Atsake Mlai, Afite Hekɛnɔfɔɔ

Yɛ Maŋtsɛ Henry I ni jɛ England (afi 1100-1135) lɛ gbii amli lɛ, abu abasa fã kome akɛ eji “kɛjɛ Maŋtsɛ lɛ gugɔ naa kɛyashi egɔŋti ni ekpã mli lɛ naa lɛ kɛlɛ.” Te Maŋtsɛ Henry abasa fã kome kɛlɛ lɛ ja kɛha eshishibii lɛ ha tɛŋŋ? Etamɔ nɔ ni kpee ni akɛ maŋtsɛ lɛ baafee lɛ ji gbɛ kome pɛ ni abaatsɔ nɔ ale.

ÁTSƆƆ ŋmɛnɛŋmɛnɛ susumɔ kpãai amli jogbaŋŋ yɛ gbɛ ni ja jogbaŋŋ nɔ ákɛ tɛi ni áfolɔ ashwie shi. No hewɔ lɛ abuɔ mita he akɔntaa akɛ gbɛ jɛkɛmɔ ni kane kɛfãa kɛtsɔɔ fɔlɔ ni kɔɔyɔɔ bɛ mli lɛ mli yɛ hiŋmɛitswaa kome mli ni ajara mli ekomekomei 299,792,458. Kɛ aabu he akɔntaa pɛpɛɛpɛ lɛ, nɔ ni haa nɛkɛ kane kpɛmɔ kɛ egbɛ ni yɔɔ tɔrɔmɔɔ ni etsɔɔ nɔ tɛ̃ɛ ni tsakeee nɛɛ kpɛ́ɔ ji tsɔne krɛdɛɛ ko ni kane kpɛmɔi babaoo yɔɔ mli. Kɛ gbɔmɛi ni yɔɔ hei srɔtoi lɛ yɛ nɔ ni akɛsusuɔ nii lɛ, amɛbaanyɛ amɛkɛkwɛ koni amɛle akɛ bɔ ni amɛkɛleɔ nɔ ni amɛsusuɔ lɛ kɛlɛ amɛhaa lɛ tamɔ bɔ ni mɛi krokomɛi baana lɛ amɛha kɛ́ mɛi lɛ hu kɛmiisusu nakai nii lɛ eko yɛ he ko.

Kɛ tsakemɔi fioo komɛi po ba nibii ni akɛsusuɔ nii lɛ amli po lɛ, ebaanyɛ ekɛ yiŋkɔshikɔshifeemɔ aba, ni abɔɔ mɔdɛŋ jogbaŋŋ diɛŋtsɛ koni akɛbu nisusumɔ nibii lɛ ahe. Ákɛ nɔkwɛmɔnɔ lɛ, yɛ Britain lɛ, nɔ ni akɛsusuɔ nitsiimɔ ji platinum kɛ iridium ni akɛtsá ni tamɔ tso ni tsiimɔ ji kilogram kome. Akɛ tso nɛɛ toɔ yɛ National Physical Laboratory. Kɔɔyɔŋ fitemɔ ni jɛɔ tsɔnei kɛ kɔɔyɔŋ lɛji ni hoɔ lɛ amli lɛ haa kilogram nisusumɔ nii lɛ náa tsiimɔ gbi fɛɛ gbi. Shi kɛlɛ, nɛkɛ dadetso, loo ododobɛŋ nɛɛ ji nisusumɔ nii ni akpɛlɛɔ nɔ yɛ jeŋ fɛɛ lɛ henɔ ko ni akɛto glase kpuji etɛ mli yɛ shishigbɛ tsũ kɛ eyiteŋ kokroo ni yɔɔ International Bureau of Weights and Measures ni yɔɔ Sèvres yɛ France lɛ mli. Shi nɛkɛ nii nɛɛ tsiimɔ lɛ po tsakeɔ yɛ nibii bibii nyɛkɛsiɔɔi ni fiteɔ yɛ he lɛ hewɔ. Kɛbashi amrɔ nɛɛ, je lɛŋ nitsiimɔ kɛ nisusumɔ he nilelɔi lɛ efeko nisusumɔ nɔ ko ni akpɛlɛɔ nɔ jogbaŋŋ.

Eyɛ mli akɛ kɛha gbɔmɔ fɛɛ gbɔmɔ lɛ, etamɔ nɔ ni tsakemɔi bibiibibii ahe ehiaaa moŋ, shi nisusumɔ mli tsakemɔ kwraa lɛ baanyɛ afutu mɔ yiŋ. Nitsiimɔ he nisusumɔ (pound kɛ ounce) ni akɛtsuɔ nii yɛ Britain ni atsake kɛjɛ no nɔ kɛtee mita (kilogram kɛ gram) lɛ etée hekɛnɔfɔɔ ni anáaa shi—ni yiŋtoo kpakpa hu yɛ he. Shwapo mli nihɔɔlɔi komɛi ni bɛ jeŋba lɛ kɛ hegbɛ ni tsɔɔ mɛi babaoo ni leee nitsiimɔ kɛ nisusumɔ he gbɛjianɔtoo hee lɛ he nɔ ko lɛ tsuɔ nii koni amɛkɛshishiu amɛnihelɔi lɛ.

Weku kɛ Jeŋba He Mlai

Ni weku mli tsakemɔi kɛ jeŋba he mlai hu? Hewalɛ ni tsakemɔi ni tamɔ nɛkɛ náa yɛ mɔ nɔ lɛ baanyɛ aye awui waa diɛŋtsɛ. Amaniɛbɔi ni nine shɛɔ nɔ ŋmɛnɛŋmɛnɛ ni kɔɔ weku fitemɔ, bɔlɛnamɔ mli jeŋba shara nifeemɔ, kɛ gbekɛbii aniseniianiifeemɔ lɛ haa mɛi babaoo anaa kpɛɔ amɛhe, ni emaa nɔ mi akɛ wɔyɛ yinɔ ko ni mlai miifite kwraa lɛ mli. Fɔlɔ kome wekui, gbekɛbii ni “fɔlɔi” ni hiɛ  bɔɔsu kome tsɔse amɛ, kɛ gbekɛbii aniseniianiifeemɔ yɛ bɔlɛnamɔ gbɛfaŋ, ní yɔɔ nyaŋemɔ yɛ maŋ onukpai lɛ akwɛmɔ shishi lɛ fɛɛ jɛ gbɔmɛi ni kpooɔ mlai ni akpɛlɛɔ nɔ lɛ. Taakɛ Biblia lɛ gba efɔ̃ shi aaafee afii akpei enyɔ ni eho nɛ lɛ, gbɔmɛi ni fáa babaoo daa nɛɛ lɛ miitsɔmɔ “hesuɔlɔi, . . . mɛi ni edɔɔɔ mɔ he, . . . mɛi ni sumɔɔɔ ekpakpa, . . . mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.”—2 Timoteo 3:1-4.

Nɔ ni jeŋba he mlai ni eba shi lɛ kɛyɔɔ tsakpaa ji hekɛnɔfɔɔ ni anáaa ahaaa mɔ dɔŋŋ ni akɛ henumɔ tsuuu he nii lɛ. Nyɛsɛɛ nɛɛ, tsofafeemɔ nitsumɔ lɛ he mlai ni nɔ kwɔlɔ ni atsiɔ he kɛjɛɔ he kwraa lɛ bafee faŋŋ yɛ Hyde ni ji maŋ ko ni yɔɔ England kooyigbɛ lɛ mli, he ni maŋbii lɛ wieɔ amɛ teemɔŋ sane amɛtsɔɔ amɛweku datrɛfonyo ni “amɛbuɔ lɛ ni amɛheɔ lɛ amɛyeɔ lɛ.” Shi afite hekɛnɔfɔɔ ni ayɔɔ yɛ amɛmli lɛ kwraa. Yɛ mɛɛ gbɛ nɔ? Saneyelihe amaniɛbɔɔ ko tsɔɔ mli akɛ tsofafeelɔ ko je gbɛ egbe helatsɛmɛi ni ekwɛɔ amɛ lɛ ateŋ yei 15. Yɛ anɔkwale mli lɛ, ehe bahia ni polisifoi lɛ asaa akwɛ saji amli ekoŋŋ yɛ mɛi krokomɛi ni fa fe 130 ni etsɔ datrɛfonyo lɛ nine nɔ amɛgboi lɛ ahewɔ. Ama bɔ ni afite hekɛnɔfɔɔ waa aha lɛ nɔ mi beni abu datrɛfonyo lɛ fɔ ni awo lɛ tsuŋ lɛ. Akɛ nitsumɔi krokomɛi ha tsuŋwoohe nitsulɔi enyɔ ni ekolɛ datrɛfonyo nɛɛ egbe amɛnyɛ lɛ bɔni afee ni amɛkakwɛ gboklɛfonyo ni ehe gbɛi waa yɛ efɔŋfeemɔ mli lɛ. Ebɛ naakpɛɛ kwraa akɛ sane lɛ he amaniɛbɔɔ ni je kpo yɛ The Daily Telegraph lɛ mli lɛ wie tsofafeelɔ ni yeɔ fɔ lɛ he akɛ “Datrɛfonyo ‘abonsam.’”

Yɛ mlai ni tsakeɔ ni fiteɔ yɛ shihilɛ mli nifeemɔi srɔtoi babaoo amli hewɔ lɛ, namɔ ji mɔ ni obaanyɛ okɛ ohe afɔ̃ enɔ jogbaŋŋ kɛmɔ shi? Nɛgbɛ ji he ni obaanyɛ oná mlai ni tsakeee yɛ, ní hegbɛ ni nɔ kwɔ ni yɔɔ hewalɛ akɛ eeehiɛ mli lɛ fĩɔ sɛɛ? Sane ni nyiɛ sɛɛ nɛɛ baaha sanebimɔi nɛɛ ahetoo.