“Mɔ Fɛɛ Mɔ Aaatere Lɛ Diɛŋtsɛ Ejatsu”
“Mɔ Fɛɛ Mɔ Aaatere Lɛ Diɛŋtsɛ Ejatsu”
“Wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.” —ROMABII 14:12.
1. Mɛɛ sɔ̃ Hebribii etɛ lɛ tsu he nii jogbaŋŋ?
EHE bahia koni Hebribii oblahii etɛ komɛi ní hi Babilon lɛ akpɛ amɛyiŋ yɛ sane ko ni kɔɔ gbele kɛ wala he lɛ he. Sane lɛ ji akɛ, ani amɛbaajá amaga wulu ko ni mla ni awo yɛ nakai maŋ lɛ mli lɛ biɔ ni ajá lɛ lɛ, aloo amɛjaŋ, koni ashɛrɛ amɛ awo la kɛ flɔnɔɔ ni tsoɔ grigri lɛ mli? Shadrak, Meshak, kɛ Abednego bɛ be ni amɛkɛaabi ŋaawoo kɛjɛ mɔ ko dɛŋ; ni ehe ehiaaa hu ni amɛfee nakai. Oya nɔŋŋ ni amɛjaje akɛ: “Maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjáŋ shika amaga ní okɛma shi lɛ.” (Daniel 3:1-18) Hebribii etɛ lɛ diɛŋtsɛ tsu sɔ̃ ni kã amɛnɔ lɛ he nii.
2. Eyɛ mli akɛ Pilato ni kojo Yesu Kristo moŋ, shi kɛ aaakɛɛ lɛ, namɛi diɛŋtsɛ kpɛ yiŋ yɛ nakai sane lɛ mli, ni ani no ha Roma amralo lɛ ye ehe akɛ eeebu nɔ ni efee lɛ he akɔntaa?
2 Aaafee afii 600 sɛɛ lɛ, akɛ naafolɔmɔi shi nuu ko yɛ maŋ ko mli, ni amralo ni yɔɔ jɛmɛ lɛ bo naafolɔmɔi fɛɛ ni akɛshi nuu lɛ toi. Beni ebote sane lɛ mli lɛ, ena akɛ nuu ni afolɔɔ enaa lɛ yeee fɔ. Kɛlɛ gbɔmɛi ni bua shi yɛ he ni ayeɔ sane lɛ yɛ lɛ bi koni agbe lɛ. Amralo lɛ bɔ mɔdɛŋ akɛ ekatsu amɛnibimɔ lɛ he nii, ni beni efee he eko aahu lɛ, etsu amɛnibimɔ lɛ he nii yɛ nɔ najiaŋ ni eetsu sɔ̃ ni kã enɔ lɛ moŋ he nii. Beni eha aha lɛ nu ni efɔɔ edɛŋ lɛ, ekɛɛ akɛ: “Mi lɛ miyeee jalɔ nɛɛ lá yi sɔ̃.” Kɛkɛ ni ekɛ nuu lɛ ha ni ayasɛŋ lɛ. Hɛɛ, yɛ nɔ najiaŋ ni Pontio Pilato aaatsu sɔ̃ ni kã enɔ akɛ ekpɛ eyiŋ yɛ Yesu Kristo sane lɛ mli lɛ he nii lɛ, eha mɛi krokomɛi moŋ kpɛ yiŋ amɛha lɛ. Ekɔɔɔ he eko nu falɛ ni Pilato kɛfɔ edɛŋ lɛ, no haaa eye ehe kɛjɛ fɔ ní ebu Yesu yɛ gbɛ ni ejaaa nɔ lɛ mli.—Mateo 27:11-26; Luka 23:13-25.
3. Mɛni hewɔ esaaa ni wɔhaa mɛi krokomɛi kpɛɔ yiŋ amɛhaa wɔ lɛ?
3 Ni bo hu? Kɛji ehe bahia ni okpɛ oyiŋ lɛ, ani ofeɔ onii tamɔ Hebribii etɛ lɛ, aloo ohaa mɛi krokomɛi kpɛɔ yiŋ amɛhaa bo? Ebɛ mlɛo akɛ aaakpɛ yiŋ. Ebiɔ salɛ bɔni afee ni mɔ akpɛ eyiŋ yɛ gbɛ ni ja nɔ. Ákɛ nɔkwɛmɔnɔ lɛ, ehe miihia ni fɔlɔi akpɛ yiŋ ni ja amɛha amɛbii ni darako lɛ. Yɛ anɔkwale mli lɛ, kɛ nɔ ni abaakpɛ yiŋ yɛ he lɛ bɛ faŋŋ ní ebaabi ni aŋmɛ saji srɔtoi akwɛ dani anyɛ afee nakai lɛ, no haa yiŋkpɛɛ bawaa waa. Shi kɛlɛ, yiŋkpɛɛ jeee sɔ̃ ni tsii tsɔ ni ebaabi ni wɔkɛfata “jatsui” ni “mumɔŋ gbɔmɛi” lɛ tereɔ amɛhaa wɔ lɛ ahe. (Galatabii 6:1, 2) Nɔ ni tamɔɔɔ nakai lɛ, eji wɔsɔ̃ ní “wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ” yɛ he. (Romabii 14:12) Biblia lɛ kɛɔ akɛ: “Mɔ fɛɛ mɔ aaatere lɛ diɛŋtsɛ ejatsu.” (Galatabii 6:5) Belɛ, te wɔɔfee tɛŋŋ ni wɔkpɛ yiŋ ni ja yɛ shihilɛ mli? Klɛŋklɛŋ lɛ, ebaabi ni wɔyɔse adesai agbɔjɔmɔi ni yɔɔ wɔhe lɛ, ni wɔle nibii ni ebaabi ni wɔfee kɛye enɛɛmɛi anɔ.
Nifeemɔ ni He Hiaa Titri
4. Mɛɛ nɔ ko ni he hiaa waa ní kɔɔ yiŋkpɛɛ he wɔkaseɔ kɛjɛɔ klɛŋklɛŋ adesai enyɔ lɛ atoigbele lɛ mli?
4 Yiŋ ko ni klɛŋklɛŋ adesai enyɔ lɛ kpɛ yɛ blema tɔ̃ɔ lɛ kɛ haomɔi ni yɔɔ gbeyei ba. Amɛhala akɛ amɛaaye ekpakpa kɛ efɔŋ lee tso lɛ yibii lɛ eko. (1 Mose 2:16, 17) Mɛni ha amɛfee nakai? Biblia lɛ kɛɔ akɛ: “Ni beni yoo lɛ na akɛ tso lɛ hi ha yeli, ni efeɔ hiŋmɛii akɔnɔ, ni tso lɛ baa mɔ tsine, ni etsɔɔ mɔ nii lɛ, etse enɔ yibii lɛ eko ni eye, ni eha ewu ni kɛ lɛ yɔɔ lɛ hu eko, ni eye.” (1 Mose 3:6) Pɛsɛmkunya ha Hawa kɔ gbɛ ni tamɔ nakai. Adam hu yanyiɛ eŋa lɛ sɛɛ. No ha esha kɛ gbele “tsɛŋe gbɔmɛi fɛɛ.” (Romabii 5:12) Adam kɛ Hawa toigbele lɛ haa wɔkaseɔ nɔ ko ni he hiaa waa yɛ adesai agbɔjɔmɔi ahe, ni no ji: Kɛ́ adesai kɛ Nyɔŋmɔ gbɛtsɔɔmɔ tsuuu nii lɛ, amɛnyɛŋ amɛkpɛ amɛyiŋ yɛ gbɛ ni ja nɔ.
5. Mɛni Yehowa kɛduro wɔ koni etsɔɔ wɔ gbɛ, ni mɛni esa akɛ wɔfee bɔni afee ni wɔná he sɛɛ?
5 Kwɛ bɔ ni wɔdaa Yehowa shi akɛ ekɛ gbɛtsɔɔmɔi haa wɔ! Ŋmalɛi lɛ kɛɔ wɔ akɛ: “Otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ́ jio, abɛkugbɛ nyɛtsɔ́ jio.” (Yesaia 30:21) Yehowa tsɔɔ e-Wiemɔ ni jɛ mumɔŋ ni ji Biblia lɛ nɔ ekɛ wɔ wieɔ. Esa akɛ wɔkase Ŋmalɛi lɛ, ni wɔná mli anɔkwa nilee. Bɔni afee ni wɔnyɛ wɔkpɛ yiŋ ni ja lɛ, esa akɛ wɔye “niyenii kpakpa” ni ji “mɛi ni edara lɛ anɔ̃ lɛ.” Kɛ́ ‘wɔfɔ feemɔ’ lɛ, wɔ hu ‘wɔjwɛŋmɔŋ nyɛmɔi lɛ baale ekpakpa kɛ efɔŋ mlikpamɔ.’ (Hebribii 5:14) Wɔbaanyɛ wɔtsɔse wɔhe koni wɔjwɛŋmɔŋ nyɛmɔi lɛ aya hiɛ kɛtsɔ nibii ni wɔkaseɔ kɛjɛɔ Nyɔŋmɔ Wiemɔ lɛ mli lɛ ní wɔkɛaatsu nii lɛ nɔ.
6. Mɛni ehe hiaa ni wɔfee bɔni afee ni wɔhenilee atsu nii jogbaŋŋ?
6 Henilee ni akɛfɔ́ wɔ lɛ yeɔ buaa waa yɛ yiŋkpɛɛ mli. Henilee haa mɔ nyɛɔ eŋmɛɛɔ saji ekwɛɔ, ni ebaanyɛ ebu mɔ ‘fɔ loo bem.’ (Romabii 2:14, 15) Bɔni afee ni wɔhenilee atsu nii jogbaŋŋ lɛ, ebaabi ni wɔkɛ Nyɔŋmɔ Wiemɔ lɛ mli anɔkwa nilee lɛ atsɔse lɛ, ni wɔkanya lɛ kɛtsɔ nakai Wiemɔ lɛ kɛ nitsumɔ nɔ. Nibii tamɔ kusumii kɛ jeŋba ni mɛi ni yɔɔ hei ni wɔyɔɔ lɛ jieɔ lɛ kpo lɛ nyɛɔ enáa henilee ni atsɔseko lɛ lɛ nɔ hewalɛ yɛ gbɛ ni waaa nɔ. Nibii ni yaa nɔ yɛ wɔkutsei lɛ amli, kɛ mɛi krokomɛi asusumɔi hu baanyɛ alaka wɔ. Mɛni baa kɛ́ wɔtee nɔ wɔku wɔhiɛ wɔshwie nibii ni wɔhenilee kɛɔ wɔ lɛ anɔ, ní wɔkɛ tɛi ni Nyɔŋmɔ efolɔ eshwie shi lɛ tsuuu nii? Kɛ́ eba lɛ nakai lɛ, ebaashɛ be ni wɔhenilee lɛ he baashã tamɔ akɛ “dade kɛ la shãa nɔ̃” he lɛ, ni ebaatsɔ tamɔ hewolo ni la eshã he fɛɛ—bɔ ni ebaa lɛ ji akɛ hei ni la eshã lɛ gboɔ, ni kɛ́ nɔ ko sa he po lɛ, mɔ lɛ nuuu he. (1 Timoteo 4:2) Nɔ ni tamɔɔɔ nakai lɛ, henilee ni akɛ Nyɔŋmɔ Wiemɔ lɛ etsɔse lɛ lɛ kɛ gbɛtsɔɔmɔ kpakpa haa.
7. Mɛni ji nɔ̃ titri ni haa mɔ nyɛɔ ekpɛɔ eyiŋ yɛ nilee mli?
7 Belɛ, Ŋmalɛi lɛ amli anɔkwa nilee ni mɔ aaaná kɛ nakai nilee lɛ kɛ nitsumɔ ji nɔ̃ titri ni haa enyɛɔ etsuɔ sɔ̃ ni kã enɔ akɛ ekpɛ eyiŋ yɛ nilee mli lɛ he nii. Kɛ́ ehe bahia ni wɔkpɛ wɔyiŋ lɛ, esaaa akɛ wɔfeɔ kplakpla, shi moŋ esa akɛ wɔhé be ni wɔto wɔtsui shi kɛpɛi Biblia shishitoo mlai lɛ amli koni wɔkɛ wɔjwɛŋmɔŋ nyɛmɔi atsu nii kɛtsu shishitoo mlai lɛ ahe nii. Kɛ́ wɔná Nyɔŋmɔ Wiemɔ lɛ mli anɔkwa nilee ní wɔkɛtsɔse wɔhenilee lɛ, wɔbaafee mɛi ni wɔsaa wɔhe jogbaŋŋ akɛ kɛ́ ehe bahia ni wɔkpɛ wɔyiŋ amrɔ nɔŋŋ yɛ sane ko he—taakɛ eba lɛ yɛ Shadrak, Meshak, kɛ Abednego gbɛfaŋ—lɛ efeŋ naagba kɛhaŋ wɔ. Bɔni afee ni wɔna bɔ ni wɔhiɛ ni wɔɔya yɛ Nyɔŋmɔ he nilee mli lɛ baanyɛ aha wɔkpɛ wɔyiŋ jogbaŋŋ lɛ, nyɛhaa wɔsusua nibii enyɔ komɛi ni wɔtsuɔ he nii yɛ shihilɛ mli lɛ ahe wɔkwɛa.
Namɛi Esa akɛ Wɔkɛbɔ Naanyo?
8, 9. (a) Mɛɛ shishitoo mlai haa wɔnaa bɔ ni ehe hiaa ni wɔtsi wɔhe kɛjɛ nanemɛi fɔji ahe? (b) Ani naanyobɔɔ fɔŋ kɔɔ mɛi ni bɛ jeŋba ni akɛbɔɔ lɛ pɛ ahe? Tsɔɔmɔ mli.
8 Bɔfo Paulo ŋma akɛ: “Nyɛkahaa ashishiua nyɛ. Naanyobɔɔ fɔŋ fiteɔ jeŋba kpakpa.” (1 Korintobii 15:33) Yesu Kristo hu kɛɛ ekaselɔi lɛ akɛ: “Nyɛjɛɛɛ je lɛŋ.” (Yohane 15:19) Shishitoo mlai nɛɛ ni wɔbale lɛ haa wɔnaa bɔ ni ehe hiaa ni wɔtsi wɔhe kɛjɛ ajwamaŋbɔlɔi, gbalaŋkulɔi, julɔi, dãatɔlɔi, kɛ gbɔmɛi ni tamɔ nakai lɛ ahe. (1 Korintobii 6:9, 10) Beni wɔyaa hiɛ yɛ Biblia mli anɔkwa nilee mli lɛ, wɔbayɔseɔ akɛ be ni wɔfiteɔ kɛkwɛɔ mɛi ni tamɔ nakai lɛ ahe sinii, wɔkwɛɔ amɛ yɛ tɛlivishiŋ, loo kɔmpiuta nɔ aloo amɛhe saji ni wɔkaneɔ yɛ woji amli lɛ hu yeɔ awui taakɛ bɔ ni amɛkɛbɔɔ feɔ lɛ nɔŋŋ. Nakai nɔŋŋ “osatofoi” ni akɛbɔɔ kɛtsɔ Internet lɛ nɔ lɛ hu yeɔ awui.—Lala 26:4.
9 Ni mɛi ni ekolɛ amɛbaa amɛjeŋ jogbaŋŋ shi amɛbɛ anɔkwa Nyɔŋmɔ lɛ mli hemɔkɛyeli ni wɔkɛaabɔ lɛ hu? Ŋmalɛi lɛ kɛɔ wɔ akɛ: “Jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Enɛ haa wɔyɔseɔ akɛ jeee mɛi ni ekpɔtɔ loo amɛbɛ jeŋba pɛ aaanyɛ afee nanemɛi fɔji. No hewɔ lɛ, wɔɔfee jogbaŋŋ akɛ wɔkɛ mɛi ni sumɔɔ Yehowa lɛ pɛ aaabɔ naanyo.
10. Yɛ wɔkɛ je lɛŋ bii lɛ asharamɔ mli lɛ mɛni yeɔ buaa wɔ ni wɔkpɛɔ wɔyiŋ akɛ mɛi ni edara yɛ Nyɔŋmɔ he nilee gbɛfaŋ?
10 Wɔnyɛŋ wɔtsi wɔhe kɛjɛ mɛi ni yɔɔ je lɛŋ lɛ ahe kwraa ni wɔkɛ amɛ efeee nɔ ko nɔ ko, ni ehe ehiaaa hu ni wɔfee nakai. (Yohane 17:15) Wɔkɛ mɛi ni jáaa Yehowa shãraa yɛ Kristofoi ashiɛmɔ nitsumɔ lɛ mli, yɛ skul, kɛ wɔnitsumɔhei. Kristofonyo ni ebote gbalashihilɛ mli ni ehefatalɔ lɛ jeee heyelilɔ lɛ kɛ mɛi ni yɔɔ je lɛŋ baashãra fe bɔ ni enyɛmimɛi krokomɛi lɛ feɔ. Shi kɛlɛ, wɔjwɛŋmɔŋ nyɛmɔi ni wɔtsɔse lɛ lɛ haa wɔnaa akɛ srɔtofeemɔ yɛ je lɛŋ bii ni ehe hiaa ni akɛshãra kɛyashi he ko lɛ kɛ amɛ ni akɛbɔɔ diɛŋtsɛ lɛ mli. (Yakobo 4:4) No hewɔ lɛ, kɛ́ eba akɛ wɔkpɛ wɔyiŋ kɛji wɔkɛ wɔhe baawo skul nifeemɔi krokomɛi tamɔ shwɛmɔ akaŋshii kɛ joo-shwɛmɔi, loo niyeli kɛ ninumɔ kɛ okpɔlɔŋmɛɛ ni naanyo nitsulɔ ko toɔ he gbɛjianɔ lɛ amli aloo wɔfeŋ nakai lɛ, wɔnyɛɔ wɔkpɛɔ wɔyiŋ akɛ mɛi ni edara yɛ Nyɔŋmɔ he nilee gbɛfaŋ.
Nitsumɔ Taomɔ
11. Kɛ́ wɔmiikpɛ wɔyiŋ yɛ nitsumɔ taomɔ mli lɛ, mɛni ji nɔ̃ klɛŋklɛŋ ni ebaabi ni wɔsusu he?
11 Biblia shishitoo mlai ni wɔkɛtsuɔ nii yɛ gbɛ ni tsɔɔ akɛ wɔdara yɛ Nyɔŋmɔ he nilee gbɛfaŋ lɛ haa wɔnyɛɔ wɔkpɛɔ wɔyiŋ ni wɔtsuɔ sɔ̃ ni kã wɔnɔ akɛ ‘wɔkwɛ wɔweku lɛŋ bii’ lɛ he nii. (1 Timoteo 5:8) Klɛŋklɛŋ lɛ, ebaabi ni wɔsusu nɔ̃ nitsumɔ ni ji loo kɛ́ wɔɔkɛɛ lɛ, bɔ ni nitsumɔ lɛ yɔɔ ha diɛŋtsɛ lɛ he. Ejaaa akɛ wɔbaatao nitsumɔ ni Biblia lɛ teɔ shi ewoɔ. No hewɔ lɛ, anɔkwa Kristofoi ekpɛlɛɛɛ loo amɛkɛ amɛhe wooo nitsumɔi ni biɔ ni mɔ kɛ ehe awo nifeemɔi ni Biblia lɛ teɔ shi ewoɔ tamɔ wɔŋjamɔ, juu, lá ni akɛtsuɔ nii yɛ gbɛ fɔŋ nɔ, kɛ nifeemɔi krokomɛi ni tamɔ nakai lɛ amli. Wɔmaleŋ, ni wɔshishiuŋ mɛi hu, ni kɛ nitsumɔtsɛ ko po kɛɛ wɔfee nakai lɛ wɔfeŋ.—Bɔfoi lɛ Asaji 15:29; Kpojiemɔ 21:8.
12, 13. Kɛ́ wɔmiikpɛ wɔyiŋ yɛ nitsumɔ taomɔ mli lɛ, mɛɛ nibii krokomɛi ahe hiaa ni wɔsusu he kɛfata nɔ̃ nitsumɔ ni ji lɛ he?
12 Ni kɛ́ nitsumɔ lɛ ekuuu Nyɔŋmɔ mla ko mli hu? Be mli ni anɔkwale lɛ he nilee ni wɔyɔɔ lɛ yaa hiɛ, ní no haa wɔjwɛŋmɔŋ nyɛmɔi lɛ hu yaa hiɛ lɛ, wɔbayɔseɔ nibii krokomɛi ni esa akɛ wɔsusu he. Ni kɛ́ nitsumɔ lɛ baabi ni wɔkɛ wɔhe awo nifeemɔi komɛi ni teɔ shi woɔ Biblia lɛ, tamɔ ekolɛ ní wɔyaatsu nii yɛ asɔshwɛmɔ nitsumɔhe ko ákɛ mɛi ni hereɔ tɛlifoŋ ni atswaa kɛbaa jɛmɛ lɛ nɔ lɛ hu? Esa akɛ wɔsusu mɔ ni baawo wɔ nyɔmɔ, kɛ he ni wɔbaayatsu nii lɛ yɛ lɛ hu he. Ákɛ nɔkwɛmɔnɔ lɛ, ŋɔɔ lɛ akɛ Kristendom sɔlemɔi lɛ eko miitao mɔ ko ebapɛnte amɛsɔlemɔtsu he eha amɛ. Ani Kristofonyo ko ní hiɛ lɛ diɛŋtsɛ enitsumɔ, ní mɛi kɛ nitsumɔ bahaa lɛ etsuɔ lɛ baaya koni eyahe nitsumɔ ni tamɔ nakai ni etsu, ní no aha ebatsɔ mɔ ko ni miifi apasa jamɔ sɛɛ?—2 Korintobii 6:14-16.
13 Ni kɛji wɔyɛ, ni wɔnitsumɔtsɛ yahé nitsumɔ ákɛ ebaapɛnte apasa jamɔ sɔlemɔtsu ko he eha amɛ hu? Kɛ eba lɛ nakai lɛ, ebaabi ni wɔsusu hewalɛ ni wɔyɔɔ yɛ nɔ ni ayaatsu lɛ nɔ, kɛ he ni wɔkɛ wɔhe baawo mli kɛyashi lɛ he. Ni kɛji tɔmɔ ko bɛ nɔ ni wɔtsuɔ lɛ he, tamɔ ekolɛ wɔkɛ mɛi amajemɔ woji yahaa amɛ yɛ nitsumɔhei kɛ amɛshĩai amli, shi wɔle hei nɛɛ ekomɛi akɛ mɛi ni yɔɔ jɛmɛ lɛ kɛ amɛhe woɔ nifeemɔi gbohii amli hu? Ani shishitoo mla ni yɔɔ Mateo 5:45 lɛ náŋ wɔyiŋkpɛɛ lɛ nɔ hewalɛ? Nɔ kroko hu ni esaaa akɛ wɔkuɔ wɔhiɛ wɔshwieɔ nɔ ji hewalɛ ni nii ni wɔtsuɔ yaa-kɛbaa lɛ baanyɛ aná yɛ wɔhenilee nɔ. (Hebribii 13:18) Yɛ anɔkwale mli lɛ, sɔ̃ ni kã wɔnɔ akɛ wɔkpɛ wɔyiŋ akɛ mɛi ni edara yɛ Nyɔŋmɔ he nilee gbɛfaŋ yɛ wɔnitsumɔ taomɔ mli lɛ biɔ ni wɔha wɔjwɛŋmɔŋ nyɛmɔi lɛ aya hiɛ ni wɔtsɔse henilee ni Nyɔŋmɔ kɛduro wɔ lɛ.
“Kaimɔ lɛ yɛ Ogbɛ̀i Fɛɛ Mli”
14. Kɛ́ ehe baahia ni wɔkpɛ wɔyiŋ yɛ sane ko he lɛ, mɛni ebaabi ni wɔfee?
14 Ni yiŋ ni wɔkpɛɔ yɛ saji krokomɛi tamɔ skulyaa kɛ nɔ̃ tsofai ni kɛ́ wɔbɛ hewalɛ lɛ wɔbaasumɔ ni akɛtsu wɔhe nii kɛ nɔ ni wɔsumɔŋ ni akɛtsu wɔhe nii lɛ hu? Kɛ́ ehe bahia ni wɔkpɛ wɔyiŋ yɛ sane ko he lɛ, ebaabi ni wɔpɛi Biblia shishitoo mlai ni kɔɔ nakai sane lɛ he lɛ amli, koni wɔkɛ wɔjwɛŋmɔŋ nyɛmɔi atsu nii kɛtsu shishitoo mlai lɛ ahe nii. Nilelɔ Maŋtsɛ Salomo ni hi shi yɛ blema Israel lɛ kɛɛ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!”—Abɛi 3:5, 6.
15. Mɛni wɔkaseɔ kɛjɛɔ klɛŋklɛŋ afii 100 lɛ mli Kristofoi lɛ adɛŋ yɛ yiŋkpɛɛ mli?
15 Bei babaoo lɛ, yiŋ ni wɔkpɛɔ lɛ saa mɛi krokomɛi ahe, ni ehe miihia ni wɔha enɛ ahi wɔjwɛŋmɔ mli. Ákɛ nɔkwɛmɔnɔ lɛ, Kristofoi ni hi shi yɛ klɛŋklɛŋ afii 100 lɛ mli lɛ ye amɛhe kɛjɛ niyenii babaoo ni Mose Mla lɛ gu eyeli lɛ ahe. Amɛbaanyɛ amɛhala akɛ amɛbaaye niyenii komɛi ni abuɔ akɛ amɛhe tseee yɛ Mla lɛ naa lɛ ní amɛyeee fɔ́ yɛ gbɛ ko kwraa nɔ. Shi kɛlɛ, beni bɔfo Paulo wieɔ kooloi komɛi ni eeenyɛ eba akɛ agbe yɛ gbatsũi amli lɛ alòo ni ahɔ̃ɔ lɛ he lɛ, eŋma akɛ: “Kɛji ŋmãa ahã minyɛmi nane atɔ̃tɔ̃ lɛ, no lɛ miyeŋ loo gbi ko gbi ko dɔŋŋ, koni mikaha minyɛmi nane miitɔ̃tɔ̃.” (1 Korintobii 8:11-13) Awo mra be mli Kristofoi lɛ hewalɛ koni amɛsusu mɛi krokomɛi ahenilee he bɔni afee ni amɛkatɔ̃tɔ̃ amɛnane. Esaaa akɛ yiŋ ni wɔkpɛɔ lɛ toɔ mɛi “pampii” loo etɔ̃tɔ̃ɔ amɛnane.—1 Korintobii 10:29, 32.
Bi Nyɔŋmɔ ni Eha Bo Nilee
16. Mɛɛ gbɛ nɔ sɔlemɔ yeɔ buaa wɔ yɛ wɔyiŋkpɛɛ mli?
16 Sɔlemɔ yeɔ ebuaa waa yɛ yiŋkpɛɛ mli. Kaselɔ Yakobo kɛɛ akɛ: “Shi kɛ́ nilee eshwɛ nyɛteŋ mɔ ko lɛ, ékpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai, ni aaaŋɔha lɛ.” (Yakobo 1:5) Wɔbaanyɛ wɔkɛ nɔmimaa asɔle wɔbi Yehowa koni eha wɔ nilee ni he baahia wɔ bɔni afee ni wɔkpɛ wɔyiŋ yɛ gbɛ ni ja nɔ. Kɛ́ wɔkɛ wɔnaagbai lɛ fɔ̃ anɔkwa Nyɔŋmɔ lɛ hiɛ, ni wɔbi egbɛtsɔɔmɔ lɛ, mumɔ krɔŋkrɔŋ lɛ baaye abua wɔ koni wɔnu ŋmalɛi ni wɔsusuɔ he lɛ ashishi jogbaŋŋ ni wɔkai ekrokomɛi ni wɔhiɛ ekpa nɔ lɛ hu.
17. Mɛi krokomɛi baanyɛ aye abua wɔ kɛkpɛ wɔyiŋ yɛ mɛɛ gbɛ nɔ?
17 Ani mɛi krokomɛi baanyɛ aye abua wɔ kɛkpɛ wɔyiŋ? Hɛɛ, Yehowa kɛ aŋkroaŋkroi ni amɛdara yɛ ehe nilee mli eduro asafo lɛ. (Efesobii 4:11, 12) Amɛbaanyɛ amɛye amɛbua wɔ, ni wɔbaanyɛ wɔbi ŋaawoo yɛ amɛdɛŋ titri kɛ́ ehe bahia ni wɔkpɛ wɔyiŋ yɛ sane ko ni yɔɔ hiɛdɔɔ he. Aŋkroaŋkroi ni yɔɔ Nyɔŋmɔ he nilee babaoo kɛ shihilɛ mli niiashikpamɔ lɛ baanyɛ agbala wɔjwɛŋmɔ kɛya Biblia shishitoo mlai krokomɛi ni baanyɛ aná wɔyiŋkpɛɛ lɛ nɔ hewalɛ lɛ anɔ, ni eye ebua wɔ hu ni ‘wɔyoo nii ni he hiaa titri lɛ.’ (Filipibii 1:9, 10) Shi kɛlɛ, abɔɔ wɔ kɔkɔ akɛ: Esa akɛ wɔkwɛ jogbaŋŋ koni wɔkaha mɛi krokomɛi miikpɛ yiŋ kɛmiiha wɔ. Eji wɔsɔ̃ ni esa akɛ wɔ diɛŋtsɛ wɔtsu he nii.
Ani Be Fɛɛ Be Nibii Kpakpai Jɛɔ Mli Baa?
18. Mɛni abaanyɛ akɛɛ yɛ nibii ni jɛɔ yiŋ ni akpɛɔ yɛ gbɛ ni ja nɔ lɛ mli baa lɛ he?
18 Ani be fɛɛ be nibii kpakpai jɛɔ Biblia shishitoo mlai kɛ henilee ni akɛtsuɔ nii kɛkpɛɔ yiŋ lɛ mli baa? Hɛɛ, beni nibii aaayawula shi aahu lɛ, nɔ kpakpa ejɛ mli kɛba. Kɛlɛ, bei komɛi lɛ nibii ni jɛɔ mli baa amrɔmrɔ lɛ nyɛɔ ehaoɔ mɔ fioo. Shadrak, Meshak, kɛ Abednego le akɛ abaanyɛ agbe amɛ yɛ nakai amaga wulu ni amɛkpɛ amɛyiŋ akɛ amɛjáaa lɛ lɛ hewɔ. (Daniel 3:16-19) Nakai nɔŋŋ beni bɔfoi lɛ kɛɛ Yudafoi Akuashɔŋ lɛ akɛ esa akɛ abo Nyɔŋmɔ moŋ toi fe gbɔmɛi lɛ, ayi amɛ dani aŋmɛɛ amɛhe. (Bɔfoi lɛ Asaji 5:27-29, 40) Kɛfata he lɛ, “be kɛ nibii ni aleee ni baa trukaa” lɛ baanyɛ asa yiŋkpɛɛ fɛɛ yiŋkpɛɛ he yɛ gbɛ gbonyo nɔ. (Jajelɔ 9:11, NW) Kɛ́ wɔkpɛ yiŋ yɛ gbɛ ni ja nɔ, ní kɛlɛ wɔkɛ naagba kpe lɛ wɔbaanyɛ wɔná nɔmimaa akɛ Yehowa baaye abua wɔ koni wɔnyɛ naa wɔdamɔ, ni naagbee lɛ ebaajɔɔ wɔ.—2 Korintobii 4:7.
19. Te wɔɔfee tɛŋŋ wɔkɛ ekãa atsu wɔyiŋkpɛɛ he sɔ̃ ni kã wɔnɔ lɛ he nii?
19 Belɛ, kɛ́ wɔmiikpɛ wɔyiŋ yɛ sane ko he lɛ, esa akɛ wɔpɛi shishitoo mlai ni yɔɔ Ŋmalɛi lɛ amli lɛ mli koni wɔkɛ wɔjwɛŋmɔŋ nyɛmɔi lɛ atsu nii kɛtsu amɛhe nii. Kwɛ bɔ ni wɔdaa Yehowa shi akɛ eto gbɛjianɔ koni emumɔ krɔŋkrɔŋ lɛ kɛ mɛi ni edara yɛ ehe nilee gbɛfaŋ ni yɔɔ asafo lɛ mli lɛ aye abua wɔ! Nyɛhaa wɔkɛ gbɛtsɔɔmɔi kɛ nibii krokomɛi ni akɛduro wɔ bɔni afee ni eye ebua wɔ lɛ atsua nii, ni wɔkɛ ekãa atsu sɔ̃ ni kã wɔnɔ akɛ wɔkpɛ wɔyiŋ yɛ nilee mli lɛ he nii.
Mɛni Okase?
• Mɛni ji nɔ̃ titri ni haa mɔ nyɛɔ ekpɛɔ eyiŋ yɛ nilee mli?
• Mɛɛ gbɛ nɔ hiɛ ni wɔyaa yɛ Nyɔŋmɔ he nilee mli lɛ saa nanamɛi ni wɔhalaa lɛ he?
• Kɛ́ wɔmiikpɛ wɔyiŋ yɛ nitsumɔ taomɔ mli lɛ, mɛɛ nibii komɛi ni he hiaa ebaabi ni wɔsusu he?
• Mɛɛ nibii yɔɔ ni yeɔ buaa wɔ kɛkpɛɔ wɔyiŋ?
[Nikasemɔ lɛ he Sanebimɔi]
[Mfoniri ni yɔɔ baafa 22]
Wɔkaseɔ nɔ ko ni he hiaa waa kɛjɛɔ Adam kɛ Hawa toigbele lɛ mli
[Mfoniri ni yɔɔ baafa 24]
Pɛimɔ Biblia shishitoo mlai lɛ amli okwɛ dani okpɛ oyiŋ yɛ sane ko ni he hiaa waa he