Gbi ni Esa akɛ Akai

NO JI gbi ni tsake adesai ashihilɛ gbɛ kɛha amɛnaanɔ hilɛ-kɛ-hamɔ lɛ. Gbi ko gbi ko bɛ ni ená adesai awɔsɛɛ shihilɛ nɔ hewalɛ yɛ yinɔsane mli tamɔ nɛkɛ dã. No ji gbi nɔ ni Yesu gbe nitsumɔi fɛɛ ni eba shikpɔŋ lɛ nɔ koni ebatsu lɛ naa lɛ. Beni akala lɛ akpɛtɛ sɛŋmɔtso lɛ nɔ sɛɛ lɛ, emu enaagbee mumɔ ni ebo waa akɛ: “Ágbe naa!” (Yohane 19:30) Mɛɛ yiŋtoo hewɔ Yesu ba?

Biblia lɛ kɛɔ akɛ: “Gbɔmɔ bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Yesu kɛ esusuma aloo ewala ha, bɔni afee ni akpɔ̃ adesai kɛjɛ esha kɛ gbele ní amɛná akɛ gboshinii lɛ mli. Hɛɛ, “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yohane 3:16) Mɛɛ nifeemɔ ko ni jara wa waa Yesu afɔleshaa lɛ ji nɛkɛ!

Yesu gbele gbi lɛ ji gbi ni esa akɛ akai yɛ yiŋtoo kroko hu hewɔ. Yɛ nakai gbi lɛ nɔ lɛ, Nyɔŋmɔ Bi lɛ tsɔɔ ebɔfoi lɛ nikasemɔi ni he yɔɔ sɛɛnamɔ ni baaye abua amɛ koni amɛhi shi akɛ anɔkwafoi be fɛɛ be. Kwɛ bɔ ni enaagbee wiemɔi lɛ baasa nakai kaselɔi lɛ atsuii ahe eha! Mɛni ji etsɔɔmɔi lɛ? Mɛɛ gbɛ nɔ nɔ̃ ni Yesu tsɔɔ lɛ he baanyɛ aba sɛɛnamɔ aha wɔ yɛ? Abaasusu sanebimɔi nɛɛ ahe yɛ sane ni nyiɛ sɛɛ lɛ mli.