

YEHOWA ji ‘wɔ-Tsɔɔlɔ Kpeteŋkpele’ lɛ. (Yes. 30:20) Suɔmɔ ni eyɔɔ lɛ hewɔ lɛ, etsɔɔ mɛi anii ni etsɔseɔ amɛ. Ákɛ nɔkwɛmɔnɔ lɛ, suɔmɔ ni mli kwɔ ha Yehowa tsɔɔ Yesu “nibii fiaa ní lɛ diɛŋtsɛ efeɔ lɛ.” (Yoh. 5:20) Suɔmɔ ni Yehowa yɔɔ kɛha wɔ, e-Dasefoi lɛ, tsirɛɔ lɛ ni ehaa wɔ “nikaselɔi alilɛi” beni wɔbɔɔ mɔdɛŋ akɛ wɔwo ehiɛ nyam ní wɔye wɔbua mɛi krokomɛi lɛ.—Yes. 50:4.

Gbɛtsɔɔmɔ Kuu lɛ mli Nitsɔɔmɔ Ajinafoi Akuu lɛ kaseɔ Yehowa suɔmɔ lɛ kɛtsɔ teokrase skul srɔtoi nyɔŋma ni amɛtsɔɔ nɔ amɛtsɔseɔ mɛi ni yɔɔ shwelɛ akɛ amɛkɛ amɛhe aaawo mli, ní amɛshihilɛ ŋmɛɔ amɛ gbɛ hu lɛ. Ani onaa skul srɔtoi nɛɛ akɛ gbɛ ni Yehowa tsɔɔ nɔ etsɔɔ akɛ esumɔɔ wɔ?

Ha wɔsusu teokrase skul srɔtoi nɛɛ ahe ni wɔkwɛ nɔ ni mɛi ni kɛ amɛhe ewo mli lɛ ewie yɛ he. No sɛɛ lɛ, bi ohe akɛ, ‘Te mafee tɛŋŋ maná tsɔsemɔ ni jɛ ŋwɛi nɛɛ he sɛɛ lɛ?’

 NÁ TEOKRASE TSƆSEMƆ LƐ HE SƐƐ

Ákɛ ‘Nyɔŋmɔ ni yɔɔ suɔmɔ’ lɛ, Yehowa tsɔseɔ wɔ bɔni afee ni wɔhi shi yɛ gbɛ kpakpa nɔ, esaa wɔ koni wɔye shihilɛi ni mli wawai anɔ, ni eyeɔ ebuaa wɔ koni wɔná miishɛɛ yɛ shiɛmɔ nitsumɔ lɛ mli. (2 Kor. 13:11) Taakɛ eji yɛ klɛŋklɛŋ afii 100 lɛ mli kaselɔi lɛ agbɛfaŋ lɛ, awaje wɔ jogbaŋŋ koni wɔye wɔbua mɛi, ni ‘wɔtsɔɔ amɛ ni amɛye nii fiaa’ ni atsɔɔ wɔ lɛ nɔ.—Mat. 28:20.

Eyɛ mli akɛ ekolɛ wɔnyɛŋ wɔya skul srɔtoi nɛɛ fɛɛ eko moŋ, shi wɔbaanyɛ wɔná emli ekomɛi ahe sɛɛ. Ni wɔbaanyɛ wɔkɛ gbɛtsɔɔmɔ ni damɔ Biblia nɔ ni wɔnine shɛɔ nɔ lɛ atsu nii. Agbɛnɛ hu, kɛ́ wɔkɛ Yehowa tsuji ni etee skul nɛɛ eko lɛ nyiɛ shiɛmɔ nɔ lɛ, wɔbaaná he sɛɛ babaoo.

Bi ohe akɛ, ‘Ani mishihilɛ ŋmɛɔ mi gbɛ koni maya skul srɔtoi nɛɛ eko?’

Yehowa jálɔi buɔ amɛhe ni amɛkɛwoɔ skul srɔtoi ni he yɔɔ sɛɛnamɔ nɛɛ amli, kɛ nibii ni amɛkaseɔ kɛjɛɔ mli lɛ akɛ eji hegbɛ kpele. Eba akɛ tsɔsemɔ ni onáa lɛ baaha obɛŋkɛ Nyɔŋmɔ kpaakpa, ni esaa bo koni onyɛ otsu sɔ̃i ni jwere onɔ, titri lɛ, sanekpakpa lɛ shiɛmɔ lɛ, ahe nii jogbaŋŋ.

[Akrabatsa ni yɔɔ baafa 13-17]

TEOKRASE SKUL SRƆTOI LƐ AHE SAJI

Teokrase Sɔɔmɔ Skul

Yiŋtoo: Koni akɛtsɔse shiɛlɔi ni amɛnyɛ amɛshiɛ sanekpakpa lɛ, ni amɛtsɔɔ mɛi anii jogbaŋŋ.

Be ni Eheɔ: Agbeee naa.

He ni Afeɔ Yɛ: Maŋtsɛyeli Asa nɔ.

Taomɔ Nii: Esa akɛ mɔ lɛ afee mɔ ko ni kɛ asafo lɛ bɔɔ daa ni kpɛlɛɔ Biblia mli tsɔɔmɔi anɔ, ni ehiɔ shi yɛ Kristofoi ashishitoo mlai anaa.

Bɔ ni Afeɔ akɛ He Woɔ Mli: Teokrase Sɔɔmɔ Skul nɔkwɛlɔ lɛ ni kpɛlɛɔ mɛi anɔ.

Nyɛmi yoo ko ni atsɛɔ lɛ Sharon ni miiye kuumɔ hela ko lɛ kɛɛ akɛ: “Teokrase Sɔɔmɔ Skul lɛ eha mile bɔ ni ataoɔ nii amli kɛ bɔ ni akɛ ŋaa tsɔɔ nii. Eha mina hu akɛ, esa akɛ masusu mɛi krokomɛi amumɔŋ hiamɔ nii ahe—shi jeee mi pɛ minɔ.”

Arnie, ni ji nɔkwɛlɔ gbɛfalɔ ko ni kɛ afii babaoo esɔmɔ lɛ kɛɛ akɛ: “Momohalɔ ji mi kɛjɛ migbekɛbiiashi, ni ewa kɛha mi akɛ makwɛ mɛi ahiɛ. Skul nɛɛ eye ebua mi ni miná ekãa, ni eha mina akɛ mihe yɛ sɛɛnamɔ. Yɛ Yehowa yelikɛbuamɔ naa lɛ, tsɔsemɔ nɛɛ eha mile bɔ ni amuɔ jogbaŋŋ kɛ́ aawie, kɛ bɔ ni akɛ jwɛŋmɔ maa nii anɔ jogbaŋŋ. Eŋɔɔ minaa waa akɛ minyɛɔ mijieɔ Nyɔŋmɔ yi yɛ asafo lɛ mli kɛ shiɛmɔ nitsumɔ lɛ mli.”

 Skul Kɛha Mɛi ni Eje Betel Sɔɔmɔ Shishi

Yiŋtoo: Afeɔ skul nɛɛ koni akɛye abua mɛi ni eje Betel sɔɔmɔ shishi lɛ ni amɛnyɛ amɛye omanye yɛ amɛsɔɔmɔ lɛ mli.

Be ni Eheɔ: Daa otsi lɛ akɛ minitii 45 feɔ, ni eheɔ otsii 16.

He ni Afeɔ Yɛ: Betel.

Taomɔ Nii: Esa akɛ mɔ lɛ afee Betel weku lɛ mli nyo loo mɔ ni akpɛlɛ enɔ akɛ esɔmɔ afi kome loo nɔ yɛ Betel.

Bɔ ni Afeɔ Ayaa: Afɔ̃ɔ Betelbii hei anine tɛ̃ɛ ni amɛyaa.

Demetrius ni tee skul nɛɛ eko yɛ afi 1980 afii lɛ amli lɛ kɛɛ akɛ: “Skul nɛɛ ha mile bɔ ni akaseɔ nii jogbaŋŋ, ni no ha mikɛfee oti ni ma mihiɛ akɛ mahi Betel be kplaŋŋ. Tsɔɔlɔi lɛ, nibii ni wɔkase lɛ, kɛ ŋaawoi ni akɛha lɛ fɛɛ ha mina akɛ Yehowa sumɔɔ mi, ni eesumɔ ni eye ebua mi ni maye omanye yɛ mi-Betel sɔɔmɔ lɛ mli.”

Kaitlyn wie akɛ: “Skul lɛ ye ebua mi ni mikɛ nɔ ni he hiaa fe fɛɛ lɛ ma mihiɛ—akɛ mafee minii yɛ gbɛ ni Yehowa sumɔɔ lɛ nɔ. Eha mile Yehowa jogbaŋŋ, ni minya eshĩa lɛ hilɛ he waa, ni minu egbɛjianɔtoo lɛ shishi jogbaŋŋ.”

Maŋtsɛyeli Sɔɔmɔ Skul

Yiŋtoo: Koni akɛtsɔse nɔkwɛlɔi gbɛfalɔi, asafoŋ onukpai, kɛ bei komɛi lɛ, asafoŋ sɔɔlɔi koni amɛnyɛ amɛtsu sɔ̃i ni jwere amɛnɔ yɛ Yehowa asafo lɛ mli ahe nii jogbaŋŋ. (Bɔf. 20:28) Asusuɔ nibii ni yaa nɔ yɛ asafoi lɛ amli kɛ asafoi lɛ ahiamɔ nii ahe. Kɛ́ afee skul nɛɛ eko lɛ, afii fioo komɛi shwieɔ mli dani Gbɛtsɔɔmɔ Kuu lɛ tsɔɔ be ni esa akɛ afee ekoŋŋ.

Be ni Eheɔ: Nyɛsɛɛ afii nɛɛ amli lɛ, nɔkwɛlɔi gbɛfalɔi kɛ gbii enyɔ kɛmiimɔ gbii enyɔ kɛ fã yaa, ni asafoŋ onukpai kɛ gbi kome kɛ fã yaa, ni asafoŋ sɔɔlɔi hu kɛ gbi kome yaa.

He ni Afeɔ Yɛ: Bei pii lɛ, afeɔ yɛ Maŋtsɛyeli Asa loo Kpee Asa ko nɔ.

Taomɔ Nii: Esa akɛ mɔ lɛ afee nɔkwɛlɔ gbɛfalɔ, asafoŋ onukpa, loo asafoŋ sɔɔlɔ.

Bɔ ni Afeɔ Ayaa: Kpokpaa nɔkwɛlɔ lɛ fɔ̃ɔ asafoŋ onukpai kɛ asafoŋ sɔɔlɔi ni shɛɔ taomɔ nii lɛ ahe lɛ nine. Nitsumɔhe nine lɛ fɔ̃ɔ nɔkwɛlɔi gbɛfalɔi nine.

“Eyɛ mli akɛ be ni akɛfeɔ skul lɛ faaa, ni nibii ni atsɔɔ lɛ fa moŋ, shi ewajeɔ asafoŋ onukpai lɛ ni eyeɔ ebuaa amɛ koni amɛya nɔ amɛkɛ miishɛɛ asɔmɔ, ni ‘amɛfee hii’ yɛ Yehowa sɔɔmɔ lɛ mli. Ehaa mɛi ni tsɔmɔ onukpai etsɛko kɛ mɛi ni esɔmɔ afii babaoo lɛ fɛɛ tsɔɔ tookwɛlɔi kpakpai, ni ‘amɛjwɛŋmɔ fɛɛ feɔ ekome.’”—Quinn.

“Tsɔsemɔ nɛɛ ye ebua wɔ ni wɔnu saji ni kɔɔ wɔhemɔkɛyeli lɛ he lɛ shishi, ebɔ wɔ kɔkɔ yɛ osharai ahe, ni eha wɔna bɔ ni wɔɔfee wɔkwɛ tooi lɛ anɔ jogbaŋŋ. Kwɛ bɔ ni Yehowa jɛɔ mlihilɛ mli eyeɔ ebuaa wɔ.”—Michael.

 Gbɛgbalɔi Asɔɔmɔ Skul

Yiŋtoo: Koni akɛye abua gbɛgbalɔi ni ‘amɛgbe amɛsɔɔmɔ lɛ naa kwraa.’—2 Tim. 4:5.

Be ni Eheɔ: Otsii enyɔ.

He ni Afeɔ Yɛ: Nitsumɔhe nine lɛ tsɔɔ; bei pii lɛ, afeɔ yɛ Maŋtsɛyeli Asa ko nɔ.

Taomɔ Nii: Mɔ ni esɔmɔ akɛ daa gbɛgbalɔ afi kome loo nɔ ni fe nakai. *

Bɔ ni Afeɔ Ayaa: Kpokpaa nɔkwɛlɔ lɛ fɔ̃ɔ gbɛgbalɔi ní shɛɔ taomɔ nii lɛ ahe lɛ nine koni amɛya skul lɛ.

Lily wie akɛ: “Skul lɛ eye ebua mi ni minyɛ mitsu naagbai ni mikɛkpe yɛ shiɛmɔ nitsumɔ lɛ kɛ mishihilɛ mli lɛ ahe nii.” Ekɛɛ hu akɛ: “Eha mile nikasemɔ, nitsɔɔmɔ, kɛ bɔ ni akɛ Biblia lɛ tsuɔ nii jogbaŋŋ. Esaa mi jogbaŋŋ koni manyɛ maye mabua mɛi krokomɛi, mafĩ asafoŋ onukpai lɛ asɛɛ, koni maye mabua ni asafo lɛ ashwere.”

Brenda ni etee skul lɛ shii enyɔ lɛ wie akɛ: “Eye ebua mi ni mikɛ mihe wo mumɔŋ nibii amli kwraa, etsɔse mihenilee, ni eha misusu bɔ ni mafee maye mabua mɛi krokomɛi lɛ he. Eha mina faŋŋ akɛ Yehowa mli hi!”

[Shishigbɛ niŋmaa]

Skul Kɛha Asafoŋ Onukpai

Yiŋtoo: Koni akɛye abua asafoŋ onukpai ni amɛnyɛ amɛtsu nitsumɔi ni akɛwo amɛdɛŋ yɛ asafo lɛ mli lɛ ahe nii jogbaŋŋ, ní amɛhe awa yɛ mumɔŋ.

Be ni Eheɔ: Gbii enumɔ.

He ni Afeɔ Yɛ: Nitsumɔhe nine lɛ tsɔɔ; bei pii lɛ, afeɔ yɛ Maŋtsɛyeli Asa loo Kpee Asa ko nɔ.

Taomɔ Nii: Esa akɛ mɔ lɛ afee asafoŋ onukpa.

Bɔ ni Afeɔ Ayaa: Nitsumɔhe nine lɛ fɔ̃ɔ asafoŋ onukpai lɛ nine.

Nɔ ni mɛi ni tee klas ni ji 92 nɔ̃ lɛ eko yɛ United States lɛ ateŋ mɛi komɛi wie nɛ:

“Skul lɛ eye ebua mi waa, ni eha mina bɔ ni mafee makwɛ Yehowa tooi lɛ anɔ jogbaŋŋ.”

“Mitswa mifai shi akɛ mamamɔ otii ni yɔɔ ŋmalɛi lɛ amli lɛ anɔ mi kɛwo mɛi fɛɛ hewalɛ.”

“Maha tsɔsemɔ nɛɛ akudɔ mi miwala gbii abɔ fɛɛ.”

Skul Kɛha Nɔkwɛlɔi Gbɛfalɔi kɛ Amɛŋamɛi

Yiŋtoo: Koni akɛye abua kpokpaa nɔkwɛlɔi kɛ kpokpaa wulu nɔkwɛlɔi ní amɛnyɛ amɛsɔmɔ asafoi lɛ jogbaŋŋ beni ‘amɛbɔɔ wiemɔ kɛ tsɔɔmɔ he mɔdɛŋ’ lɛ.—1 Tim. 5:17; 1 Pet. 5:2, 3.

Be ni Eheɔ: Nyɔji enyɔ.

He ni Afeɔ Yɛ: Nitsumɔhe nine lɛ tsɔɔ.

Taomɔ Nii: Esa akɛ nyɛmi nuu lɛ afee kpokpaa nɔkwɛlɔ loo kpokpaa wulu nɔkwɛlɔ.

Bɔ ni Afeɔ Ayaa: Nitsumɔhe nine lɛ fɔ̃ɔ nɔkwɛlɔi gbɛfalɔi kɛ amɛŋamɛi nine.

“Eha wɔná hiɛsɔɔ babaoo wɔha bɔ ni Yesu kwɛɔ asafo lɛ nɔ lɛ. Wɔna bɔ ni ehe hiaa ni wɔwo nyɛmimɛi ni wɔsɔmɔɔ lɛ hewalɛ, ní wɔha ekomefeemɔ ni yɔɔ asafo fɛɛ asafo mli lɛ mli awa. Nibii ni wɔkase lɛ ha wɔna akɛ, eyɛ mli akɛ nɔkwɛlɔ gbɛfalɔ lɛ kɛ ŋaawoo haa, ni ejajeɔ mɛi bei komɛi moŋ, shi oti titri ni ma ehiɛ ji ni eye ebua nyɛmimɛi lɛ ni amɛna akɛ Yehowa sumɔɔ amɛ waa.”—Joel, klas ni ji 1 nɔ̃ lɛ, afi 1999.

 Biblia Skul Kɛha Nyɛmimɛi Hii Oshijafoi

Yiŋtoo: Koni akɛtsɔse asafoŋ onukpai kɛ asafoŋ sɔɔlɔi ni ji oshijafoi lɛ kɛha sɔ̃i krokomɛi ahe nitsumɔ yɛ Yehowa asafo lɛ mli. Ahaa mɛi ni egbe skul lɛ naa lɛ ateŋ mɛi babaoo yasɔmɔɔ yɛ amɛmaŋ he ni hiamɔ lɛ da yɛ. Abaanyɛ aha amɛteŋ mɛi komɛi hu ayasɔmɔ yɛ maŋ kroko nɔ kɛji amɛha ale akɛ amɛmiisumɔ ni amɛfee nakai. Abaanyɛ aha mɛi ni egbe skul lɛ naa lɛ ekomɛi ayasɔmɔ akɛ be kukuoo gbɛgbalɔi krɛdɛi koni amɛto asafoi, ni amɛlɛɛ sɔɔmɔ nitsumɔ lɛ mli yɛ hei ni etse amɛhe banee lɛ.

Be ni Eheɔ: Nyɔji enyɔ.

He ni Afeɔ Yɛ: Nitsumɔhe nine lɛ tsɔɔ; bei pii lɛ, afeɔ yɛ Maŋtsɛyeli Asa ko loo Kpee Asa ko nɔ.

Taomɔ Nii: Esa akɛ mɔ lɛ afee oshijafo ni eye kɛjɛ afii 23 kɛyashi afii 62 ni yɔɔ gbɔmɔtsoŋ hewalɛ ni miisumɔ ni eyasɔmɔ yɛ he fɛɛ he ni hiamɔ lɛ da yɛ. (Mar. 10:29, 30) Esa akɛ mɔ lɛ afee mɔ ni miisɔmɔ akɛ daa gbɛgbalɔ kɛ́ hooo lɛ afii enyɔ, ní kɛ afii enyɔ loo nɔ ni fe nakai esɔmɔ kɛtsara nɔ akɛ asafoŋ onukpa loo asafoŋ sɔɔlɔ.

Bɔ ni Afeɔ Ayaa: Afeɔ kpee ahaa mɛi ni miisumɔ ni amɛya eko lɛ yɛ kpokpaa nɔ kpee shishi.

Rick ni tee klas ni ji 23 nɔ̃ lɛ eko yɛ United States lɛ kɛɛ akɛ: “Mihe ni mikɛwo nikasemɔ lɛ mli vii lɛ ha Yehowa mumɔ lɛ ye ebua mi ni mifee tsakemɔi wuji.” Ekɛfata he akɛ, “Kɛ́ Yehowa tere bo jatsu lɛ, ehaa bo ehe tako. Mina akɛ kɛ́ mifee Nyɔŋmɔ suɔmɔnaa nii fe mi diɛŋtsɛ minɔ lɛ, Nyɔŋmɔ wajeɔ mi.”

Andreas ni miisɔmɔ yɛ Germany lɛ kɛɛ akɛ: “Mina akɛ bɔ ni Nyɔŋmɔ gbɛjianɔtoo lɛ tsuɔ nii ŋmɛnɛ lɛ yɛ naakpɛɛ waa.” Ekɛɛ hu akɛ, “Tsɔsemɔ ni akɛha wɔ lɛ saa mi kɛha nitsumɔ ni kã mihiɛ lɛ. Agbɛnɛ hu, Biblia mli nɔkwɛmɔnii babaoo ha mile anɔkwale nɛɛ: Kɛ́ misɔmɔ nyɛmimɛi lɛ kɛ Yehowa lɛ, maná anɔkwa miishɛɛ.”

Biblia Skul Kɛha Kristofoi Gbalashihilɛ Mli Hefatalɔi

Yiŋtoo: Koni akɛye abua gbalashihilɛ mli hefatalɔi ni amɛná tsɔsemɔ krɛdɛɛ ni baaha Yehowa kɛ esafo lɛ anyɛ ekɛ amɛ atsu nii babaoo. Abaaha mɛi ni egbe skul lɛ naa lɛ ateŋ mɛi babaoo ayasɔmɔ yɛ amɛmaŋ he ni hiamɔ lɛ da yɛ. Abaanyɛ aha amɛteŋ mɛi komɛi ayasɔmɔ yɛ maŋ kroko nɔ kɛji amɛha ale akɛ amɛmiisumɔ ni amɛfee nakai. Abaanyɛ aha mɛi ni egbe skul lɛ naa lɛ ekomɛi ayasɔmɔ akɛ be kukuoo gbɛgbalɔi krɛdɛi koni amɛto asafoi, ni amɛlɛɛ sɔɔmɔ nitsumɔ lɛ mli yɛ hei ni etse amɛhe banee lɛ.

Be ni Eheɔ: Nyɔji enyɔ.

He ni Afeɔ Yɛ: Abɔi skul nɛɛ feemɔ yɛ United States pɛ, shi kɛjɛ September 2012 lɛ, aafee skul nɛɛ eko hu yɛ nitsumɔhe niji komɛi ni yɔɔ je lɛŋ fɛɛ lɛ, ni afeɔ yɛ Maŋtsɛyeli Asa loo Kpee Asa ko nɔ.

Taomɔ Nii: Gbalashihilɛ mli hefatalɔi ni eye kɛjɛ afii 25 kɛyashi afii 50 ni yɔɔ gbɔmɔtsoŋ hewalɛ, ní shihilɛ baaŋmɛ amɛ gbɛ ni amɛyasɔmɔ yɛ he ni hiamɔ lɛ da yɛ, ni agbɛnɛ hu amɛyɛ su ni baaha amɛnyɛ amɛkɛɛ akɛ: “Naa mi, tsũ mi!” (Yes. 6:8) Esa akɛ amɛfee mɛi ni ebote gbalashihilɛ mli kɛ́ hooo lɛ afii enyɔ, ní miisɔmɔ akɛ be fɛɛ sɔɔlɔi kɛ́ hooo lɛ afii enyɔ ní amɛfoko mli. Esa akɛ wu lɛ afee asafoŋ onukpa loo sɔɔlɔ ni esɔmɔ kɛ́ hooo kwraa lɛ afii enyɔ kɛtsara nɔ.

Bɔ ni Afeɔ Ayaa: Afeɔ kpee ahaa mɛi ni miisumɔ ni amɛya eko lɛ yɛ kpokpaa wulu nɔ kpeei ashishi. Kɛ́ afeee kpee nɛɛ eko yɛ kpokpaa wulu nɔ kpeei ni afeɔ yɛ nyɛmaŋ lɛ mli lɛ ashishi, shi oosumɔ ni oya eko lɛ, obaanyɛ oŋma nyɛnitsumɔhe nine lɛ kɛbi gbɛtsɔɔmɔ.

“Otsii kpaanyɔ ni wɔkɛtee skul lɛ tsake wɔshihilɛ kwraa, ni eji hegbɛ kpele kɛha gbalashihilɛ mli hefatalɔi ni miisumɔ ni amɛlɛɛ amɛsɔɔmɔ lɛ mli lɛ! Wɔtswa wɔfai shi akɛ wɔbaahi shi bɔ ni baaha wɔkɛ wɔbe atsu nii yɛ nilee mli.”—Eric kɛ Corina (shishigbɛ), klas ni ji 1 nɔ̃ lɛ, afi 2011.

Buu-Mɔɔ Gilead Biblia Skul

Yiŋtoo: Akɛtsɔseɔ skulbii lɛ koni amɛyasɔmɔ akɛ maŋsɛɛ sɔɔlɔi yɛ hei ni mɛi fa yɛ, ni amɛyasɔmɔ hu akɛ nɔkwɛlɔi gbɛfalɔi, loo Betelbii. Yiŋtoo titri hewɔ ni afeɔ ji, ní akɛto shiɛmɔ nitsumɔ lɛ kɛ nitsumɔhe niji ahe gbɛjianɔ jogbaŋŋ.

Be ni Eheɔ: Nyɔji enumɔ.

He ni Afeɔ Yɛ: Watchtower Educational Center, yɛ Patterson, New York, U.S.A.

Taomɔ Nii: Gbalashihilɛ mli hefatalɔi ni miisɔmɔ yɛ be fɛɛ sɔɔmɔ krɛdɛɛ lɛ fã ko mli—ákɛ maŋsɛɛ sɔɔlɔi ni eyako skul lɛ eko, gbɛgbalɔi krɛdɛi, nɔkwɛlɔi gbɛfalɔi, loo Betelbii. Esa akɛ amɛfee mɛi ni ehi be fɛɛ sɔɔmɔ krɛdɛɛ lɛ mli kɛ́ hooo kwraa lɛ afii etɛ ni amɛfoko mli. Esa akɛ amɛfee mɛi ni wieɔ Blɔfo, amɛkaneɔ, ni amɛŋmaa lɛ jogbaŋŋ.

Bɔ ni Afeɔ Ayaa: Nitsumɔhe Nine Ajinafoi Akuu lɛ fɔ̃ɔ gbalashihilɛ mli hefatalɔi ni miisumɔ ni amɛya skul nɛɛ eko lɛ nine.

Lade kɛ Monique ni jɛ United States lɛ miisɔmɔ yɛ Afrika amrɔ nɛɛ. Lade kɛɛ akɛ: “Gilead Skul lɛ saa wɔ koni wɔnyɛ wɔyasɔmɔ yɛ je lɛŋ he fɛɛ he, ní be fɛɛ be wɔfee klalo akɛ wɔkɛ wɔsuɔmɔ nyɛmimɛi lɛ baafee ekome kɛtsu nii.”

Monique kɛfata he akɛ: “Kɛ́ mikɛ nɔ ni mikase kɛjɛ Nyɔŋmɔ Wiemɔ lɛ mli lɛ tsu nii lɛ, mináa miishɛɛ waa yɛ misɔɔmɔ lɛ mli. Miishɛɛ nɛɛ haa minaa akɛ Yehowa sumɔɔ mi.”

Skul Kɛha Nitsumɔhe Nine Ajinafoi Akuu Mli Bii kɛ Amɛŋamɛi

Yiŋtoo: Koni akɛye abua Nitsumɔhe Nine Ajinafoi Akuu mli bii ni amɛnyɛ amɛkwɛ Betel shĩai lɛ anɔ, amɛtsu saji ni kɔɔ asafoi srɔtoi asɔɔmɔ nitsumɔ lɛ he lɛ he nii, ní amɛkwɛ kpokpai bibii kɛ kpokpai wuji anɔ. Agbɛnɛ hu, amɛkaseɔ wiemɔi ashishitsɔɔmɔ, woji akalamɔ, kɛ woji kɛmajemɔ ahe nii.

Be ni Eheɔ: Nyɔji enyɔ.

He ni Afeɔ Yɛ: Watchtower Educational Center, yɛ Patterson, New York, U.S.A.

Taomɔ Nii: Esa akɛ nyɛmi nuu lɛ afee Nitsumɔhe Nine Ajinafoi Akuu loo Maŋ Ajinafoi Akuu mli nyo, loo mɔ ko ni miisɔmɔ yɛ gbɛhe ni tamɔ nɛkɛ mli.

Bɔ ni Afeɔ Ayaa: Gbɛtsɔɔmɔ Kuu lɛ fɔ̃ɔ nyɛmimɛi hii kɛ amɛŋamɛi nine.

Lowell kɛ Cara, tee klas ni ji 25 nɔ̃ lɛ eko, ni amɛmiisɔmɔ yɛ Nigeria. Lowell kɛɛ akɛ: “Skul lɛ kai mi akɛ, ekɔɔɔ he eko bɔ ni mibɛ dekã ha, loo nitsumɔ ni akɛwo midɛŋ lɛ, ja wɔfee nii yɛ Yehowa gbɛ nɔ dani wɔbaanyɛ wɔsa ehiɛ.” Ekɛfata he akɛ, “Skul lɛ ha wɔkase bɔ ni ehe hiaa ni wɔkase Yehowa yɛ bɔ ni wɔkɛ mɛi krokomɛi yeɔ haa lɛ mli.”

Cara kɛfata he akɛ: “Wiemɔ ko ni mɔ ko wie ni eka mijwɛŋmɔŋ waa ji akɛ, ‘Kɛ́ minyɛɛɛ magbala sane ko mli lɛ, belɛ esa akɛ makase lɛ jogbaŋŋ dani matsɔɔ mɛi krokomɛi.’”