Okɛ Odaa Gbi Shihilɛ Awo Nyɔŋmɔ Hiɛ Nyam

LALATSƐ David sɔle eha Yehowa akɛ: “Hã manu omlihilɛ lɛ he leebi. . . . Hã male gbɛ ní sa akɛ manyiɛ nɔ.” (Lala 143:8) Kɛ́ ote shi leebi ni ooda Yehowa shi akɛ eha je etsɛre bo ekoŋŋ lɛ, ani okpaa lɛ fai koni eye ebua bo ni okpɛ oyiŋ jogbaŋŋ ní ofee nɔ ni ja, taakɛ David fee lɛ? Ekã shi faŋŋ akɛ ofeɔ nakai.

Ákɛ Yehowa tsuji ni wɔjɔɔ wɔhe nɔ lɛ, ‘kɛ́ nii wɔyeɔ jio, nii wɔnuɔ jio, aloo nɔ kroko ni wɔfeɔ jio’ lɛ, wɔbɔɔ mɔdɛŋ akɛ ‘wɔfee fɛɛ wɔkɛwo Nyɔŋmɔ hiɛ nyam.’ (1 Kor. 10:31) Wɔle akɛ bɔ ni wɔbaa wɔjeŋ wɔhaa daa gbi lɛ baanyɛ awo Yehowa hiɛ nyam loo egbe ehe guɔ. Wɔle hu akɛ Nyɔŋmɔ Wiemɔ lɛ kɛɛ akɛ Satan folɔɔ Kristo nyɛmimɛi lɛ—kɛ Nyɔŋmɔ tsuji ni yɔɔ shikpɔŋ lɛ nɔ fɛɛ lɛ—anaa “nyɔɔŋ kɛ shwane.” (Kpoj. 12:10) No hewɔ lɛ, wɔtswa wɔfai shi akɛ wɔbaaha ana akɛ Satan naafolɔmɔi lɛ ejaaa, ní wɔha Yehowa tsui anyɔ emli kɛtsɔ sɔɔmɔ krɔŋŋ ni wɔkɛaaha wɔŋwɛi Tsɛ lɛ “nyɔɔŋ kɛ shwane” lɛ nɔ.—Kpoj. 7:15; Abɛi 27:11.

Nyɛhaa wɔsusua gbɛ̀i enyɔ ni he hiaa waa ni wɔbaanyɛ wɔtsɔ nɔ wɔkɛ wɔwala awo Nyɔŋmɔ hiɛ nyam daa gbi lɛ he kuku wɔkwɛa. Klɛŋklɛŋ nɔ̃ lɛ ji ni wɔyɔse nibii ni he hiaa titri lɛ, ni nɔ ni ji enyɔ ji ni wɔjie suɔmɔ kpo wɔtsɔɔ mɛi.

Bɔ ni Wɔɔfee Wɔhi Shi yɛ Wɔshiwoo lɛ Naa

Beni wɔjɔɔ wɔhe nɔ wɔha Yehowa lɛ, wɔtsɔɔ akɛ wɔbaajɛ wɔtsui mli wɔsɔmɔ lɛ. Wɔwo Yehowa shi hu akɛ wɔbaanyiɛ egbɛ̀i lɛ anɔ “daa”—hɛɛ, kɛya naanɔ. (Lala 61:6, 9) Belɛ, te wɔɔfee tɛŋŋ wɔye wɔshiwoo nɛɛ nɔ? Mɛɛ gbɛ nɔ wɔɔtsɔ wɔtsɔɔ daa gbi akɛ wɔsumɔɔ Yehowa kɛ wɔtsui muu fɛɛ?

Nyɔŋmɔ Wiemɔ lɛ feɔ nibii ni Yehowa kpaa gbɛ akɛ wɔtsu he nii lɛ faŋŋ. (5 Mose 10:12, 13) Enɛɛmɛi ateŋ babaoo yɛ akrabatsa ni ji  “Sɔ̃i ni Nyɔŋmɔ Kɛfɔ̃ Wɔnɔ” ni yɔɔ baafa 22 lɛ mli. Nyɔŋmɔ ji mɔ ni kɛ sɔ̃i nɛɛ fɛɛ fɔ̃ wɔnɔ, no hewɔ lɛ, amɛhe miihia waa. Kɛ́ ehe bahia ni wɔtsu sɔ̃i nɛɛ ateŋ enyɔ loo nɔ ni fa fe nakai ahe nii yɛ be kome too lɛ nɔŋŋ mli lɛ, te wɔɔfee tɛŋŋ wɔna amɛteŋ nɔ ni esa akɛ wɔkɛye klɛŋklɛŋ gbɛhe?

Wɔkɛ Nyɔŋmɔjamɔ nifeemɔi tamɔ Biblia kasemɔ, sɔlemɔ, Kristofoi akpeei, kɛ shiɛmɔ nitsumɔ lɛ yeɔ klɛŋklɛŋ gbɛhe. (Mat. 6:33; Yoh. 4:34; 1 Pet. 2:9) Ni kɛlɛ, wɔnyɛŋ wɔfee enɛɛmɛi sɔŋŋ gbi muu fɛɛ. Esa akɛ wɔtsu heloonaa nitsumɔ, wɔya skul, loo wɔtsu shĩa nitsumɔi srɔtoi hu. Fɛɛ sɛɛ lɛ, wɔbɔɔ mɔdɛŋ waa wɔtoɔ wɔbe he gbɛjianɔ jogbaŋŋ koni wɔkɛ be ni esa akɛ wɔkɛtsu Nyɔŋmɔjamɔ nifeemɔi tamɔ Kristofoi akpeeiyaa lɛ ahe nii lɛ akatsu wɔheloonaa nitsumɔ kɛ nifeemɔi krokomɛi ahe nii. Ákɛ nɔkwɛmɔnɔ lɛ, kɛ́ wɔmiito gbɛjianɔ koni wɔfã gbɛ lɛ, wɔkwɛɔ koni wɔkaya beni kpokpaa nɔkwɛlɔ lɛ eba, beni abaaya gbi kome kpee krɛdɛɛ, kpokpaa nɔ kpee, loo kpokpaa wulu nɔ kpee. Bei komɛi lɛ, wɔbaanyɛ wɔtsu sɔ̃i nɛɛ ekomɛi ahe nii yɛ be kome mli. Ákɛ nɔkwɛmɔnɔ lɛ, wɔbaanyɛ wɔfee ekome akɛ weku kɛyasaa Maŋtsɛyeli Asa lɛ nɔ, loo wɔkɛ be ni wɔkɛyeɔ shwane niyenii yɛ nitsumɔhe loo skul lɛ aye mɛi ni wɔkɛtsuɔ nii loo mɛi ni wɔkɛyaa skul lɛ odase. Yɛ anɔkwale mli lɛ, be fɛɛ be ni ehe baahia ni wɔkpɛ wɔyiŋ yɛ nɔ ko he yɛ wɔshihilɛ mli—tamɔ nitsumɔ taomɔ, he ni wɔbaaya skul yɛ, mɛi ni wɔkɛaabɔ naanyo lɛ—esa akɛ wɔha nɔ ni he hiaa wɔ fe fɛɛ yɛ wɔshihilɛ mli, ni ji jamɔ ni wɔkɛhaa Yehowa, wɔ-Tsɛ ni yɔɔ suɔmɔ lɛ, aná wɔyiŋkpɛɛ lɛ nɔ hewalɛ.—Jaj. 12:13.

 Jiemɔ Suɔmɔ Kpo Otsɔɔ Mɛi

Yehowa miisumɔ ni wɔsusu mɛi ahe ni wɔfee amɛ ejurɔ. Nɔ ni tamɔɔɔ nakai lɛ, Satan miisumɔ ni mɛi afó amɛ pɛ amɛnɔ̃ mli. Jeŋ ni Satan yeɔ nɔ nɛɛ mli eyi obɔ kɛ “hesuɔlɔi,” “mɛi ni sumɔɔ shwɛmɔ kɛ ŋɔɔmɔ,” kɛ ‘mɛi ni dũɔ nii yɛ heloo lɛ mli.’ (2 Tim. 3:1-5; Gal. 6:8) Mɛi babaoo susuuu hewalɛ ni amɛnifeemɔi náa yɛ mɛi krokomɛi anɔ lɛ he. “Heloo lɛ nitsumɔi lɛ” ehe shi yɛ he fɛɛ he.—Gal. 5:19-21.

Shi mɛi ni Yehowa mumɔ krɔŋkrɔŋ lɛ náa amɛnɔ hewalɛ ní no haa amɛjieɔ suɔmɔ, mlihilɛ, kɛ ejurɔfeemɔ kpo lɛ anifeemɔi yɛ srɔto kwraa! (Gal. 5:22) Nyɔŋmɔ Wiemɔ lɛ woɔ wɔ hewalɛ koni wɔfó mɛi anɔ̃ mli fe wɔ diɛŋtsɛ wɔnɔ̃ mli. No hewɔ lɛ, wɔtsɔɔ wɔnifeemɔi anɔ wɔhaa anaa akɛ wɔsusuɔ mɛi ahe, eyɛ mli akɛ wɔkwɛɔ jogbaŋŋ koni wɔkɛ wɔhe akawo mɛi asaji amli. (1 Kor. 10:24, 33; Fili. 2:3, 4; 1 Pet. 4:15) Wɔjieɔ suɔmɔ kpo wɔtsɔɔ wɔnyɛmimɛi Kristofoi lɛ titri. Ni kɛlɛ, wɔbɔɔ mɔdɛŋ akɛ wɔye wɔbua mɛi ni heee yeee lɛ hu. (Gal. 6:10) Ani obaanyɛ otao hegbɛ ŋmɛnɛ kɛjie mlihilɛ kpo otsɔɔ mɔ ko?—Kwɛmɔ akrabatsa ni ji  “Jiemɔ Suɔmɔ Kpo Otsɔɔ Amɛ” ni yɔɔ baafa 23 lɛ.

 Jeee be krɛdɛɛ loo shihilɛ krɛdɛɛ ko mli pɛ esa akɛ wɔjie suɔmɔ kpo wɔtsɔɔ mɛi. (Gal. 6:2; Efe. 5:2; 1 Tes. 4:9, 10) Yɛ no najiaŋ lɛ, daa gbi lɛ, wɔbɔɔ mɔdɛŋ koni wɔna shihilɛi ni mɛi yɔɔ mli ní wɔye wɔbua amɛ oya nɔŋŋ kɛ́ nakai feemɔ baagba wɔnaa yɛ gbɛ ko nɔ po. Wɔmiisumɔ ni wɔkɛ nɔ fɛɛ nɔ ni wɔyɔɔ—wɔbe, wɔheloonaa nibii, wɔniiashikpamɔ, kɛ wɔnilee—aye abua mɛi. Yehowa maa nɔ mi ehaa wɔ akɛ kɛ́ wɔfee mɛi ejurɔ lɛ, lɛ hu ebaafee wɔ ejurɔ.—Abɛi 11:25; Luka 6:38.

Wɔjáa Nyɔŋmɔ “Nyɔɔŋ kɛ Shwane”

Ani wɔbaanyɛ wɔjá Yehowa “nyɔɔŋ kɛ shwane” lɛɛlɛŋ? Hɛɛ, wɔbaanyɛ wɔfee enɛ kɛ́ wɔtsu wɔjamɔ lɛ fãi srɔtoi lɛ fɛɛ ahe nii jogbaŋŋ daa lɛ. (Bɔf. 20:31) Kɛ́ wɔkaneɔ Nyɔŋmɔ Wiemɔ lɛ ni wɔjwɛŋɔ nɔ daa gbi, wɔkɛ hiɛdɔɔ sɔleɔ, wɔbɔɔ mɔdɛŋ akɛ wɔya kpeei fɛɛ, ni wɔŋɔɔ hegbɛ fɛɛ hegbɛ ni wɔnáa kɛyeɔ odase lɛ, no tsɔɔ akɛ wɔmiijá Nyɔŋmɔ nyɔɔŋ kɛ shwane.—Lala 1:2; Luka 2:37; Bɔf. 4:20; 1 Tes. 3:10; 5:17.

Ákɛ aŋkroaŋkroi lɛ, ani wɔɔmiijá Yehowa yɛ gbɛ ni tamɔ nɛkɛ nɔ? Kɛ́ wɔfeɔ nakai lɛ, no lɛ shwelɛ ni wɔyɔɔ akɛ wɔɔsa Nyɔŋmɔ hiɛ ní wɔha ana akɛ Satan naafolɔmɔi lɛ ji amale lɛ baaná nibii fɛɛ ni wɔfeɔ yɛ wɔshihilɛ mli daa gbi lɛ anɔ hewalɛ. Wɔbɔɔ mɔdɛŋ akɛ wɔwo Yehowa hiɛ nyam yɛ nɔ fɛɛ nɔ ni wɔfeɔ kɛ shihilɛ fɛɛ shihilɛ ni wɔkɛkpeɔ lɛ mli. Wɔhaa eshishitoo mlai lɛ náa wɔwiemɔi kɛ wɔnifeemɔi anɔ hewalɛ, ni wɔhaa amɛkudɔɔ wɔ kɛ́ wɔmiikpɛ wɔyiŋ. Kɛ́ wɔkɛ wɔhiɛ fɔ enɔ kwraa ni wɔkɛ wɔnyɛmɔ fɛɛ tsu nii yɛ esɔɔmɔ nitsumɔ lɛ mli lɛ, no tsɔɔ akɛ wɔhiɛ sɔɔ suɔmɔ ni ejieɔ lɛ kpo etsɔɔ wɔ, kɛ yelikɛbuamɔ ni ekɛhaa wɔ lɛ hu. Ni kɛji yɛ emuu ni wɔyeee lɛ hewɔ lɛ wɔtɔ̃ enɔ lɛ, wɔkpɛlɛɔ ŋaawoo kɛ tsɔsemɔ ni ekɛhaa wɔ lɛ nɔ.—Lala 32:5; 119:97; Abɛi 3:25, 26; Kol. 3:17; Heb. 6:11, 12.

Nyɛhaa wɔyaa nɔ wɔwoa Nyɔŋmɔ hiɛ nyam daa gbi. Kɛ́ wɔfee nakai lɛ, wɔbaaná hejɔɔmɔ wɔha wɔsusumai lɛ, ni wɔŋwɛi Tsɛ lɛ kɛ suɔmɔ baakwɛ wɔ kɛya naanɔ.—Mat. 11:29; Kpoj. 7:16, 17.

[Akrabatsa/Mfonirii ni yɔɔ baafa 22]

 Sɔ̃i ni Nyɔŋmɔ Kɛfɔ̃ Wɔnɔ

• Sɔlemɔ shii abɔ.—Rom. 12:12.

• Kanemɔ Biblia lɛ, ni okase, ni okɛtsu nii yɛ bo diɛŋtsɛ oshihilɛ mli. —Lala 1:2; 1 Tim. 4:15.

• Okɛ asafo lɛ afee ekome kɛjá Yehowa.—Lala 35:18; Heb. 10:24, 25.

• Ha oweku lɛ mlibii lɛ anine ashɛ amɛheloonaa, amɛmumɔŋ kɛ amɛhenumɔŋ hiamɔ nibii anɔ.—1 Tim. 5:8.

• Shiɛmɔ Maŋtsɛyeli lɛ he sanekpakpa lɛ, ni ofee kaselɔi.—Mat. 24:14; 28:19, 20.

• Tsu oheloonaa, omumɔŋ, kɛ ohenumɔŋ hiamɔ nii, ní hiɛtserɛjiemɔ kpakpa fata he lɛ ahe nii.—Mar. 6:31; 2 Kor. 7:1; 1 Tim. 4:8, 16.

• Tsu sɔ̃i ni oyɔɔ yɛ asafo lɛ mli lɛ ahe nii.—Bɔf. 20:28; 1 Tim. 3:1.

• Hiɛmɔ oshĩa lɛ falefale, ni oye obua koni akwra Maŋtsɛyeli Asa lɛ jogbaŋŋ.—1 Kor. 10:32.

[Akrabatsa/Mfoniri ni yɔɔ baafa 23]

 Jiemɔ Suɔmɔ Kpo Otsɔɔ Amɛ

• Kristofonyo nuumo loo yoomo ko.—3 Mose 19:32.

• Mɔ ko ni he miiye loo ehao. —Abɛi 14:21.

• Asafoŋnyo ko ni nɔ ko he ehia lɛ waa ní obaanyɛ oye obua lɛ. —Rom. 12:13.

• Owekunyo tuuntu ko. —1 Tim. 5:4, 8.

• Kristofonyo okulafo ko. —1 Tim. 5:9.

• Osafoŋ onukpa ko ni bɔɔ mɔdɛŋ waa.—1 Tes. 5:12, 13; 1 Tim. 5:17.