Ani Mɛi Krokomɛi Ahe Miihia Wɔ Lɛɛlɛŋ?

JEŊ nilelɔ ko ni ehe gbɛi waa ni gbɛi ji Albert Einstein kɛɛ akɛ: “Kɛ́ wɔpɛi wɔshihilɛ kɛ wɔnifeemɔi amli lɛ, wɔnaa amrɔ nɔŋŋ akɛ etamɔ nɔ ni wɔnifeemɔi kɛ nibii fɛɛ ni wɔshweɔ lɛ kɛ adesai krokomɛi ni yɔɔ shihilɛ mli lɛ anɔ̃ yɛ tsakpaa.” Ekɛfata he akɛ: “Wɔyeɔ niyenii ni mɛi krokomɛi du, wɔbuɔ mamai ni mɛi krokomɛi fee, wɔhiɔ shiai ni mɛi krokomɛi mamɔ amli. . . . Mɔ aŋkro lɛ ji mɔ ni eji ni ehiɛ shishinumɔ akɛ ebɛ nibii babaoo tsɔ̃ yɛ mɔ aŋkro ni eji lɛ hewɔ, shi moŋ ákɛ eji adesai aweku ko ní da ní kudɔɔ eshihilɛ yɛ helooŋ kɛ mumɔŋ kɛjɛ efɔmɔ mli kɛyashi egbele mli lɛ mlinyo.”

Yɛ kooloi ateŋ lɛ, ewaaa kwraa akɛ ooona naanyobɔɔ ni damɔ henumɔ nɔ ni miiya nɔ yɛ amɛteŋ. Shwuɔi nyiɛɔ yɛ kui amli ni amɛbuɔ amɛbii lɛ ahe jogbaŋŋ. Jata yei feɔ ekome kɛgbɔbiɔ ni amɛkɛ jata hii lɛ yeɔ nii ni amɛnine eshɛ nɔ lɛ. Atuii feɔ ekome kɛshwɛɔ ni amɛbuɔ kooloi krokomɛi loo gbɔmɛi ni sereɔ ni amɛyajeɔ haomɔ mli lɛ ahe po.

Shi kɛlɛ, jeŋ nilelɔi ni kaseɔ adesa shihilɛ he nii lɛ ekadi su ko ni miihao mɛi waa yɛ adesai ateŋ. Taakɛ adafitswaa wolo ko ni aŋma yɛ Mexico lɛ tsɔɔ mli lɛ, jeŋ nilelɔi ni kaseɔ adesa shihilɛ he nii lɛ ateŋ mɛi komɛi susuɔ akɛ “afii nyɔŋmai abɔ ni aŋkroaŋkroi kɛtsi amɛhe kɛjɛ mɛi ahe kɛ kwasafoŋ shihilɛ ni fiteɔ fiofio lɛ ená hewalɛ gbonyo yɛ U.S. maŋbii lɛ anɔ.” Adafitswaa wolo lɛ tsɔɔ mli akɛ “maŋ lɛ nɔyaa damɔ tsakemɔ diɛŋtsɛ ni aaafee yɛ shihilɛ mli, nɔ ni biɔ ni aku sɛɛ kɛya kwasafoŋ shihilɛ mli ekoŋŋ lɛ nɔ.”

Nɛkɛ naagba nɛɛ miiya nɔ titri yɛ mɛi ni yɔɔ maji ni etee hiɛ lɛ amli lɛ ateŋ. Su ko ni miihe shi waa yɛ mɛi babaoo ateŋ ji ni atsi he kɛjɛ mɛi ahe. Gbɔmɛi miitao ni ‘amɛba amɛjeŋ bɔ ni amɛsumɔɔ’ ni amɛsumɔɔɔ kwraa ni mɛi krokomɛi kɛ ‘amɛhe woɔ amɛsaji amli.’ Mɛi etsɔɔ mli akɛ, nɛkɛ su nɛɛ eha adesa weku lɛ eyaje shihilɛ ko ní ewaaa kwraa akɛ aaaná henumɔŋ naagbai, jwɛŋmɔŋ nɔnyɛɛ, kɛ hegbee po mli.

Datrɛfonyo Daniel Goleman wie yɛ enɛ he akɛ: “He ni atsiɔ kɛjɛɔ mɛi ahe—jwɛŋmɔ ni mɔ ko náa akɛ ebɛ mɔ ko mɔ ko ni ekɛ lɛ aaagba eteemɔŋ saji loo ekɛ lɛ aaaná naanyobɔɔ ni mli wa lɛ—woɔ hela loo gbele ni baanyɛ aba lɛ mli wu.” Amaniɛbɔɔ ko ni atswa he adafi yɛ wolo tɛtrɛɛ ni ji Science lɛ mli lɛ mu sane naa akɛ, he ni atsiɔ kɛjɛɔ mɛi ahe lɛ ‘ji su ko ni kɛ gbelei babaoo baa, tamɔ bɔ ni tawa shɛremɔ, lá ni faa tsɔ fe nine ni haa tsui tswaa kpalakpala, fɔ ni faa yɛ mɔ mli, shwilɛ ni ashwiɔ tsɔ fe nine, kɛ kpɔiaŋgbɔlemɔ ni akɛ he wooo mli ji lɛ.’

Belɛ, yɛ yiŋtoi srɔtoi ahewɔ lɛ, mɛi krokomɛi ahe miihia wɔ lɛɛlɛŋ. Wɔnyɛŋ wɔhi shi ni mɛi krokomɛi ayelikɛbuamɔ he ehiaaa wɔ. No hewɔ lɛ, te aaafee tɛŋŋ atsu naagba ni ji he ni atsiɔ kɛjɛɔ mɛi ahe lɛ he nii? Mɛni eha shishinumɔ diɛŋtsɛ eba mɛi babaoo awala shihilɛ mli lɛ? Sane ni nyiɛ sɛɛ lɛ baaha sanebimɔi nɛɛ ahetoo.

[Wiemɔ ni akɔ ni akɛmiitsu nii ni yɔɔ baafa 3]

“Etamɔ nɔ ni wɔnifeemɔi kɛ nibii fɛɛ ni wɔshweɔ lɛ kɛ adesai krokomɛi ni yɔɔ shihilɛ mli lɛ anɔ̃ yɛ tsakpaa.”—Albert Einstein