Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Te ooofee tɛŋŋ onu Biblia lɛ shishi?

Sɔlemɔ oha Nyɔŋmɔ ni eye ebua bo. Jiemɔ oyitsoŋ ni okɛ jwɛŋmɔ ni ja akane Biblia lɛ, koni ona Nyɔŋmɔ shɛɛ saji ni haa mɔ náa miishɛɛ waa ni yɔɔ mli lɛ. Ha Kristofonyo ko ni yɔɔ niiashikpamɔ ni le Ŋmalɛi lɛ amli jogbaŋŋ lɛ aye abua bo.—10/1, baafa 4-7.

• Mɛni wɔbaanyɛ wɔkase kɛjɛ heremɔ ni Yesu here Petro beni ebɔi shiumɔ yɛ ŋshɔ lɛ mli lɛ mli? (Mat. 14:28-31)

Kɛ́ wɔna akɛ nyɛmi ko hemɔkɛyeli faaa lɛ, wɔbaanyɛ wɔkpã wɔnine mli wɔsɔo lɛ yɛ mfonirifeemɔŋ ní wɔwa lɛ ni ehemɔkɛyeli lɛ mli awa.—9/15, baafa 8.

• Mɛni Yehowa kɛshã afɔle koni ekɛkpɔ̃ wɔ?

Yehowa ŋmɛ gbɛ ni apiŋ e-Bi lɛ ni aye ehe fɛo. Yehowa ŋmɛ gbɛ ni agbe e-Bi lɛ tamɔ ojotswalɔ, taakɛ Abraham fee he mfoniri beni ekpɛlɛ akɛ ekɛ ebi nuu lɛ baashã afɔle lɛ.—9/15, baafa 28-29.

• Mɛni hewɔ esa akɛ wɔha Nyɔŋmɔ kɛ wɔ awie daa gbi lɛ?

Abaanyɛ akɛ Biblia lɛ kanemɔ ato ashwishwɛ mlikwɛmɔ he. (Yakobo 1:23-25) Shɛɛ sane ni aŋma yɛ Nyɔŋmɔ Wiemɔ lɛ mli lɛ yɛ hewalɛ aahu akɛ, ebaanyɛ eha wɔna nɔ̃ gbɔmɛi ni wɔji diɛŋtsɛ. Be fɛɛ be ni obaakane Biblia lɛ, obaana nibii hei ni kɔɔ ohe—nibii ni osusuko amɛhe pɛŋ. Mɛni hewɔ? ‘Je nɛŋ su lɛ miitsake,’ ni wɔshihilɛi kɛ nibii ni ebɔle wɔhe lɛ hu tsakeɔ daa. (1 Korintobii 7:31).—10/1, baafa 21-22.

• Mɛni wɔkaseɔ kɛjɛɔ Abɛi 24:27 lɛ mli ni kɔɔ ‘tsumaa’ ni ji wekushishitoo he?

Esa akɛ nuu ni miitao abote gbalashihilɛ mli lɛ asaa ehe eto sɔ̃i ni yɔɔ gbalashihilɛ mli lɛ. Enɛ biɔ ni esaa ehe jogbaŋŋ bɔ ni ebaanyɛ ená heloonaa nibii ni he baahia eweku lɛ ní enyɛ etsɔɔ amɛ Yehowa he nii.—10/15, baafa 12.

• Mɛɛ gbɛ nɔ wɔɔtsɔ wɔha ‘wɔshishifãi amɔmɔ shi’ ni ‘wɔfĩ shi yɛ hemɔkɛyeli lɛ mli’?

Nyɔŋmɔ Wiemɔ ni ajɛ mumɔŋ aŋma lɛ ni wɔkɛ hiɛdɔɔ aaakase lɛ ji gbɛ kome ni he hiaa waa ní wɔɔtsɔ nɔ wɔha wɔshishifãi amɔmɔ shi. Yehowa miisumɔ ni ‘wɔyoo nɔ ni ji anɔkwale lɛ lɛɛmɔ kɛ kɛlɛ kɛ mlikwɔlɛ kɛ nɔkwɔlɛ lɛ.’ (Efe. 3:18) Shi ehe miihia ni wɔná nɔ kroko wɔfata nilee lɛ he. Esa akɛ ‘wɔle Kristo suɔmɔ ni tá nilee fɛɛ nɔ lɛ.’ (Efe. 3:19) Kɛ́ suɔmɔ ni wɔyɔɔ kɛha Yehowa kɛ anɔkwale lɛ hewɔ wɔkaseɔ nii lɛ, wɔbaanu Nyɔŋmɔ Wiemɔ lɛ mli anɔkwalei lɛ ashishi jogbaŋŋ, ni no baaha wɔhemɔkɛyeli lɛ mli awa.—10/15, baafa 26-28.

• Mɛni hewɔ shika he gbɛjianɔtoo baanyɛ ekɛ naagba aba gbalashihilɛ mli lɛ, ni mɛni baanyɛ aye abua gbalashihilɛ mli hefatalɔi koni amɛtsu enɛ he nii?

Bei pii lɛ, gbeekpamɔi ni eyabaaa yɛ shika he lɛ jɛ hekɛnɔfɔɔ ni abɛ loo gbeyeishemɔ, ni esoro bɔ ni atsɔse nuu kɛ yoo lɛ fɛɛ aha. Nii ejwɛ ni haa ayeɔ omanye lɛ ji: Kasemɔ bɔ ni ooofee okɛ mlijɔlɛ awie shika he, nyɛbaa gbeekpamɔ yɛ bɔ ni nyɛbaabu nyɛshika nyɛha lɛ he, nyɛŋmalaa nyɛgbɛjianɔtoi lɛ nyɛwoa wolo nɔ, ni nyɛbaa gbeekpamɔ yɛ nɔ ni nyɛteŋ mɔ fɛɛ mɔ baafee lɛ he.—10/1, baafa 27-29.

• Mɛɛ gbɛ nɔ Yehowa kɛ e-Bi lɛ fee nɔkwɛmɔnɔ amɛha wɔ yɛ bɔ ni ajieɔ bulɛ kpo atsɔɔ mɛi lɛ mli?

Eyɛ mli akɛ lɛ ji jeŋ muu fɛɛ Maŋtsɛ moŋ, shi ejieɔ mlihilɛ kɛ bulɛ kpo etsɔɔ adesai. Beni Yehowa kɛ Abraham kɛ agbɛnɛ hu Mose wie lɛ, ekɛ Hebri wiemɔ ni bei pii lɛ atsɔɔ shishi akɛ “ofainɛ” lɛ tsu nii. (1 Mose 13:14; 2 Mose 4:6) Nyɔŋmɔ boɔ adesai atoi hu. (1 Mose 18:23-32) Yesu hu fee nakai, ni ená he miishɛɛ akɛ eye ebua mɛi ni baa eŋɔɔ lɛ, ni bei pii lɛ ekɛ amɛgbɛi po tsɛɔ amɛ.—11/15, baafa 25.