Marko ‘Ehi Ha Sɔɔmɔ’

NAAGBAI komɛi tee nɔ yɛ Antiokia asafo lɛ mli, shi gbeekpãmɔ ni eyabaaa bɔfo Paulo kɛ bɔfo Barnaba teŋ lɛ yɛ srɔto kwraa. No mli lɛ, hii enyɔ nɛɛ miito gbɛjianɔ koni amɛyashiɛ yɛ maŋsɛɛ; shi beni amɛmiisusu mɔ ni amɛaaŋɔ amɛfata amɛhe kɛya lɛ he lɛ, “efee béi” yɛ amɛteŋ. (Bɔf. 15:39) Amɛmli gbála, ni amɛteŋ mɔ fɛɛ mɔ kɔ egbɛ. Maŋsɛɛ shiɛlɔ ni atsɛɔ lɛ Marko lɛ hewɔ béi nɛɛ ba amɛteŋ lɛ.

Namɔ ji Marko? Mɛni ha bɔfoi enyɔ lɛ taa saji anaa yɛ ehe lɛ? Mɛni hewɔ amɛyanáaa jwɛŋmɔ kome kwraa yɛ Marko he lɛ? Ani sɛɛ mli lɛ jwɛŋmɔ ní amɛhiɛ lɛ tsake? Ni mɛni obaanyɛ okase kɛjɛ Marko sane lɛ mli?

Yɛ Shia yɛ Yerusalem

Marko da yɛ Yerusalem, ni eji Yudanyo. Eeenyɛ efee akɛ ejɛ weku ko ni yɔɔ nii mli. Be klɛŋklɛŋ kwraa ni atsĩ eta tɛ̃ɛ yɛ Biblia lɛ mli lɛ, no mli lɛ aawie mra be mli Kristofoi asafo lɛ  yinɔsane he. Aaafee afi 44 Ŋ.B. beni Herode Agrippa I wo bɔfo Petro tsuŋ ní Yehowa bɔfo ko tsɔ naakpɛɛ gbɛ nɔ ejie lɛ lɛ, Petro tee “Yohane ni atsɛɔ lɛ Marko hu lɛ nyɛ Maria we lɛ, he ni mɛi pii anaa ebakpe shi yɛ ni amɛsɔleɔ lɛ.”—Bɔf. 12:1-12. *

Eeenyɛ efee akɛ, asafo ni yɔɔ Yerusalem lɛ kpeɔ yɛ Marko mami we lɛ. Wiemɔ ni awie akɛ “mɛi pii” kpe yɛ jɛmɛ lɛ tsɔɔ akɛ ewe lɛ da. Beni Petro shi “agbó lɛ,” Maria tsulɔ yoo ko ni atsɛɔ lɛ Rode lɛ ji mɔ ni yabo toi. Saji nɛɛ tsɔɔ akɛ Maria yɛ nii. Akɛni akɛɛɛ akɛ ewu we ji he ni akpe yɛ, shi moŋ akɛɛ akpe yɛ ewe hewɔ lɛ, eeenyɛ efee akɛ eji okulafo ni no mli lɛ Marko edako tsɔ.—Bɔf. 12:13.

Eka shi faŋŋ akɛ, Marko fata mɛi ni naa ebakpe shi kɛsɔleɔ lɛ ahe. Ekolɛ ele Yesu kaselɔi lɛ kɛ mɛi krokomɛi ni na nibii ni tee nɔ yɛ Yesu sɔɔmɔ nitsumɔ lɛ mli lɛ jogbaŋŋ. Eka shi faŋŋ akɛ Marko ji oblanyo ni kɛ klala eha ehe, ní nyiɛ Yesu sɛɛ beni amɔ Yesu lɛ, ní jo foi beni ayaamɔ lɛ hu lɛ.—Mar. 14:51, 52.

Sɔɔmɔ Hegbɛi ni Ená yɛ Asafo lɛ Mli

Ŋwanejee ko bɛ he akɛ Kristofoi ni edara yɛ mumɔŋ ní Marko kɛbɔ lɛ ná enɔ hewalɛ kpakpa. Eda yɛ mumɔŋ ni asafoŋ nɔkwɛlɔi lɛ ajwɛŋmɔ ba enɔ. Beni Paulo kɛ Barnaba kɛ nibii jɛ Antiokia kɛtee Yerusalem aaafee afi 46 Ŋ.B. koni “amɛkɛyafɛne” nyɛmimɛi ni yɔɔ jɛmɛ lɛ yɛ hɔmɔ ni eba lɛ hewɔ lɛ, amɛna Marko ni amɛná ehe miishɛɛ. Paulo kɛ Barnaba ŋɔ Marko amɛfata amɛhe beni amɛku amɛsɛɛ kɛtee Antiokia lɛ.—Bɔf. 11:27-30; 12:25.

Kɛ́ okane amaniɛbɔɔ nɛɛ hiɛaŋhiɛaŋ lɛ, ekolɛ obaasusu akɛ Paulo kɛ Barnaba kɛ Marko ji nanemɛi Kristofoi kɛkɛ—ni wekukpaa kroko ko bɛ amɛteŋ—ni ákɛ Marko nyɛmɔi ahewɔ amɛŋɔ lɛ amɛfata amɛhe lɛ. Shi yɛ woji ni Paulo ŋma lɛ ateŋ ekome mli lɛ, etsɔɔ akɛ Marko ji Barnaba wekunyo. (Kol. 4:10) Enɛ baanyɛ aye abua wɔ ni wɔnu nibii ni ba yɛ sɛɛ mli ni kɔɔ Marko he lɛ ashishi.

Aaafee afi sɛɛ lɛ, mumɔ krɔŋkrɔŋ lɛ kudɔ Paulo kɛ Barnaba koni amɛyashiɛ yɛ maŋsɛɛ. Amɛshi Antiokia kɛtee Kipro. Yohane Marko kɛ amɛ tee “akɛ amɛsɔɔlɔ.” (Bɔf. 13:2-5) Ekolɛ Marko sɔmɔ bɔfoi lɛ yɛ amɛgbɛfaa lɛ mli bɔni afee ni bɔfoi lɛ ahiɛ wiemɔ lɛ he sɔɔmɔ lɛ mli.

Paulo, Barnaba kɛ Marko kpa Kipro fɛɛ ni amɛshiɛ; kɛkɛ ni amɛyi gbɛ kɛtee Asia Bibioo. Shi Yohane Marko fee nɔ ko ni dɔ Paulo waa yɛ jɛmɛ. Amaniɛbɔɔ lɛ tsɔɔ akɛ beni amɛshɛ Perge lɛ, “Yohane kpale yɛ amɛsɛɛ, ni eku esɛɛ kɛtee Yerusalem ekoŋŋ.” (Bɔf. 13:13) Atsɔɔɔ nɔ̃ hewɔ ni efee nakai.

Yɛ afii komɛi asɛɛ lɛ, Paulo kɛ Barnaba, kɛ Marko yakpe yɛ Antiokia ekoŋŋ. No mli lɛ  bɔfoi enyɔ lɛ miisusu gbɛ ni amɛbaafa nɔ ni ji shii enyɔ nɔ koni amɛyatsa nii ni amɛtsu yɛ klɛŋklɛŋ gbɛfaa lɛ mli lɛ nɔ lɛ he. Barnaba miisumɔ ni amɛŋɔ ewekunyo lɛ amɛfata amɛhe, shi Paulo eŋɔɔɔ nɔ kwraa ejaakɛ Marko kpale yɛ amɛsɛɛ yɛ klɛŋklɛŋ gbɛfaa lɛ mli. Enɛ ji nɔ ni tee béi ni atsĩ tã yɛ shishijee lɛ shi lɛ. Barnaba ŋɔ Marko efata ehe ni amɛyashiɛ yɛ Kipro ni ji maŋ ni Barnaba jɛ nɔ lɛ, shi Paulo dɔ eyi kɛtee Siria. (Bɔf. 15:36-41) Eka shi faŋŋ akɛ Paulo kɛ Barnaba náaa jwɛŋmɔ kome yɛ nɔ ni Marko fee lɛ he.

Amɛsaa Amɛteŋ

Ŋwanejee ko bɛ he akɛ nɔ ni ba lɛ gba Marko naa. Shi etee nɔ esɔmɔ yɛ anɔkwayeli mli. Sane ni ba Paulo kɛ Barnaba teŋ nɛɛ sɛɛ aaafee afii 11 loo 12 lɛ, abɔ Marko he amaniɛ ekoŋŋ yɛ mra be mli Kristofoi ayinɔsane mli. Mɛni awie yɛ ehe? No mli lɛ awie akɛ efata Paulo he, nɔ ko ni ekolɛ okpaaa gbɛ.

Yɛ afi 60-61 Ŋ.B. beni awo Paulo tsuŋ yɛ Roma lɛ, eŋmala woji srɔtoi ni amrɔ nɛɛ amɛfata Ŋmalɛ Krɔŋkrɔŋ lɛ he lɛ. Eŋma yɛ nɔ ni eŋma kɛmaje Kolosebii lɛ mli akɛ: “Aristarko, minaanyo gboklɛfonyo lɛ, kɛ Marko ni ji Barnaba nyɛmi bi lɛ, mɔ hewɔ ni nyɛná woji lɛ (kɛji eba nyɛŋɔɔ lɛ, nyɛherea lɛ hiɛmɛɛ!), . . . miibi nyɛ. Mɛnɛɛmɛi pɛ ji minanemɛi nitsulɔi yɛ Nyɔŋmɔ maŋtsɛyeli lɛ hewɔ, ni etsɔmɔ tsuiwoo eha mi.”—Kol. 4:10, 11.

Mɛɛ tsakemɔ kpele nɛ! Marko ni be ko lɛ Paulo mli fu lɛ waa lɛ ebatsɔ Paulo naanyo nitsulɔ ni he yɔɔ sɛɛnamɔ waa ekoŋŋ. Eka shi faŋŋ akɛ Paulo wó Kolosebii lɛ atoi nɔ akɛ ekolɛ Marko baabasara amɛ. Kɛ́ Marko nyɛ eyasara amɛ lɛ, ebaasɔmɔ akɛ Paulo najiaŋdamɔlɔ.

Ani tsutsu lɛ Paulo fee keketee tsɔ yɛ Marko he? Ani no mli lɛ Marko sa tsɔsemɔ lɛ, ni ená he sɛɛ? Aloo ekolɛ Paulo fee keketee fioo shi Marko hu sa tsɔsemɔ lɛ? Bɔ fɛɛ bɔ ni ji lɛ, amɛteŋ ni amɛsaa lɛ tsɔɔ akɛ Paulo kɛ Marko edara yɛ mumɔŋ. Amɛŋɔ lɛ akɛ nɔ ni eho lɛ eho, ni amɛfee ekome kɛtsu nii ekoŋŋ. Mɛɛ nɔkwɛmɔnɔ kpakpa po enɛ ji nɛkɛ kɛha Kristofoi ni béi eba amɛteŋ!

Gbɛfalɔ Marko

Kɛ́ okane gbɛi srɔtoi ni Marko fã lɛ ahe sane lɛ, obaana akɛ efã gbɛ waa. Ejɛ Yerusalem, shi efã kɛtee Antiokia, ni efo lɛlɛ yɛ jɛmɛ kɛtee Kipro kɛ Perge. No sɛɛ lɛ etee Roma. Beni eyɔɔ Roma lɛ Paulo tao akɛ etsu lɛ kɛya Kolose. Ni efã gbɛi krokomɛi hu!

Bɔfo Petro ŋma eklɛŋklɛŋ wolo lɛ aaafee afi 62 kɛmiimɔ afi 64 Ŋ.B. Eŋma akɛ: ‘Asafo ní yɔɔ Babilon lɛ kɛ mibi Marko hu miibi nyɛ.’ (1 Pet. 5:13) Enɛ tsɔɔ akɛ, Marko fa gbɛ kɛtee Babilon ni eyafata bɔfo ni be ko ni eho lɛ eyaa Kristofoi akpee yɛ Marko mami shia lɛ he kɛsɔmɔ.

Beni awo Paulo tsuŋ nɔ ni ji shii enyɔ nɔ yɛ Roma aaafee afi 65 Ŋ.B. lɛ, eŋma Timoteo koni eshi Efeso kɛba eŋɔɔ, ni Paulo kɛfata he akɛ: “Ŋɔɔ Marko ni okɛ lɛ aba.” (2 Tim. 4:11) Ni tsɔɔ akɛ no mli lɛ, Marko yɛ Efeso. Ŋwanejee ko bɛ he akɛ Marko kpɛlɛ Paulo ninefɔɔ akɛ efata Timoteo he kɛba Roma  lɛ nɔ, aloo jeee nakai? No mli lɛ gbɛfaa bɛ mlɛo, shi Marko jɛ esuɔmɔ mli efa gbɛi srɔtoi nɛɛ.

Sɔɔmɔ Hegbɛ Krɛdɛɛ Kroko

Yehowa mumɔ lɛ tsirɛ Marko koni eŋma Sanekpakpai lɛ ateŋ ekome, ni enɛ ji sɔɔmɔ hegbɛ krɛdɛɛ ko ni ená. Eyɛ mli akɛ atsĩii mɔ ni ŋma Sanekpakpa ni ji enyɔ lɛ gbɛ́i ta yɛ wolo lɛ mli moŋ, shi mra be mli yinɔsaji tsɔɔ akɛ Marko ji mɔ ni ŋma, ni ákɛ ená esaji lɛ kɛjɛ Petro ŋɔɔ. Yɛ anɔkwale mli lɛ, Petro kɛ ehiŋmɛi na nɔ ni Marko ŋma lɛ ateŋ babaoo.

Mɛi ni epɛi Marko Sanekpakpa lɛ mli lɛ susuɔ akɛ eŋma kɛha Jeŋmajiaŋbii lɛ; egbála Yudafoi akusumii amli koni amɛnu shishi. (Mar. 7:3; 14:12; 15:42) Marko tsɔɔ Aramaik wiemɔi ni ekolɛ mɛi ni jeee Yudafoi lɛ nuŋ shishi lɛ ashishi. (Mar. 3:17; 5:41; 7:11, 34; 15:22, 34) Ekɛ Roma wiemɔi babaoo tsu nii, ni ekɛ Roma wiemɔi tsu nii kɛtsɔɔ Hela wiemɔi ni ale jogbaŋŋ lɛ po amli. Etsɔɔ Yudafoi ashika lɛ naa yɛ Roma shika mli. (Mar. 12:42) Etamɔ nɔ ni enɛɛmɛi fɛɛ maa nɔ ni mra be mli yinɔsane tsɔɔ akɛ Marko ŋma e-Sanekpakpa lɛ yɛ Roma lɛ nɔ mi.

“Ehi Ha Mi yɛ Sɔɔmɔ lɛ Hewɔ”

Jeee Sanekpakpa lɛ ni Marko ŋma lɛ pɛ ji nɔ ni efee yɛ Roma. Kaimɔ akɛ Paulo kɛɛ Timoteo akɛ: “Ŋɔɔ Marko ni okɛ lɛ aba.” Mɛni hewɔ Paulo kɛɛ nakai lɛ? “Ejaakɛ ehi ha mi yɛ sɔɔmɔ lɛ hewɔ.”—2 Tim. 4:11.

Ŋmalɛ mli woji ni aŋma yɛ enɛ sɛɛ lɛ etsĩii Marko gbɛ́i ta, shi ŋmalɛ nɛɛ haa wɔleɔ nɔ̃ gbɔmɔ ni eji. Awieee yɛ he ko he ko akɛ Marko sɔmɔ yɛ asafo lɛ mli akɛ bɔfo, hiɛnyiɛlɔ, loo gbalɔ. Awie ehe akɛ esɔmɔɔ, ni tsɔɔ akɛ eji tsulɔ ní sɔmɔ mɛi krokomɛi. Beni Paulo kɛɛ Marko aba eŋɔɔ lɛ, no mli lɛ eshwɛ fioo ni Paulo baagbo, ni eesumɔ ni Marko abaye abua lɛ.

Kɛ́ wɔbua saji srɔtoi ni awie yɛ Marko he lɛ fɛɛ anaa lɛ, wɔnaa akɛ eji nuu ni yɔɔ ekãa ni miisumɔ ni sanekpakpa lɛ ashwere yɛ je lɛŋ hei srɔtoi, ni ekɛ miishɛɛ sɔmɔ mɛi krokomɛi. Hɛɛ, Marko ná sɔɔmɔ hegbɛi ni haa mɔ tsui nyɔɔ emli ejaakɛ enijiaŋ ejeee wui!

Ákɛ Nyɔŋmɔ tsuji ni yɔɔ ŋmɛnɛ lɛ, wɔ hu wɔtswa wɔfai shi akɛ wɔkɛ ekãa baashiɛ Maŋtsɛyeli sanekpakpa lɛ tamɔ bɔ ni Marko fee lɛ. Taakɛ Marko fee lɛ, wɔteaŋ mɛi komɛi baanyɛ afã kɛya hei krokomɛi kɛ maŋsɛɛ po, koni wɔyashiɛ sanekpakpa lɛ yɛ jɛmɛ. Eyɛ mli akɛ jeee wɔteŋ mɔ fɛɛ mɔ baanyɛ afee nakai moŋ, shi kɛlɛ wɔ fɛɛ wɔbaanyɛ wɔkase Marko yɛ gbɛ kroko ni he hiaa nɔ. Taakɛ bɔ ni ebɔ mɔdɛŋ waa esɔmɔ enyɛmimɛi Kristofoi lɛ, esa akɛ wɔ hu wɔjɛ wɔsuɔmɔ mli wɔbɔ mɔdɛŋ waa wɔye wɔbua wɔnyɛmimɛi Kristofoi lɛ koni amɛnyɛ amɛsɔmɔ Nyɔŋmɔ. Kɛ́ wɔtee nɔ wɔfee nakai lɛ, ŋwanejee ko bɛ he akɛ Yehowa baaya nɔ ajɔɔ wɔ.—Abɛi 3:27; 10:22; Gal. 6:2.

[Shishigbɛ niŋmaa]

[Shikpɔŋ he mfoniri/​Mfoniri ni yɔɔ baafa 8, 9]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Maji Anɔ ni Marko Tee lɛ Ekomɛi

Roma

Efeso

Kolose

Perge

Antiokia (ni yɔɔ Siria)

Kipro

MEDITERRANEAN ŊSHƆ

Yerusalem

Babilon