Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni hewɔ ehe hiaa waa akɛ wɔya nɔ wɔfee jalɛ nii akɛ Kristofoi lɛ?

Jalɛ nii ni wɔɔya nɔ wɔfee lɛ haa wɔbaa wɔhe shi wɔhaa Yehowa kɛjɛɔ wɔtsuiŋ tɔŋŋ, ni wɔkɛ nakai feemɔ tsɔɔ akɛ Satan ji amalelɔ. Nyɔŋmɔ damɔɔ jalɛ nii ni wɔfeɔ lɛ hu nɔ ekojoɔ wɔ, ni no hewɔ lɛ ebaawaje hiɛnɔkamɔ ni wɔyɔɔ kɛha wɔsɛɛ lɛ.—12/15, baafa 4-6.

• Mɛni ji sablai komɛi ni haa anaa gbɛhe ni Nyɔŋmɔ kɛha Yesu lɛ?

Bi koome lɛ. Wiemɔ lɛ. Amen lɛ. Kpaŋmɔ hee mlidamɔlɔ lɛ. Osɔfonukpa lɛ. Shiwoo Seshi lɛ.—12/15, baafa 15.

• Beni gbalɔ Elia sɔleɔ koni nugbɔ anɛ lɛ, mɛni hewɔ esa kadimɔ jogbaŋŋ akɛ eha etsulɔ lɛ kwɛ ŋshɔŋgbɛ lɛ? (1 Maŋ. 18:43-45)

Elia le nu shibɔlemɔ lɛ he nɔ ko. Atatui ni ebua amɛhe naa yɛ ŋshɔŋgbɛ lɛ nyiɛɔ kɛyaa shikpɔŋ lɛ nɔ, ni jɛmɛ amɛnɛɔ yɛ akɛ nugbɔ.—4/1, baafa 21.

• Te wɔɔfee tɛŋŋ wɔná miishɛɛ babaoo yɛ sɔɔmɔ nitsumɔ lɛ mli lɛ?

Wɔbaanyɛ wɔsaa wɔtsui, ni wɔkɛ wɔjwɛŋmɔ ama bɔ ni wɔɔfee wɔye wɔbua mɛi krokomɛi lɛ nɔ. Wɔshiɛ kɛ hiɛnɔkamɔ akɛ wɔbaaná mɛi ni wɔkɛ amɛ aje Biblia mli nikasemɔ shishi. Kɛ́ mɛi ni yɔɔ wɔshikpɔŋkuku lɛ mli lɛ bɛ wiemɔ lɛ he miishɛɛ lɛ, wɔbaanyɛ wɔwie nibii ni amɛbaaná he miishɛɛ lɛ ahe kɛje wɔsanegbaa lɛ shishi.—1/15, baafa 8-10.

• Mɛni hewɔ falefalefeemɔ he hiaa waa yɛ anɔkwa Kristofoi fɛɛ ashihilɛ mli lɛ?

Gbalɔ Yesaia bɔ amaniɛ akɛ, ena yɛ ninaa ko mli akɛ, ŋwɛi bɔfoi kɛ wiemɔi ni ji “krɔŋkrɔŋ, krɔŋkrɔŋ, krɔŋkrɔŋ” lɛ tsu nii kɛtsɔɔ bɔ ni Bɔlɔ lɛ ji ha lɛ mli. (Yesaia 6:3) Wiemɔi nɛɛ tsɔɔ akɛ Nyɔŋmɔ yɛ krɔŋŋ ni ehe tse kɛmɔ shi. No hewɔ lɛ, Nyɔŋmɔ biɔ ni etsuji fɛɛ afee krɔŋkrɔŋ ni amɛhe atse. Ekɛɔ amɛ yɛ 1 Petro 1:16 lɛ akɛ: “Nyɛfea krɔŋkrɔŋ, ejaakɛ krɔŋkrɔŋ ji mi.”—1/1, baafa 26.

• Te esa akɛ Kristofonyo kɛ tsɔɔmɔi ni yɔɔ Biblia lɛ mli lɛ atsu nii yɛ yarafeemɔ kusumii ahe eha tɛŋŋ?

Eyɛ mli akɛ Kristofonyo baanyɛ aye awerɛho yɛ esuɔlɔ gbele hewɔ moŋ, shi ele akɛ gbohii lɛ leee nɔ ko nɔ ko. Kɛ́ mɛi ni heee yeee lɛ wie amɛshi lɛ po lɛ, etsiɔ ehe kɛjɛɔ kusumii ní kɛ hemɔkɛyeli ni ahiɛ akɛ gbohii lɛ baanyɛ aná hiɛkalɔi anɔ hewalɛ lɛ yɔɔ tsakpaa lɛ ahe. Bɔni afee ni naagbai akaba lɛ, Kristofoi komɛi ŋmalaa bɔ ni amɛsumɔɔ ni afee amɛyara aha lɛ amɛshwieɔ shi dani amɛgboiɔ.—2/15, baafa 29-31.

• Mɛɛ gbɛ nɔ Yehowa nine shɛɔ hewalɛ nɔ kɛjɛɔ ejálɔi lɛ aŋɔɔ?

Akɛni abɔ wɔ yɛ Nyɔŋmɔ subaŋ nɔ hewɔ lɛ, wɔyɛ Nyɔŋmɔ sui lɛ eko yɛ gbɛ ko nɔ, ni hewalɛ ji sui nɛɛ ateŋ ekome. (1 Mose 1:27) Kɛ́ wɔhiɛ sɔɔ nɔ ni wɔ-Bɔlɔ lɛ efee eha wɔ lɛ lɛɛlɛŋ lɛ, no baatsirɛ wɔ koni wɔkɛ wɔhewalɛ kɛ wɔnyɛmɔ atsu nii kɛjie eyi ni wɔwo ehiɛ nyam. Yɛ nɔ najiaŋ ni wɔkɛ wɔnyɛmɔ aaatsu nii kɛdi nibii ni wɔnyaa he lɛ asɛɛ pɛ lɛ, wɔnuɔ he akɛ Yehowa Nyɔŋmɔ ji mɔ ni esa akɛ wɔŋɔ wɔhewalɛ fɛɛ wɔha beni wɔsɔmɔɔ lɛ lɛ. (Mar. 12:30)—1/1, baafa 27.

• Ani “Yashar wolo lɛ” kɛ “Yehowa tai awolo lɛ” ji Biblia mli woji ní elaaje? (Yosh. 10:13; 4 Mose 21:14)

Dabida. Etamɔ nɔ ni woji nɛɛ yɛ be mli ni aŋmaa Biblia lɛ, shi jeee mumɔŋ ajɛ aŋmala, ni mɛi ní ŋmala Biblia lɛ ateŋ mɛi komɛi tsɛ́ saji ayisɛɛ kɛjɛ woji nɛɛ amli.—3/15, baafa 32.

• Mɛɛ nibii tsɛ kpakpa naa akɛ ehe miihia ebii?

Nibii ni he hiaa amɛ lɛ ekomɛi ji (1) suɔmɔ kpo ni eeejie, (2) nɔkwɛmɔnɔ kpakpa ni eeefee, (3) shihilɛ ni miishɛɛ yɔɔ mli, (4) Nyɔŋmɔjamɔ sui ni eeetsɔɔ amɛ, (5) tsɔsemɔ, (6) hebuu.—1/1, baafa 11-13.