“Nyɛsaraa”

YƐ BLEMA beaŋ lɛ, agbókwɛlɔi tsuɔ nii yɛ maŋ lɛ kɛ sɔlemɔwe lɛ agbói anaa, ni yɛ shihilɛi komɛi amli lɛ amɛtsuɔ nii yɛ aŋkroaŋkroi ashia agbói anaa. Kɛfata agbói lɛ ní agbókwɛlɔi lɛ ŋamɔɔ gbɛkɛ lɛ he lɛ, amɛtsuɔ nii hu akɛ bulɔi. Akɛni maŋ lɛ shweshweeshwefeemɔ damɔ tsɛmɔ ni amɛaatsɛ gbɔmɛi lɛ ní amɛbɔ amɛ kɔkɔ yɛ oshara ko ni baa lɛ he lɛ nɔ hewɔ lɛ, eji nitsumɔ ni akɛwoɔ mɛi ni ayɔɔ hekɛnɔfɔɔ waa yɛ amɛmli lɛ adɛŋ.

Yesu Kristo le nitsumɔ ni agbókwɛlɔi ní atsɛɔ amɛ hu akɛ agbónaakwɛlɔi lɛ tsuɔ lɛ waa. Yɛ be ko mli lɛ, ekɛ ekaselɔi lɛ to agbónaakwɛlɔi ahe ni ewo amɛ hewalɛ ní amɛsara yɛ Yudafoi lɛ anibii agbɛjianɔtoo lɛ ni miiba enaagbee lɛ hewɔ. Ewie akɛ: “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ. Tamɔ nuu ko ni edom eshĩ ewe, ni . . . efã agbónaakwɛlɔ lɛ akɛ ebu. No hewɔ lɛ nyɛsaraa; ejaakɛ nyɛleee beyinɔ ni shiatsɛ lɛ baa.”—Marko 13:33-35.

Nakai nɔŋŋ wolo tɛtrɛɛ nɛɛ, ni ji Buu-Mɔɔ lɛ kɛ Yesu hewalɛwoo akɛ “nyɛsaraa” lɛ etee nɔ eha nɔ ni fe afii 125 nɛ. Yɛ mɛɛ gbɛ nɔ? Taakɛ awie yɛ wolo tɛtrɛɛ nɛɛ baafa 2 lɛ, “Eyaa nɔ ekwɛɔ bɔ ni nibii ni yaa nɔ yɛ je lɛ mli lɛ haa Biblia gbalɛ baa mli lɛ. Ekɛ sanekpakpa lɛ shɛjeɔ mɛi fɛɛ amii akɛ etsɛŋ ni Nyɔŋmɔ Maŋtsɛyeli lɛ baakpata mɛi ni waa amɛnanemɛi gbɔmɛi ayi lɛ ahiɛ, ni akɛ ebaaha shikpɔŋ lɛ atsɔ paradeiso.” Ajara Buu-Mɔɔ ekomekomei ni fa fe 26,000,000 yɛ wiemɔi 150 mli yɛ jeŋ fɛɛ, ni enɛ haa ebafeɔ jamɔ he wolo ni aja waa fe fɛɛ yɛ je lɛŋ. Taakɛ blema agbókwɛlɔi lɛ ji lɛ, Yehowa Odasefoi miitsɔ wolo tɛtrɛɛ nɛɛ nɔ amɛmiiwo gbɔmɛi ni yɔɔ he fɛɛ he lɛ hewalɛ akɛ ‘amɛsara,’ ejaakɛ etsɛŋ ni Nuŋtsɔ lɛ, ni ji Yesu Kristo baaku esɛɛ ni ekɛ fɔbuu kojomɔ baaba nibii agbɛjianɔtoo nɛɛ nɔ.—Marko 13:26, 37.