Saji ni Hiɛ Kpaŋ Nɔ Kɔkɔɔkɔ

DAA afi lɛ, Yehowa Odasefoi ni yɔɔ amɛmaji srɔtoi amli lɛ kpeɔ kutuu yɛ Kristofoi akpeei bibii kɛ kpeei wuji ashishi. Amɛfeɔ enɛ koni amɛkɛná mumɔŋ tsɔsemɔ kɛ naanyobɔɔ ni tswaa mɔ emaa shi mli ŋɔɔmɔ. Shi amɛkpeei lɛ amli nibii krokomɛi hu baanyɛ ashi saji ni hiɛ kpaŋ nɔ kɔkɔɔkɔ yɛ gbɔi lɛ ajwɛŋmɔ mli.

Ákɛ nɔkwɛmɔnɔ lɛ, yɛ July 1999 mli lɛ, Odasefoi akpei abɔ kpe gbii etɛ ni wo amɛ hewalɛ waa yɛ “Nyɔŋmɔ Gbalɛ Wiemɔ” Kpokpaa Wulu nɔ Kpeei lɛ ashishi yɛ Mozambique. Mɛi ni yɔɔ jɛmɛ lɛ ateŋ mɛi babaoo ji mɛi ni eji amɛ klɛŋklɛŋ be kwraa ni amɛyaa kpee wulu nɛɛ eko shishi. Jeee akɛ amɛhiɛ kpaŋ wiemɔi ni amɛnu kɛjɛ wielɔi akpoku lɛ nɔ lɛ nɔ kɛkɛ, shi nɔ ni amɛna ni yaa nɔ lɛ hu.

Wiemɔ ko ni anu yɛ Maputo Kpee Asa lɛ shishi ji akɛ: “Minako he ko ni yɔɔ fɛo ni tamɔ nɛkɛ yɛ mishihilɛ be fɛɛ mli dã! Samala kɛ ashwishwɛi yɛ nushwiemɔ kɛ niiasɛɛyaahei lɛ, ni jɛmɛ jeɔ ŋma waa po. Toiŋjɔlɛ yɛ he fɛɛ he, ni onaaa ni gbekɛbii miifee hoo loo amɛmiinɔ yɛ jɛmɛ. Ni atsirɛɛɛ mɔ ko hu! Mina oblahii kɛ oblayei ni yɔɔ miishɛɛ ni amɛkɛ amɛhe ewo sanegbaai ni woɔ mɔ hewalɛ mli. Minaa kpɛ mihe waa hu yɛ bɔ ni mɔ fɛɛ mɔ esaa ehe fɛfɛo lɛ hewɔ. Be kroko lɛ, mikɛ mibii baaba, ni makɔne miwu yiŋ akɛ esa akɛ wɔba nɛkɛ kpee wulu nɛɛ shishi.”

Hɛɛ, Yehowa Odasefoi anɔkwayeli, emuuyeli mlihiɛmɔ, kɛ gbɔmɔtsoŋ hetsemɔ lɛ jeee nɔ ni ayɔseee. Mɛni hewɔ Odasefoi lɛ yɔɔ srɔto lɛ? Ejaakɛ amɛbɔɔ mɔdɛŋ diɛŋtsɛ ni amɛkɛ nɔ ni amɛkaseɔ kɛjɛɔ Biblia lɛ mli lɛ atsu nii. Mɛni hewɔ okɛ amɛ ebɔɔɔ afi nɛɛ yɛ maŋ kpeei ni amɛbaaya lɛ ashishi aloo yɛ amɛ daa otsi kpeei ashishi yɛ Maŋtsɛyeli Asa ni yɔɔ he ni oyɔɔ lɛ nɔ koni okɛ bo diɛŋtsɛ ohiŋmɛi ana nɔ ni baaya nɔ lɛ?

[Mfoniri ni yɔɔ baafa 32]

ZAMBIA

[Mfoniri ni yɔɔ baafa 32]

KENYA

[Mfoniri ni yɔɔ baafa 32]

MOZAMBIQUE