Marko Wolo lɛ Mli Saji Otii
Yehowa Wiemɔ lɛ Hiɛ Kã
Marko Wolo lɛ Mli Saji Otii
MARKO Sanekpakpa lɛ ji Sanekpakpai ejwɛ lɛ ateŋ nɔ ni mli amaniɛbɔɔ lɛ faaa fe fɛɛ. Yohane Marko ŋma wolo nɛɛ yɛ Yesu Kristo gbele lɛ kɛ eshitee lɛ sɛɛ afii 30, ni ewie nibii pii ní yɔɔ miishɛɛ ní Yesu fee yɛ afii etɛ kɛ fã ní ekɛsɔmɔ lɛ mli lɛ he.
Eeenyɛ efee akɛ Marko ŋma wolo lɛ kɛha mɛi ni jeee Yudafoi, titri lɛ Romabii lɛ, ni ewie Yesu he akɛ eji Nyɔŋmɔ Bi ni feɔ naakpɛɛ nii ní kɛ ekãa tsu shiɛmɔ nitsumɔ lɛ. Marko gbala jwɛŋmɔ kɛtee nibii ni Yesu fee lɛ anɔ fe nii ni etsɔɔ mɛi lɛ. Kɛ́ wɔkase Marko Sanekpakpa lɛ jogbaŋŋ lɛ, ebaaha hemɔkɛyeli ni wɔyɔɔ yɛ Mesia lɛ mli lɛ mli awa, ni ebaatsirɛ wɔ ní wɔkɛ ekãa ashiɛ Nyɔŋmɔ shɛɛ sane lɛ.—Heb. 4:12.
ETSU NII WAA YƐ GALILEA
Marko fo Yohane Baptisilɔ lɛ nitsumɔ lɛ kɛ gbii 40 ni Yesu yaye yɛ ŋa lɛ nɔ lɛ ahe saji lɛ kuku ewo Marko 1:1-14 lɛ, ni eje amaniɛbɔɔ ni yɔɔ miishɛɛ ni kɔɔ Yesu sɔɔmɔ nitsumɔ yɛ Galilea lɛ he lɛ shishi. Wiemɔ ni ji “amrɔ” ni ekɛtsu nii shii abɔ lɛ ha amaniɛbɔɔ lɛ fee tamɔ nɔ ni awo lɛ foi.—Marko 1:10, 12.
Yesu shiɛ kɛkpa Galilea shii etɛ yɛ nɔ ni shɛɛɛ afii etɛ mli. Marko to nibii ni ebɔ he amaniɛ lɛ ateŋ babaoo naa yɛ bɔ ni eko ba dani ekroko ba lɛ naa. Ebɔɔɔ Yesu Gɔŋ nɔ Shiɛmɔ lɛ kɛ Yesu wiemɔi ni sɛɛ kɛlɛ lɛ ateŋ pii ahe amaniɛ.
Ŋmalɛ Naa Sanebimɔi ni Aha Hetoo:
1:15—‘Be eshɛ’ kɛha mɛni? Yesu miikɛɛ akɛ be eshɛ kɛha esɔɔmɔ nitsumɔ lɛ shishijee. Akɛni eyɛ amɛteŋ akɛ Mɔ ni baaye Nyɔŋmɔ Maŋtsɛyeli lɛ nɔ Maŋtsɛ hewɔ lɛ, Nyɔŋmɔ Maŋtsɛyeli lɛ enina amɛ. Mɛi ni yɔɔ tsui kpakpa lɛ baanyɛ abo eshiɛmɔ lɛ toi ní amɛfee nibii ni baaha Nyɔŋmɔ akpɛlɛ amɛnɔ.
1:44; 3:12; 7:36—Mɛni hewɔ Yesu sumɔɔɔ ni agbɛɔ enaakpɛɛ nitsumɔi lɛ he amaniɛbɔɔ ashwãa lɛ? Yesu sumɔɔɔ ni mɛi adamɔ ehe amaniɛbɔi ni awo he loo atsake hiɛ lɛ nɔ amɛmu sane naa akɛ lɛ ji Kristo lɛ, shi moŋ eesumɔ ni amɛ diɛŋtsɛ amɛna odaseyeli lɛ kɛ amɛhiŋmɛi ní amɛkpɛ amɛyiŋ yɛ nɔ ni amɛbaafee yɛ he. (Yes. 42:1-4; Mat. 8:4; 9:30; 12:15-21; 16:20; Luka 5:14) Shi efeee nakai yɛ nuu ní mumɔ fɔŋ yɔɔ emli ni yɔɔ Gadarabii ashikpɔŋ lɛ nɔ lɛ gbɛfaŋ. Yesu kɛɛ lɛ akɛ eya ewe kɛ lɛ diɛŋtsɛ ewekumɛi lɛ aŋɔɔ ni eyagba nɔ ni afee aha lɛ lɛ. No mli lɛ akpa Yesu fai ni eje nakai kpokpai lɛ anɔ eya, ni no hewɔ lɛ ekɛ mɛi ni yɔɔ jɛi lɛ sharaŋ pii loo ekɛ amɛ sharaŋ kwraa. Kɛ́ mɛi aaawie ashi Yesu yɛ kplotoi akuu lɛ hiɛ ní ekpata lɛ hewɔ lɛ, nuu nɛɛ ní amɛbaana kɛ odase ní ebaaye yɛ tsamɔ ní Yesu tsa lɛ lɛ hewɔ lɛ baanyɛ aku amɛwiemɔi lɛ anaa.—Mar. 5:1-20; Luka 8:26-39.
2:28—Mɛni hewɔ atsɛ́ Yesu akɛ “hejɔɔmɔ gbi lɛ po Nuŋtsɔ” lɛ? Bɔfo Paulo ŋma akɛ: “Nii kpakpai ni baaba lɛ asusuma kɛkɛ mla lɛ hiɛ.” (Heb. 10:1) Taakɛ aŋma yɛ Mose Mla lɛ mli lɛ, ayeɔ Hejɔɔmɔ Gbi lɛ beni atsu nii gbii ekpaa sɛɛ, shi Yesu tsá mɛi yɛ Hejɔɔmɔ Gbi lɛ nɔ titri. Enifeemɔ nɛɛ feɔ hejɔɔmɔ ni toiŋjɔlɛ yɔɔ mli kɛ jɔɔmɔi krokomɛi ni adesai anine baashɛ nɔ yɛ Kristo Afii Akpe Nɔyeli lɛ shishi, beni Satan yiwalɛ nɔyeli lɛ eba naagbee lɛ sɛɛ lɛ he mfoniri. No hewɔ lɛ, atsɛ́ɔ Afii Akpe Maŋtsɛyeli nɛɛ nɔ Maŋtsɛ lɛ akɛ “hejɔɔmɔ gbi lɛ Nuŋtsɔ.”—Mat. 12:8; Luka 6:5.
3:5; 7:34; 8:12—Te fee tɛŋŋ Marko le bɔ ni Yesu nu nii ahe eha yɛ shihilɛi srɔtoi amli lɛ? Marko jeee bɔfoi 12 lɛ ateŋ mɔ ko, ni asaŋ ekɛ Yesu ebɔɔɔ gbagbalii. Ahe aye yɛ blema akɛ bɔfo Petro ní kɛ Marko bɔ gbagbalii lɛ ji mɔ ni ha Marko le saji pii ni kɔɔ Yesu he lɛ.—1 Pet. 5:13.
6:51, 52—Mɛni kaselɔi lɛ yooo sɛɛ yɛ “aboloi lɛ asane lɛ” he. Ŋmɛlɛtswai fioo ko ni tsɔ hiɛ lɛ mli lɛ, Yesu kɛ aboloi enumɔ kɛ loi enyɔ lɛ̀ hii 5,000, soro yei kɛ gbekɛbii. Kulɛ esa akɛ kaselɔi lɛ ayoo yɛ “aboloi asane lɛ” he akɛ Yehowa Nyɔŋmɔ eha Yesu hewalɛ ní efee naakpɛɛ nibii. (Mar. 6:41-44) Eji amɛyoo sɛɛ akɛ aha Yesu hewalɛ kpele diɛŋtsɛ kulɛ, beni Yesu nyiɛ nu lɛ nɔ lɛ, efeŋ amɛ naakpɛɛ.
8:22-26—Mɛni hewɔ Yesu tsaaa nuu ní hiŋmɛi eshwila lɛ shikome lɛ, shi efee nibii srɔtoi enyɔ lɛ? Eeenyɛ efee akɛ Yesu susu nuu lɛ he, ni no hewɔ efee nakai lɛ. Akɛni nuu lɛ hiŋmɛi enako la afii pii hewɔ lɛ, ehiŋmɛi lɛ ni Yesu tsá fiofio lɛ haaa hulu la lɛ fɛɛ abote ehiŋmɛiŋ shikome.
Nibii ni Wɔkaseɔ Kɛjɛɔ Mli:
2:18; 7:11; 12:18; 13:3. Marko tsɔɔ kusum nifeemɔi, wiemɔi, hemɔkɛyelii kɛ hei ni ekolɛ nikanelɔi ni jeee Yudafoi lɛ leee lɛ amli. Eha efee faŋŋ akɛ Farisifoi lɛ “hiɔ ŋmaa,” korban ji “nɔ ni akɛke Nyɔŋmɔ,” Sadukifoi lɛ “kɛɔ akɛ gbohiiashitee ko bɛ,” ni akɛ “Mu Gɔŋ lɛ” yɛ sɔlemɔwe lɛ “ŋɛlɛnɔ.” Akɛni Yudafoi titri ji mɛi ni baaná amaniɛbɔɔ ni kɔɔ Mesia wekutɔkpãa lɛ he miishɛɛ hewɔ lɛ, ewieee no he. No hewɔ lɛ, bɔ ni Marko ŋma e-Sanekpakpa lɛ ji nɔkwɛmɔnɔ kɛha wɔ. Esa akɛ wɔha mɛi ni wɔtoibolɔi lɛ ji lɛ ahi wɔjwɛŋmɔ mli beni wɔtsuɔ shiɛmɔ nitsumɔ lɛ loo beni wɔhaa wiemɔ yɛ asafoŋ kpeei ashishi lɛ.
3:21. No mli lɛ Yesu wekumɛi lɛ jeee heyelilɔi. No hewɔ lɛ, enuɔ he ehaa mɛi ni amɛwekumɛi ni heee yeee lɛ teɔ shi amɛwoɔ amɛ loo amɛyeɔ amɛhe fɛo lɛ.
3:31-35. Beni abaptisi Yesu lɛ, ebatsɔ Nyɔŋmɔ mumɔŋ bi, ni “ŋwɛi Yerusalem lɛ” ji enyɛ yɛ mfonirifeemɔŋ. (Gal. 4:26) Kɛjɛ nakai ŋmɛlɛtswaa lɛ nɔ kɛbaa lɛ suɔmɔ ni eyɔɔ kɛha ekaselɔi lɛ tee nɔ emli wa fe nɔ ni eyɔɔ kɛha eheloonaa wekumɛi lɛ. Enɛ haa wɔnaa akɛ esa akɛ wɔkɛ nibii ni kɔɔ anɔkwa jamɔ he lɛ ayɛ klɛŋklɛŋ gbɛhe yɛ wɔshihilɛ mli.—Mat. 12:46-50; Luka 8:19-21.
8:32-34. Kɛ́ mɛi krokomɛi wo wɔ ŋaa koni wɔkɛ wɔhe akasha afɔle lɛ, esa akɛ wɔyoo sɛɛ ní wɔkpoo amɛŋaawoo lɛ amrɔ nɔŋŋ. Esa akɛ mɔ ni ji Kristo sɛɛnyiɛlɔ lɛ afee klalo ní “ekwa ehe,” enɛ tsɔɔ akɛ esa akɛ ekpoo pɛsɛmkunya akɔnɔi ní ekatiu ŋkomɛŋfa otii asɛɛ. Esa akɛ ejɛ esuɔmɔ mli “ewó esɛŋmɔtso lɛ,” ni tsɔɔ akɛ kɛ́ ehe bahia ní ena amanehulu, loo ashwie ehiɛaŋ shi, loo awa lɛ yi, loo agbe lɛ po akɛni eji Kristofonyo lɛ hewɔ lɛ, ebaakpɛlɛ. Agbɛnɛ hu esa akɛ ‘enyiɛ Yesu sɛɛ’ daa, ni tsɔɔ akɛ ehi shi taakɛ Yesu hi shi lɛ. Kristo kaselɔi ni wɔ ji lɛ biɔ ni wɔná he-kɛ-afɔleshãa su ni tamɔ Kristo Yesu nɔ̃ lɛ be fɛɛ be.—Mat. 16:21-25; Luka 9:22, 23.
9:24. Esaaa akɛ efeɔ wɔ hiɛgbele akɛ wɔɔha mɛi ale wɔhemɔkɛyeli lɛ loo ní wɔɔsɔle wɔbi ní afata wɔhemɔkɛyeli lɛ he aha wɔ.—Luka 17:5.
NAAGBEE NYƆƆŊ LƐ
Yɛ afi 32 Ŋ.B. naagbee gbɛ lɛ, Yesu tee “Yudea niiaŋ, kɛ Yordan sɛɛ gbɛ,” ni mɛi pii babua amɛhe naa ekoŋŋ yɛ ehewɔ. (Mar. 10:1) Beni eshiɛ yɛ jɛi egbe naa lɛ, eyiŋ kɛtee Yerusalem.
Yɛ Nisan 8 lɛ, Yesu yashɛ Betania. Beni etá niyenii ashi lɛ, yoo ko ba ni ebafɔse mu ni jeɔ ŋma eshwie eyiteŋ. Marko to nifeemɔi ni tee nɔ kɛjɛ beni Yesu ta teji nɔ kɛtee Yerusalem lɛ kɛyashi beni atée lɛ shi lɛ anaa yɛ be ni amɛtee nɔ lɛ naa.
Ŋmalɛ Naa Sanebimɔi ni Aha Hetoo:
10:17, 18—Mɛni hewɔ Yesu kɛɛ nuu ko akɛ ekatsɛ́ lɛ “Tsɔɔlɔ Kpakpa” lɛ? Yesu ekpɛlɛɛɛ sabala ni akɛwo eyiteŋ mulu nɛɛ nɔ, ni eŋɔ anunyam lɛ eha Yehowa, ni ekɛtsɔɔ akɛ nibii kpakpai fɛɛ jɛɔ anɔkwa Nyɔŋmɔ lɛ ŋɔɔ. Kɛfata he lɛ, Yesu gbala jwɛŋmɔ kɛtee anɔkwale ni eji akɛ Yehowa Nyɔŋmɔ ni ji nibii fɛɛ a-Bɔlɔ lɛ ji mɔ pɛ ni yɔɔ hegbɛ ni ekɛaawo mla yɛ nɔ ni ja kɛ nɔ ni ejaaa he lɛ nɔ.—Mat. 19:16, 17; Luka 18:18, 19.
14:25—Mɛni Yesu tsɔɔ beni ekɛɛ ebɔfoi anɔkwafoi lɛ akɛ: “Minuŋ weintso yibii lɛ eko dɔŋŋ kɛyashi gbi nɔ ni manu lɛ ehee yɛ Nyɔŋmɔ maŋtsɛyeli lɛ mli” lɛ? Yesu etsɔɔɔ akɛ wein diɛŋtsɛ yɛ ŋwɛi. Shi akɛni bei komɛi lɛ akɛ wein feɔ miishɛɛ he mfoniri hewɔ lɛ, Yesu miiwie miishɛɛ ní ekɛ esɛɛnyiɛlɔi ni afɔ amɛ mu ní atée amɛ shi lɛ aaaná yɛ Maŋtsɛyeli lɛ mli lɛ he.—Lala 104:15; Mat. 26:29.
14:51, 52—Namɔ ji oblanyo ni ‘jo foi kɛ ehe yayai’ lɛ? Akɛni Marko pɛ tsĩ nifeemɔ nɛɛ tã hewɔ lɛ, wɔbaanyɛ wɔmu sane naa yɛ gbɛ ni ja nɔ akɛ eewie lɛ diɛŋtsɛ ehe.
15:34—Ani wiemɔ ni Yesu wie akɛ “mi-Nyɔŋmɔ, mi-Nyɔŋmɔ, mɛɛba okwa mi?” lɛ tsɔɔ akɛ ebɛ hemɔkɛyeli? Dabi. Eyɛ mli akɛ wɔnyɛŋ wɔle yiŋtoo tuuntu hewɔ ni Yesu wie nakai lɛ moŋ, shi ewiemɔi lɛ baanyɛ atsɔɔ akɛ eyɔse akɛ Yehowa ebuuu ehe yɛ nakai ŋmɛlɛtswaa lɛ nɔ koni aka e-Bi lɛ anɔkwayeli lɛ kɛmɔ shi. Eeenyɛ efee hu akɛ Yesu kɛɛ nakai akɛni eesumɔ ni nɔ ni agba yɛ ehe yɛ Lala 22:2 lɛ aba mli lɛ hewɔ.—Mat. 27:46.
Nibii ni Wɔkaseɔ Kɛjɛɔ Mli:
10:6-9. Nyɔŋmɔ yiŋtoo ji akɛ gbalashihilɛ mli hefatalɔi kɛ amɛhe ahi shi daa. No hewɔ lɛ, yɛ nɔ najiaŋ ni amɛkɛ he oyaiyeli aaatse gbala lɛ, esa akɛ wumɛi kɛ ŋamɛi abɔ mɔdɛŋ ni amɛkɛ Biblia mli shishitoo mlai atsu nii koni amɛkɛtsu naagbai ni baanyɛ ate shi yɛ gbalashihilɛ lɛ mli lɛ he nii.—Mat. 19:4-6.
12:41-44. Yoo okulafo ohiafo lɛ nɔkwɛmɔnɔ lɛ haa wɔnaa akɛ esaaa akɛ wɔsusuɔ wɔhe fe nine beni wɔkɛ wɔshika fiɔ anɔkwa jamɔ sɛɛ lɛ.
[Mfoniri ni yɔɔ baafa 29]
Mɛni hewɔ Yesu kɛɛ nuu nɛɛ akɛ eyagba ewekumɛi lɛ nɔ ni afee aha lɛ lɛ fɛɛ lɛ?