Kaashe Gbeyei Yehowa Kɛ Bo Yɛ!

NƆ NI fe afii 50 ni eho nɛɛ, beni klɛŋklɛŋ nuklea okplɛmii lɛ fɛlɛ sɛɛ etsɛɛɛ nɔŋŋ lɛ, adebɔɔ he nilelɔ Harold C. Urey ní ná Nobel Jweremɔ Nɔ̃ lɛ wie wɔsɛɛ be he akɛ: “Wɔbaaye nii yɛ gbeyeishemɔ mli, wɔbaawɔ yɛ gbeyeishemɔ mli, wɔbaahi shi yɛ gbeyeishemɔ mli ni wɔbaagboi yɛ gbeyeishemɔ mli.” Yɛ anɔkwale mli lɛ, ŋmɛnɛ, gbeyeishemɔ eyi jeŋ ni wɔyɔɔ mli nɛɛ mli obɔ, ni enɛ bɛ naakpɛɛ! Adafitswaa woji bɔɔ saji ni yɔɔ gbeyei ni tsɔɔ awuiyeli ni akɛtutuaa mɛi, awuiyeli nifeemɔi ni naa wa, kɛ helai ni anako amɛhe nɔ dã lɛ ahe amaniɛ daa gbi.

Ákɛ Kristofoi lɛ, wɔle nɔ ni shihilɛi nɛɛ tsɔɔ. Amɛtsɔɔ akɛ wɔyɛ nibii agbɛjianɔtoo fɔŋ nɛɛ “naagbee gbii lɛ” amli, ni Biblia lɛ gba akɛ nɔ ni baakadi gbii nɛɛ ji “jaramɔ bei.” (2 Timoteo 3:1) No hewɔ lɛ, wɔnáa hekɛnɔfɔɔ ni mli wa akɛ etsɛŋ ni Yehowa Nyɔŋmɔ kɛ jeŋ hee ni jalɛ baahi mli lɛ baaba. (2 Petro 3:13) Ni kɛlɛ, dani nakai be lɛ aaashɛ lɛ, ani gbeyeishemɔ baanyɛ aná wɔnɔ hewalɛ?

Gbeyeishemɔ kɛ Nyɔŋmɔ Tsuji

Yakob, David, kɛ Elia ji Yehowa tsuji ni she gbeyei beni amɛkɛ shihilɛi ní oshara baanyɛ ajɛ mli kɛba lɛ kpe lɛ ateŋ mɛi komɛi. (1 Mose 32:6, 7; 1 Samuel 21:11, 12; 1 Maŋtsɛmɛi 19:2, 3) Hii nɛɛ jeee mɛi ni bɛ hemɔkɛyeli. Yɛ no najiaŋ lɛ, amɛkɛ amɛhe fɔ̃ Yehowa nɔ kwraa kɛmɔ shi. Ni kɛlɛ, Yakob, David, kɛ Elia ji adesai; enɛ hewɔ lɛ, gbeyeishemɔ ná amɛnɔ hewalɛ. Kaselɔ Yakobo ŋma akɛ: “Elia ji gbɔmɔ adesa tamɔ wɔ nɔŋŋ.”—Yakobo 5:17.

Beni wɔsusuɔ naagba ko ni wɔkɛkpeɔ amrɔ nɛɛ loo naagba ni ekolɛ wɔkɛbaakpe wɔsɛɛ lɛ he lɛ, wɔ hu wɔbaanyɛ wɔshe gbeyei. Gbeyeishemɔ ni tamɔ nɛkɛ lɛ jeee sane srɔto ko. Yɛ anɔkwale mli lɛ, Biblia lɛ kɛɔ akɛ Satan Abonsam etswa efai shi akɛ ekɛ mɛi “ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ” ‘baawu.’ (Kpojiemɔ 12:17) Eyɛ mli akɛ nakai wiemɔi lɛ kɔɔ Kristofoi ni afɔ amɛ mu lɛ ahe moŋ, shi Paulo ŋma akɛ: ‘Mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛyi.’ (2 Timoteo 3:12) Shi kɛlɛ, kɛ́ wɔkɛ naagbai kpe lɛ esaaa akɛ wɔhaa gbeyeishemɔ yeɔ wɔnɔ. Mɛni hewɔ?

‘Yiwalaheremɔ Mawu’

Lalatsɛ David ŋma akɛ: “Lɛ, Mawu lɛ, ji wɔyiwalaheremɔ Mawu.” (Lala 68:21) Yehowa fee nyɛmɔ ni eyɔɔ ni ekɛaahere ewebii lɛ ayiwala lɛ he nɔkwɛmɔnɔ shii abɔ, ni efee nakai kɛtsɔ jiemɔ ni ejie amɛ kɛjɛ jaramɔ shihilɛi amli loo kɛtsɔ hewalɛ ni ewo amɛ koni amɛŋmɛ amɛtsui shi lɛ nɔ. (Lala 34:18; Daniel 6:23; 1 Korintobii 10:13) Nakai ‘yiwalaheremɔ’ nifeemɔi lɛ enyiɛ obaanyɛ okai kɛjɛ Biblia lɛ ní okase lɛ mli?

Mɛni hewɔ okɛ Watch Tower Publications Index * lɛ tsuuu nii ni okɛtao shihilɛi diɛŋtsɛ ni ba nɛɛ amli, tamɔ Nu Afua ni ba jeŋ fɛɛ yɛ Noa beaŋ lɛ, Lot kɛ ebiyei lɛ akpɔmɔ kɛmiijɛ Sodom kɛ Gomora, jiemɔ ni ajie Israel kɛjɛ Mizraim kɛ Ŋshɔ Tsuru lɛ ní amɛfo lɛ, loo Haman ŋaatsɔɔ koni akpata Yudafoi lɛ ahiɛ lɛ fitemɔ lɛ? Saji ni yɔɔ miishɛɛ nɛɛ akanemɔ kɛ amɛnɔ jwɛŋmɔ baawaje hemɔkɛyeli ni oyɔɔ akɛ Yehowa ji yiwalaheremɔ Mawu lɛ. Kɛkɛ lɛ, enɛ baaye abua bo ni okɛ ekãa adamɔ ohemɔkɛyeli he kaai lɛ anaa ní gbeyeishemɔ ko kwraa bɛ mli.

Ŋmɛnɛŋmɛnɛ Beaŋ Nɔkwɛmɔnii

Ani ole ŋmɛnɛŋmɛnɛ beaŋ tsuishiŋmɛɛ he nɔkwɛmɔnii komɛi yɛ bo diɛŋtsɛ okutso lɛ mli? Ekolɛ ekɔɔ mɔ ko ni awo lɛ tsuŋ yɛ anɔkwayeli mli ni ehiɛ lɛ hewɔ lɛ he. Ekolɛ ole Kristofonyo ko ni eda yɛ afii amli ni yɛ hela ni eyeɔ lɛ fɛɛ sɛɛ lɛ, eesɔmɔ  Yehowa. Aloo susumɔ oblahii kɛ oblayei ni yaa nɔ amɛtsiɔ amɛhe kɛjɛɔ je lɛ he yɛ nɔnyɛɛ babaoo ni amɛnanemɛi skulbii kɛbaa amɛnɔ lɛ fɛɛ sɛɛ lɛ he okwɛ. Agbɛnɛ hu fɔlɔi mɔ kome mɛi yɛ ni miitsɔse amɛbii, loo oshijafoi ni ekolɛ amɛmiisɔmɔ Yehowa yɛ amɛhe ni feɔ shoo lɛ fɛɛ sɛɛ. Mɛni okaseɔ kɛjɛɔ nɛkɛ mɛi nɛɛ ahe? Amɛnɔkwayeli gbɛ lɛ he ni ooosusu lɛ baanyɛ aye abua bo ni oŋmɛ otsui shi, ni oya nɔ odamɔ kaa fɛɛ kaa ni ekolɛ okɛbaakpe lɛ naa ní gbeyeishemɔ bɛ mli.

Jeee beni wɔkɛ shitee-kɛwoo kɛ yiwaa kpeɔ lɛ pɛ ji be ni esaaa akɛ wɔsheɔ gbeyei, shi ehe miihia hu ni wɔkashe gbeyei kɛ́ wɔyiŋ fee wɔ kɔshikɔshi yɛ suɔmɔ ni Yehowa yɔɔ kɛha wɔ lɛ he. Ehe miihia ni wɔná hekɛnɔfɔɔ akɛ Kristo kpɔmɔnɔ lɛ he baa sɛɛnamɔ kɛhaa wɔ ákɛ aŋkroaŋkroi. (Galatabii 2:20) Enɛ baaha wɔbɛŋkɛ Yehowa ní wɔsheee gbeyei yɛ gbɛ ni ejaaa nɔ. Kɛ́ wɔnu he akɛ wɔsaaa Yehowa suɔmɔ lɛ, wɔbaanyɛ wɔjwɛŋ wiemɔi ni Yesu kɛ esɛɛnyiɛlɔi lɛ wie lɛ anɔ, akɛ: ‘Ani afilimatai enyɔ lɛ jeee hiɛbii nyɔŋma ahɔɔ aheɔ? shi amɛteŋ ekome folo enyɔŋ shikpɔŋ, ja ejɛ nyɛtsɛ lɛ dɛŋ. Shi nyɛyiteŋtsɔi po lɛ akane fɛɛ. No hewɔ lɛ nyɛkashea gbeyei; nyɛjara wa aahu fe afilimatai babaoo.’—Mateo 10:29-31.

Bei pii lɛ, akalaa ŋmɛnɛŋmɛnɛ Yehowa Odasefoi ni kɛ ekãa edamɔ naagbai anaa lɛ aniiashikpamɔi ahe saji yɛ Buu-Mɔɔ kɛ Awake! woji tɛtrɛbii lɛ amli. Enɛ etsɔɔɔ akɛ naagbai ni amɛkɛkpe lɛ haaa amɛye awerɛho. Shi kɛlɛ, amɛhaaa henumɔi ni tamɔ nɛkɛ lɛ aha amɛfɔ̃ɔ Yehowa sɔɔmɔ. Amɛhe saji ni akala ashwie shi lɛ baanyɛ aye abua bo hu ni okɛ ekãa aŋmɛ otsui shi. Susumɔ nɔkwɛmɔnii enyɔ nɛɛ ahe okwɛ.

Pilamɔ ko Ha Eshihilɛ Tsake

Sane ni ji “How an Injury Changed My Life” (Bɔ ni Fee ni Pilamɔ ko Ha Mishihilɛ Tsake) lɛ je kpo yɛ April 22, 2003 Awake! lɛ mli. Yɛ nakai sane lɛ mli lɛ, Stanley Ombeva ni eji Yehowa Odasefoi lɛ ateŋ mɔ kome ni yɔɔ Kenya lɛ tsɔɔ naagbai ni ekɛkpe yɛ lɔle ko ni ewo foi waa ní tswa lɛ lɛ hewɔ. Beni ehela lɛ mli bawo wu lɛ, enitsumɔ je edɛŋ ni nibii fɛɛ ni esa akɛ kulɛ ená kɛjɛ nitsumɔ lɛ mli lɛ ŋmɛɛ lɛ. Nyɛminuu Ombeva wie akɛ: “Beni mibanu shihilɛ ni miyɔɔ mli lɛ shishi jogbaŋŋ lɛ, mibatsɔ mɔ ni wieɔ eshiɔ nii, ní susuɔ lɛ pɛ ehe, kɛ mɔ ni mli fũɔ mramra. Bei komɛi lɛ mimli woɔ la ni mihe tsɛ̃ɔ mɛi.” Yɛ amanehulu ni Kristofonyo nuu nɛɛ kɛkpe lɛ fɛɛ sɛɛ lɛ, etee nɔ ená ekãa. Ehaaa nijiaŋwujee aye enɔ ní no ha ehiɛnɔkamɔ fɛɛ tã. Yɛ no najiaŋ lɛ, ekɛ ehe fɔ̃ Yehowa nɔ. Nyɛminuu Ombeva kɛɛ akɛ: “Yehowa ye ebua mi yɛ shihilɛ ni mikɛkpe lɛ fɛɛ mli—aahu akɛ, bei komɛi lɛ, efeɔ mi hiɛgbele. Mitswa mifai shi waa akɛ makane ŋmalɛi ni mile akɛ amɛbaashɛje mimii yɛ mishihilɛ lɛ mli lɛ, ní majwɛŋ nɔ.”

Nyɛminuu Ombeva wiemɔi ni yɔɔ faŋŋ lɛ eye ebua mɛi babaoo ni amɛkɛ ekãa eŋmɛ amɛtsui shi yɛ kaai amli. Nyɛmi yoo Kristofonyo ko wie akɛ: “Beni mikane sane nɛɛ lɛ, mifó. Minu he akɛ Yehowa miitsɔ sane nɛɛ nɔ eejie hedɔɔ ni eyɔɔ kɛ esuɔmɔ kwɛmɔ lɛ kpo eetsɔɔ mi, ni ekɛmiishɛje mimii.” Odasefonyo kroko hu ŋma akɛ: “Saji ni tamɔ nɛkɛ lɛ woɔ wɔteŋ mɛi ni wɔkɛ shihilɛi ni tamɔ nakai nɔŋŋ kpeɔ ní wɔnaa nɔ̃, shi wɔwieee he lɛ hewalɛ waa diɛŋtsɛ.”

Henumɔŋ Piŋmɔ Naa ní Aaadamɔ

Herbert Jennings niiashikpamɔ ni agba yɛ sane ni ji “Nyɛleee Wɔ́ Sane” * lɛ mli lɛ ji niiashikpamɔ kroko hu ni kanyaa mɔ. Nyɛminuu Jennings miiye niiahesusumɔ mli naagba hela.  Beni egbaa ehela lɛ shishijee he sane lɛ, ekɛɛ akɛ: “Eji kaa diɛŋtsɛ kɛha mi akɛ maya Kristofoi akpeei ashishi po. Shi fɛɛ sɛɛ lɛ, miheɔ bɔ ni mumɔŋ nyɛmimɛi kɛ naanyobɔɔ lɛ ji nɔ ko ni jara wa waa ha lɛ miyeɔ waa. Bɔni afee ni madamɔ naa lɛ, miyaa Maŋtsɛyeli Asa lɛ nɔ beni mɛi lɛ etara shi, ni mishiɔ amrɔ nɔŋŋ dani jɛmɛ feɔ hoo beni akpa kpee lɛ.”

Shiɛmɔyaa hu bafee nɔ ni wa kɛha lɛ. Nyɛminuu Jennings gba akɛ: “Bei komɛi lɛ, kɛ miyashɛ shinaa ko naa lɛ, minaaa ekãa ni mikɛaanyɛ ŋmɛlɛ lɛ kɛkɛ po nɔ. Shi kɛlɛ, mikpaaa ejaakɛ mile akɛ wɔsɔɔmɔ nitsumɔ lɛ ji wala kɛha wɔ diɛŋtsɛ kɛ mɛi fɛɛ ni boɔ toi lɛ hu. (1 Timoteo 4:16) Be fioo sɛɛ lɛ, minyɛɔ miyeɔ mihe nɔ, ni miyaa shia kroko lɛ mli, ni mikaa mikwɛɔ ekoŋŋ. Akɛni mitee nɔ mikɛ mihe wo sɔɔmɔ nitsumɔ lɛ mli hewɔ lɛ, minyɛ mihiɛ mumɔŋ hewalɛ kpakpa mli, ni no wo mi hewalɛ koni madamɔ naa.”

Nyɛminuu Jennings wiemɔi ni yɔɔ faŋŋ lɛ eye ebua mɛi babaoo ni kane esane lɛ koni amɛkɛ ekãa ni tamɔ nakai nɔŋŋ aŋmɛ amɛtsui shi yɛ piŋmɔi ni amɛkɛkpeɔ lɛ amli. Ákɛ nɔkwɛmɔnɔ lɛ, nyɛmi yoo Kristofonyo ko ŋma akɛ: “Mikɛ afii 28 ekane Buu-Mɔɔ kɛ Awake! woji tɛtrɛbii lɛ, shi nɔ ko kanyako mi waa pɛŋ tamɔ nɔ ni mikane yɛ sane nɛɛ mli lɛ. Ehe bahia ni mafɔ̃ɔ be-fɛɛ sɔɔmɔ nitsumɔ ni mikɛ mihe ewo mli lɛ, ni akɛni minu he akɛ eji miyɛ hemɔkɛyeli ni fa babaoo kulɛ matsá etsumɔ nɔ hewɔ lɛ, eha minu he akɛ miyeɔ fɔ́. Bɔ ni ehe bahia ni Nyɛminuu Jennings afɔ̃ɔ nitsumɔ ni akɛwo edɛŋ lɛ koni enyɛ etsá hela ni yeɔ lɛ lɛ he sane ni mikane lɛ ye ebua mi koni maná jwɛŋmɔ ni ja yɛ mishihilɛ lɛ he. Enɛ ji misɔlemɔi lɛ ahetoohamɔ diɛŋtsɛ!”

Nakai nɔŋŋ nyɛmi nuu Kristofonyo ko hu ŋma akɛ: “Beni misɔmɔ akɛ asafoŋ onukpa afii nyɔŋma sɛɛ lɛ, ehe bahia ni maŋmɛɛ misɔɔmɔ hegbɛ lɛ he yɛ jwɛŋmɔŋ hela ní miyeɔ lɛ hewɔ. Henumɔi ní miná akɛ mibɔɔɔ mɔdɛŋ lɛ mli bawa aahu akɛ, bei pii lɛ ehaa minijiaŋ jeɔ wui ni minyɛɛɛ makane mɛi awala shihilɛ he saji ní bei pii lɛ etsɔɔ nitsumɔi babaoo ni Yehowa webii enyɛ amɛtsu lɛ. Shi kɛlɛ, nyɛminuu Jennings tsuishiŋmɛɛ lɛ wo mi hewalɛ waa diɛŋtsɛ. Mikane ehe sane lɛ shii abɔ.”

Ní Wɔɔya Wɔhiɛ Kɛ Ekãa

Taakɛ Nyɛminuu Ombeva kɛ Nyɛminuu Jennings ji lɛ, Yehowa Odasefoi lɛ ateŋ mɛi babaoo yaa nɔ amɛkɛ ekãa jáa Yehowa Nyɔŋmɔ yɛ shihilɛi ni mli wawai ni amɛkɛkpeɔ lɛ fɛɛ sɛɛ. Kɛji ofata nɛkɛ mɛi nɛɛ ahe lɛ, no lɛ osa yijiemɔ waa. Ná nɔmimaa akɛ: ‘Nyɔŋmɔ jeee mɔ ni yeɔ sane ni ejaaa ni ehiɛ aaakpa onitsumɔ lɛ nɔ kɛ suɔmɔ deŋme ni ogbo yɛ egbɛi lɛ ahewɔ, ni okɛsɔmɔ mɛi krɔŋkrɔŋi lɛ, ni osaa osɔmɔɔ amɛ lolo lɛ.’—Hebribii 6:10.

Taakɛ Yehowa ye ebua enɔkwa tsuji lɛ yɛ blema beaŋ koni amɛye amɛhenyɛlɔi lɛ anɔ kunim lɛ, nakai nɔŋŋ ebaanyɛ eye ebua bo hu koni oye gbɛtsĩi nii fɛɛ gbɛtsĩi nii ni ekolɛ okɛbaakpe lɛ nɔ kunim yɛ omanyeyeli mli. No hewɔ lɛ, ha wiemɔi ni Yehowa tsɔ gbalɔ Yesaia nɔ ewie nɛɛ ashɛje omii akɛ: “Kaashe gbeyei, shi mi, mikɛo yɔɔ! Kaakwɛkwɛɛ ohe, shi miji o-Nyɔŋmɔ lɛ! Mawajeo, ni maye mabuao; ni mahiɛ omli kɛ mijalɛ ninejurɔ lɛ.”—Yesaia 41:10.

[Shishigbɛ niŋmai]

[Mfonirii ni yɔɔ baafa 16]

Taakɛ Stanley Ombeva (yiteŋgbɛ) kɛ Herbert Jennings (ninejurɔgbɛ) ji lɛ, mɛi babaoo kɛ ekãa miisɔmɔ Yehowa

[He ni Mfoniri ni yɔɔ baafa 14 lɛ Jɛ]

USAF photo