Mɛni Hewɔ Nyɔŋmɔ Bɔ Shikpɔŋ Lɛ?

MƐNI haa omii shɛɔ ohe waa kɛ́ ooshara shi yɛ abɔɔ ko mli loo kɛ́ onyiɛ fɔfɔii komɛi ni jeɔ ŋma ateŋ lɛ? Mɛni hewɔ omli filiɔ bo kɛ́ ona kpaakpo fɛfɛo loo gɔji ni atatu ehà yiteŋ lɛ? Mɛni hewɔ bei komɛi lɛ, owaa odamɔɔ shi ni oboɔ loofɔji ní láa kɛ ŋɔɔmɔ yɛ tsei anɔ lɛ atoi lɛ? Ni mɛni hewɔ onáa abotiai ahurumɔ kɛ kɛtsɛjiemɔ loo gwantɛŋi ni miiye nii yɛ ŋa nɔ lɛ akwɛmɔ he miishɛɛ lɛ?

Sanebimɔi nɛɛ fɛɛ ahetoo kome. Ni no ji akɛ, abɔ wɔ koni wɔhi Paradeiso mli! Nakai shihilɛ mli abɔ wɔ klɛŋklɛŋ fɔlɔi ni ji Adam kɛ Hawa awo. Wɔná shwelɛ akɛ wɔhi Paradeiso mli lɛ kɛjɛ amɛŋɔɔ, ni amɛ hu Yehowa Nyɔŋmɔ ni ji Bɔlɔ lɛ ni kɛwo amɛmli. Ekɛ sui ni baaha wɔná Paradeiso shihilɛ he miishɛɛ bɔ wɔ, ni no hewɔ lɛ, ele akɛ ákɛ adesai lɛ, wɔmii baashɛ wɔhe yɛ shihilɛ ni tamɔ nakai mli yɛ shikpɔŋ lɛ nɔ.

Mɛni hewɔ Yehowa bɔ shikpɔŋ lɛ? “Eshɔ̃ lɛ ni [adesai] ahi nɔ.” (Yesaia 45:18) ‘Mɔ ni bɔ shikpɔŋ lɛ’ kɛ paradeiso shihilɛhe fɛfɛo ni ji Eden abɔɔ lɛ duro Adam kɛ Hawa. (Yeremia 10:12; 1 Mose 2:7-9, 15, 21, 22) Kwɛ bɔ ni faai ni hoɔ yɛ mli, fɔfɔii, kɛ tsei ni yɔɔ mli lɛ baaha amɛmii ashɛ amɛhe aha! Amɛnaa loofɔji fɛfɛji miifiliki yɛ atatuiaŋ, ni amɛnaa kooloi srɔtoi fɛɛ hu nyiɛ abɔɔ lɛ mli—ni amɛteŋ eko kwraa wooo amɛhe gbeyei. No mli lɛ, looi kɛ bɔɔ nii krokomɛi hi faai ni mli tse, kpaakpoi ni mli tse, kɛ ŋshɔ ni mli tse amli. Nɔ ni fe fɛɛ lɛ, Adam kɛ Hawa hi he kome. Amɛbaanyɛ amɛfɔ́, ni amɛ kɛ amɛbii lɛ afee ekome kɛlɛɛ amɛ-Paradeiso shihilɛhe lɛ mli yɛ miishɛɛ mli.

Eyɛ mli akɛ shikpɔŋ lɛ jeee paradeiso ŋmɛnɛ moŋ, shi abaanyɛ akɛto shĩa fɛfɛo ko ni weku ko ni yɔɔ miishɛɛ yɔɔ mli lɛ he. Wɔyɛ nibii fɛɛ ni he hiaa wɔ—la, dɔlɛ, nu, kɛ niyenii yɛ shikpɔŋ ni Nyɔŋmɔ kɛduro wɔ lɛ nɔ. Kwɛ bɔ ni wɔnáa la kɛ dɔlɛ ni hulu lɛ haa kɛ nyɔɔŋtsere lɛ kpɛmɔ gbɛkɛnaashi he miishɛɛ ha! (1 Mose 1:14-18) Nibii tamɔ ŋai kɛ mu yɛ shikpɔŋ shishi ní wɔbaanyɛ wɔtsa ni wɔkɛdɔ nii. Nu ní nɛɔ shwieɔ shi, ní ekuɔ sɛɛ kɛyaa ŋwɛi ní esaa enɛɔ eshwieɔ shi  ekoŋŋ, faai, kpaakpoi, kɛ ŋshɔ haa wɔnáa nu be fɛɛ be. Ni jwɛifɔ ehà shikpɔŋ lɛ nɔ fɛɛ fɛfɛo oookɛɛ karpɛt.

Taakɛ bɔ ni akɛ niyenii toɔ shĩa lɛ, nakai nɔŋŋ niyenii fa yɛ shikpɔŋ lɛ nɔ. Yehowa ‘haa wɔ afii ni baa nii pii, ni ekɛ ŋmaa kɛ miishɛɛ woɔ wɔtsuiiaŋ obɔ’ kɛtsɔ ŋmɔshi nibii kɛ aduawa tsei ni yɔɔ shikpɔŋ lɛ nɔ lɛ nɔ. (Bɔfoi lɛ Asaji 14:16, 17) Akɛni shikpɔŋ lɛ ji shihilɛhe ko ni yɔɔ fɛo momo hewɔ lɛ, kɛ́ Yehowa ni ji “miishɛɛ Nyɔŋmɔ” lɛ fee lɛ paradeiso lɛ, kwɛ bɔ ni enɔ baafee fɛo aha!—1 Timoteo 1:11, NW.

 [Hei ni Mfonirii ni yɔɔ baafa 2 lɛ Jɛ]

WOLO LƐ SƐƐ: Shikpɔŋ: NASA photo; Ŋulamii: NASA, ESA and AURA/​Caltech