Ajie Kɛjɛ Wɔnitoohe Lɛ

Wɔkɛ Nɔkwɛlɔi Gbɛfalɔi lɛ Miifã Gbɛ

“MINYƐŊ mashiɛ yɛ shinaa kɛ shinaa naa kɔkɔɔkɔ!” Biblia mli nikaselɔi hei babaoo nuɔ he nɛkɛ nɔŋŋ akɛ amɛnyɛŋ amɛshiɛ amɛtsɔɔ mɛi ni amɛleee! Shi mɔ ni wie sane ni tsɔ hiɛ lɛ ji Biblia mli tsɔɔlɔ ko ni he esa kɛ maŋshiɛmɔ hamɔ, ní eji nɔkwɛlɔ gbɛfalɔ.

Mɛi babaoo ni kane Zion’s Watch Tower lɛ ni shi amɛsɔlemɔi lɛ amli lɛ shwe waa akɛ amɛkɛ mɛi ni Biblia mli anɔkwale lɛ he kumai yeɔ amɛ lɛ abɔ. Wolo tɛtrɛɛ nɛɛ wo mɛi ni kaneɔ lɛ hewalɛ ní amɛtao mɛi krokomɛi ni hiɛ hemɔkɛyeli ni tamɔ nakai nɔŋŋ koni amɛkɛ amɛ afee ekome kɛkase Biblia lɛ daa. Kɛjɛ aaafee afi 1894 lɛ, Watch Tower Society lɛ je shishi etsu mɛi komɛi koni amɛfã gbɛ amɛyasara kui ni miibi ni abasara amɛ lɛ. Nɔ ni adamɔ nɔ ahala hii ni yɔɔ niiashikpamɔ ni tsuɔ nii waa nɛɛ ji akɛ, amɛbaa amɛhe shi, amɛle Biblia lɛ mli jogbaŋŋ, amɛhaa wiemɔ ni amɛtsɔɔ nii jogbaŋŋ, ni amɛyɛ hemɔkɛyeli yɛ kpɔ̃mɔnɔ lɛ mli. Saramɔ lɛ diɛŋtsɛ heɔ gbi kome loo enyɔ pɛ. Klɛŋklɛŋ gbi ni Biblia Kaselɔi babaoo je shiɛmɔ shishi ji gbi ni amɛyaja ninefɔ̃ɔ woji kɛha nɔkwɛlɔ gbɛfalɔ ko maŋshiɛmɔ lɛ. Gbɛkɛ ko, beni Hugo Riemer ni sɛɛ mli lɛ ebafata Gbɛtsɔɔmɔ Kuu lɛ he lɛ yaha maŋshiɛmɔ yɛ skul ko lɛ, abibii lɛ Biblia mli saji aahu kɛyashi maŋkɛ nyɔŋma kɛ enyɔ sɛɛ. Bɔ ni etɔ lɛ sɔŋŋ shi ená miishɛɛ lɛ ha ewie akɛ, kpee lɛ “ŋɔɔ waa.”

Watch Tower lɛ wie akɛ, oti titri ni yɔɔ nɔkwɛlɔi gbɛfalɔi lɛ asaramɔ lɛ sɛɛ ji ni amɛtsɔ kpeei ni afeɔ yɛ nyɛmimɛi ashĩai lɛ anɔ amɛtswa “hemɔkɛyeli lɛ webii lɛ” amɛma shi. Biblia Kaselɔi ni jɛ hei ni bɛŋkɛ lɛ baboɔ maŋshiɛmɔi kɛ kpee lɛ fã ni abibiɔ saji ni ahaa hetoo lɛ atoi. No sɛɛ lɛ, afeɔ Kristofoi ni eba lɛ gbɔ. Beni Maude Abbott ji gbekɛ yoo fioo lɛ, etee eyabo leebi maŋshiɛmɔ ko ni aha lɛ toi, ni no sɛɛ lɛ mɛi ni ba lɛ fɛɛ yabua amɛhe naa yɛ okpɔlɔ kakadaŋŋ ko he yɛ he ni afee kpee lɛ yɛ lɛ. Ekɛɛ akɛ: “Aha wɔ niyenii srɔtoi babaoo—wuɔ loo ni ashĩ, bodobodo srɔtoi, pai kɛ keeki! Mɔ fɛɛ mɔ ye bɔ ni ebaanyɛ, ni beni atswa shwane ŋmɛji enyɔ lɛ, wɔsaa wɔbua wɔhe naa kɛbo maŋshiɛmɔ kroko toi.” Ekɛfata he akɛ: “Shi no mli lɛ, wɔ ebɔi mɔ fɛɛ mɔ yeli.” Be ko lɛ, Benjamin Barton ni kɛ be babaoo sɔmɔ akɛ nɔkwɛlɔ gbɛfalɔ lɛ kɛɛ akɛ: ‘Eji miye nibii kpakpai fɛɛ ni aha mi lɛ kulɛ mikɛ misɔɔmɔ akɛ nɔkwɛlɔ gbɛfalɔ lɛ eba naagbee jeeŋmɔ.’ Wolo ko ni aŋma kɛjɛ nitsumɔhe lɛ yitso lɛ yɛ Brooklyn lɛ wo nyɛmimɛi yei ni hoɔ nii lɛ ŋaa akɛ, ebaahi akɛ mɛi fɛɛ ni hoɔ nii amɛhaa nɔkwɛlɔi gbɛfalɔi lɛ ‘akahoo niyenii lɛ pɔtsĩi,’ ni ákɛ, “amɛkagba amɛnaa kɛ́ amɛmiiwɔ.”

Nɔkwɛlɔi gbɛfalɔi lɛ le nitsɔɔmɔ jogbaŋŋ, ni amɛle bɔ ni afeɔ akɛ mfonirii kɛ nibii srɔtoi tsuɔ nii kɛgbálaa saji amli koni anu shishi jogbaŋŋ. Maŋshiɛmɔi ni R. H. Barber haa lɛ “yɛ miishɛɛ waa.” W. J. Thorn feɔ enii tamɔ tsɛ, ni ewieɔ tamɔ “blematsɛmɛi lɛ ateŋ mɔ ko.” Gbi ko beni Shield Toutjian ta tsɔne ni ji Model A Ford mli lɛ, ebo waa akɛ: “Wa!” Eyi shi yɛ tsɔne lɛ mli ni eyatse fɔfɔi ko, ni ekɛtsɔɔ mɛi ni ekɛta tsɔne lɛ mli lɛ Yehowa adebɔɔ he nii amrɔ nɔŋŋ.

Bɔ ni nɔkwɛlɔi gbɛfalɔi lɛ anitsumɔ lɛ wa lɛ ha mɛi babaoo, titri lɛ mɛi ni eye kɛjɛ afii 40 kɛyaa lɛ kɛ naagbai babaoo kpe. Shi yɛ mɛi komɛi agbɛfaŋ lɛ, naagba titri ni amɛkɛkpe ji amɛnitsumɔ lɛ ni atsake. Abi ni amɛnyiɛ shĩa kɛ shĩa shiɛmɔ nitsumɔ lɛ hiɛ  agbɛnɛ. March 15, 1924 Watch Tower lɛ kɛɛ akɛ, anɔkwa Kristofoi lɛ “anitsumɔ titrii lɛ ateŋ ekome ji, ni amɛye maŋtsɛyeli lɛ he odase. Enɛ hewɔ atsuɔ nɔkwɛlɔi gbɛfalɔi lɛ.”

Nɔkwɛlɔi gbɛfalɔi lɛ ateŋ mɛi komɛi ekpɛlɛɛɛ tsakemɔ nɛɛ nɔ, ni amɛkpa gbɛfãa nitsumɔ lɛ, ni amɛteŋ mɛi komɛi ni mli fu lɛ po yatse amɛ diɛŋtsɛ amɛjamɔ. Robie D. Adkins wie akɛ, nɔkwɛlɔ gbɛfalɔ ko ni le wiemɔhamɔ waa lɛ wie nyanyaanya akɛ: “Nɔ ni mile nɔŋŋ ji ni mashiɛ kɛjɛ wiemɔ kpoku lɛ nɔ. Minyɛŋ mashiɛ yɛ shinaa kɛ shinaa naa kɔkɔɔkɔ!” Nyɛminuu Adkins wie hu akɛ: “No sɛɛ lɛ, mina lɛ yɛ kpee ko ni afee yɛ afi 1924 yɛ Columbus, Ohio lɛ shishi. No mli lɛ, ekome too edamɔ tso ko shishi, ní enii efee mɔbɔ beni nyɛmimɛi akpei abɔ ni yɔɔ kpee lɛ shishi lɛ ená miishɛɛ. Kɛjɛ no sɛɛ lɛ, minaaa lɛ dɔŋŋ. Etsɛɛɛ ni eshi asafo lɛ.” Yɛ nakai kpee lɛ shishi nɔŋŋ lɛ, Nyɛminuu Adkins na “nyɛmimɛi babaoo miiho ni amɛhiɛ woji kɛmiiya amɛtsɔji ahe,” ni ekã shi faŋŋ akɛ amɛfee klalo akɛ amɛbaaye odase yɛ shĩa fɛɛ shĩa.—Bɔf. 20:20, 21.

Eyɛ mli akɛ shĩa kɛ shĩa shiɛmɔ nitsumɔ lɛ wa kɛha nɔkwɛlɔi gbɛfalɔi pii tamɔ bɔ ni ewa kɛha nyɛmimɛi ni amɛyatsɔse lɛ nɔŋŋ moŋ, shi amɛkɛ amɛtsui fɛɛ tsu. Nɔkwɛlɔ gbɛfalɔ ko ni atsɛɔ lɛ Maxwell G. Friend (Freschel) ni wieɔ German lɛ ŋma yɛ shĩa kɛ shĩa shiɛmɔ nitsumɔ lɛ he akɛ, “Nɔkwɛlɔi gbɛfalɔi lɛ anitsumɔ lɛ fã nɛɛ kɛ jɔɔmɔi pii ba.” Nɔkwɛlɔ gbɛfalɔ ko hu ni atsɛɔ lɛ John A. Bohnet lɛ tsɔɔ akɛ nyɛmimɛi lɛ pii nya tsakemɔ ni afee yɛ Maŋtsɛyeli shiɛmɔ nitsumɔ lɛ mli lɛ he. Ewie akɛ, amɛteŋ mɛi pii “miishwe akɛ amɛkɛ amɛhe baawo mli kɛ ekãa.”

Yɛ afii ni eho lɛ amli lɛ, nɔkwɛlɔi gbɛfalɔi anɔkwafoi ená nyɛmimɛi pii anɔ hewalɛ kpakpa. Norman Larson, ni ji Odasefonyo ko ni kɛ afii babaoo esɔmɔ lɛ wie akɛ: “Beni mi ji gbekɛ po lɛ, mina akɛ nɔkwɛlɔi gbɛfalɔi lɛ ahe yɛ sɛɛnamɔ waa.” Ekɛfata he akɛ: “Amɛye amɛbua mi waa.” Kɛbashi ŋmɛnɛ lɛ, nɔkwɛlɔi gbɛfalɔi ni tamɔ nɛkɛ ni kɛ amɛhe shãa afɔle, ni amɛyeɔ anɔkwa lɛ miiye amɛmiibua amɛnyɛmimɛi heyelilɔi lɛ koni amɛkɛɛ akɛ, “Wɔbaanyɛ wɔshiɛ yɛ shinaa kɛ shinaa naa!”

[Wiemɔ ni akɔ ni akɛmiitsu nii ni yɔɔ baafa 32]

Gbi fɛɛ gbi ni nɔkwɛlɔ gbɛfalɔ baaba lɛ wɔnáa miishɛɛ waa!

[Mfoniri ni yɔɔ baafa 31]

Wolo ni tsɔɔ hei 170 sɔŋŋ ni Benjamin Barton yasara yɛ afi 1905

[Mfoniri ni yɔɔ baafa 32]

Walter J. Thorn sɔmɔ akɛ nɔkwɛlɔ gbɛfalɔ, ni afɔɔ lɛ tsɛmɔ akɛ Pappy akɛni efeɔ enii tamɔ tsɛ, ni ejieɔ Kristo sui lɛ akpo lɛ hewɔ

[Mfoniri ni yɔɔ baafa 32]

J. A. Browne yasɔmɔ yɛ Jamaica akɛ nɔkwɛlɔ gbɛfalɔ yɛ aaafee afi 1902 mli, ni eyawo kui bibii 14 hewalɛ

[Mfoniri ni yɔɔ baafa 32]

Nɔkwɛlɔi gbɛfalɔi lɛ anitsumɔ lɛ tswa nyɛmimɛi lɛ ahemɔkɛyeli lɛ ema shi, ewaje ekomefeemɔ ni yɔɔ amɛteŋ lɛ, ni eha amɛkɛ asafo lɛ bɔ gbagbalii