“Kpajelɔ Ji Mi Amrɔ Nɛɛ Moŋ, Shi Jeee Kɛmiiya Naanɔ!”

Mɔ ni gba ji Sara van der Monde

Bei pii lɛ, mɛi kɛɔ mi akɛ, “Sara daa nɛɛ ohiɛ yɛ ŋmɔlɔŋmɔlɔ. Mɛni hewɔ daa nɛɛ omii shɛɔ ohe nakai lɛ?” Mikɛɔ amɛ akɛ miyɛ hiɛnɔkamɔ ko ni nɔ bɛ. Abaanyɛ amua hiɛnɔkamɔ nɛɛ naa yɛ wiemɔi nɛɛ amli akɛ, “Kpajelɔ ji mi amrɔ nɛɛ moŋ, shi jeee kɛmiiya naanɔ!”

AFƆ mi afi 1974 yɛ Paris yɛ France. Beni minyɛ fɔɔ mi lɛ ekɛ naagbai komɛi kpe, ni sɛɛ mli ana akɛ miiye aŋsɔ mli hela ko (cerebral palsy) ni kumɔɔ mɔ. Minyɛɛɛ minaji mafamɔ jogbaŋŋ, ni miwiemɔ hu mli tseee. Agbɛnɛ hu, gbiligbili mɔɔ mi, ni ewaaa akɛ helai krokomɛi aaamɔ mi.

Beni miye afii enyɔ lɛ, miweku lɛ fa kɛyahi Melbourne yɛ Australia. Afii enyɔ sɛɛ lɛ, Ataa shi mi kɛ Awo ni ekwɛɛɛ wɔtsiabo. Mikaiɔ akɛ nakai beaŋ ji be klɛŋklɛŋ kwraa ni mikɛ mihe bɔi Nyɔŋmɔ nɔ fɔ̃ɔ. Awo ni ji Yehowa Odasefoi lɛ ateŋ mɔ kome lɛ, kɛ mi fɔɔ Kristofoi akpeeiyaa, ni jɛmɛ mikase akɛ Nyɔŋmɔ sumɔɔ mi ni esusuɔ mihe. Nakai nilee lɛ, kɛ suɔmɔ ni Awo jieɔ lɛ kpo etsɔɔ mi kɛ mimii hu ni eshɛjeɔ lɛ, ye ebua mi ni minu he akɛ miyɛ shweshweeshwe ekɔɔɔ he eko bɔ ni wɔshihilɛi etsake.

Awo tsɔɔ mi bɔ ni atsiɔ abɛŋkɛɔ Yehowa yɛ sɔlemɔ mli hu. Anɔkwa sane ji akɛ, mináa sɔlemɔ mlɛo fe wiemɔ diɛŋtsɛ. Kɛ́ miisɔle lɛ, etɔɔɔ mi kɛ wiemɔ, moŋ lɛ wiemɔi ni miitao mawie lɛ feɔ faŋŋ yɛ mijwɛŋmɔŋ. Kɛfata he lɛ, akɛni miwiemɔ mli tseee hewɔ lɛ, le ni mile akɛ Yehowa nuɔ miwiemɔi fɛɛ shishi, kɛji miwie lɛ yɛ miyitsoŋ jio, mikɛ wiemɔi ni mli tseee tsu nii jio lɛ, shɛjeɔ mimii.—Lala 65:3.

Bɔ ni Mifeɔ Midamɔɔ Minaagbai lɛ Anaa

Beni miyeɔ afii enumɔ lɛ, mi-aŋsɔ mli hela lɛ mli ewo wu bɔ ni ehe bahia ni awo mi dade ko ni tsii kɛjɛ mihɛ kɛyashi minane shishi koni manyɛ manyiɛ. Enɛ haaa manyiɛ jogbaŋŋ. Beni miyeɔ afii 11 lɛ nyiɛmɔ po ebɔ mi. Sɛɛ mli lɛ, akɛni mi diɛŋtsɛ minyɛɛɛ maya misaa mli loo mate shi kɛjɛ mli hewɔ lɛ, mikɛ minine kudɔɔ ilɛtrik tsɔne ko ni ewoɔ mi kɛjɛɔ misaa mli kɛtaa ilɛtrik shwiili lɛ mli, ni no nɔŋŋ woɔ mi kɛyaa misaa nɔ.

Anɔkwa sane ji akɛ, bei komɛi lɛ mikpajee lɛ haa miwerɛ hoɔ mihe. Shi mikaiɔ wiemɔ ko ni wɔweku lɛ fɔɔ kɛnitsumɔ, no ji: “Kaagba ohe naa yɛ nibii ni onyɛŋ he nɔ ko ofee lɛ ahe. Okɛ ojwɛŋmɔ ama nibii ni obaanyɛ ofee amɛhe nɔ ko lɛ anɔ.” Enɛ eye ebua mi ni minyɛɔ mifeɔ nibii tamɔ okpɔŋɔtamɔ, lɛlɛ  kudɔmɔ kɛ ewirimɔ, ni minyɛɔ mihiɔ shi yɛ buu mli yɛ he ko banee, ni mikudɔɔ lɔle po kɛnyiɛɔ shwɛmɔhei gbɛjegbɛi anɔ! Akɛni ŋaa yɛ mihiŋmɛiiaŋ hewɔ lɛ, mitɛŋɔ nii, mikpɛɔ nii, miloɔ samai yɛ mamai anɔ, ni mishɔ̃ɔ nii hu.

Akɛni mikpajee lɛ mli wa waa hewɔ lɛ, mɛi komɛi susuɔ akɛ mi diɛŋtsɛ minyɛŋ makpɛ miyiŋ akɛ masɔmɔ Nyɔŋmɔ. Beni miye afii 18 lɛ, skul tsɔɔlɔ ko wo mi ŋaa akɛ mishi shĩa bɔni afee ni maye mihe kɛjɛ mimami jamɔ lɛ mli. Ekɛɛ po akɛ ebaaye ebua mi kɛtao wɔɔhe. Shi mikɛɛ lɛ akɛ mishiŋ mijamɔ lɛ kɔkɔɔkɔ, ni be pɛ ni mashi shĩa ji be ni minuɔ he akɛ mi diɛŋtsɛ manyɛ makwɛ mihe.

Enɛ sɛɛ etsɛɛɛ lɛ, abaptisi mi ni mibatsɔ Yehowa Odasefoi lɛ ateŋ mɔ kome. Afii enyɔ sɛɛ lɛ, mifã kɛshi shĩa ni miyahi tsu bibioo ko mli. Mináa miishɛɛ yɛ jɛmɛ ejaakɛ mináa yelikɛbuamɔ ni he hiaa mi lɛ, ni yɛ nakai beaŋ nɔŋŋ lɛ minyɛɔ mifeɔ nibii bɔ ni mitaoɔ lɛ.

Nibimɔ ko ni Mikpaaa Gbɛ

Mikɛ hemɔkɛyeli he kai krokomɛi ekpe yɛ afii ni eho lɛ amli. Gbi ko lɛ, miskulnyo ko ni lɛ hu eje kpa lɛ kɛɛ mi akɛ ebaasumɔ ni ekɛ mi abote gbalashihilɛ mli, ni minaa kpɛ mihe waa. Shishijee mli lɛ, enibimɔ lɛ ha miyitsoŋ fuu. Taakɛ eji yɛ oblayei babaoo agbɛfaŋ lɛ, mishweɔ ni mana mihefatalɔ. Kɛlɛ, kpa ni wɔyi enyɔ lɛ fɛɛ wɔje lɛ jeee nɔmimaa akɛ miishɛɛ baahi wɔgbalashihilɛ lɛ mli. Kɛfata he lɛ, oblanyo lɛ jeee Odasefonyo. Nibii ni miheɔ miyeɔ, nibii ni mifeɔ, kɛ otii ni mikɛmamɔ mihiɛ lɛ yɛ srɔto kwraa yɛ enɔ lɛ he. No hewɔ lɛ, te eeefee tɛŋŋ ni wɔbɔ bra ni ehi lɛ? Mitswa mifai shi hu akɛ mabo Nyɔŋmɔ gbɛtsɔɔmɔ ni yɔɔ faŋŋ akɛ wɔkɛ mɛi ni wɔkɛ amɛ hiɛ hemɔkɛyeli kome lɛ pɛ abote gbalashihilɛ mli lɛ toi. (1 Kor. 7:39) No hewɔ lɛ, mijɛ mlihilɛ mli mikɛɛ oblanyo lɛ akɛ minyɛŋ makpɛlɛ enibimɔ lɛ nɔ.

Amrɔ nɛɛ po lɛ, mile akɛ yiŋ kpakpa mikpɛ lɛ. Miyɛ nɔmimaa hu akɛ maná miishɛɛ yɛ jeŋ hee ni Nyɔŋmɔ ewo he shi lɛ mli. (Lala 145:16; 2 Pet. 3:13) Kɛyashi nakai be lɛ baashɛ lɛ, mitswa mifai shi akɛ maya nɔ maye Yehowa anɔkwa, ni maha mimii ashɛ shihilɛ ni miyɔɔ mli amrɔ nɛɛ he.

Miishwe be ni manyɛ matu kɛjɛ mishwiili lɛ mli ni majo foi ni nɔ ko etsiii minaa lɛ. Kɛkɛ lɛ, mabo akɛ, “Kulɛ kpajelɔ ji mi, shi amrɔ nɛɛ mihe ewa mi kɛmiiya naanɔ!”