Boaz kɛ Rut Gbalashihilɛ ni Akpaaa Gbɛ Lɛ

AGBIƐNAA beaŋ nitsumɔ miiya nɔ yɛ ŋmaagbeemɔhe ni bɛŋkɛ Betlehem lɛ. Ehe gbi muu fɛɛ. Abele fɔ́ ní ashã lɛ ŋmajee haa nitsulɔi ni hɔmɔ miiye amɛ lɛ leɔ akɛ be eshɛ kɛha niyeli. Mɔ fɛɛ mɔ baaye enitsumɔ lɛ mli ŋɔɔmɔ.

Boaz, ni ji shikpɔŋtsɛ ko ni yɔɔ nii babaoo lɛ yeɔ nii ni enuɔ nii ni emii shɛɔ ehe, ni ejɔ́ɔ ehe yɛ ŋmaa babaoo ko ni abua naa lɛ masɛi. Sɛɛ mli lɛ, nikpamɔ gbi lɛ baa naagbee, ni mɔ fɛɛ mɔ taoɔ hejɔɔmɔhe ko koni eyajɔɔ ehe yɛ jɛmɛ. Akɛni Boaz mii eshɛ ehe agbɛnɛ hewɔ lɛ, eha ehe mama ni wɔ nyɔ enɔ.

Teemɔŋ Kpee Ko

Nyɔɔŋteŋ lɛ, Boaz hiɛ tsɛ̃ ni fɛ̃i miiye lɛ ni eekpokpo. Naakpɛɛ sane ji akɛ, aje gbɛ akpá enaji ahe mama lɛ, ni mɔ ko kã enajiashi tuuntu! Akɛni enyɛɛɛ mɔ lɛ eyoo yɛ duŋ lɛ mli hewɔ lɛ, ebi akɛ: “Bo namɔŋ?” Yoo ko gbee here nɔ akɛ: “Mi oweyoo Rut ni; lɛɛmɔ ofiji amli oha oweyoo nɔ; ejaakɛ weku lɛ mli niyelɔ jio.”—Rut 3:1-9.

Amɛgba sane yɛ duŋ lɛ mli ni mɔ ko nuuu. Yei eyaaa ŋmaagbeemɔhe ko yɛ gbɛ ni tamɔ nɛkɛ nɔ. (Rut 3:14) Kɛlɛ, yɛ Boaz famɔ naa lɛ, Rut tee nɔ ekã shi yɛ enajiashi ni ete shi etee dani je bɔi tsɛremɔ, ni kɛtsɔ no nɔ lɛ eye ehe kɛjɛ wiemɔi ni ejaaa ni abaawie kɛshi lɛ lɛ he.

Ani enɛ ji suɔmɔ ni kã nuu kɛ yoo teŋ kpee ko? Ani Rut—oblayoo okulafo ohiafo, ni jɛ wɔŋjalɔi amaŋ ko mli lɛ tsɔ ŋaa gbɛ nɔ elaka nuu niiatsɛ ni eda nɛɛ? Aloo Boaz kɛ shihilɛ mli ni Rut yɔɔ kɛ shoo ni efee nakai gbɛkɛ lɛ miitsu nii koni ekɛná ehe sɛɛ? Dabi. Nɔ ni tee nɔ lɛ ji anɔkwayeli kɛ suɔmɔ kɛha Nyɔŋmɔ he nɔkwɛmɔnɔ diɛŋtsɛ. Ni anɔkwalei ni kɔɔ he lɛ hu taa mɔ mli waa.

Shi namɔ ji Rut? Mɛni ji eyiŋtoo? Ni namɔ ji Boaz, nuu niiatsɛ nɛɛ lɛ?

“Yoo Kpakpa”

Afii komɛi asɛɛ dani nɛkɛ sane nɛɛ aaaba lɛ, hɔmɔ ba Yuda. Israel weku ko kɛ emli bii ejwɛ—Elimelek; eŋa Naomi; kɛ amɛbihii enyɔ, Malon kɛ Kilion—fã kɛyahi Moab shikpɔŋ ni baa nii lɛ nɔ. Amɛbihii lɛ kɛ Moab yei enyɔ, Rut kɛ Orpa bote gbalashihilɛ mli. Beni hii etɛ lɛ egboi yɛ Moab sɛɛ lɛ, yei etɛ lɛ nu he akɛ shihilɛ yɛ Israel etee hiɛ saŋŋ. No hewɔ lɛ Naomi—ni amrɔ nɛɛ eji yoo okulafo, ni werɛ eho ehe, ni bɛ bii loo nabii lɛ—kpɛ eyiŋ akɛ ebaaku esɛɛ kɛya ejakumaŋ.—Rut 1:1-14.

Beni amɛnyiɛ gbɛ nɔ kɛyaa Israel lɛ, Naomi tsɔ Orpa yiŋ koni eku esɛɛ kɛya emaŋ. No sɛɛ lɛ, Naomi kɛɛ Rut akɛ: “Naa, obienyɛ lɛ eku esɛɛ etee emaŋ kɛ enyɔŋmɔ lɛ ŋɔɔ; kuu osɛɛ ni  otiu obienyɛ lɛ!” Shi Rut kɛɛ: “Kaahiɛ mi doo akɛ mishio, . . . shi he fɛɛ he ni oyaa lɛ, matee . . . Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ. He ni ooogbo yɛ lɛ, jɛi magbo yɛ, ni jɛi nɔŋŋ aaafũ mi yɛ.” (Rut 1:15-17) No hewɔ lɛ, yei okulafoi enyɔ ni amɛhe nibii fɛɛ etã lɛ ku amɛsɛɛ kɛtee Betlehem. Suɔmɔ kɛ kwɛmɔ ni Rut kɛha eshaayoo lɛ yɛ jɛmɛ lɛ sa akutsoŋbii lɛ ahiɛ aahu akɛ amɛbu lɛ akɛ ‘ehi ha Naomi fe bihii kpawo tete.’ Mɛi krokomɛi wie ehe akɛ eji “yoo kpakpa.”—Rut 3:11; 4:15.

Beni abɔi akoko kpamɔ yɛ Betlehem lɛ, Rut kɛɛ Naomi akɛ: “Ha maya ŋmɔji lɛ amli, ni mayanyiɛ mɔ ni mihiɛ aaaba nyam yɛ ehiɛ lɛ sɛɛ maye akoko kpɛkpɛo!”—Rut 2:2.

Heniianaa lɛ eyaje Boaz, ni ji eshaanuu Elimelek wekunyo lɛ ŋmɔshi. Ebi mɔ ni kwɛɔ ŋmɔ lɛ nɔ lɛ gbɛ koni eye kpɛkpɛo. Ekãa ni ekɛyeɔ kpɛkpɛo lɛ sa kadimɔ waa, ni mɔ ni kwɛɔ ŋmɔ lɛ nɔ lɛ jie eyi eha Boaz.—Rut 1:22–2:7.

Yibaalɔ kɛ Ejurɔfeelɔ

Boaz ji Yehowa jálɔ ni etuu ehe eha lɛ. Daa leebi lɛ, Boaz ŋaa enikpalɔi lɛ kɛ wiemɔi nɛɛ akɛ: “Yehowa afata nyɛhe,” ni amɛhereɔ nɔ akɛ: “Yehowa ajɔɔo!” (Rut 2:4) Beni Boaz na mɔdɛŋbɔɔ ni Rut kɛtsuɔ nii kɛ beni ená ele enɔkwayeli kɛha Naomi lɛ sɛɛ lɛ, eto kpɛkpɛoyeli he gbɛjianɔ krɛdɛɛ eha Rut. Yɛ kukufoo mli lɛ, ekɛɛ lɛ akɛ: ‘Hii shi yɛ miŋmɔ lɛ mli; ehe ehiaaa ni oya mɛi krokomɛi aŋmɔshi. Kpɛtɛmɔ miblayei lɛ ahe; amɛfeŋ bo efɔŋ ko. Miwo miblahii lɛ akita akɛ mɔ ko akagba onaa. Ni kɛ́ kumai miiye bo lɛ, amɛbaayɛ nuŋma amɛha bo.’—Rut 2:8, 9.

Rut ho ekula shikpɔŋ, ni ekɛɛ: ‘Mɛɛ hewɔ ni mi mɔkpɔŋ nɛɛ mihiɛ eba nyam yɛ ohiɛ lɛ?’ Boaz ha hetoo akɛ: ‘Agba mi nibii fɛɛ ni ofee oha oshaayoo lɛ yɛ owu gbele lɛ sɛɛ lɛ fɛɛ pɛpɛɛpɛ—bɔ ni oshi otsɛ, onyɛ, owekumɛi, kɛ shikpɔŋ ni afɔo yɛ nɔ lɛ, ni oyiŋ kɛba maŋ ni oleee oto sá lɛ mli lɛ. Yehowa atoo onii ni otsu lɛ najiaŋ, ni ewoo nyɔmɔ shishiishi!’—Rut 2:10-12.

Boaz ebɔɔɔ mɔdɛŋ akɛ eeeha Rut asumɔ lɛ. Yijiemɔi ni ekɛha lɛ lɛ jɛ anɔkwayeli mli. Rut ba ehe shi yɛ anɔkwayeli mli, ni eda lɛ shi yɛ emiishɛjemɔ ni ekɛha lɛ kɛtsara nɔ lɛ hewɔ. Ebu enɛ akɛ nɔ ni esaaa lɛ, ni etee nɔ etsu nii waa fe tsutsu lɛ po. Sɛɛ mli beni shɛ niyeli be lɛ, Boaz kɛɛ Rut akɛ: ‘Tsi oba, ye aboloo lɛ eko, ní okɛ atroma lɛ atsɔ ashiŋ lɛ mli!’ Eye nii ni etɔ, ni eshi niyenii lɛ eko koni ekɛyaha Naomi yɛ shia.—Rut 2:14.

Beni gbi lɛ ba naagbee lɛ, Rut eye kpɛkpɛo aaafee akoko litai 22. Ekɛ enɛ kɛ niyenii ni eshwɛ lɛ tee shia kɛyaha Naomi. (Rut 2:15-18) Akɛni Naomi mii eshɛ ehe yɛ niyenii babaoo lɛ he hewɔ lɛ, ebi akɛ: “Nɛgbɛ otee oyaye kpɛkpɛo yɛ ŋmɛnɛ? . . . Mɔ ni tse ehiɛ ehao lɛ, aaajɔɔ lɛ!” Beni Naomi ná ele akɛ Boaz ni lɛ, ekɛɛ akɛ: “Yehowa, mɔ ni ehako emɔbɔnalɛ sɛɛ afo  yɛ hiɛkalɔi kɛ gbohii fɛɛ anɔ lɛ, aaajɔɔ lɛ! . . . Nuu lɛ wɔ mɔ ni, wɔweku lɛ mli niyelɔi lɛ eko ji lɛ.”—Rut 2:19, 20.

‘Shihilɛhe ko’ Taomɔ

Akɛni Naomi miisumɔ ni ená ‘shihilɛhe ko’ loo shia ko eha eshaayoo lɛ hewɔ lɛ, eŋɔ hegbɛ lɛ koni eto gbɛjianɔ kɛbi niyelɔ gbɛnaa nii lɛ yɛ Nyɔŋmɔ Mla lɛ kɛ gbeekpamɔ naa. (3 Mose 25:25; 5 Mose 25:5, 6) Agbɛnɛ, Naomi kɛ gbɛtsɔɔmɔ ko ni mɔɔ shi jogbaŋŋ ha Rut, yɛ gbɛ ko nɔ lɛ, nɔ ni yɔɔ miishɛɛ po, nifeemɔ he ŋaa—nifeemɔ ko ni baagbala Boaz jwɛŋmɔ. Akɛni asaa Rut, ni atsɔɔ lɛ nii jogbaŋŋ hewɔ lɛ, ekpeleke shi kɛtee Boaz ŋmaagbeemɔhe lɛ beni je ena ni duŋ ewo. Eyanina lɛ ni ewɔ. Ekpá mama ni ha enaji ahe lɛ, ni emɛ kɛyashi ehiɛ aaatsɛ̃.—Rut 3:1-7.

Beni Boaz te shi lɛ, ŋwanejee ko bɛ he akɛ Rut okadifeemɔŋ nifeemɔ lɛ ye bua lɛ ni enu bɔ ni enibimɔ akɛ ‘elɛɛ efiji amli eha eweyoo nɔ’ lɛ he hiaa ha lɛ shishi. Akɛni Yudanyo ni eda nɛɛ ji Rut wu ni egbo, ni ji Malon wekunyo hewɔ lɛ, Rut nifeemɔ lɛ ha ebayɔse egbɛnaa nii akɛ niyelɔ lɛ.—Rut 3:9.

Akpaaa Rut gbɛkɛnaashi saramɔ nɛɛ gbɛ. Ni kɛlɛ, Boaz nifeemɔ tsɔɔ akɛ Rut nibimɔ kɛha niyelɔ gbɛnaa nii lɛ jeee nɔ ko ni akpaaa gbɛ kwraa. Boaz miisumɔ ni etsu Rut nibimɔ lɛ he nii.

Ekolɛ yeyeeyefeemɔ je kpo yɛ Rut gbee mli, ni no tsirɛ Boaz ni ema nɔ mi eha lɛ akɛ: “Ni agbɛnɛ, mibi, kaashe gbeyei! Nɔ fɛɛ nɔ ni okɛɔ lɛ mafee mahao; ejaakɛ mimaŋbii lɛ fɛɛ le akɛ yoo kpakpa jio.”—Rut 3:11.

Ákɛ Boaz bu Rut nifeemɔi lɛ akɛ eji jeŋba kpakpa diɛŋtsɛ lɛ jeɔ kpo faŋŋ yɛ ewiemɔi nɛɛ amli akɛ: “Yehowa ajɔɔo, mibi! Ejurɔ ni ofee sɛɛkpee nɛɛ fe tsutsu nɔ lɛ tete.” (Rut 3:10) Klɛŋklɛŋ lɛ, Rut jie mɔbɔnalɛ loo anɔkwa suɔmɔ kpo etsɔɔ Naomi. Yɛ sɛɛkpee lɛ, akɛni Boaz, ni ji nuu ni ye lɛ onukpa kwraa lɛ ji niyelɔ lɛ hewɔ lɛ, ejie ehe shi etsɔɔ lɛ yɛ gbɛ ni pɛsɛmkunya bɛ mli nɔ akɛ mɔ ni esa akɛ akpɔ̃ lɛ. Eesumɔ ni efɔ bii yɛ Malon, ni ji ewu ni egbo lɛ kɛ Naomi gbɛi amli.

Niyelɔ ko Gbala Ehe Shi

Enɔ jetsɛremɔ lɛ, Boaz tsɛ niyelɔ ko ni atsɛ lɛ akɛ “Ashimashi,” ni ji Naomi wekunyo ko ni ekɛ lɛ wekukpaa lɛ bɛŋkɛ kpaakpa fe Boaz kɛba. Boaz wie yɛ maŋbii lɛ kɛ onukpai lɛ ahiɛ akɛ: ‘Misusuɔ akɛ esa akɛ mawó otoi nɔ yɛ ogbɛnaa akɛ okpɔ̃ shikpɔŋ kuku ni ji Naomi wu Elimelek nɔ̃ lɛ, ejaakɛ esa akɛ ehɔ̃ɔ.’ Boaz tsa nɔ akɛ: ‘Ani obaakpɔ̃? Kɛ jeee nakai lɛ, makpɔ̃.’ Beni ebo Boaz toi sɛɛ lɛ, Ashimashi kɛɛ akɛ ebaakpɔ̃.—Rut 4:1-4.

Shi Ashimashi naa baakpɛ ehe! Agbɛnɛ Boaz jaje yɛ odasefoi lɛ fɛɛ ahiɛ akɛ: “Gbi ni ooohe shikpɔŋ lɛ yɛ Naomi dɛŋ lɛ, ja oŋɔ Rut, Moab yoo lɛ, ni ji mɔ ni egbo lɛ ŋa lɛ  nakai gbi lɛ nɔŋŋ, koni atee mɔ ni egbo lɛ gbɛi shi yɛ egboshi shikpɔŋ lɛ nɔ.” Akɛni wekunyo ni bɛŋkɛ fe fɛɛ nɛɛ miishe gbeyei akɛ ekolɛ eeekpata lɛ diɛŋtsɛ egboshinii lɛ ahiɛ hewɔ lɛ, eŋmɛɛ egbɛnaa akɛ niyelɔ lɛ he ekɛɛ: “Minyɛŋ makpɔ̃!”—Rut 4:5, 6.

Yɛ kusum naa lɛ, esa akɛ nuu ni kpooɔ akɛ eeekpɔ̃ gboshinii lɛ ajie etokota ni ekɛha enaanyo lɛ. No hewɔ lɛ, beni niyelɔ lɛ kɛɛ Boaz akɛ: “Hemɔ oha ohe!” lɛ, ejie etokota lɛ. Kɛkɛ ni Boaz kɛɛ onukpai lɛ kɛ maŋbii lɛ fɛɛ akɛ: “Nyɛ ji odasefoi ŋmɛnɛ, akɛ mihe nɔ fɛɛ nɔ ni ji Elimelek nɔ kɛ nɔ fɛɛ nɔ ni ji Kilion kɛ Malon nɔ lɛ yɛ Naomi dɛŋ; asaŋ Rut, Moab yoo, ni ji Malon ŋa lɛ hu mihe lɛ, ni etsɔ miŋa, koni matée mɔ ni egbo lɛ gbɛi shi yɛ egboshi shikpɔŋ lɛ nɔ . . . Nyɛ ji odasefoi ŋmɛnɛ.”—Rut 4:7-10.

Maŋbii lɛ fɛɛ ni yɔɔ maŋ lɛ koi lɛ shi lɛ kɛɛ Boaz akɛ: “Yehowa aha yoo lɛ ni baa owe lɛ atamɔ Rahel kɛ Lea ní amɛyi enyɔ lɛ pɛ amɛma Israel we lɛ, ní otsɔ gbɔmɔ agbo yɛ Efrata, ní ogbɛi ahehe yɛ Betlehem!”—Rut 4:11, 12.

Beni maŋbii lɛ ejɔɔ Boaz sɛɛ lɛ, eŋɔ Rut akɛ eŋa. Efɔ binuu eha lɛ, ni egbɛi ji Obed, ni enɛ ha Rut kɛ Boaz batsɔmɔ Maŋtsɛ David blematsɛmɛi, ni no hewɔ lɛ amɛji Yesu Kristo blematsɛmɛi.—Rut 4:13-17; Mateo 1:5, 6, 16.

‘Nyɔmɔwoo Shishiishi’

Boaz jie ehe kpo yɛ sane lɛ mli fɛɛ, kɛjɛ eklɛŋklɛŋ mlihilɛ ŋamɔ ni eŋa nitsulɔi lɛ kɛyashi Elimelek weku gbɛi lɛ yibaamɔ he gbɛnaa nii ni ekpɛlɛ nɔ lɛ nɔ akɛ eji nuu ko ni ekaaa—nuu ni tsuɔ nii waa ni hiɛ hegbɛ. Yɛ nakai beaŋ nɔŋŋ lɛ, eji nuu ni yɔɔ henɔyeli, hemɔkɛyeli kɛ mɔ ni yeɔ anɔkwa. Kɛfata he lɛ, Boaz nine kpɔɔ, emli hi, ejeŋba he tse, ni efeɔ toiboo kwraa ehaa Yehowa kitai lɛ.

Rut sa kadimɔ waa yɛ suɔmɔ ni eyɔɔ kɛha Yehowa, anɔkwa suɔmɔ kpo ni ejie etsɔɔ Naomi, kɛ agbɛnɛ emɔdɛŋbɔɔ kɛ eheshibaa lɛ hewɔ. Ebɛ naakpɛɛ mɔ akɛ mɛi bu lɛ akɛ “yoo kpakpa.” Eyeee “hejɔfeemɔ aboloo,” ni akɛni etsuɔ nii waa hewɔ lɛ, ená nɔ ko ni ekɛ eshaayoo ohiafo lɛ ja. (Abɛi 31:27, 31) Ekolɛ Rut ná miishɛɛ ni jɛɔ nihamɔ mli baa lɛ mli ŋɔɔmɔ yɛ Naomi kwɛmɔ he gbɛnaa nii ni etsu he nii lɛ hewɔ.—Bɔfoi lɛ Asaji 20:35; 1 Timoteo 5:4, 8.

Mɛɛ nɔkwɛmɔnii kpakpai wɔnáa yɛ Rut wolo lɛ mli nɛkɛ! Yehowa kai Naomi. Rut nine shɛ ‘nyɔmɔwoo shishiishi’ nɔ akɛ Yesu Kristo blemanyɛ. Ajɔɔ Boaz kɛ “yoo kpakpa.” Yɛ wɔgbɛfaŋ lɛ, aŋkroaŋkroi ni tamɔ nɛkɛ lɛ bafeɔ hemɔkɛyeli he nɔkwɛmɔnii kɛhaa wɔ.

[Akrabatsa ni yɔɔ baafa 26]

Hiɛnɔkamɔ He Nɔ ko Fioo

Kɛ́ onuɔ he akɛ oyɛ shihilɛ ni miishɛɛ bɛ mli lɛ mli lɛ, Rut sane lɛ baanyɛ ekɛ hiɛnɔkamɔ he nɔ ko fioo ko aha bo. Ejeɔ kpo faŋŋ akɛ eji Kojolɔi awolo lɛ naamuu ni he hiaa. Rut wolo lɛ gbaa bɔ ni Yehowa kɛ yoo okulafo ko ni baa ehe shi ni jɛ maŋsɛɛ shikpɔŋ ni ji Moab nɔ tsu nii ni ekɛfɔ maŋtsɛ ko eha ewebii lɛ he sane. Rut hemɔkɛyeli lɛ kpɛ tamɔ kane yɛ shihilɛ ni yɔɔ be mli ni aŋma Kojolɔi awolo lɛ mli. Kɛtsɔ Rut sane lɛ kanemɔ nɔ lɛ, obaanyɛ oná nɔmimaa akɛ, Nyɔŋmɔ susuɔ ewebii lɛ ahe be fɛɛ be, ni etsuɔ eyiŋtoi ahe nii ni bɔ ni shihilɛ lɛ baanyɛ afee nɔ ni yɔɔ gbeyei ha lɛ kɔɔɔ he eko.