Gbalashihilɛ Kɛ Bii Afɔmɔ Yɛ Naagbee Gbii Nɛɛ Amli
Gbalashihilɛ Kɛ Bii Afɔmɔ Yɛ Naagbee Gbii Nɛɛ Amli
“Be lɛ faaa dɔŋŋ.”—1 KOR. 7:29.
1. (a) Mɛɛ tsakemɔi ni yaa nɔ amrɔ nɛɛ fata nibii ni ‘jaraa’ lɛ ahe? (b) Mɛni hewɔ esa akɛ wɔsusu bɔ ni weku shihilɛ tsakeɔ lɛ he lɛ?
NYƆŊMƆ Wiemɔ lɛ gba akɛ tai, shikpɔŋhosomɔi, hɔ̃ji, kɛ gbele helai baaba yɛ “naagbee be” lɛ mli. (Dan. 8:17, 19; Luka 21:10, 11) Biblia lɛ bɔ kɔkɔ hu akɛ adesai asubaŋ baatsake yɛ nɛkɛ naagbee be nɛɛ mli. Weku mli naagbai fata “naagbee gbii” lɛ amli nibii ni ‘jaraa’ lɛ ahe. (2 Tim. 3:1-4) Mɛni hewɔ esa akɛ wɔsusu tsakemɔi nɛɛ ahe lɛ? Nɔ hewɔ ji akɛ anaa yɛ he fɛɛ he, ni amɛbaanyɛ amɛná bɔ ni Kristofoi buɔ gbalashihilɛ kɛ bii afɔmɔ amɛhaa ŋmɛnɛ lɛ nɔ hewalɛ waa. Yɛ mɛɛ gbɛ nɔ?
2. Te mɛi ni yɔɔ je lɛ mli lɛ ateŋ mɛi pii buɔ gbalashihilɛ kɛ gbalamlitsemɔ amɛhaa tɛŋŋ?
2 Yɛ wɔbei nɛɛ amli lɛ, ewaaa akɛ aaatse gbãla yɛ maji pii anɔ, ni mɛi ni tseɔ gbãla yɛ maji nɛɛ anɔ lɛ ayi miifa daa. Shi esa akɛ wɔha ehi wɔjwɛŋmɔ mli akɛ bɔ ni Yehowa Nyɔŋmɔ buɔ gbalashihilɛ kɛ gbalamlitsemɔ ehaa lɛ yɛ srɔto kwraa yɛ mɛi ni yɔɔ je lɛ mli lɛ anɔ̃ he. Belɛ, mɛni ji Yehowa susumɔ yɛ gbalashihilɛ kɛ gbalamlitsemɔ he?
3. Te Yehowa kɛ Yesu Kristo buɔ gbalashihilɛ amɛhaa tɛŋŋ?
3 Yehowa Nyɔŋmɔ kpaa mɛi ni ebote gbalashihilɛ mli lɛ gbɛ akɛ amɛye amɛgbalashihilɛ mli kitakamɔ lɛ nɔ. Beni Yehowa to klɛŋklɛŋ gbalashihilɛ lɛ he gbɛjianɔ lɛ, ekɛɛ akɛ ‘nuu aaakpɛtɛ eŋa he, ni amɛaatsɔ̃ heloo kome.’ Sɛɛ mli lɛ Yesu Kristo tĩ nakai gbɛtsɔɔmɔ lɛ mli ni ekɛfata he akɛ: “No hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.” Agbɛnɛ hu Yesu kɛɛ akɛ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala; ni mɔ fɛɛ mɔ ni wɛɔ yoo ni ashwie lɛ lɛ, lɛ hu efite gbala.” (1 Mose 2:24; Mat. 19:3-6, 9) No hewɔ lɛ, Yehowa kɛ Yesu kpaa mɛi ni ebote gbalashihilɛ mli lɛ agbɛ akɛ amɛhi shi daa kɛyashi amɛteŋ mɔ kome baagbo. (1 Kor. 7:39) Akɛni Nyɔŋmɔ ji mɔ ni to gbalashihilɛ shishi hewɔ lɛ, esaaa akɛ abuɔ gbalamlitsemɔ akɛ nɔ ko ni yɔɔ flɛflɛ. Yɛ anɔkwale mli lɛ, Nyɔŋmɔ Wiemɔ lɛ kɛɔ akɛ Yehowa nyɛɔ gbalamlitsemɔ ni damɔɔɔ Ŋmalɛ nɔ lɛ. *—Kanemɔ Maleaki 2:13-16; 3:6.
Kaabu Gbalashihilɛ akɛ Nɔ ko Flɛflɛ
4. Mɛni hewɔ Kristofoi oblahii kɛ oblayei komɛi eshwa amɛhe akɛ amɛbote gbalashihilɛ mli mra lɛ?
4 Bɔlɛnamɔ he saji eyi jeŋ fɔŋ nɛɛ mli obɔ. Wɔnaa nibii ni teɔ bɔlɛnamɔ henumɔi ashi daa gbi. Esaaa akɛ wɔsusuɔ akɛ nibii nɛɛ nyɛŋ aná wɔ loo titri lɛ oblahii kɛ oblayei ni wɔsumɔɔ amɛ waa ní yɔɔ asafo lɛ mli lɛ anɔ hewalɛ. Akɛni nifeemɔi ni he tseee nɛɛ baanyɛ atee bɔlɛnamɔ henumɔi ashi be mli ni wɔdɔko nakai feemɔ po hewɔ lɛ, te esa akɛ Kristofoi oblahii kɛ oblayei afee amɛnii yɛ he amɛha tɛŋŋ? Amɛteŋ mɛi komɛi tsuɔ enɛ he nii kɛtsɔ gbalashihilɛ mli ni amɛboteɔ mra lɛ nɔ. Amɛsusuɔ akɛ no haŋ amɛbɔ ajwamaŋ. Shi etsɛɛɛ ni amɛteŋ mɛi komɛi shwaa amɛhe akɛ amɛkpɛ yiŋ ni tamɔ nakai. Mɛni hewɔ? Kɛ́ amɛhi shi be fioo lɛ, amɛyɔseɔ akɛ amɛkɛ amɛhe kpãaa gbee yɛ nibii ni amɛfeɔ yɛ shihilɛ mli daa gbi lɛ ahe. Ebɛ naakpɛɛ mɔ akɛ gbalashihilɛ mli hefatalɔi ni tamɔ nɛkɛ lɛ kɛ naagbai wuji kpeɔ.
5. Mɛni baaye abua wu kɛ ŋa ni amɛye amɛgbalashihilɛ he kitakamɔ lɛ nɔ? (Kwɛmɔ shishigbɛ niŋmaa.)
5 Kɛ́ okɛ Kristofonyo po bote gbalashihilɛ mli ni ona yɛ sɛɛ mli akɛ bɔ ni ona lɛ lɛ, jeee nakai eji lɛ, no lɛ ekɛ shihilɛ baanyɛ afee nɔ ni wa. (1 Kor. 7:28) Ni kɛlɛ, bɔ ni shihilɛ lɛ baanyɛ afee nɔ ni wa fɛɛ sɛɛ lɛ, anɔkwa Kristofoi le akɛ jeee gbalamlitsemɔ ni damɔɔɔ ŋmalɛ nɔ ji nɔ ni tsuɔ gbalashihilɛ ni miishɛɛ bɛ mli lɛ he nii. No hewɔ lɛ, kɛ́ mɛi ni miisumɔ ni amɛye amɛgbalashihilɛ kitakamɔ lɛ nɔ lɛ tee nɔ amɛmia amɛhiɛ koni akɛbaa amɛgbalashihilɛ lɛ yi lɛ, mɛi ni yɔɔ Kristofoi asafo lɛ mli lɛ jieɔ bulɛ kpo amɛtsɔɔ amɛ ni amɛjɛɔ amɛsuɔmɔ mli amɛyeɔ amɛbuaa amɛ. *
6. Te esa akɛ Kristofoi oblahii kɛ oblayei abu gbalashihilɛ mlibotemɔ amɛha tɛŋŋ?
6 Ani oji oblanyo loo oblayoo, ni okã he oji oshijafo? Kɛ́ nakai ni lɛ, te esa akɛ obu gbalashihilɛ mlibotemɔ oha tɛŋŋ? Kɛ́ oná tsui kɛyashi osale gbãla, ní oda yɛ mumɔŋ dani okɛ Kristofonyo ko bɔi nyiɛmɔ kɛha gbalashihilɛ mlibotemɔ lɛ, no lɛ obaanyɛ oye ohe kɛjɛ tsuiŋdɔlɛ babaoo he. Eji anɔkwale akɛ Ŋmalɛ lɛ etsɔɔɔ afii abɔ ni esa akɛ mɔ ko aye dani ebote gbalashihilɛ mli. * Akɛni henumɔ ni anáa kɛha bɔlɛnamɔ mli waa waa be mli ni mɔ ko miihe asale gbãla hewɔ lɛ, Biblia lɛ tsɔɔ akɛ ehi jogbaŋŋ akɛ ooomɛ kɛyashi ooosale gbãla. (1 Kor. 7:36) Mɛni hewɔ? Ejaakɛ bɔlɛnamɔ henumɔi ni mli wa haŋ onyɛ osusu nii ahe jogbaŋŋ, ni ebaanyɛ eha okpɛ yiŋ ni nilee bɛ mli ní baaha otsui akumɔ wɔsɛɛ. Kaimɔ akɛ kɛ́ okɛ Yehowa ŋaawoo ni nilee yɔɔ mli ní yɔɔ Biblia lɛ mli lɛ tsu nii lɛ, obaaná he sɛɛ, ni omii baashɛ ohe.—Kanemɔ Yesaia 48:17, 18.
Kaabu Bii Afɔmɔ akɛ Nɔ ko Flɛflɛ
7. Mɛɛ shihilɛ oblahii kɛ oblayei bibii komɛi ni ebote gbalashihilɛ mli lɛ kɛkpeɔ, ni mɛni hewɔ enɛ baanyɛ ekɛ naagbai aba gbalashihilɛ lɛ mli lɛ?
7 Mɛi ni boteɔ gbalashihilɛ mli mra lɛ ateŋ mɛi komɛi fɔ́ɔ be mli ni amɛdarako kwraa. Amɛfɔ́ɔ bi ní ebiɔ ni amɛkwɛ lɛ gbi muu fɛɛ lɛ be mli ni amɛ diɛŋtsɛ lɛ amɛnáko be amɛle amɛhe jogbaŋŋ. Efɔɔ kaa akɛ nyɛ lɛ jwɛŋmɔ fɛɛ hiɔ abifao lɛ nɔ, ni enɛ baanyɛ aha tsɛ ni edako tsɔ lɛ aye awuŋa. Kɛfata he lɛ, kɛ́ abifao lɛ kwɛmɔ shi amɛ kpe lɛ, no baanyɛ ekɛ béi aba amɛteŋ. Amɛyɔseɔ akɛ amɛnáaa hegbɛ kɛfee nibii komɛi dɔŋŋ. Agbɛnɛ amɛnyɛɛɛ amɛya hei ni tsutsu ko lɛ amɛnyɛɔ amɛyaa loo amɛfee nibii ni tsutsu ko lɛ amɛnyɛɔ amɛfeɔ lɛ. Te esa akɛ amɛbu tsakemɔ ni eba amɛshihilɛ mli agbɛnɛ lɛ amɛha tɛŋŋ?
8. Te esa akɛ ana bii akwɛmɔ aha tɛŋŋ, ni mɛni hewɔ?
8 Taakɛ bɔ ni esaaa akɛ abuɔ gbalashihilɛ akɛ nɔ ko flɛflɛ lɛ, nakai nɔŋŋ hu esaaa akɛ abuɔ bifɔmɔ akɛ nɔ ko flɛflɛ, shi moŋ akɛ eji sɔ̃ kɛ hegbɛ ni jɛ Nyɔŋmɔ dɛŋ. Esa akɛ gbalashihilɛ mli hefatalɔi ni ji Kristofoi lɛ amia amɛhiɛ waa ni amɛtsu tsakemɔi ni ekolɛ bi lɛ fɔmɔ kɛbaaba amɛshihilɛ mli lɛ he nii jogbaŋŋ. Akɛni nyɛmɔ ni adesai yɔɔ akɛ amɛfɔ́ bii lɛ jɛ Yehowa ŋɔɔ hewɔ lɛ, esa akɛ fɔlɔi lɛ abu abifao lɛ akɛ eji “Yehowa gboshinii.” (Lala 127:3) Esa akɛ nyɛ kɛ tsɛ ni ji Kristofoi lɛ abɔ mɔdɛŋ ni amɛtsu amɛsɔ̃i lɛ ahe nii akɛ ‘fɔlɔi ni yɔɔ Nuŋtsɔ lɛ mli.’—Efe. 6:1.
9. (a) Mɛni bi kwɛmɔ biɔ? (b) Mɛni wu baanyɛ afee kɛye abua eŋa ni ená ekɛ Nyɔŋmɔ teŋ wekukpãa kpakpa?
9 Bi kwɛmɔ biɔ ni akɛ he ashã afɔle afii pii. Enɛ heɔ be kɛ mɔdɛŋbɔɔ babaoo. Esa akɛ wu ni ji Kristofonyo lɛ ana akɛ gbekɛ lɛ kwɛmɔ haŋ eŋa lɛ jwɛŋmɔ ahi nibii ni awieɔ yɛ asafoŋ kpeei ashishi lɛ ekomɛi anɔ, ni ekolɛ eŋa lɛ naŋ be tsɔ ekɛfee aŋkro Biblia mli nikasemɔ ní ekɛjwɛŋ saji anɔ, ni enɛ baanyɛ aya nɔ afii babaoo. Enɛ baanyɛ aha wekukpaa ni kã eŋa lɛ kɛ Nyɔŋmɔ teŋ lɛ mli agbɔjɔ. Akɛni bii afɔmɔ jeee nɔ ko flɛflɛ hewɔ lɛ, esa akɛ wu lɛ afee bɔ fɛɛ bɔ ni eeenyɛ ni ekɛye ebua eŋa lɛ kɛkwɛ gbekɛ lɛ. Ebaanyɛ ekɛ eŋa lɛ agba nibii ni asusu he yɛ asafoŋ kpeei lɛ ashishi lɛ ekomɛi ahe sane yɛ shĩa, bɔni afee ni eŋa lɛ aná nibii ni ŋmɛɛ lɛ yɛ kpeei lɛ ashishi lɛ he sɛɛ. Ebaanyɛ eye ebua kɛkwɛ gbekɛ lɛ hu bɔni afee ni eŋa lɛ aná be ni fa ni ekɛ ehe awo Maŋtsɛyeli shiɛmɔ nitsumɔ lɛ mli.—Kanemɔ Filipibii 2:3, 4.
10, 11. (a) Mɛɛ gbɛ nɔ atsɔɔ atsɔseɔ gbekɛbii yɛ ‘Yehowa tsɔsemɔ kɛ ŋaawoo lɛ mli’? (b) Mɛni hewɔ Kristofoi pii ni ji fɔlɔi lɛ sa yijiemɔ lɛ?
10 Bi kwɛmɔ biɔ babaoo fe niyenii, atade, kɛ wɔɔhe ní aaaha gbekɛ lɛ aná, kɛ helatsamɔhe ni akɛlɛ aaaya kɛ́ ebɛ hewalɛ lɛ kɛkɛ. Yɛ nɛkɛ naagbee gbii ni jaraa nɛɛ amli lɛ, ehe miihia waa ni akɛ jeŋba he shishitoo mlai atsɔse gbekɛbii kɛjɛ amɛgbekɛbiiashi. Esa akɛ atsɔse amɛ “yɛ Nuŋtsɔ lɛ tsɔsemɔ kɛ ŋaawoo lɛ mli.” (Efe. 6:4) “Ŋaawoo” nɛɛ tsɔɔ akɛ esa akɛ adu Yehowa susumɔi awo gbekɛ lɛ jwɛŋmɔ mli kɛjɛ egbekɛbiiashi tɔɔ kɛ agbɛnɛ hu beni edaa kɛtsɔɔ oblanyo loo oblayoo ní ekɛ naagbai kpeɔ lɛ.—2 Tim. 3:14, 15.
11 Kɛɛmɔ ni Yesu kɛɛ esɛɛnyiɛlɔi lɛ akɛ ‘amɛyafee jeŋmaji fɛɛ ekaselɔi’ lɛ hu tsɔɔ akɛ esa akɛ fɔlɔi aye abua amɛbii lɛ ni amɛtsɔmɔ kaselɔi. (Mat. 28:19, 20) Enɛ baanyɛ afee nɔ ni wa kɛha fɔlɔi ejaakɛ oblahii kɛ oblayei bibii lɛ kɛ naagbai kpeɔ waa yɛ je lɛ mli. No hewɔ lɛ, esa akɛ mɛi ni yɔɔ asafo lɛ mli lɛ ajɛ amɛsuɔmɔ mli amɛjie fɔlɔi ni enyɛ etsɔse amɛbii lɛ ni amɛbatsɔmɔ Kristofoi ni amɛjɔɔ amɛhe nɔ lɛ ayi. Akɛni amɛtsu amɛgbɛnaa nii akɛ fɔlɔi lɛ he nii jogbaŋŋ ni amɛjie hemɔkɛyeli hu kpo hewɔ lɛ, ‘amɛye’ hewalɛ fɔŋ ni je lɛ náa yɛ mɔ nɔ lɛ “nɔ kunim.”—1 Yoh. 5:4.
Oshija Shihilɛ loo Bi ni Afɔ́ɔɔ yɛ Yiŋtoo Kpakpa ko Hewɔ
12. Mɛni hewɔ Kristofoi komɛi kpɛɔ amɛyiŋ akɛ amɛbaahi shi akɛ oshijafoi kɛyashi be ko lɛ?
12 Akɛni “be lɛ faaa dɔŋŋ” ni “je nɛŋ subaŋ lɛ hoɔ yaa” hewɔ lɛ, Nyɔŋmɔ Wiemɔ lɛ woɔ wɔ hewalɛ koni wɔsusu sɛɛnamɔi ni yɔɔ oshija shihilɛ he. (1 Kor. 7:29-31) Enɛ hewɔ lɛ, Kristofoi komɛi kpɛɔ amɛyiŋ akɛ amɛbaahi shi oshija amɛwala gbii abɔ fɛɛ loo amɛbaafee nakai kɛyashi be ko. Esa jogbaŋŋ akɛ amɛkɛ heyeli ni amɛná akɛ oshijafoi lɛ tiuuu ŋkomeŋfa shihilɛ sɛɛ. Amɛteŋ mɛi pii hiɔ shi oshija ni amɛkɛsɔmɔ Yehowa ‘ni nɔ ko nɔ ko wooo amɛ ahuntoo.’ (Kanemɔ 1 Korintobii 7:32-35.) Kristofoi oshijafoi komɛi miisɔmɔ akɛ gbɛgbalɔi, ni amɛteŋ mɛi komɛi hu miisɔmɔ yɛ Betel. Amɛteŋ mɛi babaoo yaa Sɔɔmɔ Tsɔsemɔ Skul lɛ, ni amɛhaa amɛhe baa sɛɛnamɔ kɛhaa Yehowa asafo lɛ. Yɛ anɔkwale mli lɛ, bei pii lɛ oshijafoi ni kɛ amɛbe fɛɛ sɔmɔɔ dani amɛboteɔ gbalashihilɛ mli yɛ sɛɛ mli lɛ nuɔ he akɛ nibii ni amɛkase beni amɛkɛ amɛbe fɛɛ sɔmɔɔ lɛ he baa sɛɛnamɔ kɛhaa amɛ lolo.
13. Mɛni hewɔ Kristofoi komɛi ni ebote gbalashihilɛ mli lɛ kpɛɔ amɛyiŋ akɛ amɛfɔŋ lɛ?
13 Yɛ je lɛŋ hei komɛi hu lɛ, gbalashihilɛ mli hefatalɔi babaoo ekpɛ amɛyiŋ akɛ amɛfɔŋ. Amɛteŋ mɛi komɛi feɔ nakai yɛ shika he naagbai ahewɔ, ni mɛi krokomɛi hu feɔ nakai bɔni afee ni amɛná be kɛtsu nitsumɔi ni baaha amɛná heloonaa nii babaoo. Kristofoi komɛi hu ni ebote gbalashihilɛ mli lɛ kpɛɔ amɛyiŋ akɛ amɛfɔŋ. Shi bei pii lɛ amɛfeɔ nakai bɔni afee ni amɛná be babaoo kɛsɔmɔ Yehowa. Enɛ etsɔɔɔ akɛ gbalashihilɛ mli hefatalɔi nɛɛ náaa miishɛɛ yɛ amɛshihilɛ mli. Yɛ anɔkwale mli lɛ amɛnáa miishɛɛ. Ni kɛlɛ, amɛmiisumɔ ni amɛkɛ bii afɔmɔ ashã afɔle yɛ Maŋtsɛyeli lɛ he nitsumɔi ahewɔ. (1 Kor. 7:3-5) Gbalashihilɛ mli hefatalɔi nɛɛ ateŋ mɛi komɛi sɔmɔɔ Yehowa kɛ amɛnyɛmimɛi lɛ yɛ Betel loo ákɛ kpokpaa nɔkwɛlɔi kɛ kpokpaa wulu nɔkwɛlɔi. Amɛteŋ mɛi krokomɛi hu miisɔmɔ akɛ gbɛgbalɔi loo maŋsɛɛ sanekpakpa shiɛlɔi. Yehowa hiɛ kpaŋ amɛnitsumɔ kɛ suɔmɔ deŋme ni amɛgboɔ yɛ egbɛi lɛ hewɔ lɛ nɔ.—Heb. 6:10.
“Heloo Gbɛfaŋ Amanehulu”
14, 15. Mɛɛ “heloo gbɛfaŋ amanehulu” Kristofoi ni ji fɔlɔi lɛ baanyɛ amɛkɛkpe?
14 Bɔfo Paulo kɛɛ Kristofoi ni ebote gbalashihilɛ mli lɛ akɛ amɛbaaná “heloo gbɛfaŋ amanehulu.” (1 Kor. 7:28) Enɛ baanyɛ afee hela ni baamɔ amɛ, amɛbii, loo amɛ diɛŋtsɛ amɛfɔlɔi ni egbɔlɔ lɛ. Ebaanyɛ ekɔ naagbai kɛ tsui kuumɔ ni yɔɔ bii akwɛmɔ mli lɛ hu he. Taakɛ atsĩ ta yɛ nikasemɔ nɛɛ shishijee lɛ, Biblia lɛ gba akɛ “naagbee gbii lɛ anɔ lɛ jaramɔ bei baaba.” Jaramɔ nɛɛ eko ji bii ni aaatsɔmɔ “fɔlɔi anɔ toigbolɔi.”—2 Tim. 3:1-3.
15 Bii atsɔsemɔ jeee nɔ ko flɛflɛ kɛha fɔlɔi ni ji Kristofoi. Nibii ni yaa nɔ yɛ “jaramɔ bei” nɛɛ amli lɛ baanyɛ asa wɔ he. No hewɔ lɛ, esa akɛ fɔlɔi ni ji Kristofoi lɛ aya nɔ awu ashi hewalɛ fɔŋ ni “je nɛŋ” baanyɛ aná yɛ amɛbii anɔ lɛ. (Efe. 2:2, 3) Shi jeee be fɛɛ be fɔlɔi yeɔ kunim! Kɛ́ fɔlɔi ni ji Kristofoi lɛ bɔ mɔdɛŋ akɛ amɛkɛ Nyɔŋmɔ anɔkwale lɛ atsɔse amɛbinuu loo amɛbiyoo, shi amɛbi lɛ kpa Yehowa sɔɔmɔ lɛ, ebafeɔ “amanehulu” diɛŋtsɛ kɛhaa fɔlɔi lɛ.—Abɛi 17:25.
“Amanehulu Babaoo Aaaba”
16. Mɛɛ “amanehulu” Yesu gba akɛ ebaaba?
16 Shi kɛlɛ, amanehulu kroko yɛ ni da fe “amanehulu” fɛɛ “amanehulu” ni anáa yɛ gbalashihilɛ mli loo bii akwɛmɔ mli. Yesu wie yɛ gbalɛ ni kɔɔ ebaa kɛ je nɛŋ naagbee lɛ he lɛ mli akɛ: “Amanehulu babaoo aaaba, ní anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mat. 24:3, 21) Sɛɛ mli lɛ Yesu ha ale akɛ abaabaa asafo babaoo ko yi yɛ “amanehulu babaoo” nɛɛ mli. Shi Satan gbɛjianɔtoo lɛ baatutua Yehowa Odasefoi ni sumɔɔ toiŋjɔlɛ lɛ nɔ ni ji naagbee nɔ̃. Ŋwanejee ko bɛ he akɛ ebaafee jaramɔ be kɛha wɔ fɛɛ—onukpai kɛ gbekɛbii bluublu.
17. (a) Mɛni hewɔ wɔbaanyɛ wɔkwɛ wɔsɛɛ be gbɛ kɛ nɔmimaa lɛ? (b) Mɛni esa akɛ ekudɔ wɔsusumɔ yɛ gbalashihilɛ kɛ bifɔmɔ he?
17 Ni kɛlɛ, esaaa akɛ wɔsheɔ nɔ ni baaba wɔsɛɛ lɛ gbeyei bɔ ni esaaa. Fɔlɔi ni yeɔ Yehowa anɔkwa lɛ baanyɛ aná nɔmimaa akɛ Yehowa baabu amɛ kɛ amɛbii bibii lɛ ahe. (Kanemɔ Yesaia 26:20, 21; Zef. 2:2, 3; 1 Kor. 7:14) Shi amrɔ nɛɛ, eba akɛ le ni wɔle akɛ wɔyɛ jaramɔ bei amli lɛ aaaná bɔ ni wɔsusuɔ gbalashihilɛ kɛ bifɔmɔ he wɔhaa yɛ naagbee be nɛɛ mli lɛ nɔ hewalɛ. (2 Pet. 3:10-13) Kɛ́ wɔfee nakai lɛ, no lɛ wɔkɛ wɔshihilɛ baajie Yehowa yi, ni ebaawo Yehowa kɛ Kristofoi asafo lɛ hiɛnyam—kɛ́ wɔji oshijafoi jio, wɔbote gbalashihilɛ mli ni wɔfɔ́ jio, loo wɔfɔko jio.
[Shishigbɛ niŋmai]
^ kk. 3 Kanemɔ saneyitso bibioo ni ji “He Has Hated a Divorcing” (Miinyɛ Ŋa Shwiemɔ) ni yɔɔ Live With Jehovah’s Day in Mind wolo lɛ baafa 125 lɛ mli lɛ.
^ kk. 5 Mɛi ni náa naagbai yɛ amɛgbalashihilɛ mli lɛ baanyɛ akane gbalashihilɛ he saji ni yɔɔ September 15, 2003 Buu-Mɔɔ kɛ January 8, 2001 Awake! lɛ mli lɛ, ni enɛ baawo amɛ hewalɛ.
^ kk. 6 Kanemɔ sane ni ji “Am I Ready for Marriage?” (Ani Mishɛ Gbalashihilɛ Mlibotemɔ?) ni yɔɔ Questions Young People Ask—Answers That Work wolo lɛ yitso 30 lɛ mli lɛ.
Emlitĩi
• Mɛni hewɔ esaaa akɛ Kristofoi oblahii kɛ oblayei yeɔ amɛhe oyai kɛboteɔ gbalashihilɛ mli lɛ?
• Mɛni ji bi kwɛmɔ?
• Mɛni hewɔ Kristofoi babaoo hiɔ shi akɛ oshijafoi lɛ, ni amɛteŋ mɛi komɛi hu ni ebote gbalashihilɛ mli lɛ fɔ́ɔɔ lɛ?
• Mɛɛ “amanehulu” ekolɛ fɔlɔi ni ji Kristofoi lɛ baana?
[Nikasemɔ lɛ he Sanebimɔi]
[Mfoniri ni yɔɔ baafa 17]
Mɛni hewɔ nilee yɔɔ mli akɛ Kristofoi oblahii kɛ oblayei aaamɛ ni amɛdara dani amɛbote gbalashihilɛ mli lɛ?
[Mfoniri ni yɔɔ baafa 18]
Wu lɛ baanyɛ afee nibii pii kɛye ebua koni eŋa lɛ anyɛ ekɛ ehe awo Nyɔŋmɔjamɔ nifeemɔi amli
[Mfoniri ni yɔɔ baafa 19]
Mɛni hewɔ Kristofoi komɛi ni ebote gbalashihilɛ mli lɛ kpɛɔ amɛyiŋ akɛ amɛfɔŋ lɛ?