Emii Shɛ Yehowa Mla lɛ He

ALBERT D. SCHROEDER ní kulɛ eji Yehowa Odasefoi a-Nɔyeli Kuu lɛ mlinyo lɛ gbe eshikpɔŋ nɔ sɔɔmɔ lɛ naa yɛ Shɔ March 8, afi 2006 lɛ nɔ. Eye afii 94 ni ekɛ nɔ ni fe afii 73 hi be-fɛɛ sɔɔmɔ nitsumɔ lɛ mli.

Afɔ́ Nyɛminuu Schroeder yɛ Saginaw, Michigan, U.S.A., yɛ afi 1911 mli. * Beni eji gbekɛ fioo lɛ, enaa ni ji enyɛ mami tsɔɔ lɛ nibii babaoo yɛ Biblia lɛ mli, ni asaŋ eha emii shɛ Nyɔŋmɔ Wiemɔ lɛ kanemɔ he. Eyakase Latin, Germany wiemɔ kɛ sarawa hewalɛ ahe nii yɛ Michigan Univɛsiti lɛ. Shi beni ená hiɛsɔɔ ni mli kwɔ eha Ŋmalɛi lɛ, efo ewolokasemɔ lɛ sɛɛ ni ekɛ ehe wo Maŋtsɛyeli shiɛmɔ nitsumɔ ni akɛ be fɛɛ tsuɔ lɛ mli. Yɛ afi 1932 lɛ, ebatsɔ Betel weku ni yɔɔ Brooklyn, New York lɛ mlinyo.

Yɛ afi 1937 lɛ, ahala Nyɛminuu Schroeder koni ekwɛ Yehowa Odasefoi anitsumɔ lɛ nɔ yɛ Britain, ni no mli lɛ, eye afii 26. Ekãa ni no mli lɛ ekɛtsuɔ shiɛmɔ nitsumɔ lɛ ha mɛi ni yɔɔ jɛmɛ lɛ ateŋ mɛi pii kɛ amɛhe wo be-fɛɛ sɔɔmɔ nitsumɔ lɛ mli. Oblanyo ko ni ekɛ lɛ hi Betel yɛ London ji John E. Barr. Sɛɛ mli lɛ, amɛyi enyɔ lɛ fɛɛ kɛ afii babaoo sɔmɔ akɛ Nɔyeli Kuu lɛ mlibii.

Hiɛ kpaŋ nii ni Nyɛminuu Schroeder tsu eha Yehowa Odasefoi beni awuɔ jeŋ ta ni ji enyɔ lɛ nɔ. Atswa enane shi tu kɛjɛ Britain yɛ August afi 1942 lɛ mli. Efã gbɛ ko ni yɔɔ tɔlɛ yɛ nakai tawuu afii lɛ mli kɛnyiɛ Atlantik ŋshɔ lɛ hiɛ kɛbaho Brooklyn ekoŋŋ yɛ September mli.

No beaŋ lɛ, Yehowa tsuji lɛ etsɔ hiɛ amɛna akɛ nitsumɔ wulu yɛ ni amɛbaatsu yɛ Jeŋ Ta II lɛ sɛɛ. Nitsumɔ hee ni aha Nyɛminuu Schroeder lɛ ha enaa kpɛ ehe ni ená miishɛɛ hu—akɛ nitsumɔ wo edɛŋ koni eye ebua kɛto nibii ni abaakase yɛ Buu-Mɔɔ Biblia Skul ni Yɔɔ Gilead lɛ ahe gbɛjianɔ. Ekɛ afii babaoo tsɔɔ nii yɛ jɛmɛ, ni eye ebua kɛtsɔse maŋsɛɛ sanekpakpa shiɛlɔi. Mɛi ni etsɔɔ amɛ nii yɛ Gilead kɛ sɛɛ mli lɛ yɛ Maŋtsɛyeli Sɔɔmɔ Skul lɛ kaiɔ bɔ ni eklas yɔɔ miishɛɛ ha. Ekɛ miishɛɛ dũ Nyɔŋmɔ mlai lɛ ahe suɔmɔ ewo mɛi ni etsɔɔ amɛ nii lɛ amli, ni ema bɔ ni ehe hiaa ni ale Yehowa lɛ nɔ mi.

Yɛ afi 1956 lɛ, Nyɛminuu Schroeder kɛ Charlotte Bowin bote gbalashihilɛ mli, ni yɛ afi 1958 lɛ, amɛfɔ́ amɛbinuu ni ji Judah Ben. Nyɛminuu Schroeder ji Kristofonyo wu kɛ tsɛ kpakpa. Ebɔi sɔɔmɔ akɛ Nɔyeli Kuu lɛ mlinyo yɛ afi 1974 mli, ni kuu lɛ mlibii krokomɛi lɛ ná ŋaalee ni ekɛtsuɔ nii lɛ he miishɛɛ jogbaŋŋ. Eji mɔ ko ni mli hi ní baa ehe shi, ni nɔ ni fe fɛɛ lɛ, esumɔɔ koni ewo Nyɔŋmɔ gbɛi kpeteŋkpele lɛ hiɛ nyam. Wɔyɛ nɔmimaa akɛ Nyɛminuu Schroeder nine eshɛ enyɔmɔwoo lɛ nɔ yɛ ŋwɛi ákɛ Kristofonyo ni afɔ lɛ mu ní ‘mii shɛ Yehowa mla lɛ he’ diɛŋtsɛ.—Lala 1:2.

[Shishigbɛ niŋmaa]