Sanebimɔi ni Jɛ Kanelɔi Adɛŋ

Beni bɔfo Yohane ŋma akɛ “suɔmɔ ni eye emuu lɛ shwieɔ gbeyeishemɔ” lɛ, mɛni “suɔmɔ ni eye emuu” ni ewie he lɛ tsɔɔ, ni mɛɛ “gbeyeishemɔ” eshwieɔ lɛ?

Bɔfo Yohane ŋma akɛ: “Gbeyeishemɔ bɛ suɔmɔ mli, shi moŋ suɔmɔ ni eye emuu lɛ shwieɔ gbeyeishemɔ mli piŋmɔ shi mɔ ni sheɔ gbeyei lɛ, enako eye emuu yɛ suɔmɔ mli.”—1 Yohane 4:18.

Wiemɔi ni tsɔ ŋmalɛ nɛɛ hiɛ lɛ tsɔɔ akɛ Yohane miiwie wiemɔ mli heyeli he—titri lɛ wekukpaa ni yɔɔ suɔmɔ kɛha Nyɔŋmɔ kɛ heyeli ni ayɔɔ ákɛ akɛ Lɛ awie lɛ teŋ. Wɔbaanyɛ wɔna enɛ kɛ́ wɔkane kuku 17 [NW] lɛ akɛ: “Nɛkɛ ji bɔ ni aha suɔmɔ eye emuu yɛ wɔmli, koni wɔná wiemɔ mli heyeli yɛ kojomɔ gbi lɛ nɔ.” Bɔ ni Kristofonyo ko sumɔɔ Nyɔŋmɔ ni enuɔ he akɛ Nyɔŋmɔ sumɔɔ lɛ lɛ náa wiemɔ mli heyeli ni eyɔɔ lɛ nɔ hewalɛ tɛ̃ɛ, kɛ́ ebɛŋkɛ Nyɔŋmɔ yɛ sɔlemɔ mli—nakai nɔŋŋ hu eji kɛ́ ebɛ eko.

Shishinumɔ yɛ wiemɔ ni ji “suɔmɔ ni eye emuu” lɛ mli. Taakɛ akɛtsu nii yɛ Biblia lɛ mli lɛ, jeee be fɛɛ be wiemɔ “emuu” lɛ tsɔɔ emuuyeli, ni ji emuu kwraa ni aye kɛwula shi, shi akɛfɔɔ nitsumɔ yɛ gbɛ kroko nɔ. Ákɛ nɔkwɛmɔnɔ lɛ, Yesu wie yɛ e-Gɔŋ nɔ Shiɛmɔ lɛ mli akɛ: “No hewɔ lɛ nyɛhia kɛwulaa shi, tamɔ bɔ ni nyɛtsɛ ni yɔɔ ŋwɛi lɛ hi kɛwula shi lɛ.” Yesu miikɛɛ esɛɛnyiɛlɔi lɛ akɛ kɛ́ amɛsumɔɔ mɛi ni sumɔɔ amɛ pɛ lɛ, amɛsuɔmɔ lɛ baafee nɔ ni yeee emuu, nɔ ni shɛɛɛ, nɔ ni etɔ fã. Esa akɛ amɛha amɛsuɔmɔ lɛ aye emuu loo eyi obɔ kɛtsɔ amɛhenyɛlɔi ni amɛaasumɔ lɛ nɔ. Nakai nɔŋŋ beni Yohane ŋma “suɔmɔ ni eye emuu” lɛ he sane lɛ, no mli lɛ eewie suɔmɔ ni ayɔɔ kɛha Nyɔŋmɔ ni jɛ tsui muu fɛɛ mli ni eda waa, ni kɔɔ mɔ shihilɛ mli nɔ fɛɛ nɔ he lɛ he.—Mateo 5:46-48; 19:20, 21.

Kɛ́ Kristofonyo ko kɛ Nyɔŋmɔ miiwie yɛ sɔlemɔ mli lɛ, ele jogbaŋŋ akɛ eji eshafeelɔ ni eyeee emuu. Shi kɛ́ suɔmɔ ni eyɔɔ kɛha Nyɔŋmɔ kɛ bɔ ni enuɔ suɔmɔ ni Nyɔŋmɔ yɔɔ kɛha lɛ he lɛ eda kɛmɔ shi lɛ, gbeyeishemɔ akɛ abaabu lɛ fɔ́ loo abaakpoo lɛ lɛ etsiŋ enaa koni ekasɔle. Shi moŋ enáa miishɛɛ ni ekɛ wiemɔ mli heyeli wieɔ nɔ ni yɔɔ etsui mli, ni ekpaa fai koni adamɔ kpɔmɔ afɔleshaa ni Nyɔŋmɔ jɛ esuɔmɔ mli eto he gbɛjianɔ kɛtsɔ Yesu Kristo nɔ lɛ nɔ akɛ ehe eshai lɛ ake lɛ. Enáa nɔmimaa akɛ Nyɔŋmɔ ebo efaikpamɔi lɛ atoi.

Mɛɛ gbɛ nɔ mɔ ko aaatsɔ ‘aye emuu yɛ suɔmɔ mli’ koni ‘eshwie’ gbeyeishemɔ akɛ abaabu lɛ fɔ́ loo abaakpoo lɛ lɛ kɛya? Bɔfo Yohane kɛɛ akɛ: “Mɔ fɛɛ mɔ ni yeɔ [Nyɔŋmɔ] ewiemɔ lɛ nɔ lɛ, lɛɛlɛŋ, lɛ emli Nyɔŋmɔ suɔmɔ lɛ eye emuu yɛ.” (1 Yohane 2:5) Susumɔ he okwɛ: Kɛ́ beni wɔji eshafeelɔi lolo lɛ Nyɔŋmɔ sumɔɔ wɔ lɛ, ani esumɔŋ wɔ babaoo kɛ́ wɔtsake wɔtsui lɛɛlɛŋ ni wɔbɔ mɔdɛŋ koni ‘wɔye ewiemɔ lɛ nɔ’ lɛ? (Romabii 5:8; 1 Yohane 4:10) Yɛ anɔkwale mli lɛ, kɛ́ wɔtee nɔ wɔye anɔkwa lɛ, wɔbaanyɛ wɔná hekɛnɔfɔɔ ni bɔfo Paulo ná lɛ nɔŋŋ eko, beni ewie yɛ Nyɔŋmɔ he akɛ: “Mɔ nɔŋŋ ni kamaaa wɔ lɛ diɛŋtsɛ ebi lɛ, shi moŋ eŋɔ lɛ eha yɛ wɔ fɛɛ wɔnajiaŋ lɛ; ani eŋɔŋ nibii fiaa efataŋ ehe ekeŋ wɔ?”—Romabii 8:32.